Azərbaycan Texnologiya Universitetində “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 layihəsi ilə bağlı məlumatlandırma günü keçirilib.
Tədbir Avropa Birliyi tərəfindən maliyyələşdirilən, Azərbaycan Dövlət İqtisad Universitetinin koordinatorluğu ilə həyata keçirilən, Azərbaycan Texnologiya Universitetinin tərəfdaş olduğu REFRESH layihəsinin Danimarka səfərinə həsr edilib.
Görüşdə layihə meneceri, tədris işləri üzrə prorektor Raqif Hüseynov REFRESH layihəsinin məqsədi, yerli və xarici tərəfdaşları, cari fəaliyyət planı barədə məlumat verib, cari ilin 14-20 aprel tarixlərində Danimarka Texniki Universitetinin (DTU) təşkilatçılığı ilə baş tutan səfərin nəticələrini təqdim edib, əldə olunan təcrübələri bölüşüb.
Sonda tədbir iştirakçılarını maraqlandıran suallar cavablandırılıb.
Azərbaycan Texnologiya Universitetində (ATU) 2024/2025-ci qəbul ili ilə bağlı məktəblilər arasında tanıtım kampaniyasına start verilib. Kampaniya çərçivəsində Qida mühəndisliyi fakültənin nəzdində fəaliyyət göstərən Qida mühəndisliyi və ekspertiza, Ətraf mühitin mühafizəsi kafedralarının əməkdaşları məktəblərdə yuxarı sinif şagirdləri ilə görüşüblər.
Görüş zamanı baş tutan baş tutan təqdimatlarda kafedraların əməkdaşları əmək bazarındakı perspektivlər, ATU kampusu, tədris olunan ixtisaslar, müsabiqə və keçid balları, təqaüd və təcrübə proqramları, o cümlədən universitetin maddi-texniki bazası və tələbələrə yaradılan şərait barədə ətraflı məlumat verib, şagirdlərin ünvanladığı sualları cavablandırıblar.
Azərbaycan Texnologiya Universitetinin (ATU) təşkilatçılığı ilə Ulu Öndər Heydər Əliyevin 101 illiyinə həsr edilmiş "Dördüncü Sənaye İnqilabı dövründə elm və texnologiyaların mövcud vəziyyəti və inkişaf perspektivləri” adlı Beynəlxalq Elmi-Praktik Konfrans keçirilib.
Tədbirdən əvvəl konfrans iştirakçıları Ulu Öndər Heydər Əliyevin Heydər Əliyev Mərkəzində ucaldılmış abidəsini ziyarət edib, önünə gül dəstələri düzüblər.
Tədbir Azərbaycan Respublikasının Dövlət Himninin səsləndirilməsi, Ümummilli lider Heydər Əliyevin və torpaqlarımızın ərazi bütövlüyü uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə açıq elan edilib.
ATU-nun rektoru v.m.i.e. dos. Yaşar Ömərov konfransda giriş sözü ilə çıxış edib, mövzunun aktuallığına diqqət çəkərək bildirib ki, Dördüncü Sənaye İnqilabı ilə ayaqlaşmaq, biliyə və süni intellektə əsaslanan informasiya cəmiyyətinin formalaşdırılması, eləcə də insan kapitalına investisiya qoyuluşu dövlətimizin strateji hədəflərindəndir və bütün bunlar yüksək ixtisaslı insan resursları, yeni elmi yanaşmalar və çevik innovasiya fəallığı tələb edir. Odur ki, 15 ölkənin elm adamlarının bir araya gəldiyi bu konfrans elmi platforma kimi olduqca əhəmiyyətlidir.
Tədbirdə Gəncə şəhər İcra Hakimiyyəti başçısının müavini Adil Tağıyev, Azərbaycan Texniki Universitetinin rektoru, prof. Vilayət Vəliyev, AMEA-nın vitse-prezidenti akademik İradə Hüseynova, AR Elm və Təhsil Nazirliyinin Radiasiya Problemləri İnstitutunun Baş direktoru, AMEA-nın müxbir üzvü prof. İslam Mustafayev, Macarıstanın Sopron Universitetinin rektoru prof. Fabian Atilla, Polşanın Varşava Ekologiya və Menecment Universitetinin rektoru prof. Yanuş Mroviç, Ankara Hacı Bayram Veli Universitetinin prorektoru prof. Metin Orbay, Rumıniyanın “Gheorghe Asachi” İasi Texniki Universitetinin beynəlxalq əlaqələr üzrə prorektoru prof. İrina Lungu və Azər Maya İstehsal QSC-nin direktoru Elvin Əliyev çıxış edərək konfransın işinə uğurlar arzu ediblər.
