Əvvəlcə Azərbaycan Respublikasının Dövlət Himni səsləndirilib. Daha sonra Vətən uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.Azərbaycan Texnologiya Universitetinin rektor vəzifəsini müvəqqəti icra edən dos. Yaşar Ömərov giriş sözü ilə çıxış edib. Yaşar Ömərov giriş sözü ilə çıxış edib. Bildirib ki, 1918-ci il mayın 28-də Azərbaycan Xalq Cümhuriyyətinin yaradılması ölkəmizin həyatına böyük tarixi hadisə kimi daxil olub. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti cəmi 23 aylıq fəaliyyəti dövründə xalqın milli mənlik şüurunu özünə qaytarıb, onun öz müqəddəratını təyin etməyə qadir olduğunu nümayiş etdirib. İstiqlal ideyası uğrunda atılan addımlar məhz bu gün Azərbaycanı gələcəyə doğru inamla irəliyə aparan yol olub.Daha sonra Gəncə Veteranlar Şurasının sədri Yusif Məmmədov, Qarabağ Əlillərinə Qayğı İctimai Birliyinin nümayəndəsi Rövşən Əsədov, ATU-nun Sosial məsələlər və ictimaiyyətlə əlaqələr üzrə müşaviri Şahmar Həsənov, İnzibati İdarəetmə kafedrasının dosenti Elmir Cəfərov, İctimai elmlər və multikulturalizm kafedrasının baş müəllimi Rafiq Hüseynov çıxış ediblər. Azərbaycanın müstəqillik qazanmasından 105 il keçməsinə baxmayaraq hələ də bu əlamətdar günün əvvəlki kimi coşqu ilə qeyd olunduğunu bildiriblər. Azərbaycan xalqının müstəqillik uğrunda apardığı mübarizələrdən bəhs ediblər.Tədbirin yekununda universitetimizin əməkdaşı I Qarabağ müharibəsi iştirakçısı İsfəndiyar Vəli oğlu Hacıyev 65 illik yubileyi münasibəti ilə həm universitet adından, həm də Qarabağ Əlillərinə Qayğı İctimai Birliyi adından fəxri fərmanla təltif olunub.
Xəzər və Baltik sahili dövlətlərdən olan Azərbaycan və Litva strateji mövqeyi, tarixi zənginliyi, iqtisadi, diplomatik və sosial əlaqələri baxımından diqqət cəlb edən ölkələrdəndir. Azərbaycan və Litva əlaqələrinin rəsmi və diplomatik tarixi keçən əsrdən başlamışdır. Litvanın Azərbaycan Demokratik Respublikasında nümayəndəliyi fəaliyyət göstərmişdir, Bakıda yerləşən nümayəndəliyə konsul Vintsas Kreve-Mitskəviçyus rəhbərlik etmişdir. Azərbaycan Parlamenti 1920-ci ilin aprel ayının 22-sində bir sıra Avropa ölkələrində, Amerikada, Fransa, Böyük Britaniya, İtaliya, ABŞ və Polşada fəaliyyət göstərəcək diplomatik missiyaların təsis edilməsi haqqında qərar qəbul etmişdir. Azərbaycanın Polşada təsis ediləcək diplomatik nümayəndəliyi bir sıra orta Avropa ölkələrində, o cümlədən Litvada da akkreditə olunması planlaşdırılsa da, 28 apreldə Azərbaycanın Sovet ittifaqı tərəfindən işğalı milli hökumətin diplomatik nümayəndəliklər açmaq barədə qərarının icrasını alt-üst etdi. Nəticədə hər iki ölkə İttifaqda birləşdirildi. Keçmiş ittifaq daxilində də yaxşı əlaqələrə malik olan hər iki ölkə ötən əsrin ortalarından başlayaraq bir sıra sahələrdə qarşılıqlı əməkdaşlığı möhkəmləndirməyə nail olub. Bunun nəticəsidir ki, iqtisadiyyatları bir-birinə yaxın olan Azərbaycanla Litva