Azərbaycan Texnologiya Universitetində müəllimlər üçün “Rəqəmsal hekayədanışma” mövzusunda təlimlərə start verilib. Beş gün davam edəcək təlimlər Qeyri Hökumət Təşkilatlarına Dövlət Dəstəyi Agentliyi və El-Gücü Beynəlxalq Humanitar Assosiasiyası İctimai Birliyinin birgə təşkilatçılığı ilə həyata keçirilir. Təlimçi qismində Bakı Amerika Mərkəzinin mütəxəssisi Ehtiram Məmmədov çıxış edir.İştirakçılar hər gün 3 saat ərzində dünya təhsil sahəsində innovativ və effektiv hesab edilən “Rəqəmsal hekayədanışma” texnologiyasına dair vacib məlumatlar əldə edirlər.Təlimlərin sonunda iştirakçılara sertifikatlar veriləcək.
UTECA-da respublika elmi konfransı keçirilibAzərbaycan Texnologiya Universitetində “Texnoloji inkişaf iqtisadi inkişafın əsasıdır” adlı müəllim və gənc tədqiqatçıların respublika elmi konfransı keçirilib.Konfransın onlayn qaydada təşkil edilən plenar iclasını Azərbaycan Texnologiya Universitetinin rektoru, professor Akif Süleymanov giriş sözləri ilə açıb. Rektor bildirib ki, müasir iqtisadiyyat texnologiyanın inkişafından asılıdır və yeni texnologiyanın inkişafı istehsal texnologiyalarının inkişafının əsasını təşkil edir. “Texnologiyanın inkişafı, texnoloji ideyalar yenilikləri sevir və bu istiqamətdə Azərbaycan Texnologiya Universiteti də yüksək ixtisaslı kadrların yetişdirilməsində və tələbələrin tədqiqata cəlb edilməsində mühüm addımlar atmaqdadır” –deyə qeyd edən rektor Azərbaycan Texnologiya Universitetinin TEKNOFEST Azərbaycan festivalına hazırlığı barədə məlumatlar verib, beş UTECA komandasının dörd müsabiqə üzrə qeydiyyatdan keçdiyini və komandaların layihələr üzərində ciddi işlədiklərini açıqlayıb.Daha sonra Gəncə şəhər icra hakimiyyəti başçısının müavini Adil Tağıyev, Türkiyə və Azərbaycan İş Adamları və Sənayeçilər Birliyinin sədri Hüseyn Böyükfırat, Dördüncü Sənaye İnqilabının Təhlili və Koordinasiya Mərkəzinin Təhlil və Monitorinq şöbəsinin mütəxəssisi Aygün Əhmədova, KOBİA katibliyinin rəhbəri Elmar İsayev, AMEA İqtisadiyyat İnstitutunun şöbə müdiri, professor Fuad Qənbərov, Bakı Mühəndislik Universitetinin elmi işlər üzrə prorektoru Elçin Süleymanov, Bakı Avrasiya Universitetinin elmi işlər üzrə prorektoru, professor Gülzar İbrahimova, Mİngəçevir Dövlət Universitetinin elmi işlər üzrə prorektoru, professor Veysəl Eyyubov və digər elm adamları çıxış ediblər. Çıxışlarda konfransın mövzusunun müsir tələblərlə uzlaşdığı xüsusilə vurğulanaraq tədbirin məhsuldar olacağına əminlik ifadə edilib.Konfransın plenar iclasında UTECA-nın Marketinq kafedrasının baş müəllimi, 2021-ci ildə UTECA-da “İlin gənc alimi” adına layiq görülən Sevinc Babakişiyeva “Müasir texnologiyaların müasir iqtisadiyyatda rolu”, Tələbə Elmi Cəmiyyətinin sərdi Aysel Məmmədli “Startapların yaradılmasında universitetlərin rolu”, Yüngül sənaye mühədisliyi və logistika fakültəsinin I kurs tələbəsi Elmir Mollayev isə “PUA-ların həndəsi parametrlərini dəyişməklə aerodinamik keyfiyyətinin yaxşılaşdırılması” adlı məruzələrlə çıxış ediblər.Plenar iclasın yekunundan sonra respublika konfransı panellərdə davam edib. Qida mühəndisliyi, Logistika mühəndisliyi, Yüngül sənaye mühəndisliyi, Metal və materiallar mühəndisliyi, İnformasiya texnologiyaları və kompüter mühəndisliyi, İqtisadiyyat və menecment, Davamlı inkişaf və təhsil texnologiyaları istiqamətləri üzrə həyata keçirilən panel iclaslarında müəllim və gənc tədqiqatçıların aktual məruzələri dinlənilib.Konfransın məcmuələr toplusuna 200-dən çox tezis daxil edilib.
