Azərbaycan Texnologiya Universiteti ilə Macarıstanın Sopron Universiteti arasında ikili diplom müqaviləsi imzalanıb. 

Magistratura səviyyəsində "Ekologiya mühəndisliyi" proqramı üzrə ikili diplom müqaviləsi Azərbaycan Texnologiya Universitetinin rektoru dos.Yaşar Ömərovla Sopron Universitetinin rektoru prof.dr. Attila Fabian tərəfindən imzalanıb. 

2025/2026-cı tədris ilindən başlayaraq innovativ proqram magistr tələbələrinə unikal mədəniyyətlərarası və təhsil təcrübəsi təqdim edəcək. İngilis dilində tədris olunacaq proqramın iştirakçıları iki semestr Azərbaycan Texnologiya Universitetində, digər iki semestr isə Sopron Universitetində təhsil alaraq iki müxtəlif akademik mühit təcrübəsi qazanmaq imkanı əldə edəcəklər. Proqram çərçivəsində təhsilini başa vuran məzunlara hər iki ali təhsil müəssisəsinin magistr dərəcələri veriləcək.

Azərbaycan Texnologiya Universiteti Avropa İttifaqı tərəfindən maliyyələşdirilən və Azərbaycan Texniki Universitetinin koordinatorluğu ilə həyata keçirilən “Gürcüstan, Azərbaycan və Qazaxıstanda optik şəbəkələr və optik kommunikasiyalar üzrə ali təhsil müəssisələrinin monitorinq və idarəetmə potensiallarının artırılması - OPTIFY” adlı layihədə tərəfdaş kimi çıxış edir.

Layihənin ilkin görüşü onlayn formatda 10 yanvar 2025-ci il tarixində keçirilib. Görüşdə Azərbaycan Texnologiya Universitetini layihənin ATU üzrə meneceri strateji inkişaf və rəqəmsallaşdırma məsələləri üzrə rektor müşaviri Mehman Kərimov təmsil edib.

Görüşdə layihə çərçivəsində görüləcək işlərə dair məhsuldar müzakirələr aparılıb, təklif və tövsiyələr dinlənilib. 

Qeyd edək ki, Azərbaycanda genişlənməkdə olan optik şəbəkələrin monitorinqi və idarəolunması üzrə yeni magistratura proqramının təsis edilməsini hədəfləyən layihə 3 il müddətində icra olunacaq.  Bu ixtisas üzrə müasir səriştələrə və bacarıqlara malik kadr hazırlığı yerinə yetiriləcək, akademik heyətin qabaqcıl Avropa ali təhsil müəssisələrində təlimləri təşkil ediləcək,  həmçinin, tərəfdaş ATM-lərin bazasında yeni tədris laboratoriyası yaradılmaqla sənaye üçün müvafiq məzmunlu təhsil modulları formalaşdırılacaq.

Azərbaycan Texnologiya Universitetinin rektoru Yaşar Ömərov və digər rəhbər şəxslər Bakı-Qroznı aviareysini həyata keçirən AZAL-a məxsus təyyarənin Qazaxıstanın Aktau şəhəri yaxınlığında qəzaya uğraması nəticəsində xəsarət alan Texnologiya Universitetinin tələbəsi Toğrul Cəfərovu ziyarət edib.

Ziyarət zamanı rektor hadisə baş verdiyi vaxtdan ATU kollektivinin Toğrulun vəziyyətini daim izlədiyini, onun timsalında faciədən sağ çıxan bütün yaralıların şəfa tapması üçün dualar edildiyini deyib, təhqiqat prosesinin Azərbaycan Respublikasının Prezidenti Cənab İlham Əliyevin xüsusi diqqətində olduğunu vurğulayaraq ədalətin bərqərar olacağına, faciə səbəbkarlarının cəzalandırılacağına inandığını qeyd edib, qəzada həlak olanlara Allahdan rəhmət diləyib.

Qeyd edək ki, dekabrın 25-də AZAL-ın J2-8244 nömrəli Bakı-Qroznı aviareysini həyata keçirən "Embraer 190" sərnişin təyyarəsinin qəzaya uğraması nəticəsində 38 nəfər, o cümlədən üç ekipaj üzvü həlak olub, 29 nəfər isə sağ qalıb.

Azərbaycan Texnologiya Universiteti (ATU) ilə İsrailin Holon Texnologiya İnstitutu (HTİ) arasında əməkdaşlıq memorandumu imzalanıb.

Bu məqsədlə hər iki təhsil müəssisəsi arasında onlayn görüş keçirilib.

Görüşdə ATU-nun rektoru dos.Yaşar Ömərov və HTİ-nin prezidenti, prof. Eduard Yakubov əməkdaşlığın perspektivlərindən, hər iki təhsil ocağı üçün əhəmiyyətindən danışıb, birgə görüləcək işləri müzakirə ediblər.   

