ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2023-11-30

Azərbaycan Texnologiya Universitetində “Avtomatika, rabitə və informasiya texnologiyaları” adlı elmi jurnal təsis edilib

Buna dair qərar universitet Elmi Şurasının 29 noyabr 2023-cü il tarixində keçirilən iclasında qəbul olunub. Elmi jurnal ildə dörd dəfə nəşr olunacaq.

Jurnal İnformasiyanın mühafizəsi üsulları və sistemləri, informasiya təhlükəsizliyi, Radiotexnika, radionaviqasiya, radiolokasiya, televiziya sistemləri və qurğuları, Telekommunikasiya texnologiyası, Kompüter qurğuları və texnologiyası, İnformasiya-ölçmə və idarəetmə sistemləri (sahələr üzrə) kimi bölmələrdən ibarətdir.

Nəşrin redaksiya heyəti Azərbaycan alimləri ilə yanaşı, Türkiyə, Hindistan, İtaliya, Rusiya, Gürcüstandan olan elm adamlarından formalaşdırılıb.

2023-11-29

Azərbaycan Texnologiya Universitetində Elmi Şuranın növbəti iclası keçirilib

Elmi şuranın sədri, Azərbaycan Texnologiya Universitetinin rektoru v.m.i.e. dos. Yaşar Ömərov kvorumu nəzərə alaraq iclası açıq elan edib.

İclasda tədris işləri üzrə prorektor Raqif Hüseynov 2023/2024-cü tədris ili üzrə Qış imtahan sessiyasına hazırlıq və qarşıda duran məsələlərə dair hesabatla çıxış edib. Daha sonra Keyfiyyətin təminatı və audit şöbəsinin müdiri Mətləb Əliyevin hesabatı dinlənilib.

İclasda həmçinin Tofiq Mirzəyevin təqdimatında Yüngül sənaye mühəndisliyi və dizayn kafedrasının, Musa Cəfərovun təqdimatında Kimya və metallurgiya mühəndisliyi kafedrasının, Qalibə Məmmədovanın təqdimatında isə universitetdə nəşr olunan elmi jurnalların mövcud vəziyyətinə dair hesabatları dinlənilib.

Daha sonra əməkdaşlardan Müsfiq Xəlilovun dosent elmi adı alması üçün AAK

qarşısında vəsatətin qaldırılması, eləcə də Yusif Hümbətovun professor vəzifəsinə seçilməsilə bağlı səsvermə keçirilib.

Elmi Şurada universitetdə fəaliyyət göstərən bir neçə komissiyaların tərkibi yenidən formalaşdırılıb, tədris proqramlarının monitorinqinin nəticələri, tədris metodiki vəsaitlərin təsdiqi kimi digər məsələlərə baxılıb.

2023-11-27

"TamGənc" Tələbə Basketbol Liqasının seçmə mərhələsi keçirilib

Azərbaycan Basketbol Federasiyasının təşkilatçılığı ilə 2023/2024 yarış mövsümü üzrə "TamGənc" Tələbə Basketbol Liqasının seçmə mərhələsi keçirilib.

Seçmə mərhələsi 22-26 noyabr tarixlərində Bakı şəhərində Azərbaycan Texniki Universitetinin idman zalında baş tutub. Bu mərhələdə B qrupunda 3 komanda ilə üzləşən Azərbaycan Texnologiya Universitetinin tələbələri yarışdan qalib ayrılıb.

ATU tələbələri birinci oyunda Azərbaycan Pedaqoji Universitetinə 53:33, ikinci oyunda Sumqayıt Dövlət Universitetinə 64:39, üçüncü - həlledici oyunda isə Bakı Mühəndislik Universitetinə 64:33 hesabı ilə qalib gəlib.

2023-11-24

Azərbaycan Texnologiya Universitetində növbəti iki tələbənin hər birinə yardım edilib

Azərbaycan Texnologiya Universiteti (ATU) Tələbə Həmkarlar İttifaqı Komitəsinin xətti ilə müəyyən edilmiş növbəti iki tələbənin hər birinə 300 manat məbləğində yardım edilib.