Azərbaycan Texnologiya Universiteti Asiya İnkişaf Bankının dəstəyi ilə həyata keçirilən “Yerli Texnoloji Startapların İnkişafına Dəstək" layihəsində tərəfdaş kimi çıxış edir. Adı çəkilən layihə çərçivəsində icraçı təşkilat (STW) tərəfindən universitetə növbəti işgüzar səfər baş tutub. İşgüzar səfər STW şirkətinin konsultantı Stephen Omullane tərəfindən həyata keçirilib. Səfərin əsas məqsədi universitetdə innovasiya ekosisteminin (həmçinin inkubasiya/akselerasiya proqramlarının təşkili və təlim ehtiyaclarının təyini) qurulması üçün fəaliyyət strategiyasının təkmilləşdirməsi xarakteri daşıyıb. İki gün müddətində keçirilən intensiv təlimlərdə ekspert universitet nümayəndələri ilə texnoloji startaplara dəstək mexanizminin qurulması üçün 3 illik Strateji plan və Fəaliyyət planının yazılmasına dair öz təcrübələrini bölüşüb və təlim iştirakçılarını hər iki sənədin hazırlanması üçün metodologia haqqında məlumatlandırıb. Eyni zamanda ekspert bildirib ki, 3 ay müddətində ekspertlə birgə mütəmadi fəaliyyət göstərmək və lazımi sənədləri hazırlamaq üçün universitet tərəfindən işçi qrupu müəyyənləşdirilməli və həmin işçi qrupu 3 ay müddətinə - aprel-may-iyun aylarında layihə çərçivəsində cari komponent üzrə nəzərdə tutulan fəaliyyətləri yerinə yetirməlidir.
Azərbaycan siyasəti modern çağırışlara cavab verir Günümüzdə inkişaf etmiş ölkələrin keçdiyi uğurlu siyasi tarixinə nəzər salsaq həmin ölkələrdə aparılan düzgün islahatların, inkişaf yönümlü siyasətin, eləcə də aparılan arasıkəsilməz quruculuq işlərinin olduğunun şahidi olarıq. Azərbaycan xalqının bugünkü banisi ulu öndər Heydər Əliyevin layiqli davamçısı, siyasi lider İlham Əliyevdir. Cənubi Qafqazın lider dövləti olan Azərbaycan Respublikasının nüfuzunun ümumbəşəri sferada artmasının əsas səbəblərindən biri də cənab İlham Əliyevin rəhbərliyi ilə həyata keçirilən islahatların milli maraqlara və siyasətin modern çağırışlarına cavab verməsinin nəticəsidir. İlham Əliyev Heydər Əliyevin siyasi kursunun diktə etdiyi sülh, sabitlik və tərəqqi yolunun alternativsizliyini sübuta yetirmiş, inam və etimad üzərində qərarlaşan, gələcəyə yönümlü güclü dövlət konsepsiyasını ilbəil uğurla reallaşdırmışdır və parlaq qələbələrə imza atmışdır. Milli iqtisadiyyatımızın son illərdə dünyada rekord səviyyədə artmasıyla nəinki neft sektorunda hətta qeyri-neft sektorunda da davamlı gəlirlər əldə etmiş və ölkəmiz etibarlı tərəfdaş və islahatçı adını qazanmışdır. Xüsusilə qeyd etmək lazımdır ki, 30 ilə yaxın Ermənistanın işğalı altında qalmış doğma torpaqlarımızın azadlığı, 2020-ci ildə Azərbaycanın Ali Baş Komandanı İlham Əliyevin həyata keçirdiyi adekvat siyasət nəticəsində Vətən müharibəsində əldə edilən Zəfər tariximizin ən şanlı qələbəsinə çevrildi. Digər tərəfdən Azərbaycan