Azərbaycan Texnologiya Universitetində Xocalı soyqırımının 30-cu ildönümünə həsr olunmuş dəyirmi masa təşkil edilib. Tədbir soyqırımı qurbanlarının xatirəsinin bir dəqiqəlik sükutla yad edilməsi ilə başlayıb.Ardınca UTECA-nın rektoru, professor Akif Süleymanov Azərbaycan xalqının tarixinə qara səhifə kimi yazılmış Xocalı faciəsinin dəhşətlərindən bəhs edib. Qeyd edib ki, 1992-ci il fevralın 25-dən 26-na keçən gecə erməni hərbi birləşmələri keçmiş sovet ordusunun 366-cı motoatıcı alayının köməyi ilə Xocalı şəhərinə hücum edib. Xocalı sakinləri xilas olmaq üçün Ağdam istiqamətində hərəkət edib. Ermənilər isə dinc sakinləri gülləbaran ediblər, bəşər tarixinin ən qanlı qətliamlarından birini törədiblər. Rektor əlavə edib ki, 1994-cü ildə Heydər Əliyevin təşəbbüsü ilə Milli Məclis “26 fevral - Xocalı soyqırımı günü haqqında” xüsusi qərar qəbul edib. Sənəddə hadisənin başvermə səbəbləri və günahkarları təfsilatı ilə açıqlanıb. Heydər Əliyev Fondu uzun illərdir Xocalı soyqırımı haqqında faktların dünyaya çatdırılması istiqamətində sistemli və ardıcıl fəaliyyət göstərir. Fondun dəstəyi və təşkilatçılığı ilə soyqırımla bağlı xüsusi layihə çərçivəsində dünyanın bir sıra ölkələrində aksiyalar, silsilə tədbirlər, sərgilər, anım mərasimləri keçirilir. Fondun vitse-prezidenti, İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyevanın təşəbbüsü ilə elan edilən “Xocalıya ədalət!” kampaniyasının səmərəsi isə ildən-ilə artır. Məqsəd Xocalıdakı cinayətə hüquqi-siyasi qiymətin verilməsinə, bütün dünyanın Xocalı soyqırımını tanımasına nail olmaqdır. Rektor qeyd edib ki, Azərbaycan hazırda Xocalı faciəsinin ildönümünü hüznlə bərabər 44 günlük Vətən müharibəsində Zəfər qazanan xalq olaraq həm də qürurla yad edir.Tədbirdə Xocalı sakini Dövlət İmtahan Mərkəzinin Gəncə Regional Bölməsinin müdiri Nəsimi Məmmədov çıxış edərək faciənin miqyasından danışıb. Qeyd edib ki, erməni təcavüzkarlarının Azərbaycan xalqına qarşı törətdiyi növbəti kütləvi qırğın 613 nəfərin, o cümlədən 106 qadın, 63 uşaq, 70 qocanın həyatına son qoyub. 1 275 dinc sakin əsir götürülüb, onlardan 150 nəfərin taleyi hələ də məlum deyil. 475 nəfər şikəst olub. 8 ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib. Xocalı şahidi həmin gecə insanların köməksiz qaldıqlarını, o dövün hakimiyyət səriştəsizliyi səbəbindən insanların xilas edilmədiyini qeyd edib.Daha sonra “Xocalının səsi” qəzetinin redaktoru Qalib Bəyməmmədli çıxış edərək qəzetin faciəylə bağlı təfərrüatlı məlumatlar verən ilk mətbu orqanlarından biri olduğunu, hətta buna görə əməkdaşlarının o dövrün hakim dairələri tərəfindən ölümlə təhdid edildiyini qeyd edib. Eyni zamanda UTECA tələbəsi olan Qalib uzun illər ərzində Xocalı şahidlərinin qan yaddaşını dinləyən yurnalist kimi çıxış edərək uşaq, qadın və qocaların başına gətirilən minbir müsibətlərdən söz açıb.UTECA-nın baş müəllimi Hüseyn Budaqovun Xocalı faciəsi ilə bağlı çıxışından sonra Tələbə Gənclər Təşkilatının sədri Nicat Nağıyev Xocalıya Ədalət Kampaniyası çərçivəsində Gənclər Fondunun dəstəyilə ərsəyə gətirilən “Sevinj stories” adlı layihəs barədə məlumat verib. Bildirib ki, sosial şəbəkə gündəliyi formatında olan layihə Xocalıda yaşayan 9 yaşlı qızın gözləri ilə Xocalı faciəsinə baxışı əks etdirir. Sözügedən İnstagram səhifəsinin daha çox izləyici tərəfindən tanınmasının Xocalı faciəsini dünyanın diqqətinə çatdırılmasına kömək edəcəyini bildirərək, dəyirmi masa iştirakçılarını səhifəni aktiv şəkildə izləməyə dəvət edib. Tədbirin sonunda Xocalı faciəsinə həsr edilmiş videoçarx nümayiş etdirilib. 