Universitetin rektoru v.m.i.e. dos. Yaşar Ömərov həmin tələbələrlə görüşərək problemləri ilə maraqlanıb, dərslərində müvəffəqiyyətlər arzu edib, nailiyyətlərinin davamlı olması üçün məsləhət və tövsiyələr verib.

2023-11-23

“Prima Consulting” MMC-nin səlahiyyətli nümayəndələri fokus qruplar üzrə görüşlər keçirib

Azərbaycan Texnologiya Universitetində “Prima Consulting” MMC-nin səlahiyyətli nümayəndələri fokus qruplar üzrə görüşlər keçirib. Görüşlərin keçirilməsində məqsəd Təhsil Tələbə Krediti Fondunun fəaliyyəti ilə bağlı kəmiyyət və keyfiyyət göstəricisinin, vətəndaş məmnuniyyətinin müəyyən edilməsi olub.

Görüşlərdə müxtəlif zaman aralığında sosial və standart TTK-yə müraciət edən tələbələrin valideynləri, TTK haqqında məlumatlı olan və olmayan əməkdaşlar, təhsil tələbə kreditinə namizəd olub, ancaq təhsil tələbə kreditindən yararlanmayan tələbələr iştirak edib.

“Prima Consulting” MMC-nin əməkdaşı Allahverdi Şəfiyev fokus qruplar üzrə təhsil tələbə kreditinin mahiyyəti, müraciət qaydaları haqqında danışıb, şərtlər üzrə yanvar ayından tətbiq olunacaq yenilikləri diqqətə çatdırıb, valideynlərin, universitet əməkdaşlarının, eləcə də tələbələrin TTK ilə bağlı fikirlərini öyrənib, təklif və müraciətlərini qeydə alıb.

2023-11-23

REFRESH Erasmus+ KA2 Layihəsinin məlumatlandırma günü keçirilib

Azərbaycan Texnologiya Universitetində (ATU) Azərbaycan Dövlət İqtisad Universitetinin (UNEC) koordinatoru olduğu, Avropa İttifaqının maliyyə dəstəyi ilə reallaşan “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 Layihəsinin məlumatlandırma günü keçirilib.

Tədbirdə ATU-nun tədris işləri üzrə prorektoru Raqif Hüseynov, strateji inkişaf və rəqəmsallaşma məsələləri üzrə müşavir Mehman Kərimov, UNEC-in Beynəlxalq Əməkdaşlıq Departamentinin şöbə müdiri Afət Ələkbərova, ATU-nun struktur bölmə rəhbərləri və Ətraf mühitin mühafizəsi kafedrasının professor-müəllim heyəti, tələbələr iştirak ediblər.

Azərbaycan Texnologiya Universitetinin layihə üzrə meneceri Raqif Hüseynov tədbirdə giriş sözü ilə çıxış edib, ATU-nun qoşulduğu REFRESH layihəsi barədə danışıb, universitet üçün, müvafiq kafedranın professor-müəllim heyəti, eləcə də tələbələr üçün faydalı olacağını qeyd edib.

Daha sonra Beynəlxalq əməkdaşlıq şöbəsinin müdiri v.m.i.e. Ramidə Xəlilova təqdimatla çıxış edərək layihənin fəaliyyət planı, idarə edilməsi və koordinasiyası, bərpa olunan enerji təhsili üzrə tərəfdaş olan Azərbaycan universitetlərində ilkin tədqiqatı, pilot kursların və innovativ kurikulumların dizaynı, virtual öyrənmə və simulyasiya (VLS) laboratoriyalarının Aİ modellərinin araşdırılması, disseminasiya, dayanıqlılıq, keyfiyyət planı və monitorinqi, layihədən gözlənilən nəticələr barədə ətraflı məlumat verib.

Tədbirin sonunda layihə ilə bağlı professor-müəllim heyətini və tələbələri maraqlandıran suallar cavablandırılıb.