Daha sonra Türkiyənin Atatürk Universitetinin dosenti İlhan Volkan Önerin “Tullantıların alternativ enerjinin alınmasında tətbiqi”, Bolu Abant İzzet Baysal Universitetinin professoru Himmet Karadalın “Türk dünyasında innovasiyaların və sahibkarlığın inkişafı”, İspaniyanın Qranada Universitetinin Genetika kafedrasının professoru Federiko Zurita Martinezin “CRISPR-Cas9. İnsan xəstəliklərinin müalicəsi üçün molekulyar qayçı”, ATU-nun Ümumi və tətbiqi fizika kafedrasının müdiri professor Məntiq Cəfərovun “Elm, texnologiya və innovasiya üçbucağı davamlı inkişafın hərəkətverici qüvvəsi kimi”, ATU-nun doktorantı Kamran Qasımovun “Müasir dünyada süni intellektin rolu” başlıqlı məruzələri dinlənilib.
2 günlük beynəlxalq konfrans öz işini 11 istiqamət üzrə bölmələrdə davam etdirib. Konfransa 15 ölkə olmaqla 68 xarici, 15 yerli universitet, 10 elmi-tədqiqat institutu, 5 dövlət qurumu qatılıb, məcmuələr toplusuna 562 məqalə daxil olub ki, onların 19%-i xarici ölkələrin payına düşür.
Gənclərin İnkişaf və Karyera Mərkəzinin Gəncə-Daşkəsən Regional nümayəndəliyi tərəfindən Azərbaycan Texnologiya Universitetinin turizm ixtisasının tələbələri üçün
“Regionlarda ekoturizmin inkişafı və turizm sahəsində karyera perspektivləri” mövzusunda panel müzakirə təşkil edilib.
Spiker qismində Gəncə Regional Turizm İdarəsinin rəisi Zaur Bayramov, Azərbaycan Texnologiya Universitetinin İnnovasiya Mərkəzinin direktoru Şamo Salayev, Azərbaycan Texnologiya Universitetinin Ətraf mühitin mühafizəsi kafedrasının dosenti İrşad Abbasov və “Leon” hotelin əməliyyatlar üzrə meneceri Emin Məmmədov çıxış edib. Maraqlı keçən müzakirədə tələbələrin sualları cavablandırılıb.
Avropa Birliyinin maliyyələşdirdiyi, Azərbaycan Dövlət İqtisad Universitetinin (UNEC) koordinator, Azərbaycan Texnologiya Universitetinin tərəfdaş olduğu “Azərbaycan Universitetlərində Yaşıl və Dayanıqlı İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması - REFRESH” layihəsi çərçivəsində Danimarka Krallığının Danimarka Texniki Universitetinə (DTU) təcrübə səfəri baş tutub.
Səfərdə Azərbaycan Texnologiya Unversitetini layihə meneceri Tədris işləri üzrə prorektor Dr. Raqif Hüseynov təmsil edib.
Səfərin əsas məqsədi, yerli tərəfdaş univeristetlərin alternativ və bərpa olunan enerji sahəsi üzrə mövcud kurikulumların təkmilləşdirilməsi, innovativ yönümlü istiqamətləndirilməsidir.
5 günlük təcrübə səfəri müddətində DTU-nun REFRESH layihəsi üzrə təlimçiləri Mads Peter Sorensen, Jalal Kazempour, Per Sieverts Nielsen, Martin Brynskov, Ivano Eligio Castelli, Henrik Madsen və digərləri iştirakçılara universitetin bərpa olunan enerji mənbələri, bərpa olunan enerji istehsalının proqnozlaşdırılması (külək, günəş, su) və istehlakçı aspektindən uyğunlaşma, dayanıqlı enerji texnologiyaları üzrə mühəndislik ixtisasları üzrə bakalavr və magistratura proqramlarını təqdim ediblər. O cümlədən, dayanıqlı enerji sistemləri, sözügedən istiqamət üzrə fənlərin tədrisi zamanı süni intellektin istifadəsi, bərpa olunan enerji mənbələri - günəş və külək enerjisi, isitmə sistemləri, təkmilləşdirmək məqsədilə sillabusları təhlil etmiş və öz tövsiyələrini bildiriblər.
Təcrübə səfərinin növbəti günlərində səfər iştirakçılarının tərəfdaş yerli ali təhsil müəssisələrinin proqramının inkişaf etdirilməsi istiqamətində fikir mübadiləsinə dair "vörkşop" keçirilmişdir. Vörkşop çərçivəsində proqram portfolioları, məzmunu və tədris materialları haqqında geniş diskussiya həyata keçirilib.
Təcrübə səfərinin son günündə yerli tərəfdaşlar üçün təlim (ToT) keçirilib.
