Azərbaycan Texnologiya Universitetində (ATU) 14–15 may tarixlərində baş tutacaq Karyera Festivalı çərçivəsində tələbələr üçün Karyera Forumu təşkil olunacaq.
Forumun moderatoru Azərbaycan Texnologiya Universitetinin Universitet–sənaye əlaqələri üzrə rektor müşaviri Rövşən Əliyev olacaq.
Festivalın ikinci gününə - 15 may tarixinə təsadüf edəcək forumda spiker qismində iqtisadçı Fərhad Pərvizi, KOBİA-nın Gəncə-Daşkəsən və Qazax-Tovuz iqtisadi rayonları üzrə regional koordinatoru Anar Əliyev, eləcə də “Garabagh Resort & Spa”nın direktor əvəzi Nicat Məhərrəmov çıxış edəcəklər.
Forum çərçivəsində əmək bazarının mövcud vəziyyəti, sahibkarlıq mühiti, karyera imkanları və gənclərin inkişaf perspektivləri müzakirə olunacaq.
Azərbaycan Texnologiya Universitetində (ATU) Ümumdünya Şəhərsalma Forumunun On Üçüncü Sessiyası – WUF13 barədə məlumatlandırma məqsədilə Avtomatika, telekommunikasiya və informatika fakültəsinin (ATİ) tələbələri üçün infosessiya təşkil edilib. Tədbirin əsas məqsədi tələbələri dünyanın ən nüfuzlu şəhərsalma platformalarından biri olan WUF13 haqqında məlumatlandırmaq, onların forumun yaratdığı imkanlarla yaxından tanış olmasını təmin etmək olub.
İnfosessiyada ATİ fakültəsinin dekanı Rövşən Hacıyev, Avtomatika və informasiya texnologiyaları kafedrasının müdiri Rövşən Qasımov da iştirak edib. Tədbirdə kfedranın əməkdaşları Ayidə Məmmədova və Aysel Vəliyeva çıxış edərək forumun mahiyyəti, əsas məqsədləri və beynəlxalq əhəmiyyəti barədə ətraflı məlumat veriblər. Bildirilib ki, WUF13 dayanıqlı şəhər inkişafı, innovativ urbanizasiya həlləri, rəqəmsal transformasiya, “ağıllı şəhər” konsepsiyası və ekoloji davamlılıq kimi aktual mövzuları əhatə edən mühüm beynəlxalq platformadır.
Çıxışlarda forumun Azərbaycanda keçirilməsinin ölkəmizin beynəlxalq nüfuzunun göstəricisi olduğu vurğulanıb, eyni zamanda bu cür tədbirlərin gənclərin qlobal proseslərdə iştirakına, yeni bilik və təcrübələr əldə etməsinə geniş imkanlar yaratdığı diqqətə çatdırılıb. Tələbələrə forum çərçivəsində keçiriləcək panel müzakirələri, sərgilər, innovasiya təqdimatları, startap və texnologiya yönümlü tədbirlər barədə məlumat verilib, xüsusilə informasiya texnologiyaları və rəqəmsal həllərlə bağlı mövzuların ATİ tələbələri üçün maraqlı və faydalı olacağı qeyd olunub.
Tədbir zamanı tələbələrin sualları cavablandırılıb, onların forumda iştirak imkanları, könüllülük proqramları və beynəlxalq mühitdə təcrübə qazanma perspektivləri barədə fikir mübadiləsi aparılıb.
Azərbaycan Texnologiya Universitetində (ATU) Ümummilli Lider Heydər Əliyevin anadan olmasının 103-cü ildönümünə həsr olunmuş “Beşinci sənaye inqilabına doğru – universitetlərin rolu, çağırışlar və imkanlar” mövzusunda Beynəlxalq Elmi-Praktik Konfransın ikinci günü uğurla davam edib.
Beynəlxalq Elmi-Praktik Konfrans Qida mühəndisliyi və texnologiyaları; Süni intellekt, elektronika və informasiya texnologiyaları; Tekstil, yüngül sənaye və dizayn; Maşınqayırma, nəqliyyat və logistika; Metallurgiya mühəndisliyi; Rəqəmsal iqtisadiyyat və idarəetmə; Turizm sənayesinin təşkili; Ətraf mühit, təhlükəsizlik və dayanıqlı inkişaf; Fundamental elmlər; Multikultural təhsildə innovativ texnologiyalar olmaqla 10 bölmədə hibrid formatda təşkil olunub.
Bölmələrə ATU-nun alimləri sədrlik edib, həmsədr qismində isə Polşa, İsveç, Türkiyə, Gürcüstan, Özbəkistan, Qazaxıstan və Rusiya Federasiyasının ali təhsil müəssisələrinin nümayəndələri çıxış ediblər.
Konfrans çərçivəsində bölmələr üzrə məruzələr dinlənilib, müasir elmi-texnoloji tendensiyalar müzakirə olunub və beynəlxalq əməkdaşlığın genişləndirilməsi istiqamətində fikir mübadiləsi aparılıb. Həmçinin, Türkiyənin Ege Universitetinin Biokimya kafedrasının müdiri Cenk Selcukinin tələbələr üçün seminarı təşkil edilib.
