Azərbaycan Texnologiya Universitetində Zəfərin 5 illiyi çərçivəsində vətənpərvərlik mövzusunda görüş keçirilib.

Tədbirdə Xüsusi Təyinatlı Qüvvələrin Şəhid Ailələri və Qaziləri İctimai Birliyinin sədri Nemət Abdullayev, sədr müavini Elçin Həsənov, qazi Ramil Qasımov, həmçinin Gəncə Şəhər İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri, ehtiyatda olan mayor Mahir Hüseynov iştirak edib.

Sosial məsələlər və ictimaiyyətlə əlaqələr üzrə prorektor Şahmar Həsənov tədbiri açaraq qonaqları salamlayıb, tələbələrə vətənpərvərlik ruhunun aşılanmasının əhəmiyyətindən danışıb. Görüşdə çıxış edən qonaqlar Vətən müharibəsində qazandığımız qələbədən, şəhidlərimizin qəhrəmanlığından və gənclərin vətənə sədaqət ruhunda tərbiyə olunmasının vacibliyindən bəhs ediblər.

Bu tədbir SDG 16 (Sülh, ədalət və güclü institutlar) ilə birbaşa əlaqəlidir. Vətənpərvərlik ruhunun gənclərə aşılanması cəmiyyətin dayanıqlı və məsuliyyətli vətəndaşlar əsasında formalaşmasına xidmət edir. Şəhid və qazilərin iştirakı ilə keçirilən görüşlər tarixi yaddaşın qorunmasına və milli həmrəyliyin möhkəmlənməsinə töhfə verir. Bu isə güclü və dəyərlərə əsaslanan cəmiyyətin inkişafını dəstəkləyir.

Tələbələr üçün unudulmaz təəssürat yaradan tədbir sonda xatirə fotosu ilə yekunlaşıb.

Azərbaycan Texnologiya Universitetində (ATU) şanlı Zəfərin 5 illiyinə həsr olunmuş fakültələrarası futzal birinciliyi təşkil olunub. 

Yarışda Qida mühəndisliyi (QM) fakültəsi (2 komanda), Avtomatika, telekommunikasiya və informatika (ATİ) fakültəsi (2 komanda), Yüngül sənaye mühəndisliyi və logistika (YSML) fakültəsi, İqtisadiyyat və idarəetmə (İİE) fakültəsinin komandaları, eləcə də ATU-nun əcnəbi tələbələrdən ibarət yığma komandası iştirak edib.

Püşkatmadan sonra baş tutan ilk yarışı ATU-nun rektoru Yaşar Ömərov, proprektorlar, dekanlar, kafedra müdirləri və digər rəhbər heyət izləyib. Bu oyunda YSML1 komandası ilə əcnəbi tələbələr komandası qarşılaşıb və oyun yerli tələbələrin qalibiyyəti ilə sonlanıb. 

İkinci oyunda QM1 komandası ilə ATİ2 komandası mübarizə aparıb və bu oyun 3:2 hesabı ilə nəticələnib.

Üçüncü görüşdə İE komandası ATİ1 komandası qarşı-qarşıya gəlib və ATİ1 komandasının xeyrinə yekunlaşıb. 

Dördüncü oyunda YSML komandası ilə QM2 komandası üz-üzə gəlib və gərgin mübarizə 2:1 hesabı ilə başa çatıb.

Qeyd edək ki, qalib komandalar sabah final uğrunda mübarizə aparacaqlar

Azərbaycan Texnologiya Universitetinin (ATU) İnnovasiya Mərkəzinin təşkilatçılığı ilə universitetin tələbələri və tədqiqatçıları tərəfindən hazırlanmış ilk süni intellekt əsaslı ağıllı elektrik avtomobilinin təqdimatı keçiriləcək.

“ATU-Car” adlanan innovativ layihənin təqdimatı 5 noyabr 2025-ci il tarixində, saat 13:00-da baş tutacaq. Təqdimat Zəfər Gününə həsr olunmuş “Elm və texnologiyaların müasir trendləri” adlı Respublika Elmi-Praktik Konfrans çərçivəsində reallaşacaq.

Layihə çərçivəsində ölkədə ilk dəfə olaraq bir neçə müasir texnologiya bir sistemdə birləşdirilib. Ağıllı avtomobil günəş panelli enerji sistemi, universitet istehsalı olan özəl batareya texnologiyası, hərəkət sensorları vasitəsilə enerji bərpası, GPS əsaslı idarəetmə, həmçinin 0-dan proqramlaşdırılmış “beyin” sistemi ilə təchiz olunub.