xalqının sosial rifahının təminatı həmişə Prezident İlham Əliyevin uğurlu sosial-iqsitadi siyasətinin mərkəzində dayanır. “Azərbaycan sosial dövlətdir. Bizim siyasətimizin mərkəzində Azərbaycan vətəndaşı, onun qayğıları, onun problemləri, onun təhlükəsizliyi, onun xoşbəxtliyi dayanır ” -deyə bəyan edən Prezident İlham Əliyevin əsas prinsipi ölkəsində hər bir vətəndaşın yaxşı yaşaması olmuşdur. Bunun üçün də Prezidentimiz daim sosial sahəyə xüsusi qayğı göstərmiş, bu sahədə sosial müdafiə və aktiv məşğulluq proqramlarının uğurla davam etdirilməsinə və sosial təminat sisteminin dəfələrlə artmasına nail olmuşdur. Buna misal olaraq vətəndaş müharibəsi veteranlarına, əlillərə evlərin verilməsini, işsizlərin dövlət tərəfindən yaradılan xüsusi qurumlar tərəfindən işlə təmin edilməsini, son illərdə əhaliyə verilən pensiya, təqaüdlərin, sosial ödənişlərin və maaşların nəzərə çarpacaq dərəcədə artmasını misal göstərə bilərik. Habelə, sosial təminat sistemində humanist yanaşmalara əsaslanan islahatlar da aparılmışdır. Bunlardan biri də sağlamlıq imkanları məhdud olan uşaqların həm də ailə başçısını itirmiş uşaqlara görə verilən müavinətdən yararlana bilməsidir. 2020-ci ilin əvvəlindən müaviq kateqoriyadan olan uşaqlara ailə başçısını itirməsinə görə pensiyanı sağlamlıq imkanlarının məhdudluğuna görə müavinətlə birgə ala bilmək hüququ verilib. Günümüzdə ölkədə həyata keçirilən ən yaxşı islahatlardan biri də gəncləşmə siyasətidir. Hakimiyyətin ön cərgəsinə artıq savadlı, innovativ gənclər gətirilir. Son illər sosial-siyasi sferada olan dəyişiklər onu deməyə əsas verir ki, hakimiyyət innovativ düşüncəli kadrların, gənclərin əsas vəzifələrə təyin olunmasıyla idarəçiliyin daha səmərəli təşkilinə nail olub. Gənc kadrların hazırlanmasıyla bağlı həyata keçirilən islahatlarda Heydər Əliyev fondunun rolu danılmazdır. Dövlət başçımız həmçinin bildirib ki, yaşlı nəslin təcrübəsinin və gənc nəslin müasirliyinin, novatorluğunun sintezi ölkənin uğurlu inkişafına təsir göstərir. Bu gün Azərbaycanda hər bir gəncin imkanlarını reallaşdırması üçün geniş imkanlar açılır və onlar stimullaşdırılır. Hazırda gənclərin öz lahiyələrini reallaşdırması üçün istər Gənclər və İdman Nazirliyi, Təhsil Nazirliyi, istər başqa dövlət qurumları və Gənclər Fondu dəstək göstərir. Dövlət qurumları nəinki gənclər təşkilatlarının, o cümlədən fərdi gənclərin də layihələrinin maliyyələşməsinə və reallaşmasına yardım edir. Gəncləşmə siyasətinin uğurlu nəticəsi olaraq onu da göstərə bilərik ki, əvvəllər cəmiyyət yaşlı müəllim, yaşlı həkim axtarışında idisə hazırda bunun əksi olaraq gənc və innovativ müəllim, cavan və savadlı həkim axtarışındadır. Bunları nəzərə alsaq deyə bilərik ki, həqiqətən də Prezidentimizin gəncləşmə siyasəti uğurla həyata keçir.