Qeyd edək ki, tədbir 25 ölkə, 88 universitet, 22 tədqiqat institutu və bir sıra dövlət və özəl müəssisələrin iştirakı ilə baş tutub. Konfrans materialları toplusuna 767 (154-ü xaricdən) tezis qəbul edilib.
Azərbaycan Texnologiya Universitetində (ATU) Ümummilli Lider Heydər Əliyevin anadan olmasının 103 illiyinə həsr olunmuş “Beşinci sənaye inqilabına doğru - universitetlərin rolu, çağırışlar və imkanlar” mövzusunda Beynəlxalq Elmi-Praktik Konfrans keçirilib.
Tədbirdən əvvəl konfrans iştirakçıları Ulu Öndər Heydər Əliyevin abidəsini ziyarət edib, önünə gül dəstələri düzüblər.
Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin və torpaqlarımızın ərazi bütövlüyü uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə açıq elan edilib.
ATU-nun rektoru Yaşar Ömərov konfransda giriş sözü ilə çıxış edib. O, Azərbaycanda rəqəmsal transformasiyanın sürətləndirilməsinin Prezident İlham Əliyev tərəfindən uğurla həyata keçirilən dövlət siyasətinin əsas prioritetlərindən biri olduğunu vurğulayaraq, bu istiqamətdə qəbul edilən strateji sənədlərin və təşəbbüslərin əhəmiyyətini qeyd edib. Rektor bildirib ki, universitetdə son illər rəqəmsallaşma sahəsində mühüm addımlar atılıb. O ATU-da elektron tədris idarəetmə sisteminin tətbiqini, sənəd dövriyyəsinin rəqəmsallaşdırılmasını, imtahana hazırlıq portalını və süni intellekt əsaslı rəqəmsal təhsil bələdçisinin istifadəyə verilməsini misal gətirərək, bu istiqamətdə hədəflərin daha da genişləndirilməsinin qarşıda duran əsas vəzifələrdən biri olduğunu qeyd edib.
Açılış tədbirində Gəncə şəhər İcra Hakimiyyəti başçısının müavini Adil Tağıyev, YAP Gəncə şəhər təşkilatının sədri Bayram Aslanov, Rəqəmsal İnkişaf və Nəqliyyat Nazirliyinin Aparat rəhbərinin müavini Bəxtiyar Məmmədov, Azərbaycan Dövlət Neft və Sənaye Universitetinin rektoru Rüfət Əzizov, Azərbaycan Respublikası Milli Məclisinin deputatı Pərvin Kərimzadə, Qazaxıstanın Kızılorda Bolaşak Universitetinin rektoru Gülcahan Snasapova, Özbəkistanın Buxara Dövlət Universitetinin rektoru Obicon Hamidov, Rumıniyanın İaşi Texniki Universitetinin prorektoru İrina Lungu, Macarıstanın Sopron Universitetinin prorektoru Ferens Lakatos çıxış edərək konfransın işinə uğurlar arzu ediblər.
Plenar iclas çərçivəsində “Azercosmos”un Süni İntellekt Bölməsinin rəhbəri Həmid Əskərovun, Türkiyənin Ege Universitetinin Biokimya kafedrasının müdiri Cenk Selcukinin, ATU-nun Avtomatika və informasiya texnologiyaları kafedrasının müdiri Rövşən Qasımovun, İnnovasiya Mərkəzinin direktoru Elnur Əhmədovun, İdarəetmə kafedrasının əməkdaşı, gənc tədqiqatçı İmran Əmiraslanovun elmi məruzələri dinlənilib. Daha sonra iki günlük konfrans 10 istiqamət üzrə bölmələrdə öz işini davam etdirib.
Qeyd edək ki, tədbir 25 ölkə, 88 universitet, 22 tədqiqat institutu və bir sıra dövlət və özəl müəssisələrin iştirakı ilə baş tutub. Konfrans materialları toplusuna 767 (154-ü xaricdən) tezis qəbul edilib.
Azərbaycan Texnologiya Universiteti (ATU) ölkədə ali təhsil müəssisələri arasında bir ilkə imza ataraq süni intellekt əsaslı "ATU-Bot" Rəqəmsal Təhsil Bələdçisini istifadəyə verib.
Universitetin İnnovasiya Mərkəzi tərəfindən hazırlanmış "ATU-Bot" tələbələrə akademik sahədə suallarını cavablandırmaq, faydalı tövsiyələr vermək və təhsil prosesində istiqamət göstərmək imkanına malikdir. Həmçinin, proqram abituriyentlər üçün də faydalıdır. "ATU-Bot" onlara topladıqları ballara əsasən müxtəlif illərin plan yerlərini, müsabiqə və keçid ballarını müqayisə edərək ən uyğun ixtisas seçimlərini göstərir, araşdırma əsasında müəyyən tövsiyələr verir.
Rəqəmsal Təhsil Bələdçisi universitetin rəsmi atu.edu.az veb saytına inteqrasiya olunub.
Universitetin Strateji İnkişaf Planı və rəqəmsallaşma siyasətinə uyğun olaraq hazırlanan bu yeniliyin məqsədi tələbələrin akademik suallarına cavab tapmasını asanlaşdırmaq, məlumat əldə etmə prosesini sürətləndirmək və abituriyentlərə sərbəst seçim imkanı yaratmaqdır.