hər bir sahədə normal əlaqələrə malikdir və istər siyasi, istərsə də iqtisadi məsələlərdə daha tez anlaşmaya nail olur, bir-birini dəstəkləyirlər. Müstəqillik əldə edildikdən sonra dövlətlərarası əlaqə müstəqillik prizmasından yenidən qurulmağa, dərinləşməyə başladı. Azərbaycan Respublikasının Milli Məclisində Azərbaycan-Litva parlamentlərarası əlaqələr üzrə işçi qrupu fəaliyyət göstərir. Bu işçi qrupu 7 mart 1997-ci il tarixində "Azərbaycan-Baltikyanı ölkələri (Latviya, Litva, Estoniya) parlamentlərarası əlaqələr üzrə işçi qrupu" adı ilə yaradılmışdır. Hər iki ölkənin bir-birində 2007-ci ildən səfirlikləri fəaliyyətə başlamışdır. Dövlət və hökumət başçıları səviyyəsində rəsmi və işgüzar səfərlər hər iki dövlətin əlaqələrinin dərinləşməsi baxımından faydalı olmuş, bir sıra sənədlər imzalanmışdır. Azərbaycan Prezidentinin Litvaya hələ 2007-ci ildə baş tutmuş səfəri Azərbaycan-Litva münasibətlərinin yüksələn xətlə inkişafına geniş perspektivlər açmışdır. Həmin vaxt dövlət başçılarının geniş tərkibdə görüşündə Prezident İlham Əliyev demişdir: "Biz Litva ilə münasibətlərə böyük əhəmiyyət veririk və bu münasibətlər son vaxtlar xeyli inkişaf etmişdir. Litva və Azərbaycan vahid mövqelərdən çıxış edirlər, ölkələrimiz arasında heç bir problem yoxdur və əlaqələrimiz yüksələn xətlə inkişaf edəcəkdir." Litva Prezidenti Valdas Adamkus Azərbaycan Prezidenti İlham Əliyevin Vilnüsə ilk rəsmi səfərini yüksək qiymətləndirərək demişdir ki, ölkələrimiz arasında münasibətlər qısa müddətdə intensiv inkişaf etməyə başlamışdır. Ölkələrimiz arasında hansısa fikir ayrılığı yoxdur. Vətən müharibəsindən əvvəl baş tutmuş Litva rəsmiləri ilə görüşlərdə daima vurğulanan məsələlərdən biri Ermənistan-Azərbaycan münaqişəsində Azərbaycanın haqlı mövqeyini dəstəkləməsi işğal altındakı ərazilərdə ticarət-iqtisadi fəaliyyətin Azərbaycanın ərazi bütövlüyünə əsaslanmalı olmasıdır. Litva Azərbaycanın Avropa tərəfdaşları sırasındadır. Şərq Tərəfdaşlığı ölkələri çərçivəsində Aİ-nin Litvaya təqdim etdiyi tvinninq layihələrində də Azərbaycan Litvanın ən etibarlı tərəfdaşlarından biridir. Bu günə qədər Litva Azərbaycanda 26 layihənin seçimində iştirak edib, onlardan 17-də ölkəmizin iştirakı təmin olunmuşdur. Litva Avropa İttifaqı ilə Azərbaycan arasında tərəfdaşlıq əlaqələrinin inkişafının tərəfdarıdır. Mədəni, sosial, iqtisadi əlaqələrin qurulması, müxtəlif kommunikasiya kanallarının mövcudluğu beynəlxalq münasibətlərin ən mühüm amillərindəndir. Bu baxımdan bu günün Azərbaycanının apardığı balanslaşdırılmış daxili və xarici siyasət təqdirəlayiqdir. Prezident İlham Əliyevin və birinci xanım Mehriban Əliyevanın Litva Respublikasına 21 may 2023-cü il tarixində baş tutmuş rəsmi səfəri dövlətlərarası münasibətlərin daha intensivləşməsinə əsas verir. Səfər çərçivəsində imzalanan sazişlər də iki ölkə arasında əməkdaşlığın inkişafında yeni mərhələ təşkil edəcəkdir. Prezident İlham Əliyev səfər çərçivəsində Litvanın Prezidenti Gitanas Nauseda, ölkənin Baş naziri xanım İnqrida Şimonite ilə görüşmüşdür. Ətraf mühit, gənclər və hüquq-mühafizə sahələrində də Litva ilə Azərbaycan arasında əməkdaşlıq haqqında sazişlər imzalanmış, ikitərəfli müzakirələr aparılmışdır, biznes forum təşkil edilmişdir. Bunlar isə əlaqələrin daha da dərinləşməsinə, zənginləşməsinə öz növbəsində rəvac verir. Bu gün Azərbaycan regionda öz məxsusi və güclü mövqeyi ilə seçilir. Bu xarizmanın formalaşmasına günbəgün inkişaf edən iqtisadi və sosial sferadakı müsbət dəyişikliklərlə yanaşı, Vətən müharibəsində qazanılan qələbənin də qüvvətli təsiri vardır. Ölkə başçısı prezident İlham Əliyev Vilnüsdə mətbuata verdiyi bəyanatında vurğulamışdır ki, Litva ölkəmizlə Avropa İttifaqı arasında əlaqələrin inkişafına önəmli töhfələr verir. Prezident Q.Nauseda Azərbaycana səfər edəndən iki ay sonra Avropa Komissiyası ilə Azərbaycan arasında Bakıda enerji sahəsində strateji tərəfdaşlıq üzrə Anlaşma Memorandumu imzalanmışdır və bu memorandum uğurla icra edilir. Azərbaycan təbii qazının Avropa bazarlarına nəql edilməsi ilə bağlı çox ciddi addımlar atılır. Nəql edilən, yəni, ixrac edilən qazın həcmi ildən-ilə artır və artacaq. Avropa İttifaqının Cənubi Qafqazda olan geosiyasi maraqları getdikcə böyüyür. Bu gün Aİ ölkələrinin enerji təhlükəsizliyinin təmin olunması məsələsi bu maraqları daha konkret formalarda ortaya qoyur. Məhz elə bu maraqların da təmin olunması naminə Avropa İttifaqı 44 günlük müharibədən sonra yaranmış yeni geosiyasi reallığı qəbul edir və öz mövqeyində yaranmış bu yeni reallığa əsaslanır. Yeni reallıq isə, ilk növbədə, möhkəm və davamlı regional sülhün bərqərar olunmasına əməli töhfələr verə biləcək yeni, işlək formatın yaradılmasını tələb edir. Belə bir format da məhz Prezident İlham Əliyevin son iki ildə keçirdiyi görüşlərin və apardığı danışıqların nəticəsi olaraq yaranıb. Bu gün Avropa ölkələrinin enerji təhlükəsizliyinin təmin olunması Avropa İttifaqının qarşısında duran ən vacib məsələlərdən biridir. Daha bir vacib məqam da budur ki, Azərbaycan və Litva Prezidentlərinin keçirdikləri görüşdə bərpaolunan enerji növlərinin yaradılması ilə də bağlı fikir mübadiləsi aparılıb. Müəyyən olunub ki, ölkələrimiz bu istiqamətdə də demək olar, paralel şəkildə hərəkət edirlər. Həm Litvada, həm Azərbaycanda bu sahəyə çox böyük diqqət göstərilir və yaxın gələcəkdə bu sahədə də dinamik ikitərəfli əməkdaşlıq mümkün olacaqdır. Hər bir yeni rəsmi görüş inkişafın yeni bir mərhələsini təşkil edir. Ölkə başçısının səyi nəticəsində Azərbaycan dünya miqyasında söz sahibi olan dövlətlərdən biridir. Prezident İlham Əliyevin yorulmaz və davamlı siyasəti nəticəsində işğaldan azad olunmuş ərazilərimiz də 30 illik vandalizmdən sonra qısa müddətdə bərpa olunacaq, Azərbaycan daima çiçəklənəcəkdir.