Azərbaycan Texnologiya Universitetində aktiv tələbələrlə görüş keçirilib. Rektorun Sənaye və Tədris məsələləri üzrə müşaviri, dosent Aqil Eyvazov universitetin ictimai həyatında xüsusi fəallıqları ilə seçilən tələbələrlə görüşərək, onlarla gələcək planları, prioritetləri və perskpektivləri bölüşüb.Müşavir 2 Fevral Gənclər Günü münasibətilə Prezident İlham Əliyevin gənclərlə görüşünü xatırladaraq tələbələrə ölkə başçısının həmin çıxışını bir daha diqqətlə dinləməyi tövsiyə edib. Prezidentin gənclərə, təhsilə qayğısından bəhs edərək bildirib ki, görüşdə ölkə başçısının nitqi bizim üçün yeni üfüqlər açır.UTECA Tələbə Gənclər Təşkilatının, eləcə də Tələbə Həmkarlar İttifaqı Komitəsinin fəaliyyəti ilə də yaxından tanış olan müşavir gələcək planlardan danışıb. Bildirib ki, tələbələrin asudə vaxtının səmərəli təşkili üçün bir sıra layihələr, sosial, maarifləndirici təlim və seminarlar, karyerada uğur qaznanlarla motivasiya xarakterli görüşlərin keçirilməsi nəzərdə tutulub və tələbə həyatının maraqlı və məhsuldar keçməsi üçün bir çox tədbirlər görüləcək.Tələbələrin ictimai müzakirəsinin universitet rəhbərliyi üçün vacib olduğunu qeyd edən müşavir tələbələr üçün ən yaxşı şəraitin qurulmasının əsas prioritetlərdən biri olduğunu diqqətə çatdırıb: “Bu konteksdə tələbələrlə görüşlər davamlı olacaq, təkliflərinizə hər zaman açığıq. Tələbələr öz təkliflərini heç bir məhdudiyyət olmadan universitetin sosial şəbəkə hesablarından, eləcə də universitet rəhbərliyinə bir başa bildirə bilərlər” -deyə A.Eyvazov qeyd edib.Səmimi və diskusiya şəklində keçən görüşdə tələbələrin təklifləri və müraciətləri qeydə alınıb. 

Dövlət Məşğulluq Agentliyinin (DMA) nümayəndələri Azərbaycan Texnologiya Universitetinin (UTECA) tələbələrinə təlim keçib. UTECA-nın Akt zalında baş tutan görüş "5 səhv" və "Karyera planlanlamasında mən" mövzularını əhatə edib.DMA nümayəndəsi Toğrul Ələkbərov tələbələri karyerada hansı addımları necə atılmalı, iş həyatına necə hazırlaşmalı, xaricdə iş təcrübəsi, iş həyatına başlamaq üçün təcrübə əhəmiyyəti, həyatdakı missiya, etdiyimiz səhvlər kimi mövzular ətrafında maarifləndirib.Digər DMA nümayəndəsi Pərviz Əfəndizadə tələbələrin diqqətinə karyera planlamasına necə başlamalı və hansı mərhələlərdən keçməli olduqlarını çatdırıb.Hər mövzunun sonunda tələbələrlə qarşılıqlı müzakirə aparılıb, suallar cavablandırılıb və mövzu ətrafında dəyərli tövsiyələr verilib. 

