Azərbaycan Texnologiya Universitetinin (ATU) rektoru Yaşar Ömərov, elm və innovasiyalar üzrə prorektor v.m.i.e., elm və xarici əlaqələr üzrə müşavir Sahil Həmidov və Qida mühəndisliyi fakültəsinin dekanı Mehman İsmayılov Veysəloğlu Şirkətlər Qrupuna məxsus “Ulduz” Şokolad Fabrikinə və “Xonça” Fabrikinə səfər ediblər. 

Səfər çərçivəsində müvafiq olaraq hər iki müəssisədə – “Ulduz” Şokolad Fabrikinin icraçı direktoru Kazım Babayev, eləcə də “Xonça” Fabrikinin rəhbəri Rəhman Ələkbərov ilə görüş keçirilib, gələcək əməkdaşlıq məsələləri müzakirə edilib. 

Daha sonra ATU rəhbərliyi fabriklərin iş prinsipi, tətbiq olunan müasir texnologiyaları, kadr tələbatı ilə yaxından tanış olub, mütəxəssisləri ilə müzakirələr aparıblar.

Qeyd edək ki, 2001-ci ildən fəaliyyət göstərən "Ulduz" Şokolad Fabriki nəinki Azərbaycanda, bütün Qafqazda ən böyük və ən çox istehsal gücünə sahib, tam avtomatlaşdırılmış şokolad fabriklərindən biridir. 9 fərqli texnologiyanın tətbiq olunduğu müəssisədə 300 nəfər işçi çalışır. “Ulduz” milli brendi 200-dən çox məhsul çeşidi ilə 20-dən çox ölkəyə ixrac olunur. 

2016-cı ildən əsası qoyulan “Xonça” fabriki isə şirniyyat və un məmulatlarının istehsalı, ketrinq xidmətləri üzrə fəaliyyət göstərir. Müəssisədə il ərzində 8 000 ton məhsul istehsal edilir. 800 iş yerinə malik bu fabrikdə Fransa, Almaniya, Avstriya, Rusiya və Ukraynada xüsusi təlim keçmiş texnoloqlar və işçi heyəti çalışır.

Azərbaycan Respublikasının Prezidenti yanında Ali Attestasiya Komissiyasının (AAK) 24.06.2025-ci il tarixli qərarı ilə ATU-nun Strateji inkişaf və rəqəmsallaşma məsələləri üzrə rektor müşaviri, iqtisad elmləri üzrə fəlsəfə doktoru Mehman Kərimova iqtisad elmləri elm sahəsinin 5308.01 – Ümumi iqtisadiyyat ixtisası üzrə  dosent elmi adı verilib.

Həmçinin, AAK-ın 30.06.2025-cü il tarixli qərarı ilə Qida mühəndisliyi və ekspertiza kafedrasının əməkdaşı, texnika üzrə fəlsəfə doktoru Mehriban Aslanova elmi-pedaqoji fəaliyyətinə görə texnika elmləri elm sahəsinin 3309.01 – Qida məhsullarının texnologiyası ixtisası üzrə dosent elmi adına layiq görülüb.

Təbrik edirik!

Azərbaycan Texnologiya Universitetində (ATU) Elmi Şuranın 2024/2025-ci tədris ili üzrə son iclası keçirilib. Universitetin rektoru, elmi şura sədri Yaşar Ömərov yetərsayı nəzərə alaraq iclası açıq elan edib, gündəlikdə duran məsələləri diqqətə çatdırıb. 

İclasda rektor Yaşar Ömərov ATU-nun cari tədris ilinə dair fəaliyyəti və perspektiv inkişaf haqqında məruzə ilə çıxış edib. 

Daha sonra Elm və innovasiyalar üzrə prorektor v.m.i.e., elm və xarici əlaqələr üzrə müşavir Sahil Həmidovun təqdimatı əsasında Elmi Şuranın 2025/2026-cı tədris ilinin birinci yarımili üçün iş planının müzakirə edilərək təsdiq edilib. Ardınca İqtisadiyyat və idarəetmə fakültəsinin dekanı Fazil Kərimovun, Turizm sənayesinin təşkili kafedrasının müdiri Yusif Hümbətovun hesabatları dinlənilib. 

