Bu gün Eko Klubun təşkilatçılığı ilə “Dayanıqlı İnkişaf Məqsədlərində Biomüxtəlifliyin Rolu” mövzusunda tədbir keçirildi. Tədbir zamanı klubun fəal üzvü İsmayılov İsmayıl çıxış edərək biomüxtəlifliyin ətraf mühitin qorunmasında və davamlı inkişafın təmin edilməsindəki əhəmiyyətindən bəhs etdi.
Tədbirin əsas məqsədi gənclər arasında ekoloji şüurun artırılması və biomüxtəlifliyin qorunmasına yönəlik fəallığın təşviq olunması idi.
Bu fəaliyyət SDG 15 (Quruda həyat) və SDG 13 (İqlim dəyişikliklərinə qarşı mübarizə) ilə əlaqəlidir. Biomüxtəlifliyin davamlı inkişaf kontekstində rolunun vurğulanması gənclərdə ekoloji məsuliyyət və təbiətə həssas yanaşmanı gücləndirir. Belə maarifləndirici tədbirlər ekosistemlərin qorunmasının yalnız ekoloji deyil, həm də sosial-iqtisadi əhəmiyyətini önə çıxarır. Bu isə ətraf mühitin qorunmasına yönəlmiş ictimai fəallığın artmasına stimul verir.
Eko Klub olaraq gələcəyimiz naminə ekoloji dəyərləri qorumağa davam edəcəyik!
Azərbaycan Texnologiya Universiteti (ATU), Azərbaycan Basketbol Federasiyası (ABF) və "Rövşən Oğuz Qrup" MMC-nin birgə təşkilatçılığı ilə Ümummilli lider Heydər Əliyevin anadan olmasının 102 illiyinə həsr olunmuş universitetlərarası basketbol turnirinin açılışı baş tutub.
Tədbirdə Azərbaycan Texnologiya Universitetinin rektoru Yaşar Ömərov, Gəncə şəhər İcra Hakimiyyəti başçısının müavini Adil Tağıyev, YAP Gəncə şəhər təşkilatının sədri Bayram Aslanov, Azərbaycan Dövlət Aqrar Universitetinin rektoru Zəfər Qurbanov və digər müəssisə rəhbərləri, şəhər ictimaiyyəti, tələbələr, idmançılar iştirak edib.
Açılış zamanı Azərbaycan Respublikasının Dövlət Himni səsləndirilib, Ulu öndər Heydər Əliyevin və torpaqlarımızın müstəqilliyi və ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edilib. Daha sonra konsert proqramı təqdim edilib.
Yarışa püşkatma ilə start verilib. İki gün davam edəcək universitetlərarası basketbol yarışını ABF hakimlər kollegiyasının müvafiq lisenziyasına malik meydan və masa hakimləri idarə edir. Kubok uğrunda Azərbaycan Texnologiya Universiteti, Azərbaycan Dövlət Aqrar Universiteti, Gəncə Dövlət Universiteti və Mingəçevir Dövlət Universitetinin komandaları mübarizə aparır. İlk oyun Azərbaycan Texnologiya Universiteti və Mingəçevir Dövlət Universitetinin komandaları arasında baş tutub, müvafiq olaraq 119:37 xal hesabı ilə nəticələnib.
Qeyd edək ki, ATU universitetlərarası basketbol yarışını artıq üçüncü ildir təşkil edir. Yarışın keçirilməsində məqsəd gənclər arasında sağlam həyat tərzinin təşviqi, idmana marağın artırılması, ali təhsil müəssisələri arasında əməkdaşlığın gücləndirilməsi, tələbələrin asudə vaxtlarının səmərəli təşkili və komandada işləmə bacarıqlarının inkişaf etdirilməsidir.
Bu təşəbbüs SDG 3 (Sağlamlıq və rifah) və SDG 17 (Məqsədlər üçün tərəfdaşlıqlar) ilə yanaşı SDG 4 (Keyfiyyətli təhsil) ilə də əlaqələndirilə bilər. İdman yarışları gənclər arasında sağlam həyat tərzinin təşviqi ilə yanaşı, komanda işi, nizam-intizam və sosial ünsiyyət bacarıqlarının inkişafına da xidmət edir. Fərqli universitetlərin bir idman platformasında bir araya gəlməsi institusional əməkdaşlığı və tələbələrarası əlaqələri gücləndirir. Bu isə təhsil mühitində həm fiziki, həm də sosial rifahın inkişafını dəstəkləyir.
Azərbaycan Texnologiya Universitetində (ATU) gənc müəllimlərin peşəkar inkişafına dəstək məqsədilə təcrübəli akademik heyətin növbəti ustad dərsləri təşkil edilib.
Bu dəfə Avtomatika və informasiya texnologiyaları kafedrasının müdiri dosent Rövşən Qasımov “Yeni təlim və tədris metodları və interaktiv öyrənmənin təşviqi” mövzusunda master-klass keçib.
