Xəbərlər
Universitetimizdə ən son xəbərləri buradan əldə edin.

Ali təhsildə beynəlmiləlləşmə üzrə komitənin növbəti iclası keçirilib

Azərbaycan Texnologiya Universitetində ECAR layihəsi çərçivəsində Ali təhsildə beynəlmiləlləşmə üzrə komitənin növbəti iclası keçirilib

Bakı Biznes Universitetinin koordinatorluğu və Avropa Komissiyasının maliyyə dəstəyi ilə həyata keçirilən “Azərbaycanda Rektorlar Konfransının yaradılması” (ECAR) adlı Erasmus+ layihəsi çərçivəsində Azərbaycan Texnologiya Universitetində (ATU) Ali təhsildə beynəlmiləlləşmə üzrə komitənin hibrid formatda növbəti iclası keçirilib. 

İclasda ATU-nun tədris işləri üzrə prorektoru dos.Raqif Hüseynov iştirakçıları salamlayaraq bu layihənin təhsilin beynəlmiləlləşməsi, eləcə də rəqəmsal və innovativ iqtisadiyyatda ali təhsil müəssisələrinin rolunu artırmaq məqsədilə universitetlərarası əlaqələrin təmin olunmasına əhəmiyyətli dərəcədə dəstək verdiyini vurğulayıb.

15-ə yaxın ali təhsil müəssisəsindən məsul şəxslərin iştirakı ilə keçirilən görüşdə Azərbaycan Dillər Universitetinin Beynəlxalq əlaqələr üzrə prorektoru, əvvəlki komitə sədri dosent Jalə Qəribova tərəfdaşlara müvafiq komitənin hesabatını təqdim edib, daha sonra Bakı Biznes Universitetinin Beynəlxalq əlaqələr üzrə prorektoru Eşqin Bayramov komitə sədri və sədr müavinlərinin yenidən seçkisi barədə iştirakçılara məlumat verib, müvafiq komitənin səsverməsi həyata keçirilib. 

İclasda ATU-nun Beynəlxalq əməkdaşlıq şöbəsinin müdiri v.m.i.e. Ramidə Xəlilova və layihə meneceri İlahə Qurbanova da iştirak edib.

Azərbaycan Texnologiya Universiteti (ATU) ilə "Azerbaijan Coca-Cola Bottlers" şirkəti arasında görüş keçirilib

İşgüzar görüş ATU -nun rektoru v.m.i.e. dos. Yaşar Ömərovla "Azerbaijan Coca-Cola Bottlers" şirkətinin Baş direktoru Rəna Məmmədovanın iştirakı ilə baş tutub.
Görüşdə istehsalat təcrübəsinin təşkili, birgə kadr hazırlığı, elmi əməkdaşlıq, birgə tədbirlərin keçirilməsi və s. kimi əməkdaşlıq məsələləri müzakirə edilib.
Görüşə həmçinin, ATU-nun Qida mühəndisliyi fakültəsinin dekanı Mehman İsmayılov, "Azerbaijan Coca-Cola Bottlers"in insan resursları üzrə supervayzeri Gülən İbrahimzadə və ictimaiyyətlə əlaqələr və kommunikasiya üzrə supervayzeri Türkan Manaflı da qatılıb.
Qeyd edək ki, Coca-Cola şirkəti 2030-cu ilə qədər müəyyənləşdirdiyi Davamlı İnkişaf Öhdəliklərinin “Müxtəliflik və Daxilolma” bəndinə uyğun olaraq müxtəlif proqramlar, o cümlədən ölkənin aparıcı universitetləri ilə əməkdaşlıq həyata keçirir.

Azərbaycan Texnologiya Universitetinin (ATU) əməkdaşları üçün iftar süfrəsi açılıb

Universitetin rektoru v.m.i.e. dos. Yaşar Ömərov kollektivi qarşıdan gələn Ramazan bayramı münasibətilə təbrik edərək duaların qəbul olmasını diləyib, xalqımıza firavanlıq, sülh və əmin-amanlıq arzulayıb.
Mərasimdə iştirak edən Qafqaz Müsəlmanları İdarəsinin Qərb regionu üzrə nümayəndəsi Hacı Tahir çıxış edərək Ramazanın cəmiyyətimizdə milli-mənəvi həmrəyliyin, humanizmin, şəfqət və mərhəmət duyğularının təntənəsini nümayiş etdirdiyini dilə gətirib.
ATU Həmkarlar İttifaqı Komitəsinin xətti ilə baş tutan tədbirdə İdarəetmə kafedrasının müdiri prof. Füzuli Məmmədov da çıxış edərək başda rektor v.m.i.e. dos.Yaşar Ömərov olmaqla bütün kollektivi qarşıdan gələn Ramazan bayramı münasibətilə təbrik edib, xoş arzular diləyib.
Daha sonra iftar süfrəsində dualar edilib, Ramazan ayının fəzilətləri barədə söhbətlər açılıb.