Layihə enerji səmərəliliyi, ekoloji təmizlik və intellektual idarəetmə sahəsində universitetin mühüm elmi nailiyyətlərindən biri olmaqla ATU-nun innovasiya yönümlü inkişaf strategiyasının növbəti mərhələsini nümayiş etdirir.

Bu təşəbbüs SDG 7 (Təmiz və əlçatan enerji), SDG 9 (Sənaye, innovasiya və infrastruktur) və SDG 13 (İqlim dəyişikliklərinə qarşı mübarizə) ilə birbaşa əlaqəlidir. Günəş enerjisi, batareya texnologiyası və ağıllı idarəetmənin bir sistemdə birləşdirilməsi yaşıl innovasiyanın praktik nümunəsini təqdim edir. Tələbə və tədqiqatçıların iştirakı ilə belə layihənin hazırlanması universitetin texnoloji yaradıcılıq potensialını nümayiş etdirir. Bu yanaşma ekoloji təmiz nəqliyyat və enerji səmərəliliyi istiqamətində mühüm töhfə kimi qiymətləndirilə bilər.

Azərbaycan Texnologiya Universitetində (ATU) Elmi Şuranın növbəti iclası keçirilib. Universitetin rektoru, Elmi Şura sədri Yaşar Ömərov kvorumu nəzərə alaraq iclası açıq elan edib və gündəlikdə duran məsələləri diqqətə çatdırıb.

İclasda Tədrisin təşkili və idarə edilməsi şöbəsinin müdiri Cəsarət Şabanovun hesabatı dinlənilib. Daha sonra sosial məsələlər və ictimaiyyətlə əlaqələr üzrə prorektor Şahmar Həsənov tədris-metodiki vəsaitlərin təsdiqi, ardınca monitorinq qrupunun meyarlarının təsdiqinə dair məruzə ilə çıxış edib. İnsan resursları şöbəsinin müdiri İlham Əlizadə isə ştat cədvəlində dəyişiklə bağlı çıxış edib. 

İclas çərçivəsində hesabat və təkliflərlə bağlı müvafiq qərarlar qəbul edilib. Sonda Ümumi və tətbiqi riyaziyyat kafedrasının dosenti Zərdan Səmədov elmi-pedaqoji sahədə uzunmüddətli və səmərəli fəaliyyətinə görə 75 illik yubileyi münasibətilə təltif edilib.

Azərbaycan Texnologiya Universitetinin Tələbə Gənclər Təşkilatının nəzdində fəaliyyət göstərən Psixologiya Klubunun təşkilatçılığı ilə tələbələr üçün maarifləndirici görüş keçirilib.

Təlim universitetin psixoloqu Fərqanə Həsənova tərəfindən təqdim olunub. O, tələbələrlə psixoloji rifahın qorunması və şəxsi inkişafın gücləndirilməsi istiqamətində öz peşəkar yanaşmalarını bölüşüb.

Sessiya zamanı gündəlik həyatda qarşılaşılan psixoloji çətinliklər, emosiyaların düzgün yönləndirilməsi və streslə mübarizə üsulları müzakirə olunub. Eyni zamanda iştirakçılara özünü daha yaxşı tanımaq və daxili balansı qorumaq üçün praktik tövsiyələr verilib.

Təlim açıq dialoq şəraitində keçib, tələbələr aktiv iştirak edərək mövzu ilə bağlı fikir və suallarını səsləndiriblər.

Azərbaycan Texnologiya Universitetinin (ATU) Tələbə Gənclər Təşkilatı nəzdində fəaliyyət göstərən İntelektual Oyun Klubu 28 oktyabr 2025-ci il tarixində Gəncə şəhərində keçirilən “GİNius tələbə-gənclər kuboku 2025” yarımfinal mərhələsində yüksək nəticə göstərərək II yerə layiq görülüb. Yarış Gəncə Gənclər Evində təşkil olunub və müxtəlif ali təhsil müəssisələrinin komandaları arasında gərgin və maraqlı mübarizə şəraitində keçib.

Layihə çərçivəsində keçirilən “Fibonacci” intellektual-əyləncəli oyunda tələbələr bilik və məntiq bacarıqlarını sınayıblar. ATU komandası həm hazırlıq səviyyəsi, həm bilik potensialı, həm də güclü komanda ruhu ilə seçilərək uğura layiq görülüb.

Qeyd edək ki, bu cür intellektual yarışlar tələbələrin analitik düşüncə bacarıqlarını inkişaf etdirməsi, dünyagörüşünün genişlənməsi və sağlam rəqabət mühitinin formalaşması baxımından böyük əhəmiyyət kəsb edir.