Dayanıqlı inkişaf, birlik və qələbəyə inam “Biz gələcəyə baxmalıyıq və baxırıq. Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var..." Bu sözlər Prezident İlham Əliyevin 2018-ci il 11 aprel tarixli andiçmə mərasimindəki çıxışındandır. Yəqin ki, çoxlarımız o zaman bu sözlərin altındakı böyük mənanı tam dərinliyi ilə anlaya bilməzdik. Biz bu təsəvvürlərin, planların və proqramların altında yatan böyük siyasətin, xalqımızın illərdir gözlədiyi qələbənin xəbərçisi olduğunu bilmirdik.  Cənab İlham Əliyevin prezident seçkisindəki qələbəsi təxminən 2 il sonra bütün xalqımızın illərdir qurumayan göz yaşlarının sevinc yaşları ilə əvəz olunmasına, işğalda olan torpaqlarımızın azadlığına, 30 illik həsrətə son qoyulmasına, dünyanın ədalətsiz siyasətinə meydan oxumamıza və bütöv Azərbaycanın qələbəsinə gətirib çıxardı.  2020-ci il 27 sentyabr tarixində Cənab Ali Baş komandanımız İlham Əliyevin torpaqlarımızın yağı düşməndən azad olunması naminə verdiyi “əks hücüm!” əmri bizə öz kimliyimizi qaytardı. Yaşından, tutduğu vəzifəsindən, kimliyindən asılı olmayaraq hamı vətən naminə birləşib “Dəmir Yumruğ”a döndü. “El bir olsa, dağ oynadar yerindən, söz bir olsa zərbi kərən sındırar” ifadəsi 2018-ci ilin prezident seçkilərində olduğu kimi, həmin gün də öz təsdiqini bir daha tapdı. 44 günlük zəfər tariximizdə ön  cəbhədə  düşmənlə üz-üzə dayanan ordumuz el birliyini, Ali Baş Komandamızın diqqət və qayğısını hiss etdikcə azğın düşmənə daha da ağır zərbələr endirməkdə davam edir, bir an belə olsun geri çəkilmir, daim irəliləyirdi. Ən kiçik yaşlı uşaqların belə küçələrdə axışaraq “Qarabağ bizimdir, bizim olacaq!” şüarını dayanmadan səsləndirmələri, yol boyunca evlərin eyvanından, pəncərələrindən üçrəngli bayrağımızın dalğalandırılması, cəbhəyə getmək üçün könüllərimizin sayının gündən-günə artması hər bir ölkə vətəndaşına mənəvi güc verir, bizi qələbəyə daha da yaxınlaşdırırdı. Azərbaycanın təkcə daxilində deyil, xarici arenada da uğurları - ölkə prezidentinin xarici ölkə jurnalistlərinin qərəzli suallarına layiqli, faktlara söykənən cavabları, eləcə də Xarici İşlər nazirinin  xarici görüşlərdəki çıxışları dövlət-xalq birliyini möhkəmləndirirdi.  Bu tarix təkcə azərbaycanlıların yox, bütün türk millətinin birliyini, əzmini, gücünü bir daha dünyaya bəyan etdi. Qardaş Türkiyə həmişə olduğu kimi bu meydanda da bizi tək buraxmadı və  bu savaş  tarixi unudanlara bir dərs oldu. Bu yerdə ölməz sənətkarımız Xəlil Rza Ulutürkün aşağıdakı misraları yerinə düşər:   Yadda saxla, qoca tarix, mən Türk oğlu, Ulutürkəm    Əhrimənlər qarşısında sanma çökəm, boyun bükəm    Bircə kişi qalsam belə, güman etmə yalqız, təkəm    Mən - dünənəm, mən - bugünəm, gələcəyəm, yerəm - göyəm    Həzrət Əli qılıncıyam, oddan gərək bir qın geyəm    Kəsib keçəm xəyanəti, cinayəti, alçaqlığı    Eşqim, hüsnüm, cəlalımsan, Odər yurdu!  Od torpağı !   Son iki ildə dünyanın Azərbaycana və Azərbaycan prezidentinə fikri, baxışı tamamilə dəyişdi. Gücümüz, qüdrətimiz, ədalətimiz, birliyimiz bizim kim olduğumuzu, nəyə qadir olduğumuzu hər kəsə göstərdi. Amma hələ bunlar nədir ki, Cənab Ali Baş Komandanın rəhbərliyi ilə  bütöv Azərbaycanın işıqlı gələcəyi, inkişafı, qazanacağı qələbələr hələ qabaqdadır. 