ATU-da elmi-praktik seminar keçirilib

Azərbaycan Texnologiya Universitetinin (ATU) İqtisadiyyat və İdarəetmə fakültəsində “Yaşıl dünya naminə həmrəylik ili” çərçivəsində "Davamlı ekoloji inkişaf: innovativ texnologiyalar" mövzusunda elmi-praktik seminar keçirilib.
ATU Tələbə Elmi Cəmiyyətinin (TEC) təşkilatçılığı ilə baş tutan seminarda strateji inkişaf və rəqəmsallaşma məsələləri üzrə rektor müşaviri Mehman Kərimov, İdarəetmə kafedrasının müdiri prof. Füzuli Məmmədov, Turizm sənayesinin təşkili kafedrasının müdiri Yusif Hümbətov, İqtisadiyyat kafedrasının müdiri Mamed Urkayev, TEC sədri Aysel Məmmədli, professor-müəllim heyəti və tələbələr iştirak edib.
Tədbirdə M. Kərimov, F. Məmmədov, Y. Hümbətov və M. Urkayev çıxış edərək mövzuların aktuallığına diqqət çəkib, məruzəçi tələbələrə uğurlar arzulayıblar.
Seminarda İdarəetmə, İqtisadiyyat, eləcə də Turizm sənayesinin təşkili kafedralarının bakalavr və magistrlarının təqdimatında “Qarabağda ağıllı kənd sistemi”, “Yaşıl marketinqdə innovativ alətlər”, “Filtrilizasiya dronları, Qlobal iqlim dəyişikliyinin dünya iqtisadiyyatına təsiri”, “İşğaldan azad olunmuş ərazilərdə yaşıl iqtisadiyyatın inkişaf potensialı”, “Regionlarda ekoturizm sektorunun inkişafı və məhdudiyyətlərin aradan qaldırılması”, “Ağıllı şəhərlər: davamlılıq üçün texnologiyalar və tətbiqlər” başlıqlı məruzələr dinlənilib, gənc tədqiqatçılara suallar verilib, mövzular ətrafında geniş fikir mübadiləsi aparılıb.

ATU-da elmi-praktik tələbə seminarı təşkil edilib

Azərbaycan Texnologiya Universiteti Tələbə Elmi Cəmiyyəti və Göygöl Milli Parkının birgə təşkilatçılığı ilə “Yaşıl dünya naminə həmrəylik ili” çərçivəsində “Biomüxtəliflik və iqlim dəyişmələri” mövzusunda elmi-praktik tələbə seminarı təşkil edilib.
Göygöl Milli Parkında baş tutan seminarda Ətraf mühitin mühafizəsi kafedrasının professor-müəllim heyəti, müvafiq ixtisaslarda təhsil alan tələbələr iştirak edib.
Seminarda Göygöl Milli Parkının direktoru Fuad Quliyev, ATU-nun Qida mühəndisliyi fakültəsinin dekanı Mehman İsmayılov, Ətraf mühitin mühafizəsi kafedrasının müdiri prof. Elşad Məmmədov və TEC sədri Aysel Məmmədli çıxış edərək mövzunun aktuallığına diqqət çəkib, məruzəçilərə uğurlar arzu ediblər.
Daha sonra gələcəyin mühəndis-ekoloqlarının təqdimatında "Turşulu yağışlar", "Qlobal iqlim dəyişmələrinin Azərbaycanda kənd təsərrüfatına təsiri", "Nüvə reaksiyası və onun ətraf mühitə təsiri, Atmosfer havasına təhlükə yaradan mobil mənbələr" başlıqlı məruzələr dinlənilib, tələbələrə suallar ünvanlanıb, mövzular ətrafında geniş fikir mübadiləsi aparılıb.
Seminar çərçivəsində tələbələr Göygöl Milli Parkı ilə yaxından tanış olublar.

ATU-da Aprel döyüşlərinə həsr edilmiş tədbir keçirilib

Azərbaycan Texnologiya Universiteti və Vətən Müharibəsi Əlillərinə Kömək İctimai Birliyinin birgə təşkilatçılığı ilə Aprel döyüşlərinə həsr edilmiş tədbir keçirilib.
Əvvəlcə Dövlət Himni səsləndirilib, daha sonra Aprel şəhidlərinin timsalında Vətən uğrunda canından keçən Vətən övladlarının əziz xatirəsi bir dəqiqəlik sükutla yad edilib.
Tədbirdə Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru Şahmar Həsənov, şəhid ailələri, qazilər, professor-müəllim heyəti və tələbələr iştirak edib.
Prorektor Ş.Həsənov giriş sözü ilə çıxış edərək Müzəffər Ali Baş Komandan İlham Əliyevin rəhbərliyi ilə rəşadətli ordumuzun Aprel döyüşləri və Vətən müharibəsi zamanı həyata keçirdiyi əks-hücum əməliyyatlarının nəticələrindən danışıb, Azərbaycan bayrağının azad olunmuş Lələtəpə yüksəkliyində və Qarabağ torpaqlarında ucaldılmasının, Zəfərin xalqımıza və türk dünyasına böyük qürur və sevinc hissləri yaşatdığını vurğulayıb.
Tədbirdə şəhid ailələri və qazilərin çıxışları, xatirələri dinlənilib. Şəhidlərin döyüş meydanında göstərdikləri qəhrəmanlıqlardan, onların keçdiyi şərəfli yoldan bəhs edilib.
Tədbir çərçivəsində Aprel döyüşlərinə həsr edilmiş videoçarx izlənilib, fəallığı ilə seçilən bir qrup tələbələr təltif edilib.