Azərbaycan Texnologiya Universitetində Elmi Şuranın 8 saylı  iclası keçirilib.  Əvvəlcə Elmi Şura üzvləri və iştirakçılar UTECA-nın  professoru Şəmsəddinin Mütəllimovu 80 illiyi, elmlər doktoru Emin Namazovu 85 illik yubileyi, texnika üzrə fəlsəfə doktoru, dosent Tofiq Mirzəyevi isə 63 illiyi münasibətilə təbrik edib, ən xoş arzularını çatdırıblar. Daha sonra iclasın gündəliyində duran məsələlər elan edilib. İqtisadiyyat və idarəetmə fakültəsində tədris, elmi-tədqiqat işlərinin və nizam-intizamın vəziyyəti barədə müvafiq fakülətin yoxlanması komissiyasının sədri Hacıyev Rövşən məlumat verib. Monitorinqin nəticələri dinlənildikdən sonra sözügedən fakültənin elmi-tədqiqat işləri və nizam-intizama dair mövcud vəziyyəti müzakirə edilib, tövsiyələr verilib. Keyfiyyətin təminatı və audit şöbəsinin müdiri Mətləb Əliyev Kitabxana İnformasiya Mərkəzinin fəaliyyəti barədə çıxış edib. Doktorantura və Magistratura şöbəsinin müdiri Sadiq Əfəndiyev doktorantların illik hesabatını məruzə edib. Elmi Şura üzvləri tərəfindən doktorant Aytəkin Bağırovanın mövzu və rəhbəri təsdiqlənib. 

Azərbaycanın ali təhsil müəssisələrinə əcnəbilərin cəlbinin təşviqi və təhsilinin təşkili hazırda prioritet istiqamətlərdən biridir və bu istiqamətdə irəliləyişlərə nail olunması üçün çoxşaxəli işlər görülməkdədir. Bu məqsədlə Təhsil Nazirliyi və Diasporla İş üzrə Dövlət Komitəsinin birgə təşkilatçılığı ilə Rusiya, Ukrayna və Gürcüstanda yaşayan soydaşlarımız üçün Azərbaycanda təhsil imkanlarına dair “Vətəndə təhsil” adlı vebinar keçirilib.  Vebinarda ATM təbliği üçün təqdimatla çıxış imkanı yaradılan 6 təhsil müəssisəsindən biri də Azərbaycan Texnologiya Univetsiteti olub. UTECA görüşdə Elm və xarici əlaqələr mərkəzinin əməkdaşları tərəfindən təmsil edilib, universitetə əcnəbilərin qəbul şərtləri, qəbul prosesi, viza, miqrasiya məsələlərinə dəstək, Dil Hazırlıq Qrupu və əcnəbilər üçün yaradılmış şərait, pandemiya dövründə əcnəbilər üçün edilmiş güzəştlər,onların universitetin yataqxanasında ödənişsiz yerləşdirilmələri barədə məlumatlar verilib. Daha sonra isə vebinar iştirakçılarını maraqlandıran suallar cavablandırılıb.  