Mətanət Eldar qızı Mustafayeva
Azərbaycan Texnologiya Universitetinin
İctimai elmlər və multikulturalizm kafedrasının baş müəllimi
1917-ci ildə Rusiyada baş vermiş Fevral inqilabı nəticəsində çar devrildi. Bununla da Rusiyada monarxiyaya son qoyuldu. Ölkədə çarizmin məzlum vəziyyətə saldığı xalqların milli hərəkatı başlandı. 1918-ci il mayın 28-də Məhəmməd Əmin Rəsulzadənin başçılığı altında Azərbaycan Xalq Cümhuriyyəti (1918–1920) – müsəlman Şərqində ilk dünyəvi demokratik dövlət yaradıldı. Bu respublika Azərbaycanlıların tarixi yaddaşında Azərbaycan dövlətçiliyinin ilk təcrübəsi kimi iz qoymuşdur. Məhəmməd Əmin Rəsulzadə tərəfindən əsası qoyulan Azərbaycan Xalq Cümhuriyyəti türk və islam dünyasında ilk parlamentli Respublika və ilk demokratik, hüquqi və dünyəvi dövlət nümunəsi idi. 28 May –şanlı tariximizə qızıl hərflərlə həkk olunmuş, hər bir Azərbaycan vətəndaşının qürur mənbəyi olan bir gündür. 1918-ci il mayın 28-də mürəkkəb siyasi hərbi-şəraitdə əsarət altında yaşayan, tarixi, mədəniyyəti, dili, dini sıxışdırılan Azərbaycan xalqı özünün və Şərqin ilk demokratik, hüquqi, dünyəvi və parlamentli respublikasını yaradıb. Yüz beş il bundan əvvəl - 1918-ci il mayın 28-də Azərbaycan Xalq Cümhuriyyətinin yaradılması ölkəmizin həyatına böyük tarixi hadisə kimi daxil oldu. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti cəmi 23 aylıq fəaliyyəti dövründə xalqın milli mənlik şüurunu özünə qaytardı, onun öz müqəddəratını təyin etməyə qadir olduğunu nümayiş etdirdi. 1918-ci il mayın 28-də qəbul edilən İstiqlal Bəyannaməsindən də göründüyü kimi, bu möhtəşəm tarix xalqımızın müstəqillik hisslərini daha da gücləndirdi. Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni şərəflə yerinə yetirdi. Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, ordu quruculuğu sahəsində ciddi tədbirlər həyata keçirildi, maarifin və mədəniyyətin inkişafına xüsusi diqqət yetirildi. Azərbaycanın ilk universiteti təsis olundu, təhsil milliləşdirildi, xalqın sonrakı illərdə mədəni yüksəlişi üçün zəmin hazırlayan, ictimai fikir tarixi baxımından müstəsna əhəmiyyətli işlər görüldü. Azərbaycan Demokratik Respublikasını rəsmi surətdə tanıyan ilk dövlət Osmanlı dövləti olmuşdur. Həmin tarixi hadisə 4 iyun 1918-ci ildə baş vermişdir. 