Azərbaycan Texnologiya Universiteti Azərbaycan Beynəlxalq Təhsil Menecerləri Assosiasiyası (AIEMA), Midlberi Beynəlxalq Araşdırmalar İnstitutu (Monterey, Kaliforniya, ABŞ) və Amerika Birləşmiş Ştatlarının Azərbaycandakı Səfirliyinin tərəfdaşlığı ilə “Peşəkar Assosiasiya və Bilik Mübadiləsi vasitəsilə Azərbaycanda Ali Təhsilin Beynəlmiləlləşdirilməsinin Genişləndirilməsi” adlı seminara dəvət edilib. Seminar 25 yanvar 2022-ci il tarixində Bakı şəhərində Emerald Suite Otelin konfrans zalında pandemiya qaydalarına uyğun olaraq təşkil edilib. Seminarda Amerika Birləşmiş Ştatlarının Azərbaycandakı Səfirliyinin, Azərbaycan Respublikasının Təhsil Nazirliyinin Beynəlxalq əlaqələr şöbəsinin, Azərbaycandakı Milli Erasmus+ Ofisinin, British Council Azərbaycan təşkilatının, ABŞ-ın Midlberi Beynəlxalq Araşdırmalar İnstitutunun və 25 ali təhsil müəssisəsinin beynəlxalq əlaqələr şöbələrinin rəhbər və nümayəndələri iştirak ediblər. Görüşdə Azərbaycan Texnologiya Universitetini Beynəlxalq əməkdaşlıq şöbəsinin əməkdaşı Tural Rüstəmov təmsil edib.Seminar, iştirakçılar və qonaqlar tərəfindən müsbət qarşılanıb və iştirakçılar faydalı seminarların davamlı olmasını arzulayıblar. Seminar iştirakçıların fərdi müzakirələri və şəbəkələşməsi, həmçini xatirə şəkli çəkdirməklə yekunlaşıb. Qeyd edək ki, Azərbaycan Beynəlxalq Təhsil Menecerləri Assosiasiyası (ABTMA) 2019-cu ilin noyabr ayında bir təşəbbüs qrupu kimi təsis edilib və könüllülük prinsipi əsasında bir neçə yerli ali təhsil müəssisələrinin əməkdaşları tərəfindən fəaliyyətə başlayıb. ABTMA-nın missiyası təşviq, vəkillik, şəbəkələşmə və peşəkar resurs mübadiləsi vasitəsilə fərdləri və qurumları dəstəkləməklə Azərbaycanda ali və peşə təhsilinin effektiv beynəlmiləlləşdirilməsinə töhfə verməkdir. 

Azərbaycan Texnologiya Universiteti ilə Qazaxıstanın Almatı Texnologiya Universiteti arasında əməkdaşlıq əlaqələri qurulub. İki ali təhsil ocağının əməkdaşlıq münasibətləri ötən həftə imzalanan anlaşma memorandumu ilə rəsmiləşdirilib. Əməkdaşlıq çərçivəsində ilk görüş baş tutub. Onlayn şəraitdə keçən görüşdə hər iki universitetin prorektorları çıxış edib.Azərbaycan Texnologiya Universitetinin tədris işləri üzrə prorektoru dosent Yaşar Ömərov beynəlxalq əməkdaşlığın inkişaf etdirilməsi və dünya universitetləri ilə əlaqələrin genişləndirilməsinin universitetin beynəlmiləşdirilməsində xüsusi əhəmiyyətindən bəhs edib və iki universitet arasındakı əməkdaşlığın məhsuldar olacağına inamını ifadə edib. Daha sonra UTECA-nın İnzibati idarəetmə və kommersiya kafedrasının müdiri professor Fizuli Məmmədov xarici kolleqalarını Azərbaycan Texnologiya Universitetinin tarixi və hazırkı vəziyyəti ilə tanış edib. UTECA-nın Yüngül sənaye mühəndisliyi və logistika fakültəsinin dekanı Nazim Vəliyev fakültədə aparılan elmi tədqiqat işləri barədə məlumat verərək sənayedə tətbiqini xüsusilə vurğulayıb, universitet-sənaye əlaqələrinin UTECA üçün prioritet olduğunu qeyd edib. Qazaxıstanın Almatı Texnologiya Universitetinin digər nümayəndələri də çıxış edərək əməkdaşlığın həyata keçirilməsi istiqamətində geniş fikir mübadiləsi aparıblar. Azərbaycan Texnologiya Universiteti ilə Qazaxıstanın Almatı Texnologiya Universiteti arasında imzalanan memorandum hər iki ali təhsil müəssisəsinin təhsil və tədqiqat sahəsində əməkdaşlıq əlaqələrinin inkişaf etdirilməsi məqsədini daşıyır. Sənədə əsasən universitetlər arasında müəllim-tələbə mübadiləsi, layihə və proqramların işlənib hazırlanması, birgə elmi-tədqiqatların aparılması, beynəlxalq konfransların keçirilməsi və s. kimi əməkdaşlıq nəzərdə tutulub.   