“Akkreditasiya qiymətləndirilməsində ekspertlərin rolu” Azərbaycan Texnologiya Universitetində Keyfiyyətin Təminatı Mərkəzinin təşkilatçılığı ilə Təhsildə Keyfiyyət Təminatı Agentliyinin (TKTA) onlayn seminarı təşkil olunub. Seminarın keçirilməsində məqsəd yeni redaksiyada təsdiq olunmuş “Təhsil müəssisələrinin akkreditasiyası Qaydaları”na əsasən akkreditasiya qiymətləndirilməsini həyata keçirəcək Akkreditasiya Komissiyalarının fəaliyyətində ekspert kimi iştirak etməyin əhəmiyyəti və tələblərinə dair məlumat vermək olub. “Akkreditasiya qiymətləndirilməsində ekspertlərin rolu” mövzusunda baş tutan seminarda UTECA-nın müəllimləri iştirak edib. Tədbirdə TKTA-nın Təlim və metodologiya şöbəsinin müdiri Asiman İlyasov geniş təqdimatla çıxış edib. TKTA barədə məlumat verən məruzəçi agentliyin Azərbaycan Prezidenti cənab İlham Əliyevin 29 dekabr 2019-cu il tarixli sərəncamı ilə yaradıldığını bildirib. A.İlyasov qeyd edib ki, agentliyin fəaliyyət istiqamətləri təhsil müəssisələrinin akkreditasiyasını, xarici dövlətlərin ali təhsil sahəsində ixtisaslarının tanınmasını və ekvivalentliyinin müəyyən edilməsini, həmçinin peşə təhsili üzrə qeyri-formal və informal təhsil formaları vasitəsilə əldə edilmiş bilik, bacarıq, səriştə və təcrübənin qiymətləndirilməsi və tanınmasını həyata keçirməkdir. Yeni akkreditasiya qaydalarından danışan şöbə müdiri keyfiyyətin təminatı sisteminə də toxunub. O, agentliyin formalaşdırdığı “Ekspert bankı”na seçilmiş şəxslər üçün keyfiyyət təminatı proseslərində qiymətləndirici qismində iştirak məqsədilə müvafiq təlimlərin təşkil olunduğunu və sertifikatlaşdırıldığını diqqətə çatdırıb. A.İlyasov komissiyanın tərkibi, ekspertlərə qoyulan tələblər, ekspertin komissiyadakı fəaliyyəti barədə də iştirakçılara ətraflı məlumat verib. Seminar iştirakçıları maraqlandıran sualların cavablandırılması ilə davam edib.  

UTECA tələbəsi qaliblər sırasında Azərbaycan Tələbə Gənclər Təşkilatları İttifaqı və Azərbaycan Memarlıq və İnşaat Universiteti Tələbə Gənclər Təşkilatının birgə keçirdiyi, ümummilli lider Heydər Əliyevin 98-ci ildönümünə həsr olunmuş “Sən elə bir zirvəsən” adlı inşa müsabiqəsinin nəticələri məlum olub.

Azərbaycan Yazıçılar Birliyinin mətbuat xidmətinin rəhbəri Xəyal Rzanın münsiflik etdiyi yarışmanın nəticələrinə əsasən 3-cü yerin qalibi Azərbaycan Texnologiya Universitetinin tələbəsi Şəlalə Kazımovadır. Yarışın ikincisi Ağcəbədi Pedaqoji Kolleci tələbəsi Ramilə Mehdiyeva, birincisi isə Azərbaycan Memarlıq və İnşaat Universiteti tələbəsi Nurlanə Rəhimovadır.  Qalibləri təbrik edir və uğurlar arzulayırıq! 