Nilufər Orucova
Azərbaycan Texnologiya Universitetinin
Ümumi və tətbiqi fizika kafedrasının müəllimi
Azərbaycan - regionun lider ölkəsi Müstəqillik əldə etdiyimiz ilk illərdə iqtisadiyyatımız çox çətin vəziyyətdə idi. Bu azmış kimi ölkəmiz bir də Qarabağ savaşı ilə üz-üzə qalmışdı. Bədxah qonşularımızın illər öncədən gizli-gizli hazırlıq görüb, ani hücum etmələri dövlətimizi və xalqımızı çox çətin vəziyyətə salmışdı. Həmin illərdə ölkəmizdə istehsalat kəskin azalmış, ÜDM minimum səviyyəyə enmişdi. 1994-cü ilin mayında imzalanan atəşkəsdən sonra dövlətin qarşısında uzun bir yol var idi. Bu yol inkişaf yolu idi. İqtisadi inkişafa nail olmaq üçün əsas prioritet məsələ infrastrukturun bərpa edilməsi idi. Eyni zamanda ölkəyə xarici investisiya cəlb edilməli, ölkə iqtisadiyyatına təkan verilməli idi. 1994-cü il xalqımız üçün bir dönüş ili olacaqdı. Ümummilli lider Heydər Əliyevin uzaqgörən siyasəti nəticəsində eyni ildə həm atəşkəsin imzalanması, həm də Əsrin Müqaviləsinin həyata keçirilməsi ölkə müstəqilliyimizi möhkəmləndirdi. Həmin ilin 20 sentyabrında dünyanın nəhəng neft şirkətləri ilə dövlətimiz arasında Əsrin Müqaviləsi imzalandı. Bu müqavilənin imzalanması ayrı-ayrı böyük xarici şirkətlərin də diqqətini çəkdi. Ard-arda ölkəyə xarici investisiyalar cəlb olunmağa başladı. Əsrin Müqaviləsindən təkan alan ölkə iqtisadiyyatının ətalətə uğramaması üçün bunun davamı gəlməli idi. BMT-nin Davamlı inkişaf konsepsiyasını rəhbər tutan Ulu öndər Heydər Əliyev ölkənin inkişafı naminə bir çox mühüm qərarlara imza atmışdır. 2 mart 2001-ci il tarixli, 636 saylı sərəncamı ilə “Yoxsulluğun Azaldılması və İqtisadi İnkişaf üzrə Dövlət Proqramı”, Azərbaycanda Davamlı İnsan inkişafı strategiyası”nın hazırlanması haqqında 30 oktyabr 2001-ci il tarixli, 198 saylı sərəncam və s. kimi sərəncamlarla iqtisadi inkişafın qanuni əsasları formalaşdırılmışdır. Heydər Əliyev siyasi-iqtisadi irsinin davamı olaraq Prezident İlham Əliyev də möhkəm təməllər üzərində duran Azərbaycan iqtiyyatının davamlı inkişafı yolunda böyük işlər görməyə davam edir. Sadəcə enerji siyasətini gözdən keçirsək qloballaşan dünya iqtisadiyyatı ilə necə ayaqlaşdığımızı aydın görmək olar. Ölkəmiz hal-hazırda neft-qaz ixracı ilə bərabər elektrik enerjisi də ixrac etməyə başlayıb. Dörd qonşu ölkə - Türkiyə, Gürcüstan, İran və Rusiyaya elektrik enerjisi ixrac olunur. Bakı-Tbilisi-Ceyhan və Bakı-Novorossiysk kimi neft kəmərləri ilə yanaşı, Cənub qaz dəhlizi ilə də qaz ixrac edən ölkəmiz dönyanın böyük neft-qaz ixrac edən ölkələri sırasına qatılıb. Cənub qaz dəhlizi həm Türkiyənin, həm də Avropanın enerji təhlükəsizliyinin təmin edilməsində böyük rol oynayır. Bu həm də bizim siyasi sabitliyimiz deməkdir, Rusiya asılılığının azaldılması deməkdir, müstəqilliyin qarantı deməkdir. Avropanın qazla təmin edilməsi baxımından da Rusiya asılılığının azaldılması deməkdir. Yuxarıda sadalanan bütün nüanslar ölkəmizi strateji baxımdan bütün dünya ölkələri üçün vacib bir ölkəyə çevirib. İndiki və gələcək nəsillərin üzərinə düşən isə əldə edilən siyasi və iqtisadi nailiyyətləri qoruyub saxlamaq, bununla bərabər texnoloji yeniliklərlə davamlı inkişafı təmin etməkdir.
