ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2023-12-09

“Davamlı inkişaf strategiyası: qlobal trendlər, milli təcrübələr və yeni hədəflər” adlı II beynəlxalq elmi konfrans

Azərbaycan Texnologiya Universitetinin rektoru v.m.i.e. dos.Yaşar Ömərov Mingəçevir Dövlət Universitetində keçirilən (MDU) Ümummilli Lider Heydər Əliyevin 100 illiyinə həsr olunmuş “Davamlı inkişaf strategiyası: qlobal trendlər, milli təcrübələr və yeni hədəflər” adlı II beynəlxalq elmi konfransda iştirak edib.

Yaşar Ömərov konfransın plenar iclasında çıxış edib, konfrans mövzusunun aktuallığı, bu konteksdə yerli və xarici elm adamlarının bir araya gəlməsinin əhəmiyyəti və zərurəti haqda danışıb, konfransın işinə uğurlar arzu edib.

Qeyd edək ki, tədbirə dünyanın 9 ölkəsinin ali təhsil müəssisələri, elmi tədqiqat institutları və müvafiq qurumlarından akademik heyət üzvləri, alimlər və ekspertlər qatılıb.

2023-12-08

Azərbaycan Texnologiya Universitetində Elm və Təhsil Nazirliyinin tabeliyində fəaliyyət göstərən Təhsilin İnkişafı Fondunun Gəncədə yerləşən ali təhsil müəssisələri üçün təqdimatı keçirilib

Tədbirdə Azərbaycan Texnologiya Universitetinin rektoru v.m.i.e. dos.Yaşar Ömərov, Gəncə Dövlət Universitetinin rektoru Yusif Yusibov, Azərbaycan Dövlət Aqrar Universitetinin rektoru Zəfər Qurbanov və hər üç universitetin struktur bölmə rəhbərləri iştirak edib.

Təhsilin İnkişafı Fondunun İdarə Heyətinin sədri Elnur Nəsibov təqdimatla çıxış edib. Sədr Fondun yaradılması, məqsədləri, missiyası, Fond tərəfindən həyata keçirilən layihələr, təqaüd proqramları barədə ətraflı məlumat verib, perspektivdə yeni layihələrin olduğunu qeyd edib.

Sonda tədbir iştirakçılarının təklifləri dinlənilib, sualları cavablandırılıb.

2023-12-08

Azərbaycan Texnologiya Universitetinin nümayəndələri Tacikistan Respublikasının paytaxtı Düşənbədə keçirilmiş "Kimya elmləri və texnologiyaları üzrə müasir innovativ trendlər" adlı beynəlxalq elmi konfransda iştirak ediblər

Konfransda Azərbaycan Texnologiya Universitetini təmsil edən Ətraf Mühitin Qorunması kafedrasının müəllimi, İnnovasiya mərkəzinin direktoru Şamo Salayev "LDH-əsaslı Fe-MG Nanokmopozitlərin ağır metalların adsorbsiyasında tətbiqi və tədqiqatın nəticələri", doktorant Elnur Arifzadə "Suların təmizlənilməsində elektrokatalitik üsulların tətbiqi" adlı elmi araşdırmalarını təqdim edərək məruzələrlə çıxış ediblər.

Şamo Salayev konfrasınsın Yüksək texnologiyalar: nanokimya və nanomaterialları adlı sesiyasına rəhbərlik edib.

Tacikistan Milli Elmlər Akademiyasının təşəbbüsü ilə keçirilən elmi konfransda Azərbaycan, Qazaxıstan, Özbəkistan, Tacikistan, Rusiya, Belarus və Ermənistan kimi MDB ölkələrinin universitet və tədqiqat mərkəzlərində çalışan alimlər iştirak edib.

Konfransda uğurla çıxış edən nümayəndə heyətləri diplom və sertifikatlarla təltif edilib.