1918-ci il 9 noyabr tarixində Azərbaycan Demokratik Respublikasının üç rəngli bayrağı qəbul edilmişdir. O zamana qədər Azərbaycan Demokratik Respublikasının bayrağı qırmızı rəngdə idi. Cümhuriyyət çox az müddət mövcud olsa da, Azərbaycan xalqının milli-vətənpərvərlik ruhunun, azadlıq, müstəqillik arzusunun alovlanmasına təkan verdi. Həmin dövrdə mürəkkəb siyasi şəraitdə yaranmış dövləti qoruyub saxlamaq təəssüf ki, mümkün olmadı. Bundan sonra ilk dəfə olaraq rəsmi qaydada üçrəngli bayrağı Ulu Öndər Heydər Əliyev Naxçıvan Muxtar Respublikasının Ali Məclisinin sessiyasında rəsmi dövlət bayrağı kimi qaldırıdı. Bununla da müstəqilliyə gedən yolun əsası qoyuludu. Sovet İttifaqı mövcud olduğu bir vəziyyətdə belə cəsarətli addımın atılması Ulu Öndərin xalqına, dövlətinə nə qədər bağlı olduğunu, bu yolda nə qədər cəsarətli, dönməz olduğunu bir daha göstərdi. Tarixi proseslər, hadisələr deməyə əsas verir ki, müstəqilliyin əldə edilməsi mürəkkəb bir proses olsa da onu qoruyub saxlamaq daha çətin, məsuliyyətli bir işdir. 1991-ci ilin dekabrında SSRİ dağıldıqdan sonra Azərbaycan özünü Xalq Cümhuriyyətinin varisi elan edib və ölkə müstəqiliyini yenidən bərpa etməyə başladı. XX əsr tarixə yalnız elm, texnika əsri kimi yox, həm də milli oyanış, xalqların müstəmləkəçilikdən azad olması və milli dövlətlərin yaranması əsri kimi də daxil olub. XX əsrin sonlarında yenidən müstəqilliyinə qovuşan Azərbaycan öz suverenliyini qoruyub saxlamağı bacardı. Yenidən hakimiyyətə qayıdan Ümummilli Lider Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Beləliklə, Heydər Əliyevin şah əsəri olan müasir müstəqil Azərbaycan dövləti quruldu və sürətli inkişaf yoluna qədəm qoydu. Ümummilli Liderin bu siyasətini Prezident İlham Əliyev uğurla davam etdirir. Dövlətimizin başçısının sərəncamları ilə 2018-ci il ölkəmizdə “Azərbaycan Xalq Cümhuriyyəti İli” elan olundu və AXC-nin 100 illik yubileyi təntənəli şəkildə qeyd edildi. Ulu Öndərin layiqli varisinin də siyasətində hər zaman Azərbaycan Xalq Cümhuriyyətinə hörmət və sayğı özünü göstərməkdədir. Belə ki, 28 May - hər il ölkəmizdə xüsusi təmtəraqla qeyd edilir, Azərbaycan dövləti öz siyasətində Azərbaycan Xalq Cümhuriyyətinin qurucularının xatirəsinə həmişə ehtiramla yanaşır. Bu gün Prezident İlham Əliyevin rəhbərliyi ilə Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir, ölkə iqtisadiyyatı dönmədən inkişaf etdirilir, əhalinin sosial müdafiəsinin gücləndirilməsi üçün əsaslı tədbirlər görülür. 