İclas çərçivəsində sosial məsələlər və İctimaiyyətlə əlaqələr üzrə prorektor, Tədris Metodiki Şuranın sədri Şahmar Həsənov tədris metodiki vəsaitlərin təsdiqi, Tədri̇si̇n təşki̇li̇ və idarə edi̇lməsi̇ şöbəsinin müdiri Cəsarət Şabanov professor-müəllim heyətinin tədris işi üçün vaxt normalarının müəyyən edilməsi, İnsan resursları şöbəsinin müdiri İlham Əlizadə ştat cədvəlində dəyişiklik, Keyfiyyətin təminatı və audit şöbəsinin müdiri v.m.i.e. Mətləb Əliyev Akkreditasiya prosesinin keçirilməsi ilə əlaqədar Özünütəhlil hesabatının hazırlanması üçün Təşkilat Komitəsinin yaradılması barədə təqdimatla çıxış edib, gündəlikdə olan məsələlər müzakirə edilərək müvafiq qərarlar qəbul edilib.

Azərbaycan Texnologiya Universitetində (ATU) "Açıq qapı” günü keçirilib. Yaz imtahan sessiyası ilə bağlı təşkil olunan “Açıq qapı” günündə valideynlər, rəhbər heyət və dekanlar iştirak edib.
 
Sosial məsələlər və ictimaiyyətlə əlaqələr üzrə prorektor Şahmar Həsənov, elm və innovasiyalar üzrə prorektor v.m.i.e., elm və xarici əlaqələr üzrə müşavir Sahil Həmidov dəyirmi masa ətrafında imtahan prosesi, nəticələrain yoxlanması barədə məlumat veriblər. Bildiriblər ki, Elm və Təhsil Nazirliyinin müvafiq əmrinə uyğun olaraq İmtahan Qərargahı və Apellyasiya Komissiyası fəaliyyət göstərir. İmtahanların şəffaf keçirilməsi, tələbələrin biliyinin obyektiv qiymətləndirilməsi məqsədilə otaqlarda müşahidə kameraları yerləşdirilib, təklif, irad və şikayətlərin daha çevik formada QR kod ilə göndərilməsi imkanı yaradılıb.

Daha sonra İmtahan Komissiyasının sədri, Tədrisin təşkili və idarə edilməsi şöbəsinin müdiri Cəsarət Şabanov monitor vasitəsilə real vaxt rejimində imtahan prosesini təqdim edib. İmtahanları canlı izləyən valideynlərə bildirib ki, 2 iyun 2025-ci il tarixindən başlayan imtahanlar test və yazılı qaydada qrafik üzrə həyata keçirilir, tələbəyə yazılı imtahanlarda 3 saat, test imtahanında isə 1 saat vaxt verilir, nəticələr xüsusi kodlaşdırma otağında yoxlanılır, Apellyasiya Komissiyasına daxil olan müraciətlərə yerində baxılaraq obyektiv qərar verilir. 

Valideynlər neqativ halların qarşısının alınmasına dair zəruri tədbirlərin görülməsini yüksək qiymətləndirib, tələbələrin biliklərinin şəffaf və obyektiv qiymətləndirilməsi üçün yaradılan şəraitdən məmnunluq ifadə ediblər.

Qeyd edək ki, Azərbaycan Texnologiya Universitetində yaz imtahan sessiyası 11 iyuladək davam edəcək.

Azərbaycan Texnologiya Universitetinin İctimai Nəzarət Şurasının (İNŞ) növbəti iclası keçirilib. İclasda Azərbaycan Texnologiya Universitetinin rektoru Yaşar Ömərov İctimai Nəzarət Şurası üzvlərini salamlayıb, müzakirə olunacaq məsələlərin, ediləcək təklif və tövsiyələrin, ümumilikdə ictimai rəyin öyrənilməsinin universitetin fəaliyyətində əhəmiyyətini vurğulayıb.

İclasda üzvlərdən millət vəkilləri Naqif Həmzəyev, Müşfiq Cəfərov, “Respublika” qəzetinin bölgə müxbiri Zabit Xəlilov, “Regional İnkişaf” İB-nin Gəncə-Daşkəsən bölməsinin nümayəndəsi Aişə Osmanlı, “Təşəbbüslərin İnkişaf Mərkəzi” İB-nin sədri Azad Rəhimov, “Təmas” Regional İnkişaf İB-nin sədri Südabə Məmmədova iştirak edib.

İNŞ üzvləri 2024/2025-ci tədris ilinin yaz imtahan sessiyası ilə tanış olub, prosesi monitor vasitəsilə izləyiblər. Onlara imtahanların gedişi və təşkili, İmtahan Komissiyası, Apellyasiya Komissiyasının fəaliyyəti ilə bağlı məlumatlar təqdim edilib. 

İclasda yaz imtahan sessiyasının ardından ATU-nun inkişafı ilə bağlı mövcud vəziyyət və qarşıda duran məsələlər müzakirə edilib. Yekunda Şura tərəfindən universitet rəhbərliyinə təklif və tövsiyələr təqdim edilib.

Qeyd edək ki, ATU İctimai Nəzarət Şurası 2023-cü ildə yaradılıb və bu təşəbbüs Gəncə universitetləri arasında ilk dəfə məhz Azərbaycan Texnologiya Universitetində reallaşdırılıb.

Azərbaycan Texnologiya Universitetində (ATU) “Coca-Cola” şirkətinin baş sponsorluğu, “Nar” və Kapital Bankın dəstəyi ilə Məzun Günü tədbiri keçirilib.

Əvvəlcə Azərbaycan Respublikasının Dövlət Himni səsləndirilib. Ardınca Ulu Öndər Heydər Əliyevin və Vətənimizin bütövlüyü və suverenliyi uğrunda canından keçən şəhidlərin əziz xatirəsi bir dəqiqəlik sükutla yad edilib.

Giriş sözü ilə Azərbaycan Texnologiya Universitetinin rektoru Yaşar Ömərov çıxış edib. Y.Ömərov bu ilki Məzun Gününün universitetin 55 illiyinə təsadüf etdiyini və bu səbəbdən daha da əlamətdar olduğunu qeyd edib. Rektor bu il məzun olan 750-dən çox gəncin bundan sonra da layiqli vətəndaş olacağına, gələcək həyatda, təhsil sahəsində yeni-yeni uğurlara imza atacağına əminlik ifadə edib.

Gəncə şəhər İcra Hakimiyyətinin başçısı Niyazi Bayramov, Yeni Azərbaycan Partiyasının Gəncə şəhər təşkilatının sədri Bayram Aslanov, “Nar" şirkətinin Baş icraçı direktoru Qunnar Panke, valideyn Anar İbrahimov, əlaçı tələbə Aynur Nağıyeva, qazi məzun Babək Həsənov çıxış edərək tələbələri təbrik edib, həyatlarının bundan sonrakı mərhələsində uğur və nailiyyətlər arzulayıblar.

Tədbir ən yüksək göstəriciləri olan tələbələrin təltif olunması ilə davam edib. Məzunlara təşəkkürnamə və Kapital Bank, “Nar"  şirkətləri tərəfindən hədiyyələr verilib.

Tədbirin bədii hissəsində məzun tələbələrin ifasında mahnı və rəqs nömrələri göstərilib.

Məzun Günü səsi ilə könülləri fəth edən xalq artisti İlqar Muradovun, müxtəlif musiqi qruplarının konsert proqramı ilə davam edib.

Sonda məzunlar Vətənə, xalqa, dövlətə sadiq qalacaqlarına, bundan sonrakı həyatlarında böyük həvəslə çalışaraq layiqli mütəxəssis olacaqlarına and içərək məzun papaqlarını səmaya atıblar.