2023-12-07

Ulu Öndər Heydər Əliyevin 100 illiyinə həsr olunmuş "Qida Sənayesi və Qida Təhlükəsizliyi" forumu keçirilib

Azərbaycan Texnologiya Universiteti (ATU) və Azərbaycan Qida Təhlükəsizliyi İnstitutunun (AQTİ) birgə təşkilatçılığı ilə Ulu Öndər Heydər Əliyevin 100 illiyinə həsr olunmuş "Qida Sənayesi və Qida Təhlükəsizliyi" forumu keçirilib.

Qəbələ Konserv Zavodunun, Azgranata Şirə və Şərab Emalı Zavodunun və Gama/Orzax şirkətinin dəstəyi ilə baş tutan 2 bölmədən ibarət forum Heydər Əliyev Mərkəzində təşkil olunub.

Tədbirdə giriş sözü ilə çıxış edən Azərbaycan Texnologiya Universitetinin rektoru v.m.i.e dos. Yaşar Ömərov bildirib ki, Ümummilli Lider Heydər Əliyev Azərbaycana rəhbərlik etdiyi bütün dövrlərdə ölkənin ərzaq təhlükəsizliyi məsələsini daim diqqət mərkəzində saxlayıb, dövlətçilik strategiyasının əsas elementləri sırasına daxil edib. Bunun davamı olaraq Azərbaycan Respublikasının Prezidenti cənab İlham Əliyevin səyi nəticəsində qida təhlükəsizliyinin təmin edilməsi istiqamətində mühüm işlər görülüb, bu sahədə qəbul edilən dövlət proqramları uğurla icra olunur. Y.Ömərov çıxışında qida sənayesi və qida təhlükəsizliyinin dünyada mövcud vəziyyətinə və aktual məsələlərinə diqqət çəkib, bölmələrdə aparılacaq müzakirələrin məhsuldar olacağına, qeyd olunan sahələrə töhfə verəcəyinə əminlik ifadə edib.

Daha sonra AQTİ-nin İdarə Heyətinin sədri Əli Nəbiyev çıxış edərək Ümummili Liderin reallaşdırdığı kənd təsərrüfatı inkişaf konsepsiyasının ölkəmizdə yeyinti məhsullarının keyfiyyətinin təmin edilməsinə və qida sənayesinin inkişafının sürətlənməsinə əlverişli zəmin yaratdığını bildirib. Qeyd edib ki, Prezident İlham Əliyevin rəhbərliyi ilə digər sahələrlə birgə qida təhlükəsizliyi sahəsində də həyata keçirilən islahatlar əhalinin sağlam qida ilə təminatının yaxşılaşdırılmasına öz töhfəsini verməkdədir. Ə. Nəbiyev qida təhlükəsizliyinin təmin edilməsi ilə əlaqədar AQTİ tərəfindən həyata keçirilən tədbirlər, eləcə də yeni fəaliyyətə başlayan Gəncə Regional Sınaq Laboratoriyasının sahə və bölgə üçün əhəmiyyətindən də danışıb.

Açılış tədbirində AMEA-nın Gəncə bölməsinin rəhbəri akademik Fuad Əliyev, YAP-nın Gəncə şəhər təşkilatının sədri Bayram Aslanov, Kənd Təsərrüfatı Nazirliyinin Aqrar İnnovasiya Mərkəzinin direktoru Anar Cəfərov, Bitki Mühafizəsi və Texniki Bitkilər Elmi Tədqiqat İnstitutunun direktoru, AMEA-nın müxbir üzvi İbrahim Cəfərov, FAO Azərbaycan Ofisinin nümayəndəsi Elməddin Namazov da çıxış edərək forumun işinə uğurlar arzu ediblər.

Forum iki paneldə öz işini davam etdirib.

"Qida sənayesi" paneli ATU-nun Qida mühəndisliyi fakültəsinin dekanı dos.Mehman İsmayılovun moderatorluğu, spikerlər - AQTİ-nin Kompleks tədqiqatlar laboratoriyasının müdiri Nihad Quliyev, Qəbələ Konserv Zavodunun direktoru Özgür Demirkıran, Azərbaycan Koorperasiya Universiteti, eləcə də Neft və Sənaye Universitetinin professoru Vüqar Mikayılov, İspaniyanın Jaen Universitetinin nümayəndəsi Dr. Julio Vena Oya, AzərMaya İstehsal QSC-nin istehsalat departamentinin direktoru Yusif Şahverdiyevin iştirakı ilə baş tutub.

