Azərbaycan Texnologiya Universitetində (ATU) yenilənmiş Tədrisin Elektron İdarəetmə Sisteminin (Kodera platformasının) təqdimatı keçirilib. Təqdimat zamanı ATU-nun rektoru Yaşar Ömərov yeni sistemin tətbiqinin universitetdə tədrisin keyfiyyətinə, idarəetmənin çevikliyinə və şəffaflığın təmin olunmasına mühüm töhfə verəcəyini deyib. Rektor bildirib ki, Kodera platformasının istifadəyə verilməsi ATU-da rəqəmsallaşma strategiyasının mühüm mərhələsidir və tələbələr üçün daha müasir, interaktiv təhsil imkanları yaradacaq.

Tədbirdə “SEKOP” MMC-nin baş direktoru Əli Süleymanov və texniki direktoru Ravid Ağayev Kodera brendi altında fəaliyyət göstərəcək yeni platformanın funksionallığını ətraflı təqdim ediblər. Şirkət rəsmiləri sistemin idarəetmə mexanizmləri, texniki dəstək prosedurları və ümumi iş prinsipləri barədə məlumat veriblər.

Qeyd edək ki, sabahdan professor-müəllim heyəti üçün seminarlar baş tutacaq. Akademik heyətə müəllim və tələbə kabinetlərinin idarə olunması, elektron jurnal və imtahan modullarının istifadəsi, elektron kitabxana, daxili yazışma, təqvim və digər xidmətlərin iş prinsipləri barədə praktik təlimlər keçiləcək.

Azərbaycan Texnologiya Universitetinin (ATU) Gəncə Cihazqayırma Zavodunda (GCZ) kafedra filialı fəaliyyətə başlayıb. Bu gün zavodda ATU-nun Maşın mühəndisliyi və logistika kafedrasının filialının açılış mərasimi keçirilib.

Tədbirdə ATU-nun rektoru Yaşar Ömərov və GCZ-nin direktoru Ayət Bağırov iştirak edib, onlar açılış lentini kəsdikdən sonra kafedra filialında yaradılan şərait - tədris və praktik imkanlarla tanış olublar.

ATU və GCZ rəhbərliyi bildirib ki, tərəflər arasında imzalanmış əməkdaşlıq memorandumu çərçivəsində tələbələrin istehsalat təcrübələri, elmi-tədqiqat işləri və gələcəkdə birgə layihələrin reallaşdırılması istiqamətində fəaliyyətlər davam etdiriləcək.

Yeni kafedra filialının açılmasında məqsəd tələbələrin nəzəri biliklərini istehsalat mühitində tətbiq etməsinə, praktiki bacarıqlarını inkişaf etdirməsinə və universitet–sənaye əməkdaşlığının möhkəmləndirilməsi təmin etməkdir.

Mərasimdən sonra nəqliyyat mühəndisliyi ixtisasının tələbələri “İxtisasa giriş” fənninin məşğələ dərsini artıq zavodun nəzdində fəaliyyətə başlayan Maşın mühəndisliyi və logistika kafedrasının filial otağında keçiriblər. Bu addım tələbələr üçün nəzəriyyənin istehsalatla sintezini təmin edən yeni imkanlar açır.

Azərbaycan Texnologiya Universitetində (ATU) 27 Sentyabr – Anım Gününə həsr olunmuş tədbir keçirilib. Tədbirdə Vətən Müharibəsi şəhidlərinin ailə üzvləri və qazilər iştirak ediblər.

Tədbirdən öncə universitetin həyətində ATU-nun şəhid məzun və tələbələrinin xatirəsinə ucaldılmış abidə və II tədris korpusunda yerləşən şəhidlər guşəsi ziyarət olunub, önünə gül dəstələri düzülüb.

Anım tədbiri Azərbaycan Respublikasının Dövlət Himninin səsləndirilməsi və Vətənin ərazi bütövlüyü uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə açıq elan edilib.

Daha sonra fəxri qonaqlar və ATU kollektivi üçün “44 Gün, 44 An” adlı sənədli film nümayiş etdirilib. Təxminən 40 dəqiqə davam edən film iştirakçılara duyğulu anlar yaşadıb.

Ardınca Azərbaycan Texnologiya Universitetinin rektoru Yaşar Ömərov çıxış edərək Ali Baş Komandan İlham Əliyevin rəhbərliyi ilə rəşadətli Azərbaycan Ordusunun gücündən, mübariz əsgər və zabitlərimizin igidliyindən, şəhidlərin misilsiz qəhrəmanlıqlarından, eləcə də ATU-nun Vətən Müharibəsində iştirak edən şəhid məzun və tələbələrindən bəhs edib.

