Azərbaycan Texnologiya Universitetində “Zəfərin mübarək, Azərbaycan!” adlı tədbir keçirilib. 8 noyabr – Zəfər Gününə həsr olunan tədbir dövlət himninin səsləndirilməsilə açıq elan edilib. Daha sonra bütöv Azərbaycan naminə canından keçən, şəhidlik zirvəsinə ucalan bütün oğul və qızlarımızın əziz xatirələri bir dəqiqəlik sükutla yad edilib. Tədbirdə çıxış edən Azərbaycan Texnologiya Universitetinin rektoru, professor Akif Süleymanov bütün kollektivi, eləcə də tələbələri qələbənin ildönümü münasibətilə təbrik edərək şanlı zəfərin 44 günlük dastanından danışıb. Rektor qeyd edib ki, ötən il sentyabrın 27-dən başlayan və 30 ilə yaxın işğal altında qalan ərazilərimizin azad edilməsi ilə nəticələnən Vətən müharibəsi tariximizin ən parlaq səhifəsinə çevrilib: “Bu qələbəni bizlərə yaşadan isə Ali Baş Komandan, möhtərəm cənab Prezident İlham Əliyevin qətiyyəti, Güclü Ordumuz, rəşadətli əsgər və zabitlərimiz, Şəhidlərimizdir. 44 günlük Vətən müharibəsində Universitetimizin 7 məzunu - Kərim Əhmədəliyev, Ruslan Məmmədov, Rahim Mikayılov, Nemət Orucov, Kənan Ömərli, Nurlan Həsənov, Asim Əliyev şəhid olaraq adlarını şanlı qələbə tarixinə yazdırıblar. Biz şəhid məzunlarımızla fəxr edirik və onların valideynlərinə öz dərin minnətdarlığımızı bildiririk. Biz UTECA ailəsi olaraq daim onların xatirəsini əziz tutaraq yad edəcəyik. Onların adına yarışlar, turnirlər və s. tədbirlər keçirərək əziz xatirələrini daim yaşadacacağıq”. Tədbirdə universitetin- Azərbaycanın 44 günlük haqq savaşında iştirak edən məzunları, övladları Vətən müharibəsinə qatılan müəllimləri və digər əməkdaşları çıxış ediblər. Məruzələrdə həm də erməni əsirliyindən azad olan torpaqlarda qısa zamanda görülən işlərdən, yenidənqurma prosesində tələb olunan kadr potensialından danışılıb. Sonda Zəfər gününə həsr edilmiş videoçarx izlənilib.
Azərbaycan Texnologiya Universitetində 2021-ci il 29 oktyabr tarixində Azərbaycan Respublikasının Təhsil Nazirliyinin sektor müdiri, universitetin Elm və innovasiya məsələləri üzrə prorektoru vəzifəsini icra edən Yaşar Ömərovun universitetdə təhsil alan II kurs magistrantları ilə görüşü keçirilib. Görüşdə gənc tədqiqatçıların fəaliyyətlərində mövcud çağırışlar, dissertasiya mövzularının aktuallığı, eləcə də elmi və praktik əhəmiyyəti, hesabatların daha mütəşəkkil aparılması, xaricdə nəşr olunan nüfuzlu jurnallarda elmi məqalələrin sayının artırılması, rəhbər və magistrant münasibətləri və digər məsələlər müzakirə edilib. Qarşılıqlı diskussiya şəklində davam edən görüşdə Yaşar Ömərov magistrantların çoxsaylı suallarını cavablandırılıb, onların qarşılaşdıqları çətinliklərlə maraqlanıb, magistrantlar tərəfindən verilən təkliflərin nəzərə alınacağını qeyd edib. Yaşar Ömərov Tələbə Elmi Cəmiyyəti tərəfindən təşkil olunacaq seminarlarda magistrantlar üçün faydalı mövzulara yer verildiyini açıqlayaraq magistr tələbələrinə tədqiqat işlərinin keyfiyyətinin artırılması ilə bağlı öz tövsiyələrini verib.