Ulduz BABAYEVA

Azərbaycan Texnologiya Universitetinin

Magistratura və doktorantura şöbəsinin müdiri,

texnika üzrə fəlsəfə doktoru    

06 aprel 2022-ci il tarixində Avropa Komissiyası tərəfindən maliyyələşdirilən və Bakı Biznes Univeristetinin koordinatorluğu ilə həyata keçirilən “Azərbaycanda Rektorlar Konfransının yaradılması” adlı Erasmus+ layihəsi çərçivəsində Azərbaycan Texnologiya Universitetinə dəyirmi masa keçirilib. Tədris işləri üzrə prorektor Yaşar Ömərovun iştirakı ilə keçirilən tədbirdə layihə çərçivəsində görülmüş işlərin nəticələri və növbəti mərhələdə icrası planlaşdırılan fəaliyyətlər, layihənin icrası ilə bağlı təşkilati məsələlər, layihə fəaliyyətinin ictimailəşdirilməsi tədbirləri, eyni zamanda layihə çərçivəsində müvafiq ekspertlər tərəfindən rektorlar konfransına dair hazırlanmış nizamnamənin ilkin variantı ilə bağlı geniş fikir mübadiləsi aparılıb, layihənin fəaliyyət planına uyğun müvafiq tapşırıqlar verilib, təkliflər irəli sürülüb.Qeyd edək ki, bu layihənin məqsədi rektorlar konfransı vasitəsilə universitetlər arasında hərtərəfli əməkdaşlığı inkişaf etdirmək və yerli universitetlərdə həyata keçirilən tədrisin və elmin beynəlmiləlləşməsinə və universitetlərin rəqabət qabiliyyətinin yüksəldilməsinə əsaslı dəstək olmaqdır. 

Gəncə şəhər Gənclər və idman Baş idarəsinin təşkilatçılığı ilə Ümumilli lider Heydər Əliyevin anadan olmasının 99-cu ildönümünə həsr edilmiş silsilə yarışlar çərçivəsində basketbol üzrə oğlanlar arasında ali və orta ixtisas təhsil müəssisələri tələbələrinin birinciliyi keçirilib.Dairəvi sistem üzrə keçirilən şəhər spartakiadasında 4 komanda iştirak edib. Azərbaycan Texnologiya Universitetinin tələbələri ilk oyun günündə Gəncə Dövlət Regional Kollecinin basketbolçuları üzərində 28:20 hesabı ilə qalib gəlib. UTECA basketbolçuları 2-ci görüşdə Gəncə Dövlət Universitetinin komandasını 35:28 hesabı ilə məğlub edib.Sonuncu həlledici qarşılaşmada isə UTECA komandası Azərbaycan Dövlət Aqrar Universitetinin tələbələri ilə üz üzə gəlib. Son saniyələrədək gərgin keçən oyunda basketbolçularımız 43:39 hesabı ilə əzmkar qələbə qazanaraq 1-ci yerə çıxıblar. Komandanı yarışa Azərbaycan Respublikasının əməkdar məşqçisi Elçin Süleymanov və məşqçi Fariz Əliyev hazırlayıb.   

Mövcud tədris planlarına uyğun olaraq Azərbaycan Texnologiya Universitetinin buraxılış kursunda təhsil alan tələbələrinin müxtəlif müəssisələrdə istehsalat təcrübəsi davam etməkdədir. Azərbaycan Texnologiya Universitetinin rektoru, professor Akif Süleymanov tədrisdə praktik vərdişlərin mənimsənilməsinin vacibliyini nəzərə alaraq prosesə xüsusi nəzarət edir. Təcrübə Gəncə şəhərində fəaliyyət göstərən 30 aparıcı şirkət və müəssisədə təşkil olunub.Cari ilin 6 aprel tarixində Azərbaycan Texnologiya Universitetinin tədris işləri üzrə prorektoru Yaşar Ömərov və təcrübənin təşkilinə cavabdeh olan məsul şəxslər tələbələrin istehsalat təcrübəsinin gedişatı ilə tanış olmaq məqsədilə 1 saylı Gəncə regional "ASAN xidmət" mərkəzində olmuş və sözügedən müəssisə rəhbərliyi ilə görüşlər keçirilmişdir. Mərkəzin direktoru Turqud Mustafazadə ilə keçirilmiş görüşdə Azərbaycan Texnologiya Universiteti və "ASAN xidmət" arasında əməkdaşlığın əhəmiyyəti qeyd olunmuş və bu əlaqələrin genişləndirilməsi perspektivləri, əmək bazarının ehtiyaclarına uyğun kadr hazırlığı və təcrübə prosesinin tələbələr üçün daha keyfiyyətli və səmərəli təşkili məsələləri müzakirə edilmişdir. Eyni zamanda təcrübədə olan tələbələrlə də görüş keçirilmiş və təcrübənin keçirilməsi ilə bağlı fikir mübadiləsi aparılmışdır.Yaxın günlərdə təcrübənin təşkil olunduğu digər iri müəssisələrdə də belə görüşlərin keçirilməsi nəzərdə tutulur.Qeyd edək ki, cari ilin 16 fevral tarixində başlamış istehsalat təcrübəsi tədris planlarına əsasən 14 həftə müddətində davam edəcək.