Təlimdə Avtomatika, telekommunikasiya və informatika fakültəsinin tabeliyində fəaliyyət göstərən Avtomatika və informasiya texnologiyaları, Kompüter mühəndisliyi və telekommunikasiya, Ümumi və tətbiqi fizika, eləcə də Ümumi və tətbiqi riyaziyyat kafedralarının müəllimləri iştirak ediblər.
Rövşən Qasımov ustad dərsi zamanı müxtəlif praktik nümunələr təqdim edib, gənc müəllimlərin tədris zamanı qarşılaşa biləcəkləri situasiyalarla bağlı məsləhətlər verib və onların həlli yollarını izah edib.
Tədbir qarşılıqlı müzakirələr şəklində keçib, iştirakçılar öz təcrübələrini bölüşüb, suallarını ünvanlayaraq müzakirələrdə fəal iştirak ediblər.
Azərbaycan Texnologiya Universiteti ilə İnnovasiya və Rəqəmsal İnkişaf Agentliyi (İRİA) növbəti əməkdaşlıq mərhələsinə qədəm qoyur. Bu məqsədlə İRİA nümayəndə heyətinin ATU-ya səfəri baş tutub. Səfər çərçivəsində ATU-nun rektoru Yaşar Ömərovun İRİA nümayəndə heyətini təmsil edən İnformasiya təhlükəsizliyi departamentinin müdiri Şahmar Hacıyəhyayev, İT və informasiya təhlükəsizliyi şöbəsinin müdiri İlkin Əzizov, Kibertəhlükəsizlik üzrə davamlı inkişaf və araşdırma şöbəsinin qrup rəhbərləri Xəyyam Məsiyev və Gülnar Mirhüseynova ilə görüşü baş tutub.
Rektor Yaşar Ömərov görüş zamanı qeyd edib ki, rəqəmsal bacarıqların inkişafı və kibertəhlükəsizlik sahəsində kadr hazırlığının gücləndirilməsi universitetin əsas prioritetlərindəndir. Rektor bu əməkdaşlığın tərəflər üçün qarşılıqlı faydalı olacağını və tələbələrin innovativ mühitə inteqrasiyasına töhfə verəcəyi vurğulayıb.
Görüş zamanı Azərbaycan Kibertəhlükəsizlik Mərkəzinin həyata keçirdiyi, ölkədə kibertəhlükəsizlik sahəsində kadr potensialının artırılmasını hədəfə alan “Beyin Mərkəzi” layihəsi çərçivəsində əməkdaşlıq imkanları müzakirə edilib.
Müzakirələr zamanı ATU-da kibertəhlükəsizlik ixtisası üzrə dərslərin təşkili, müəllimlər üçün master-klassların keçirilməsi, tələbələr üçün hakatonların təşkil edilməsi, kibertəhlükəsizlik və informasiya təhlükəsizliyi ixtisaslarının kurikulum və sillabuslarının yenilənməsi və əmək bazarının tələblərinə uyğunlaşdırılması istiqamətində də müvafiq addımlar atılmasına dair qərar verilib.
Görüş çərçivəsində İRİA-nın nümayəndə heyəti ATU-nun Kibertəhlükəsizlik laboratoriyası ilə tanış olub. Tanışlıq zamanı ATU-nun Kibertəhlükəsizlik laboratoriyasının bazasında tələbələrin praktiki bacarıqlarının artırılması məqsədilə “Cyber Club”un yaradılması, burada mütəmadi olaraq onlayn və oflayn formatda “workshop”ların təşkili ilə bağlı razılıq əldə edilib.
Bu təşəbbüs SDG 9 (Sənaye, innovasiya və infrastruktur), SDG 4 (Keyfiyyətli təhsil) və SDG 17 (Məqsədlər üçün tərəfdaşlıqlar) ilə sıx bağlıdır. Kibertəhlükəsizlik üzrə kurikulumların yenilənməsi, hakatonların təşkili və praktiki klub fəaliyyətlərinin yaradılması rəqəmsal bacarıqların sistemli inkişafına şərait yaradır. Dövlət agentliyi ilə universitet arasında qurulan bu əməkdaşlıq modelinin əsas üstünlüyü təhsil məzmununun əmək bazarının çağırışlarına uyğunlaşdırılmasıdır. Bu isə rəqəmsal təhlükəsizlik sahəsində peşəkar kadr potensialının gücləndirilməsinə xidmət edir.
Azərbaycan Texnologiya Universitetində (ATU) "İnsan Hüquqları Aylığı" çərçivəsində Konstitusiya və Suverenlik İlinə həsr edilmiş "Dini dözümlülük və insan hüquqları" mövzusunda tədbir keçirilib. Tədbir ATU, Dini Qurumlarla İş üzrə Dövlət Komitəsinin (DQİDK) Gəncə-Daşkəsən regional bölməsi və Ombudsmanın Gəncə Regional Mərkəzinin həmtəşkilatçılığı ilə baş tutub.