Daha sonra 44 günlük Vətən Müharibəsi şəhidi Amal Əhmədovun və ATU tələbəsi Əsmər Əhmədovanın anası Mehriban Əhmədova, həmçinin universitetin şəhid məzunu Eldar Həsənlinin atası Müşviq Həsənli çıxış edərək övladlarının qəhrəmanlığı ilə qürur duyduqlarını, şəhidlərin xatirəsinin yaşadılmasının bütün ailələr üçün mənəvi dayaq olduğunu qeyd ediblər.

Tədbirdə həmçinin 44 günlük Vətən Müharibəsi zamanı mülki şəxslərə raket hücumu nəticəsində üç ailə üzvünü itirmiş tələbə Sənan Hacıyev, qazi tələbə Urfan İbrahimov çıxış edərək, o dövrün həm ağrılı, həm də qürurlu anlarından danışıblar.

Sonda tələbə Mələk Hacıyeva “Salam şəhid anası” şeirini səsləndirib.

Azərbaycan Texnologiya Universiteti (ATU) ilə Gəncə Cihazqayırma Zavodu (GCZ) arasında işgüzar görüş keçirilib. ATU-nun rektoru Yaşar Ömərov və GCZ-nin direktoru Ayət Bağırovun iştirakı ilə baş tutan görüşdə universitet-sənaye əlaqələri, eləcə də əməkdaşlıq məsələləri müzakirə edilib. 

Görüş çərçivəsində ATU ilə GCZ arasında anlaşma memorandumu imzalanıb. Memorandumda birgə kadr hazırlığı, istehsalat təcrübələrinin təşkili, müvafiq ixtisaslar üzrə tədris-metodiki vəsaitlərin birgə hazırlığı, elmi əməkdaşlıq, məzunların işlə təmin edilməsi, davamlı öyrənmə proqramları kimi məsələlər öz əksini tapır. 

İmzalanma mərasimindən sonra ATU-nun nümayəndə heyəti müəssisə ilə yaxından tanış olub, istehsal prosesini izləyib.

Azərbaycan Texnologiya Universitetində (ATU) universitet-sənaye əməkdaşlığı çərçivəsində yenidən qurulmuş 2 tədris otağının açılışı olub.

Açılış çərçivəsində ATU-nun rektoru Yaşar Ömərov “Təmas” Regional İnkişaf İctimai Birliyinin rəhbəri Südabə Məmmədova və "BuildX" şirkətinin təsisçisi Məmmədağa Bayramovla birgə otaqlarda yaradılan şəraitlə tanış olub.

Rektor universitet-sənaye əlaqələrinin tələbələrin praktiki bilik və bacarıqlarının formalaşdırılması baxımından mühüm əhəmiyyət daşıdığını, bu kimi dəstəyin əmək bazarının tələblərinə cavab verən mütəxəssislərin hazırlanmasına töhfə verəcəyini bildirib.

Müəssisə rəhbərləri öz növbəsində gələcək layihələrdə birgə fəaliyyətin davam etdiriləcəyini deyiblər.

Yüngül sənaye mühəndisliyi və logistika fakültəsində yerləşən bu otaqlardan biri – dizayn emalatxanası “Təmas” Regional İnkişaf İctimai Birliyinin dəstəyi ilə ərsəyə gəlib. Yüngül sənaye mühəndisliyi və dizayn kafedrasının nəzdində yaradılan emalatxana tikiş üçün zəruri texnika və mebel avadanlıqları ilə tam təchiz edilib.

Digər tədris otağı isə ATU ilə "BuildX" şirkəti arasında imzalanmış anlaşma memorandumu əsasında ərsəyə gəlib. 15 nəfərlik bu auditoriyada dərslərin keçirilməsi üçün tam şərait yaradılıb.

Azərbaycan Texnologiya Universitetində (ATU) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və "Təmas" Regional İnkişaf İctimai Birliyinin (RİB) birgə təşkilatçılığı ilə “Bölgədə məişət zorakılığı və insan alverinə qarşı mübarizə tədbirlərinin təşkili” layihəsi çərçivəsində seminar keçirilib.

Seminar ATU tələbələri üçün nəzərdə tutulub və iştirakçılara mövzu ilə bağlı ətraflı məlumat verilib. Tədbirdə “Təmas” RİB-in sədri Südabə Məmmədova və həmsədri Kubra Ələkbərova çıxış edərək, məişət zorakılığı və insan alverinə qarşı mübarizənin əhəmiyyəti, bu sahədə görülən tədbirlər və tələbələrin maarifləndirilməsi istiqamətində atılan addımlar barədə məlumat veriblər.

Seminar iştirakçıların aktiv sual-cavab sessiyası ilə davam edib və tələbələr layihə çərçivəsində həyata keçirilən fəaliyyətlərə dair fikir mübadiləsi aparıblar. Tədbir tələbələrin sosial məsuliyyət hissini artırmaq, insan hüquqlarının qorunması sahəsində bilik və bacarıqlarını gücləndirmək məqsədi ilə təşkil edilib.