2020-ci il sentyabrın 27-də Azərbaycan Ordusunun işğalçı Ermənistan silahlı qüvvələrinə qarşı başladığı əks-hücum əməliyyatında əldə etdiyi möhtəşəm qələbələrin ən başlıca səbəbi Prezident, Ali Baş Komandan İlham Əliyevin son 17 ildə həyata keçirdiyi güclü dövlət, güclü ordu strategiyası, milli birlik, döyüşçülərimizin qəhrəmanlığı, vətənpərvərliyi, ruh yüksəkliyi idi. Qırx dörd günlük müharibədə məğlub olan Ermənistanın Azərbaycanın şərtlərini qeyd-şərtsiz qəbul etməsi, Azərbaycan, Rusiya prezidentlərinin və Ermənistanın baş nazirinin birgə imzaladıqları bəyanat da məhz düşmən ölkənin kapitulyasiyasının ifadəsi və Azərbaycan dövlətinin birmənalı qələbəsinin göstəricisi oldu. Bu gün Azərbaycan Respublikası Prezident, Müzəffər Ali Baş Komandan İlham Əliyevin ətrafında yumruq kimi birləşərək onun hər bir tapşırığını yerinə yetirmək üçün müsəlləh əsgər kimi hazırdır. Bu sevinci, qüruru, tarixi qələbəni yaşadıqları üçün Ali Baş Komandan İlham Əliyevə minnətdar olan Azərbaycan xalqı şəhidlərimizin ruhları qarşısında baş əyir, qazilərimizə, hərbçilərimizə, Vətənin keşiyində duran igid oğullarımıza sağlamlıq, güc-qüvvət arzulayırlar. Məhz Prezident, Ali Baş Komandanımızın və rəşadətli Azərbaycan Ordusunun sayəsində xalqımız uzun illərdən sonra bu il ilk dəfə 28 May torpaqlarımızın işğaldan azad edilməsinin sevinci, Vətən müharibəsi zəfərinin qüruru ilə yaşayır və qeyd edir. 28 Mayın qeyd edilməsi xüsusilə əlamətdardır. Vətən müharibəsində qazandığımız möhtəşəm zəfər hər bir Azərbaycanlıya ikiqat sevinc yaşadır. Artıq Azərbaycanda mayın 28-i Respublika Günü deyil, Müstəqillik Günü kimi qeyd edilir. Azərbaycan xalqı ötən əsrin əvvəlində müstəqil respublika qurmuş, 1991-ci ildə isə Azərbaycan Respublikası Azərbaycan Xalq Cümhuriyyətinin varisi kimi öz müstəqilliyini bərpa etmişdir. Beləliklə,“Müstəqillik Günü haqqında” Azərbaycan Respublikası Qanununun layihəsində 1918-ci ildə İstiqlal Bəyannaməsinin qəbul olunduğu 28 may Azərbaycan Respublikasında müstəqillik günü, 1991-ci ildə “Azərbaycan Respublikasının dövlət müstəqilliyi haqqında” Konstitusiya Aktının qəbul olunduğu 18 oktyabr isə müstəqilliyin bərpası günü kimi qeyd olunur. 28 may tarixinin Müstəqillik Günü, 18 oktyabr tarixinin isə Müstəqilliyin Bərpası Günü kimi təsbit olunması Azərbaycanın dövlət suverenliyinin məhz 1918-ci ildə bərqərar olunması faktına əsaslanır. Bu, ərazi bütövlüyünü bərpa etmiş müasir Azərbaycanın 1918-ci ildə qurulmuş Azərbaycan Xalq Cümhuriyyətinin tamhüquqlu varisi olduğunu göstərir.