Görüş çərçivəsində ATU və HTİ haqqında hazırlanmış qısa təqdimatlar göstərilib, sonda əməkdaşlıq memorandumu imzalanıb. 

Memorandumda Texnologiya Universiteti ilə Holon Texnologiya İnstitutu arasında akademik və inzibati heyətin, eləcə də tələbələrin mübadiləsini həyata keçirmək, elmi-tədqiqat sahəsində əməkdaşlıq məsələləri nəzərdə tutulur.

Azərbaycan Texnologiya Universitetində (ATU) Dünya Azərbaycanlılarının Həmrəyliyi Günü və ilin yekunlarına həsr edilmiş tədbir keçirilib.

Əvvəlcə Azərbaycan Respublikasının Dövlət Himni səsləndirilib, Azərbaycanın müstəqilliyi, ərazi bütövlüyü və suverenliyi uğrunda canından keçən şəhidlərin, eləcə də Bakı-Qroznı reysini yerinə yetirən “Embraer 190” tipli sərnişin təyyarəsinin qəzaya uğraması nəticəsində həlak olanların əziz xatirəsi bir dəqiqəlik sükutla yad edilib.

Sonra Azərbaycan Texnologiya Universitetinin rektoru Yaşar Ömərov kollektivi Dünya Azərbaycanlılarının Həmrəyliyi Günü və qarşıdan gələn yeni 2025-ci il münasibəti ilə təbrik edib. Rektor əsası Ümummilli lider Heydər Əliyev tərəfindən qoyulan həmrəylik tarixindən, geridə qoymaq üzrə olduğumuz ildə Prezident cənab İlham Əliyevin rəhbərliyi ilə ölkəmizin əldə etdiyi nailiyyətlərdən bəhs edib, cənab Prezidentin sərəncamı ilə 2025-ci ilin “Konstitusiya və Suverenlik İli” elan edildiyini vurğulayaraq növbəti ildə daha çox uğurlara imza atılacağına əminlik ifadə edib. Y.Ömərov çıxışında ATU-da 2024-cü il ərzində elm, tədris və digər sahələrdə görülmüş işlərdən danışıb, yeni il üzrə hədəfləri diqqətə çatdırıb.

Daha sonra Qida mühəndisliyi və ekspertiza kafedrasının müdiri prof. Əhəd Nəbiyev və Elmi fəaliyyətin təşkili və idarə edilməsi şöbəsinin müdiri Qalibə Məmmədova çıxış edərək dünya azərbaycanlılarının həmrəylik tarixindən, bu tarixin yaranmasında Ümummilli lider Heydər Əliyevin rolundan danışıblar. 

Tədbir çərçivəsində “İlin müəllimi” nominasiyasının qalibləri elan edilərək rektor tərəfindən təltif olunublar. Tələbələr arasında keçirilmiş sorğunun nəticələrinə əsasən Qida mühəndisliyi fakültəsindən Mehriban Aslanova, Yüngül sənaye mühəndisliyi və logistika fakültəsindən Mobil Qarayev, İqtisadiyyat və idarəetmə fakültəsindən Mehriban Tağıyeva, Avtomatika, telekommunikasiya və informatika fakültəsindən isə Aida Məmmədova “İlin müəllimi” seçilib.

Azərbaycan Texnologiya Universitetində tyutor hazırlığı kursunu müvəffəqiyyətlə başa vurmuş dinləyicilərə sertifikatlar təqdim edilib.

Azərbaycan Texnologiya Universitetinin ümumi işlər üzrə prorektoru Rauf Bağırov, sosial məsələlər və ictimaiyyətlə əlaqələr üzrə prorektoru Şahmar Həsənov, elmi işlər üzrə prorektor v.m.i.e, elm və xarici əlaqələr üzrə müşavir Sahil Həmidov, Tədri̇si̇n təşki̇li̇ və İdarə edi̇lməsi̇ şöbəsinin müdiri Cəsarət Şabanov kursu uğurla bitirənlərə rektor Yaşar Ömərovun təbrikini çatdırıb, onlara fəaliyyətlərində müvəffəqiyyətlər arzulayıblar.

Daha sonra rəhbər heyət tərəfindən akademik məsləhətçi statusu qazananlara müvafiq sertifikatlar təqdim edilib. 4 müdavim I dərəcəli, 6 nəfər II dərəcəli, 4 dinləyici isə III dərəcəli sertifikata layiq görülüb.

Qeyd edək ki, tyutor hazırlığı kursu 2024-cü ilin 15 oktyabr tarixindən başlayaraq 3 ay davam edib. Kursa təkmilləşdirmə məqsədilə fakültələr üzrə fəaliyyət göstərən tyutorlar da cəlb edilib.