"Qida təhlükəsizliyi" paneli isə Şirvan Şərabları Zavodunun baş texnoloqu Teymur Musayevin moderatorluğu, AQTİ-nin Qida təhlükəsizliyi və risklərin qiymətləndirilməsi şöbəsinin müdiri Deniz Ercan Pirinççi, Əməkdar mədəniyyət işçisi, Azərbaycan Milli Kulinariya Assosiasiyasının və Türksoyun Dünya Türk Mətbəx Kültürü, Elmi və Sənəti Birliyinin prezidenti Tahir Əmiraslanov, ATU-nun professoru Əhəd Nəbiyev, Heyvandarlıq Elmi-Tədqiqat İnstitunun Genetika və embrion transferi laboratoriyasının müdiri Rəşad Məhərrəmov, iqlim dəyişmələri üzrə ekspert İsa Əliyevin iştirakı ilə reallaşıb.

Digər xarici mütəxəssislərin, elmi-tədqiqat institutlaının. sənaye müəssisələri təmsilçilərinin qatıldığı forumda qida sənayesi, qida təhlükəsizliyinə aid ən aktual məsələlər, problemlər müzakirə edilib.

2023-12-07

Azərbaycan Texnologiya Universitetində (ATU) Ümummilli lider Heydər Əliyevin 100 illiyinə həsr olunmuş "Gənc İnnovatorlar" Startap müsabiqəsi keçirilib.

Yarış ATU İnnovasiya Mərkəzinin təşkilatçılığı, Təhsilin İnkişafı Fondu, "Huawei" şirkəti, "Bir" Tələbə Könüllü Təşkilatının dəstəyi ilə reallaşıb.

ATU-nun rektoru v.m.i.e. dos.Yaşar Ömərov, Təhsilin İnkişafı Fondunun İdarə Heyətinin sədri Elnur Nəsibov, "BİR" Könüllü Tələbə Təşkilatının Region üzrə sədri Əsli Məhərrəmova stendləri gəzib, startap layihələri ilə ətraflı tanış olublar.

Müsabiqədə 56 tələbədən ibarət komandalar tərəfindən qida, yüngül sənaye, İKT, nəqliyyat sahəsini əhatə edən bir-birindən maraqlı 28 startap təqdim edilib.

"Laser Eye" komandası Mina axtaran dron startapı ilə müsabiqənin qalibi olub. İkinci yeri "Alpha Soldier" startap oyunu ilə "Yarostı Geym" komandası tutub. Üçüncü yerə isə "Yeah Crypto" startap ilə eyni adlı " komanda layiq görülüb.

Qalib komandalar pul mükafatı, sertifikat və hədiyyələrlə təltif edilib.

Qeyd edək ki, startap yarışın keçirilməsində məqsəd universitetdə startap ekosistemini inkişaf etdirmək, yeni startapların yaradılmasına kömək etmək, bu sahəyə marağı və istedadı olan gənclərdə stimul yaratmaqdan ibarətdir.

2023-12-07

Azərbaycan Texnologiya Universiteti (ATU) ilə Azərbaycan Respublikası Elm və Təhsil Nazirliyinin tabeliyində fəaliyyət göstərən Təhsilin İnkişafı Fondu (TİF) arasında görüş keçirilib

ATU-nun rektoru v.m.i.e. dos. Yaşar Ömərov və Təhsilin İnkişafı Fondunun İdarə Heyətinin sədri Elnur Nəsibovun iştirakı ilə baş tutan görüşdə əməkdaşlıq əlaqələrinin perspektivləri müzakirə edilib.

Görüş çərçivəsində Fond sədri Azərbaycan Texnologiya Universitetin maddi-texniki bazası ilə yaxından tanış olub.