Azərbaycan qadını bütün dövrlərdə dövlətə öz sədaqəti və fədəkarlığı ilə seçilmişdir Azərbaycan qadını ifadəsi iradə və mərdliyi, saflığı və sədaqəti, zəka və müdrikliyi təcəssüm etdirir. Azərbaycan tarixində Azərbaycan qadının müstəsna rolu daima mövcud olmuşdur. Belə ki, milli-mənəvi dəyərlərimizin inkişaf etməsində, eləcə də sürətlə inkişaf edən modern və dayanıqlı iqtisadiyyata malik olan ölkə kimi formalaşmaqda qadınlarımızın rolu misilsizdir. Ümumiyyətlə istənilən cəmiyyətdə sürətli inkişafın təməlini məhz insanların fəallıq dərəcəsi və bunun üçün yaradılan şərait təşkil edir. Respublikamızda bərqərar olan demokratik mühit ölkə qadınlarının zəngin potensialının gerçəkləşdirilməsi üçün əlverişli zəmin yaradır. Azərbaycanda qadın siyasətinin təməli ümummilli lider Heydər Əliyev tərəfindən qoyulmuşdur. Azərbaycan cəmiyyətində qadın siyasətinin tətbiq edilməsi, dövlətin idarə edilməsində qadınların irəli çəkilməsi ümummilli lider Heydər Əliyevin dövlətçilik siyasətində öz əksini tapmış ən aktual məsələlərdən biri olmuşdur. Ümummilli Lider Heydər Əliyev qadın şəxsiyyətinə daima böyük hörmətlə yanaşırdı. Ulu Öndər ölkə həyatının bütün sahələrində qadınlara xüsusi yer ayırırdı, onların hərtərəfli fəaliyyətinə geniş imkanlar yaradırdı. 1995-ci ildə YAP Qadınlar Şurasının yaradılması və qadınların bu şurada fəal iştirakı bu siyasətin bariz nümunəsidir. YAP bu baxımdan digər partiyalar üçün bir örnək oldu. 1998-ci il sentyabrın 25-də keçirilmiş Azərbaycan qadınlarının ilk qurultayı dövlət qadın siyasətinin tarixində baş vermiş mühüm hadisədir. Respublikamızdada cərəyan edən mürəkkəb ictimai-siyasi proseslərin gedişində Azərbaycan qadınlarının daim milli dövlətçilik mövqeyindən çıxış etdiklərini nümayiş etdirən qurultayda mühüm məsələlər müzakirə olunmuşdur. 1998-ci ildən etibarən hər beş ildən bir Azərbaycan qadınlarının qurultayları keçirilir. Bu qurultaylar dövlət qadın siyasəti sahəsində ən əlamətdar və böyük hadisələrdən biri kimi qiymətləndirilir. Bu siyasət Prezident İlham Əliyev tərəfindən ardıcıl surətdə davam etdirilir. Azərbaycanda qadınların inkişafı məqsədilə Prezident İlham Əliyevin rəhbərliyi altında çoxlu sayda fərman və sərəncamlar verilib, qanunvericilik aktları qəbul edilib. Prezident İlham Əliyev Azərbaycan qadınının potensialına, onların ictimai-siyasi həyatdakı fəaliyyətinə xüsusi diqqət ayırır. 2006-cı ildə Prezident İlham Əliyevin sərəncamı ilə Qadın Problemləri üzrə Dövlət Komitəsi Ailə, Qadın və Uşaq problemləri üzrə Dövlət Komitəsi kimi yenidən formalaşdırılmışdır. Hazıda Azərbaycanda Ailə, Qadın və Uşaq Problemləri üzrə Dövlət Komitəsi ailə, qadın və uşaq problemləri ilə iş sahəsində dövlət siyasətini və tənzimlənməsini həyata keçirən mərkəzi icra hakimiyyəti orqanıdır. Xüsusilə qeyd etmək lazımdır ki, YAP-ın tərkibində fəaliyyət göstərən qadınlarımızın ən nümunəvi örnəyi Mehriban xanım Əliyevadır. Azərbaycan cəmiyyətində qadınların uğurlu fəaliyyətinin sürətli inkişafı Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın adı ilə