Cəmiyyətimizdə öz layiqli vətəndaş mövqeyi ilə seçilən insanlar məhz müəllim əməyinin yetirmələridir. Bizim hər birimizin layiqli vətəndaş kimi yetişməyimizdə müəllimlərimizin böyük və əvəzsiz xidmətləri vardır. Şərəfli və müqəddəs yolda sizə uğurlar arzu edirik, əziz müəllimlər!
27 sentyabr- Anım Günü Azərbaycan Respublikası Təhsil Nazirliyinin müvafiq əmri və "27 sentyabr Anım günü və 8 noyabr Zəfər Günü ilə bağlı" tədbirlər planına əsasən Azərbaycan Texnologiya Universitetində ilk dərs gününün birinci saatları Anım Gününə həsr edilib.
Azərbaycan Texnologiya Universitetinin Avtomatika, Telekommunikasiya və İnformatika fakültəsində 27 Sentyabr –Anım Gününə həsr olunmuş tədbir keçirilib. Tədbirdə Vətən müharibəsində iştirak etmiş tələbələr, şəhid ailələri və müəllimlər iştirak edib. Əvvəlcə şəhidlərimizin əziz xatirəsi bir dəqiqəlik sükutla yad edilib. Daha sonra şəhid anası Aybəniz müəllimə oğlunu qürur hissi ilə yad edərək Vətən uğrunda canından keçən bütün şəhidlərə rəhmət diləyib. 44 günlük Vətən müharibəsi iştirakçıları Röyal Məmmədov, Gündüz Səmədov öz xatirələrini bölüşərək hər zaman Vətənin vur çağırışına müsəlləh əsgər olmağa hazır olduqlarını bildiriblər. Tədbirdə Şəhid tələbəmiz Nurlan Həsənovun yaxınları da iştirak edib. Onlar çıxışlarında Azərbaycan Ordusunun şücaətindən danışıb, qazilərimizlə və şəhidlərimizlə qürur duyduqlarını bildiriblər.
İlk dərs günü qeyd edilib Azərbaycan Texnologiya Universitetində ilk dərs günü münasibətilə tədbir keçirilib. Tədbirdə Gəncə Şəhər İcra Başçısının müavini Adil Tağıyev, I, III kurs tələbələri və valideynlər iştirak edib. Universitetin rektoru, professor Akif Süleymanov yeni tədris ilinin başlanması münasibətilə tələbələri təbrik edib, dərslərində müvəffəqiyyətlər arzulayıb. Gəncə Şəhər İcra Başçısının müavini Adil Tağıyev qeyd edib ki, bu gün respublika üzrə 189 minə yaxın tələbə il yarımlıq fasilədən sonra ənənəvi qaydada dərslərə başlayır. Bildirib ki, ənənəvi dərslərin davamlı olması üçün COVİD19 - un hələ də hökm sürdüyü bir vaxtda pandemiya tələblərinə əməl edilməsi vacib məsələdir. Tədris işləri üzrə prorektor Vüqar İsmayılov da tələbələrə öz tövsiyyələrini verib. Artıq qalib bir ölkənin tələbələri olduqlarını xatırladaraq öz üzərlərində daha əzmlə çalışmalı olduqlarını bildirib. Valideyn və tələbə çıxışlarından sonra hər fakültə üzrə ən yüksək balla qəbul olan I kurs tələbələrinə mükafat və tələbə bileti təqdim edilib.
Azərbaycan Texnologiya Universitetində növbəti tyutor hazırlığı kurslarını başa vurmuş tyutorlara (tələbənin akademik məsləhətçisi) sertifikatların təqdimetmə mərasimi keçirilib. Tədbirdə Azərbaycan Texnologiya Universitetin rektoru vəzivəsini icra edən dosent Yaşar Ömərov gənc tyutorlar qarşısında çıxış edərək onlara məsləhət və tövsiyyələrini verib. Bildirib ki, tyutor kursları Boloniya prosesinin baza prinsiplərinin öyrənilməsilə əlaqədar təşkil edilir. “COVİD-19 pandemiyasının yaratdığı çətinliklərə baxmayaraq tyutor hazırlığının təşkili universitetin tədris həyatında əlamətdar hadisədir. Bu kursu müvəffəqiyyətlə başa vurduğunuz üçün hər birinizi təbrik edirəm! Hər bir tyutorun başlıca vəzifəsi tələbələrin problemini zamanında həll etmək, eləcə də tələbənin fikirlərinə önəm verməkdən ibarətdir. Öz missiyanızı yerinə yetirərkən diqqətli olmalı, nöqsanlara yol verməməlisiniz”- deyə Yaşar Ömərov qeyd edib. Daha sonra müdavimlərə I və II dərəcəli sertifikatlar təqdim edilib. Qeyd edək ki, bu dəfəki tyutor kurslarında 18 gənc, eyni zamanda təkmilləşdirmə məqsədilə universitetin tyutorları iştirak edib. Onlar 3 ay (31 may-30 avqust) ərzində 300 saatlıq təlimlərə cəlb olunublar.
Azərbaycan Texnologiya Universitetində (UTECA) Avropa Birliyinin Erasmus+ proqramının CRENG layihəsi çərçivəsində, Avropa Birliyinin maliyyə dəstəyi ilə CRENG laboratoriyası qurulub, innovativ öyrənmə mühiti yaradılıb. Laboratoriyanın açılışında universitetin rektor vəzifəsini müvəqqəti icra edən dosent Yaşar Ömərov, prorektorlar və struktur bölmə rəhbərləri, Yüngül Sənaye Mühəndisliyi və Logistika fakültəsinin nümayəndələri iştirak ediblər. CRENG yenilikçi təhsil mühiti tələbələrin nəqliyyat sahəsində rəqəmsal və informasiya texnologiyalarından istifadə etməklə praktiki bacarıqlar əldə edəcəyi kompüter texnikası və uyğun proqram təminatı ilə təchiz olunmuş müasir CRENG Laboratoriyası və Virtual Sinif Otağını əhatə edir. Mövcud proqram məhsullarının təhlili əsasında təhsil ehtiyacları üçün AnyLogic proqramı seçilib. AnyLogic müxtəlif miqyaslı sistemlərin (müəssisələr, təchizat zəncirləri, yük və sərnişin daşımaları, anbar, dəniz limanı və s.) böhran vəziyyətində fəaliyyət planının hazırlanması üçün lazım olan təhlilin aparılması və simulyasiya modellərini 2D və 3D -də görüntülənməsi imkanlarını təklif edir. Eyni zamanda IPBL (International Project Based Leaning) ilə məşğul olan tələbələrin ünsiyyətini təmin etmək, web seminarlar və onlayn konfranslar təmin etmək üçün UTECA-da virtual sinif otağı yaradılıb. Bütün avadanlıq və proqramlar təşkilat, müəssisə, işəgötürən və digər maraqlı tərəflərin yenilənmə kurslarında istifadəsi üçun nəzərdə tutulub.CRENG yenilikçi öyrənmə mühitinin fəaliyyətini təmin etmək üçün universitetə 50-yə yaxın avadanlıq gondərilib.
