Azərbaycan Texnologiya Universiteti Asiya İnkişaf Bankının dəstəyi ilə həyata keçirilən “Yerli Texnoloji Startapların İnkişafına Dəstək" layihəsində tərəfdaş kimi çıxış edir. Adı çəkilən layihə çərçivəsində onlayn görüş keçirilib. Görüş “STW” şirkətinin konsultantı Stephen Omullane tərəfindən idarə edilib və Strateji Planların hazırlanması, mentor hazırlığı üzrə potensialın gücləndirilməsi təlimlərinin keçirilməsi və digər məsələlər müzakirə edilib.Görüşdə Stephen Omullane universitetdə innovasiya ekosisteminin (həmçinin inkubasiya/akselerasiya proqramlarının təşkili və təlim ehtiyaclarının təyini) qurulması üçün universitetlər tərəfindən hazırlanmış fəaliyyət strategiyasının təkmilləşdirilməsi ilə bağlı rəy və təkliflərini verib.Görüşdə Azərbaycan Texnologiya Universitetini Elm və xarici əlaqələr üzrə müşavir dos. Mayıs Gülalıyevin rəhbərlik etdiyi işçi qrupu və KOICA WFK NIPA proqramı çərçivəsində universitetə cəlb edilmiş koreyalı ekspert Chang Yull Byun təmsil edib.     

Seminarlarda III kurs tələbəsi Şəhriyar Tağıyev Kompyuter mühəndisliyi və telekommunikasiya kafedrasının baş müəllimi Rasimə Quliyevanın rəhbərliyi ilə “Command injection” mövzusunda, I kurs tələbələri Babək Məmmədli və Aysel Vahidova Ümumi və tətbiqi riyaziyyat kafedrasının dossenti Yusub Yusubalıyevin rəhbərliyi ilə “Pandemiya dövründə bakteriaların artma sürətinin təyini” və “Əhalinin say artımının təyini” mövzuları ilə çıxış ediblər.Məruzələrdə kiber təhlükəsizliyin inkişafı, beynəlxalq təcrübədə bu sahənin əhəmiyyəti, günümüzdə aktual olan pandemiya şəraitində virusların, bakteriaların artma tempindən və əhalinin artımından riyazi hesablamalarla bəhs edilib.Tədbirdə rektorun elm və xarici əlaqələr üzrə müşaviri dos.Mayıs Gülalıyev, Elmi Tədqiqat Mərkəzinin direktoru dos.Qalibə Məmmədova, elmi katib dos.Mətanət Əhmədova, ATİ fakültəsinin dekanı dos.Rövşən Hacıyev, tədris işləri üzrə dekan müavini Ramil Vəliyev, elmi işlər üzrə dekan müavini dos.Elmir Cəfərov, TEC sədri Aysel Məmmədli, fakültə TEC sədri Arzu Əsgərov, fakültənin professor-müəllim heyəti və tələbələr iştirak ediblər.    

Elm və xarici əlaqələr üzrə müşavir Mayıs Gülalıyev Avtomatika, Telekommunikasiya və İnformatika, eləcə də Qida mühəndisliyi fakültələrinin Tələbə Elmi Cəmiyyəti (TEC) sədrləri, onların müavinləri, elmi işlər üzrə dekan müavinləri və hər iki fakültənin TEC üzvləri ilə görüş keçirib.Universitetin Oxu zalında baş tutan görüşün əsas məqsədi növbəti ay keçiriləcək tələbə elmi konfransının universitetimizdə təşkili ilə bağlı proqramın müzakirə edilməsi olub.Görüşdə gündəlik məsələlər müzakirə edilib, baş tutacaq tələbə elmi konfransı ilə bağlı tövsiyələr verilib, qarşıya qoyulan məqsədlər izah edilib. Müşavir tezis və məqalələrin yazılması qaydalarını izah edərək yaxın günlərdə gənc müəllim və tələbələr üçün tezis və məqalələrin necə yazılmasına dair ayrıca təlim keçəcəyini bildirib.Daha sonra fakültə TEC sədrlərinin seminarların gedişatı, dərnəklərin fəaliyyəti haqqında məruzələri dinlənilib, tövsiyə və məsləhətlər verilib. Sonda Tələbə Elmi Cəmiyyətinin sədri Aysel Məmmədli protokollar barədə hesabat verib. 