“Həqiqi mərhəmət real işlər görülməsini, real məsələlərin həllini, konkret addımlar atılmasını tələb edir. Biganəlik və laqeydlik ən dəhşətli xüsusiyyətdir. Bunlar olmamalıdır”. – bu sözlər Azərbaycanın birinci xanımı, UNESCO və İSESCO-nun xöşməramlı səfiri, birinci vitse-prezident Mehriban Əliyevaya məxsusdur. Azərbaycan vətəndaşı hər zaman bu sözlərin müəllifinin cəmiyyətin həssas təbəqələrinə göstərdiyi qayğının, dövlətin gələcəyi olan uşaqlara ayrılan diqqətin, milli-mənəvi dəyərlərimizə sahib çıxmağının şahididir. Hər bir dövlətin varlığı, inkişaf etmiş ölkələr sırasında yer ala bilməsi üçün lazım olan əsas faktorlardan biri də onun görkəmli şəxsiyyətlərinin dövlət üçün göstərdiyi xidmətlərdir. Mehriban Əliyeva özünün insanpərvərliyi, alicənablığı, yüksək erudisiyaya sahib olması, zəngin fəaliyyəti, təşəbbüsləri, gerçəkləşdirdiyi layihələri ilə nəinki ölkəmizdə, eləcə də bütün dünyada böyük nüfuza malikdir. Bu gün Azərbaycan bütün dünyada öz milli-mənəvi dəyərləri ilə seçilən, həm də öz dəyərlərinə sahib çıxan sivil bir ölkə kimi tanınır. Müstəqilliyimizin bərqərar edildiyi ilk zamanlardan başlayaraq ölkəmizin ictimai-humanitar həyatının bütün sahələrində geniş fəaliyyətə başlayan Mehriban xanım Əliyeva 1995-ci ildə “Azərbaycan Mədəniyyətinin Dostları” Xeyriyyə Fondunu yaradaraq ona rəhbərlik etməyə başladı. Fondu yaratmaqda əsas məqsəd Azərbaycan mədəniyyətini dünya miqyasında daha yaxşı tanıtmaq, geniş təbliğ etmək, Azərbaycan xalqının dünya mədəniyyətinə inteqrasiyası, beynəlxalq əlaqələrin formalaşması və incəsənət xadimlərinə maddi yardım göstərilməsindən ibarət idi. İlk gündən əsas işi üç istiqamətdən ibarət olan Fond xeyriyyə aksiyaları, mədəni tədbirlər və naşirlik işlərinə xüsusi diqqət ayırdı. Azərbaycanın görkəmli incəsənət xadimlərinin yubiley gecələrinin təşkil edilməsi, “Azərbaycan-İrs” jurnalının xüsusi nömrələrinin çap olunması, müxtəlif sənətkarların mahnı albomlarının buraxılması, Azərbərbaycanda xarici ölkə incəsənət xadimlərinin konsertlərinin, teatr tamaşalarının, təqdimat mərasimlərinin, sərgilərin, festivalların, mədəniyyət günlərinin təşkili, dünya şöhrətli incəsənət xadimlərinin Bakıdakı çıxışları bu qəbildəndir. “Bakı Muğam Mərkəzi”nin yaradılması mədəni tədbirlər istiqamətində atılan addımlar arasındadır ki, bununla da Azərbaycan muğamını dünya miqyasında təbliğ etmək, həmçinin bu ulu sənəti yaşadan musiqiçi və müğənnilərə qayğı göstərmək bir daha milli dəyərlərimizə sahib çıxmağın göstəricisidir. “Bakı payızı” Beynəlxalq festivalının, IX Şərq-Qərb Bakı beynəlxalq kino festivalının, Beynəlxalq Bakı Caz Festivalının təşkil edilməsi Azərbaycan Mədəniyyətinin Dostları fonduna beynəlxalq aləmdə də nüfuz qazandırmışdır. Milli-mənəvi dəyərlərimizin himayədarı və təbliğatçısı, Azərbaycan reallıqlarını bütün dünyaya çatdıran Mehriban xanım Əliyeva 2004-cü ildə UNESCO-nun şifahi ənənələr və musiqi ənənələri sahəsində xoşməramlı səfiri adına layiq görülüb. Əgər bu gün Azərbaycan bütün dünyada davamlı inkişafı ilə tanınırsa, dünyaya mütərəqqi dəyərlər təqdim edə bilirsə, bunun əsasında xalqına və dövlətinə böyük məhəbbətdən, rəğbətdən qaynaqlanan, dərin ictimai və milli məzmun daşıyan fəaliyyət dayanır. 