Azərbaycan Texnologiya Universitetində I və II kurs tələbələrinə Gəncə şəhər Gənclər Evinin təqdimatı keçirilib. Tədbirdə Gənclər evinin direktoru Amil Qurbanov, Gəncə İntellektual Klubunun rəhbəri Natiq Salahov, UTECA-nın İnzibati idarəetmə və kommersiya kafedrasının dosenti Mətanət Əhmədova, universitetin Tələbə Gənclər Təşkilatının sədri Nicat Nağıyev, I və II kurs tələbələri iştirak ediblər. Tələbələrə bildirilib ki, 2016-cı ildən gənclərin ixtiyarına verilən Gəncə şəhər Gənclər evində aparılan işlərin əsas istiqaməti vətənpərvərlik, sağlam həyat tərzi, ictimai fəallıq, asudə vaxt, məşğulluq və yaradıcılıq prinsipləridir. Gənclər evində Toxuculuq və tikiş dərnəyi, Conversation club, Gənc iqtisadçılar klubu, Gənclərin intellektual klubu, Ekologiya dərnəyi, Vətənpərvərlik klubu, Texnika və ixtiraçılar klubu, Karyera mərkəzi, Akt zalı, Toplantı zalı, Kitabxana, Sərgi zalı, İstedadların hazırlığı labaratoriyası, Ölkəşünaslıq otağı, Peşə yönümü mərkəz, Kompyuter qrafikası, Psixoloji reabilitasiya xidməti, Rəsm studiyası, Video studiya mövcuddur ki, gənclər bütün bunlardan faydalanmaqla asudə vaxtlarının səmərəli keçirə, özlərində yeni bacarıqlar üzə çıxara bilərlər. Tələbələr dərs saatlarından sonra Gənclər evinin sakinlərilə birgə şəhər tədbirlərinə, flaşmoblara, marafonlara, yeni layihələrə qoşulmaqla yeni dostlar, yeni ünsiyyətlər qazana bilərlər.
Tədbirin sonunda tələbələrin sualları cavablandırılıb.
Azərbaycan Texnologiya Universitetinin professor-müəllim heyətinin maaşları artırılıb. Bununla bağlı universitet Elmi Şurasının bu gün təşkil olunan iclasında qərar verilib. Qərara əsasən professor və müəllimlərin vəzifə maaşları noyabr ayından etibarən 40% artırılıb. UTECA-nın rektoru, professor Akif Süleymanovun sədrliyilə keçən Elmi Şuranın 4 saylı iclasında universitetin qış mövsümünə hazırlıq vəziyyəti, strateji planın işlənməsi üzrə işçi qrupun hesabatı dinlənilib, bir sıra tədris vəsaitləri təsdiq edilib, əməkdaşlardan Afət Qasımovanın dosent elmi adı alması üçün AAK qarşısında vəsatətin qaldırılması və digər məsələlərlə bağlı səsvermə yolu ilə qərarlar verilib.
Azərbaycan Texnologiya Universitetinin (UTECA) Tədris şöbəsinə yeni rəhbər təyin edilib. Tədris şöbəsinin müdiri vəzifəsində Babək Mikayıl oğlu Həsənov çalışacaq. Babək Həsənov 10 aprel 1990-cı ildə Samux rayonunda anadan olub. Azərbaycan Texnologiya Universitetini 2011-ci ildə bakalavr, 2014-cü ildə isə magistr dərəcəsi ilə bitirib. 2015-ci ildə Azərbaycan Texnologiya Universitetində sənayenin təşkili və idarə edilməsi ixtisası üzrə fəlsəfə doktoru proqramına qəbul olub. Hazırda fəlsəfə doktorluq proqramının müdafiə mərhələsindədir. Babək Həsənov 2014-cü ildən Azərbaycan Texnologiya Universitetində laborant, baş laborant, müəllim və rektor köməkçisi kimi işləyib. 2016-cı ildən isə Distant və qiyabi təhsil mərkəzinin direktoru idi. Ailəlidir, 2 övladı var.
Azərbaycan Texnologiya Universitetində 2021-ci il 28 oktyabr tarixində Azərbaycan Respublikasının Təhsil Nazirliyinin sektor müdiri, universitetin Elm və innovasiya məsələləri üzrə prorektoru vəzifəsini icra edən Yaşar Ömərovun universitetdə təhsil alan doktorant və dissertantlarla görüşü keçirilib. Görüşdə gənc tədqiqatçıların elmi fəaliyyətlərində mövcud çağırışlar, elmi-tədqiqat işlərinin aparılması zamanı kafedralarda və laboratoriyalarda şəraitin yaxşıladırılması, eləcə də elmi işlərin keyfiyyətinin artırılması üçün həll yolları, xaricdə nəşr olunan nüfuzlu jurnallarda elmi məqalələrin sayının artırılması, elmi rəhbər və doktorant arasında ikili münasibətlər və digər məsələlər müzakirə edilib. Görüş zamanı Yaşar Ömərov tərəfindən doktorant və dissertantların sualları cavablandırılıb və onlar tərəfindən verilən təkliflərlə bağlı universitetdə yaxın gələcəkdə müəyyən işlərin aparılacağı barədə məlumat verilib. Sonda doktorant və dissertantlar görüşdən məmnun qaldıqlarını, bu görüşün onların elmi fəaliyyətləri üçün müsbət istiqamət verəcəyini bildiriblər.