Tədbiri Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru Şahmar Həsənov açıq elan edərək tələbələrə mövzunun əhəmiyyətindən bəhs edib. Bildirib ki, İnsan Hüquqları Aylığı çərçivəsində keçirilən tədbirin məqsədi insan hüquqlarının və hüquq bərabərliyi üzərində qurulmuş multikulturalizm dəyərlərini təbliğ etmək, eləcə də cəmiyyətdə insan ləyaqətinə hörmətin, insan hüquqlarına əməl olunmasının zəruriliyini önə çəkməklə humanizm keyfiyyətlərini formalaşdırmaqdan ibarətdir.
Daha sonra DQİDK-nın Gəncə-Daşkəsən regional bölməsinin müdiri Həsən Məmmədov, Ombudsmanın Gəncə Regional Mərkəzinin rəhbəri Səbuhi Abbasov çıxış edib. Çıxışlarda qeyd edilib ki, hər il 18 may – 18 iyun tarixləri İnsan Hüquqları Aylığı elan edilir və bu ilki aylıq Ümummilli lider Heydər Əliyevin 102 illiyinə, Ümumdünya İnsan Hüquqları bəyannaməsinin 77 illiyinə, "İnsan hüquqlarının müdafisəinə dair Dövlət Proqramı"nın isə təsdiq edilməsinin 27 illiyinə təsadüf edir. Diskussiya şəklində davam edən tədbirdə insan hüquqlarının qorunması sahəsində görülən işlər nəzərə çatdırılıb, tələbələri maraqlandıran suallar cavablandırılıb.
Bu təşəbbüs SDG 16 (Sülh, ədalət və güclü institutlar) və SDG 10 (Bərabərsizliyin azaldılması) ilə əlaqəlidir. İnsan hüquqları və dini dözümlülük mövzusunda aparılan maarifləndirici müzakirələr cəmiyyətdə qarşılıqlı hörmət və hüquq bərabərliyi dəyərlərinin möhkəmlənməsinə xidmət edir. Multikulturalizm və birgəyaşayış prinsiplərinin təşviqi sosial harmoniyanın qorunması baxımından mühüm əhəmiyyət daşıyır. Bu cür tədbirlər demokratik və inklüziv ictimai mühitin inkişafını dəstəkləyir.
Sonda DQİDK-nın sifarişi ilə hazırlanmış "Müasir çağırışlar: birgəyaşayış nümunəsi" sənədli filmi nümayiş etdirilib.
Azərbaycan Texnologiya Universiteti Azərbaycan Respublikası Kənd Təsərrüfatı Nazirliyinin təşkilatçılığı ilə 13–16 may 2025-ci il tarixlərində Bakı Ekspo Mərkəzində keçirilən 18-ci Azərbaycan Beynəlxalq Kənd Təsərrüfatı Sərgisində – Caspian Agro 2025-də uğurla təmsil olunub. Sərgidə universitetin İnnovasiya Mərkəzi, tələbə startapları və aqrar texnologiyalar sahəsində çalışan gənc tədqiqatçılar öz layihə və prototiplərini təqdim ediblər. Onlar rəqəmsal aqronom, ağıllı suvarma sistemləri, torpaq analizi üçün sensor avadanlıqlar və digər aqrar innovasiya yönümlü texnoloji həlləri nümayiş etdiriblər.
Təqdim olunan layihələr sərgi iştirakçıları tərəfindən böyük maraqla qarşılanıb və aqrar sektorda innovativ yanaşmaların genişləndirilməsi baxımından yüksək qiymətləndirilib. Bu iştirak universitetin həm elmi-tədqiqat potensialını, həm də aqrar sahədə tətbiq olunan müasir texnologiyalar üzrə bilik və bacarıqlarını bir daha nümayiş etdirmiş olub.
Bu təşəbbüs SDG 2 (Aclığa son), SDG 9 (Sənaye, innovasiya və infrastruktur) və SDG 12 (Məsuliyyətli istehsal və istehlak) ilə əlaqələndirilə bilər. Aqrar texnologiyalar və startap layihələrinin sərgidə nümayişi kənd təsərrüfatında innovativ yanaşmaların təşviqinə şərait yaradır. Ağıllı suvarma, torpaq analizi və rəqəmsal aqronom kimi həllər resurslardan daha səmərəli istifadəni dəstəkləyir. Bu yanaşma həm ərzaq təhlükəsizliyinin möhkəmlənməsinə, həm də dayanıqlı aqrar inkişaf modelinin formalaşmasına töhfə verir.
Azərbaycan Texnologiya Universiteti olaraq Aqrar İnnovasiya Mərkəzinə bu mühüm tədbirdə iştirak imkanını yaratdığı üçün dərin təşəkkürümüzü bildiririk. Gənc tədqiqatçılara və universitet nümayəndələrinə göstərilən dəstək, eləcə də innovasiya mədəniyyətinin təşviqinə verdikləri töhfəyə görə minnətdarlığımızı ifadə edirik.