Təhsil Tələbə Krediti Fondunun sədr müavini Tahir Xələfovun rəhbərliyi ilə fondun nümayəndə heyəti Azərbaycan Texnologiya Universitetində olub.Görüş zamanı Azərbaycan Texnologiya Universitetinin tədris işləri üzrə prorektoru Yaşar Ömərov Təhsil Tələbə Krediti Fondunun əhəmiyyətindən danışıb. Qeyd edib ki, fondun yaradılması tələbələrin ali təhsilə əlçatanlığını artırır, yeni imkanlar yaradır, dövlətin gəncliyə və təhsilə qayğısından xəbər verir.Təhsil Tələbə Krediti Fondunun sədr müavini Tahir Xələfov fondun imkanları barədə məlumat verib, mexanizmin üstünlüklərindən danışıb. Müzakirələr zamanı UTECA əməkdaşlarının təhsil tələbə kreditinə dair təklifləri dinlənilib, sualları cavablandırılıb.Qeyd edək ki, ötən semestr ərazində Texnologiya Universitetinin 70 tələbəsi təhsil tələbə kreditindən yararlanıb ki, onlardan 16 tələbənin ümumi orta müvəffəqiyyət göstəricisi (ÜOMG) 91 baldan yuxarı olub. 2021-2022-ci tədris ilinin ikinci semestri üçün isə UTECA tələbələrindən 72 nəfər Təhsil Tələbə Krediti Fonduna müraciət edib.     

Azərbaycan Texnologiya Universitetində (UTECA) tələbə və məzunların karyeralarını inkişaf etdirmələri, əmək fəaliyyətinə hazırlanmaları, ixtisaslarına uyğun iş tapmaları və uğur əldə etmələri istiqamətində tədbirlər görülür. Bu qəbildən tədbirlərdən biri UTECA partnyorlarından olan “AzerGold” QSC ilə birgə həyata keçirilib. Bu dəfə universitetdə “AzerGold” QSC-nin İnsan resurslarının idarəolunması şöbəsinin Təşkilati inkişaf sektorunun baş mütəxəssisi Valid Əliyevin tələbələrlə görüşü təşkil edilib. Karyeraya uğurlu keçid mövzusuna həsr olunan görüşdə Yüngül sənaye mühəndisliyi və logistika fakultəsinin tələbələri iştirak edib.Valid Əliyev “Gündəlik həyatımızdan gələcək hədəflərimizə doğru” adlı çıxışında gənclərin öz istəyinə çatması üçün atılacaq addımlardan danışıb. Karyera planlamasında vacib olan şəxsi profillərin və CV-nin tərtib olunması və beynəlxalq standartlara uyğunlaşdırılması, iş axtarışı və məlumat kanallarının tapılması, müsahibə mərhələsində tələbənin məlumatlandırılması, işəgötürən tərəfindən müsahibəyə çağırıldıqda davranış qaydaları barədə məlumat verib.Mövzuyla bağlı suallar cavablandırıldıqdan sonra kimya, metallurgiya, maşın mühəndisliyi və logistika, eləcə də digər ixtisasların tələbələri arasında CV hazırlanması haqqında sorğu və viktorina keçirilib. İntellektual yarışda ən fəal tələbə - Məryəm Əhmədova “AzerGold”un hədiyyəsi ilə mükafatlandırılıb.