Azərbaycan Texnologiya Universitetində UTECA Könüllüləri Təşkilatının təqdimatı keçirilib. Tədbirdə rektorun tədris və sənaye üzrə müşaviri Aqil Eyvazov, Elmi katib Mətanət Əhmədova, Qida mühəndisliyi fakültəsinin dekanı Mehman İsmayılov, Gəncə İş Adamları İB-nin idarə heyətinin üzvü, şəhid Hacı Rauf adına Tədris Mərkəzinin direktoru Günel İsgəndərova və tələbələr qatılıb.Təqdimat tədbirində rektorun tədris və sənaye üzrə müşaviri Aqil Eyvazov çıxış edərək bidirib ki, UTECA Könüllüləri Təşkilatının yaradılıması ideyası rektorun tələbələrlə görüşü zamanı tələbələr tərəfindən irəli sürülüb. Rektor, professor Akif Süleymanov tələbələrə dəstək göstərərək onların bu təşəbbüsünü qısa vaxt ərzində dəyərləndirib. Artıq təşkilatın əsasnaməsi təsdiq edilib. Müşavir təşkilata üzv olacaq gənclərin yeni nailiyyətlərə imza atacaqlarına əminlik ifadə edərək rektor adından təşkilatın fəaliyyətinə uğurlar arzulayıb.Çıxışlarda Azərbaycanın gənclər siyasətinin mühüm elementlərindən olan könüllülük hərəkatından, gənclər üçün faydasından, gələcək karyera üçün əhəmiyyətindən danışılıb, tələbələr arasında sorğu keçirilib.Bildirilib ki, hazırda müvəqqəti idarə heyəti formalaşıb. UTECA Könüllülərinin əsasnaməsi təqdiqlənib və idarə heyəti yaxın günlərdə seçki əsasında müəyyənləşəcək. Təşkilat tək UTECA tələbələri üçün deyil, Gəncə və ətraf bölgələrdə yaşayan bütün gənclər üçün açıqdır. UTECA Könüllüləri Təşkilatına üzv olmaq istəyənlər https://forms.gle/brqAQr4ejq4uisCfA linki vasitəsilə qeydiyyatdan keçə bilərlər.Qeyd edək ki, təşkilatın yaradılmasında əsas məqsəd universitetin tələbələrində könüllülük fəaliyyətinə maraq yaratmaq, onların əmək vərdişlərini inkişaf etdirmək, universitetin ictimai, mədəni, idman, sosial, iqtisadi həyatında fəal iştirakını təmin etmək, müasir əmək bazarının tələblərinə uyğun kadrlar kimi yetişməsinə müvafiq şəraitin yaradılmasıdır.   

Azərbaycan Texnologiya Universitetinin İdman Zalında basketbol üzrə fakültələr arasında açıq birincilik keçirilib. Yarış torpaqlarımızın azadlığı uğrunda canlarından keçmiş şəhidlərimizin əziz xatirəsinə həsr edilib.Oyunlardan öncə UTECA-nın İdman Zalında yeni quraşdırılmış şəhidlər lövhəsinə və UTECA tələbələrinin əl işlərindən ibarət rəsmlərə baxış keçirilib.Dövlət Himni səsləndirildikdən sonra şəhidlərin xatirəsi bir dəqiqəlik sükutla yad edilib. Daha sonra şəhid ailələrinin üzvləri çıxış ediblər. Şəhid ailələrinə dövlət qayğısından danışılıb, şəhidlərin xatirəsinin gənc nəsillərə ötürülməsinin vacibliyi qeyd edilib. Bildirilib ki, univeritetin şəhid məzunu Nemət Orucov həm voleybol, həm də atletika idman növləri üzrə təhsil müəssisəsinin əsas heyət üzvü olub.Daha sonra rəsmi hissədə ölkədə idmanın inkişafına cənab Prezidentin diqqət və qayğısından bəhs edilib. Tədris və sənaye işləri üzrə müşavir Aqil Eyvazov bildirib ki, təhsil naziri Emin Əmrullayevin basketbol Federasiyasının Prezidenti seçildikdən sonra basketbol idman növünün inkişafına diqqət daha da artıb. Azərbaycan Texnologiya Universitetinin rektoru, professor Akif Süleymanov UTECA basketbolçularının hazırlanması üçün ciddi təşəbbüs göstərib, bu işə əməkdar məşqçi Elçin Süleymanovu cəlb edib. Artıq ilkin nailiyyətlərin əldə olunduğunu vurğulayan müşavir bir neçə gün əvvəl Gəncə şəhər Gənclər İdman Baş İdarəsinin təşkilatçılığı ilə keçirilən spartakiadada basketbol birinciliyinin qalibi olan UTECA komandasını rektor adından bir daha təbrik edib, yeni-yeni nailiyyətlər arzulayıb.Yarışa start verilməzdən əvvəl UTECA-nın Tələbə Gənclər Təşkilatının sədri Nicat Nağıyevin ifasında “Xudayar təsnifi” dinlənilib.Yarışda UTECA tələbələri ilə yanaşı Telekom basketbolçuları da iştirak edib. Qida mühəndisliyi fakültəsinin tələbələri keçirdiyi bütün görüşlərdə qalib gələrək çempion adını qazanıblar.   

“TEKNOFEST Azərbaycan” festivalına müraciət edən UTECA komandlarından ikisi - "Rosol" və "Asan Parkomat" növbəti mərhələyə vəsiqə qazanıb.Daha 4 – "Şahin", "Nirvana", "Asan Ödəniş" və "Veterinarian" komandaları “TEKNOFEST Azərbaycan” Aerokosmik və Texnologiya Festivalı çərçivəsində təşkil olunacaq “Take Off Baku” beynəlxalq startap sammitinə müraciət edib.