Heydər Əliyevin həyat və fəaliyyəti xalqın siyasi varlığı ilə, dövlət və dövlətçiliklə o dərəcədə sıx surətdə bağlı idi ki, onun ideyaları ictimai-iqtisadi həyatın, dövlət quruculuğunun bütün sahələrinə dərindən nüfuz etmişdi. Siyasi liderliklə milli liderlik keyfiyyətlərinin bir şəxsdə birləşməsi bəşər tarixində nadir hallarda rast gələn haldır. Heydər Əliyev bu iki keyfiyyəti ehtiva etməklə bərabər, fəaliyyət göstərdiyi bütün digər sahələrdə də özünü məhz birinci şəxs kimi, lider kimi təsdiq etmişdi. Həm böyük rəhbər, komandan, siyasət qrossmeysteri, natiq, filosof, ideoloji lider, həm də iqtisadi və mədəni-mənəvi quruculuq sahələrində əvəzsiz iz qoymuş dahi şəxsiyyətin ideyaları da tarixin yaddaşına həmişəlik həkk olunmuşdur. Hələ sağlığında ikən müdrik fikirləri dillərdə əzbər olmuş, böyüş filosofların aforizmləri ilə bir sırada yer tutmuş, bir çox xarici dillərdə nəşr olunmuşdur. Heydər Əliyevin həm nəzəri, həmdə praktiki ideyaları bu gün də aktuallığını itirməmiş və bir sıra əməli fəaliyyət sahələrində tətbiq olunmaqdadır. Onun bir siyasi rəhbər və lider kimi oynadığı misilsiz rol hamıya məlumdur. Hər bir ölkənin tarixində elə an var ki, o ölkə üçün həlledici olub onun tarixini dəyişir. Belə anlar dünya tarixində də mövcuddur və bunlar dünyanın ulduzlu anları adlandırılır. Müstəqil Azərbaycanın da tarixində elə anlar var ki, onlar ölkə üçün həlledici olub, ölkə fəlakətdən xilas olub. Əgər 15 iyun 1993- cü ildə Heydər Əliyev Bakıya dönməsə idi, ölkənin başında durmasa idi, kim bilir, ölkədə nələr baş verərdi və Azərbaycan xalqı hansı faciələrlə qarşılaşacaqdı. Bu baxımdan Azərbaycan tarixinin ən parlaq səhifələrindən biri, Azərbaycan üçün ulduzlu anlardan biri - 15 iyun 1993-cü il oldu. Bu ərəfədə alovlar içində yanan Azərbaycan parçalanma təhlükəsi qarşısında idi. İdarə olunmayan silahlı dəstələrin, səriştəsiz “siyasətçilər”in hakimiyyət uğrunda apardıqları mübarizənin yaratdığı problemlərin ağırlığı Azərbaycan xalqının üzərinə düşürdü. 15 iyun 1993- cü ildə ölkəmiz və ümumiyyətlə, bölgə üçün tarixi hadisə baş verdi. Heydər Əliyev Naxçıvandan Bakıya döndü və Azərbaycan Parlamentinin rəhbəri seçildi. Bununla da tarixin axarı dəyişdi. Azərbaycan öz müstəqilliyini qoruyb saxlaya bildi, dünya ölkələri arasında tanındı və inkişaf başladı. Dünya siyasi arenasında çox nadir şəxsiyyətlər digərlərinə məxsus olmayan dərin intellekt və bilikləri ilə fərqlənərək, baş verən gözlənilməz hadisələrdə qeyri-adi addımlar atıb çıxış yolu tapır. Belə tarixi şəxsiyyətlərdən biri Azərbaycanın qismətinə düşüb. Dahi şəxsiyyət Heydər Əliyev Azərbaycan xalqının ən ağır çağlarında onunla birgə olmuşdur. Bu gün regionun ən qüdrətli ölkəsi sayılan Azərbaycanın siyasi gücü hər an artmaqdadır. Əldə etdiyimiz bütün uğurların səbəbi isə möhtərəm Prezidentimizin dünya siyasətində və dövlətçilik təcrübəsində hər cür maneələri dəf etmiş Heydər Əliyev kursunu davam etdirməsi və bütün məsələlərdə xalqla yekdil olması idi. Xalqımız əmindir ki, dünya azərbaycanlılarının ümummilli lideri Heydər Əliyevin Azərbaycan xalqına ərməğan etdiyi əvəzsiz irs onun siyasətinin layiqli davamçısı olan Prezidentimiz cənab İlham Əliyev tərəfindən qorunub saxlanılacaq və onun rəhbərliyi altında Azərbaycanda bundan sonrada sürətlə inkişaf edəcəkdir.

Namiq Muradov Azərbaycan Texnologiya Universitetinin

I kurs tələbəsi, Qərbi Azərbaycan İcması Gənclər Təşkilatının sədri 

“Şərq Tərəfdaşlığı ölkələrində KOB-ların rəqəmsallaşmasının təşviqi” mövzusunda təşkil olunmuş vebinarda KOBİA İdarə Heyətinin sədri Orxan Məmmədov qeyd edib ki, Agentlik müxtəlif dəstək mexanizmləri, bilik və məlumatlılıq səviyyəsinin yüksəldilməsi və elektron infrastrukturun genişləndirilməsi vasitəsilə KOB-ların rəqəmsallaşdırılmasını təşviq edir. "KOB-ların rəqəmsallaşma üzrə bilik və bacarıqlarının artırılması istiqamətində KOB inkişaf mərkəzləri tərəfindən həyata keçirilən təlim və məsləhət xidmətlərinin davamı olaraq onlayn təlim platforması yaradılmaqdadır. Həmçinin, KOB-ların məhsul və xidmətlərini tanıtmaq və onlayn satışına dəstək olmaq məqsədilə onlayn satış platforması hazırlanır”.