2004-cü il may ayının 10-da Ümummilli Lider Heydər Əliyevin xatirəsinə Azərbaycan xalqının ehtiramının göstəricisi olaraq, eyni zamanda, azərbaycançılıq fəlsəfəsinin Azərbaycan üçün əhəmiyyətini vurğulamaq, milli dövlətçilik ideyalarını yeni nəsillərə aşılamaq məqsədi ilə Heydər Əliyev Fondu yaradıldı və bu fonda rəhbərlik Azərbaycanın birinci xanımı Mehriban Əliyevaya həvalə edildi. Fondun əsas işlərinə Azərbaycanın tərəqqisi – elm, təhsil, səhiyyə, idman, ekoloji və s. sahələrə aid layihələr hazırlayıb həyata keçirmək, elmi tədqiqatların aparılmasına yardım etmək, xarici ölkələrin təhsil müəssisələri, nüfuzlu elmi-tədqiqat müəssisələri ilə alimlərin mübadiləsini təşkil etmək daxil idi. Fondun dəstəyi ilə təkcə mədəniyyət sahəsində göstərilən xidmətlərə 2005-ci ildə Cavad xanın qəbri üzərində məqbərənin ucaldılmasını, Comərd Qəssabın məzarı və məzarüstü türbəsinin bərpasını, Abdulla Şaiqin ev-muzeyinin bərpasını, 2008-ci ildə Qala Arxeoloji-Etnoqrafik Muzey Kompleksinin yaradılmasını, Gəncə qapılarının ilkin şəkildə qurulmasını, Salyan Dövlət Rəsm Qalereyasının yenidən qurulmasını, Ağcabədidə Qarabağ Muğam Mərkəzinin inşasını, Bakı Beynəlxalq Muğam Mərkəzinin inşasını, 2009-cu ildə Ağdaşda Xalq artisti Habil Əliyevin adını daşıyan uşaq musiqi məktəbinin inşasını, Bakı Müasir İncəsənət Muzeyinin yaradılmasını, 2014-cü ildə Gəncədə Nizami Gəncəvi Muzeyinin, Məhsəti Gəncəvi Mərkəzinin inşasını, Bakıda Azərbaycan Xalçası və Xalq Tətbiqi Sənəti Dövlət Muzeyi üçün yeni binanın tikilməsini və s. misal göstərmək olar. "Yeniləşən Azərbaycana yeni məktəb" proqramı çərçivəsində ölkənin müxtəlif bölgələrində 100 mindən çox şagirdin təhsil aldığı 412 məktəb binası inşa olunmuş və yenidən qurulmuş, "Təhsilə dəstək" layihəsi çərçivəsində isə respublika üzrə 20-dən çox uşaq bağçası əsaslı təmir olunaraq müasir avadanlıqla təchiz edilmişdir. Bütün bunlar onu göstərir ki, xalqımızın keçmişdən miras qalan xeyriyyəçilik ənənələrinin bu gün geniş miqyas alması bilavasitə Heydər Əliyev Fondunun prezidentinin göstərdiyi şəxsi nümunə nəticəsində mümkün olub. Genişmiqyaslı xeyriyyəçilik fəaliyyətinə, bəşəriyyətin ali ideallarına xidmət sahəsində yüksək nailiyyətlərinə görə 2007-ci ilin mayında Mehriban Əliyeva “Qızıl ürək” beynəlxalq mükafatına, 2012-ci il fevralın 13-də Rusiya Federasiyasının İ.M.Seçenov adına Birinci Moskva Dövlət Tibb Universitetinin Fəxri professoru adına, 2019-cu il yanvarın 18-də dahi bəstəkar, müasir Azərbaycan musiqi sənətinin banisi Üzeyir Hacıbəylinin zəngin irsinin qorunub saxlanılması və gələcək nəsillərə çatdırılmasına verdiyi əvəzsiz töhfələrə görə Azərbaycan Bəstəkarlar İttifaqının təsis etdiyi “Üzeyir Hacıbəyli” fəxri medalına və ən əsası Azərbaycanın ən ali dövlət mükafatı olan “Heydər Əliyev” ordeninə layiq görülüb. Bütün bunlar Azərbaycanın Birinci vitse-prezidentinin layiq görüldüyü mükafatların heç də tam siyahısı deyil. Amma burada adları çəkilən və çəkilməyən bütün digər mükafatlar, ordenlər onu göstərir ki, peşəkar qərarların qəbul edilməsi, yüksək təşkilatçılıq, çeviklik Mehriban xanım Əliyevanın uğurlu fəaliyyətini şərtləndirən əsas amillərdir. Ən böyük mükafatı isə xalqın ona olan sevgisi, inamı və etimadıdır. Çünki, özünün də qeyd etdiyi kimi, qarşıya çıxan yeni planlar və ideyalar məqsədləri xaraktercə dəyişsə də, dəyişməz olan Azərbaycan xalqına xidmət etmək amalı olaraq qalacaqdır.  

Zəminə  Novruzova

Azərbaycan Texnologiya Universitetinin

İctimai elmlər və multikulturalizm kafedrasının baş müəllimi