bağlıdır. Birinci vitse-prezident Mehriban xanım Əliyeva ölkədə müasir Azərbaycan qadınının ən nümunəvi təmsilçisidir. Onun UNESCO-nun və müsəlman aləmini əhatə edən ISESCO-nun sülhməramlı səfiri kimi ölkəmizi həm Şərq və Qərbdə, həm də Asiya və Avropada təmsil etməsi Azərbaycanın “Yumşaq güc” siyasətinin formalaşmasında və uğurla həyata keçirilməsində rolu böyükdür. Mehriban xanımın birbaşa təşəbbüsü ilə Azərbaycan qadınının istedadı bütün dünyada nümayiş olunur. Azərbaycan qadını qəhrəmanlığı və igidliyi ilə daima seçilmişdir. Öz varlığı ilə cəmiyyətə sevgi bəxş edən, özündə mərhəmət, ləyaqət, ismət və sədaqət sözlərini ehtiva edən Azərbaycan qadını adı bir o qədər də dərin cəsurluq simvoludur. Azərbaycan qadınları tarix boyu ölkənin ictimai-siyasi, mədəni həyatında fəal iştirak etmiş, Vətənin müdafiəsində fədakar xidmətlər göstəriblər. Ölkəmizin ictimai-siyasi həyatında fəal iştirak edən qadınlarımız Vətənin müdafiəsində də daima fədakarlıq, şücaət göstəriblər. Vətən uğrunda neçə-neçə qadın şəhid olub. Onlardan 2 nəfəri Azərbaycanın Milli Qəhrəmanı adına layiq görülüb. Qarabağda davam edən 44 günlük döyüşlərdə Azərbaycan qadını əsgərlərimizin yanında oldu, gecə-gündüz onlar üçün dualar etdi. Yaralı əsgərlərimizə tibbi yardım göstərən həkim qadınlarımız hər bir əsgərimizin qayğısına qaldı. Hazırda Azərbaycan Ordusunun bütün qoşun növlərində, xüsusi təyinatlı hərbi təhsil müəssisələrində, hərbi tibb ocaqlarında və digər sahələrdə yüzlərlə qadın xidmət edir və vətən qarşısında vəzifə borclarını şərəf və ləyaqətlə yerinə yetirirlər. Azərbaycan qadınının ədalət, humanizm, xeyriyyəçilik və digər bəşəri prinsiplərə söykənən, sərhəd tanımayan çoxşaxəli fəaliyyəti nəinki Azərbaycan, hətta dünya qadınları üçün nümunə və örnəkdir. Azərbaycan qadını bu gün dünya qadınları hərəkatının ön cərgəsində ağlı, zəkası, istedadı, ləyaqəti ilə təmsil olunur. Prezident İlham Əliyevin hər il 8 Mart Beynəlxalq Qadınlar Günü münasibətilə Azərbaycan qadınlarına ünvanladığı təbrik dövlət başçısının qadınlara olan diqqətinin və ehtiramının təcəssümüdür. Dövlət başçısı respublikamızın qazandığı uğurlarda qadınların rolunu yüksək qiymətləndirir: “Biz hamımız dinamik inkişaf edən ölkəmizin irimiqyaslı iqtisadi layihələrin iştirakçısı kimi əldə etdiyi yüksək göstəricilərlə haqlı olaraq fəxr edirik. Bu tərəqqinin bəhrələri respublikamızın hər bir guşəsində özünü aydın hiss etdirir. Həmin nailiyyətlərdə Azərbaycan qadınlarının böyük rolu danılmazdır. Qədim zamanlardan bəri Vətənə və torpağa sədaqəti ilə seçilən qadınlarımız milli məfkurəyə sadiq qalaraq bu gün də suveren Azərbaycan Respublikasının güclənməsi naminə töhvələr verirlər. Onlara xas olan işguzarlıq, müdriklik, yüksək daxili mədəniyyət və xalqımızın yüzillər boyu təşəkkül tapmış zəngin milli-mənəvi sərvətlərinə sədaqət müasir Azərbaycan qadınının ictimai həyatımızda mövqeyini və simasını müəyyən edir”.
Məmmədova Ayşən Viladdin qızı
Azərbaycan Texnologiya Universitetinin
İqtisadiyyat və idarəetmə fakültəsi Marketinq kafedrasının assistenti