Bayramova Lamiyə İlyas qızı
Azərbaycan Texnologiya Universiteti
İctimai elmlər və multikulturalizm kafedrasının baş müəllimi
Azərbaycan müstəqillik əldə etdikdən sonra Baltikyanı respublikalarla da əməkdaşlığa xüsusi önəm verib. Ölkəmiz Baltikyanı respublikalar olan Litva, Latviya və Estoniya ilə birlikdə uzun müddət keçmiş SSRİ-nin tərkibində olub. Bu isə həmin dövlətlərlə ölkəmiz arasında dərin və hərtərəfli əməkdaşlığın qurulmasında yardımçı rol oynayıb. Həmçinin Baltikyanı dövlətlərlə əməkdaşlıq Azərbaycanın Avropaya inteqrasiyası prosesinə təkan verib. Litva Respublikası ölkəmizin müstəqilliyini ilk tanıyan (20 dekabr 1991-ci il) dövlətlərdən olmuş və Azərbaycan-Litva ikitərəfli münasibətlərinin qurulmasında maraqlı olmuşdur. 1995-ci ilin noyabr ayının 27-də Litva Respublikası ilə Azərbaycan arasında diplomatik münasibətlər qurulmuşdur. İki ölkə arasında diplomatik münasibətlərin qurulmasında ulu öndər Heydər Əliyevin müstəsna rolu olmuşdur. 2006-cı ildə Azərbaycan və Litva Respublikalarının Prezidentləri ölkələrimizin tərəfdaşlıq əlaqələrinin inkişafında xüsusi əhəmiyyət kəsb edən Bəyannamə, Saziş və onlarla müqavilələr imzalamışdır. 3 aprel 2007-ci ildə Litvanın Azərbaycanda, 6 sentyabr 2007-ci ildə isə Azərbaycanın Litvada səfirliyi açılmışdır. Hazırda da hər iki dövlət aralarında olan əməkdaşlığı inkişaf etdirmək üçün mühüm addımlar atmaqda davam edirlər. Qeyd edək ki, Azərbaycan Respublikası torpaqlarının 30 ilə yaxın Ermənistanın işğalı altında olunması faktının tanınmasına və Qarabağ münaqişəsinin həllində özünə tərəfdaş qazanmaq üçün bu əlaqələrə önəm verib. Litva Respublikası Ermənistan-Azərbaycan, Qarabağ münaqişəsinin Azərbaycanın ərazi bütövlüyü çərçivəsində sülh yolu ilə həll edilməsinin tərəfdarıdır. Litvanın xarici işlər naziri Qabrielius Landsbergis 8 may 2023-cü il tarixli mətbuat konfransında deyib ki, Cənubi Qafqazdakı vəziyyəti çox diqqətlə, böyük narahatlıqla və eyni zamanda sülh tənzimlənməsini böyük ümidlə izləyirik və əminik ki, davamlı sülh həm Azərbaycan, həm də Ermənistanın maraqlarına xidmət edir. Bakı və Vilnüs eyni zamanda müxtəlif beynəlxalq parlament strukturlarında fəal əməkdaşlıq edir. Litva Respublikası Avropa İttifaqının üzvü kimi Azərbaycan üçün əhəmiyyətə malikdir. Litva Bakı-Brüssel münasibətlərində obyektiv mövqeyi və yanaşması ilə seçilir və bu, ölkəmizin mənafelərinin qorunması üçün çox vacibdir. Prezident İlham Əliyevin Litva Respublikasına səfəri bu sahədə Azərbaycanın Avropa İttifaqı müstəvisində də mövqelərini möhkəmləndirəcək və Bakının təşəbbüskarı olduğu layihələrə siyasi dəstəyi gücləndirəcək. Litva Respublikası Azərbaycanla həmçinin iqtisadi, humanitar və digər sahələrdə də əlaqələrin inkişafında maraqlıdır. Azərbaycan da Litva ilə iqtisadi əlaqələrin genişləndirilməsinə, kapital qoyuluşuna və müxtəlif iqtisadi və humanitar sahədə birgə layihələrin həyata keçirilməsinə xüsusi əhəmiyyət verir. Azərbaycan Respublikası ilə Litva Respublikası arasında iqtisadi sahədə əlaqələr inkişaf etməkdədir. İki ölkə arasında sənaye və energetika, kənd təsərrüfatı, turizm, nəqliyyat, rabitə və informasiya texnologiyaları, gömrük sahəsində əməkdaşlıq mövcuddur. Bütün bunlar bir daha deməyə əsas verir ki, qarşıdakı illərdə də Azərbaycan və Litva iqtisadi tərəfdaş kimi əlaqələrini daha da inkişaf etdirəcək. 22 may 2023-cü il tarixində Vilnüsdə keçirilən Azərbaycan-Litva biznes forumu isə iqtisadi əlaqələr üçün yeni imkanlar yaradır. Azərbaycanın irəli sürdüyü Şərqlə Qərb arasında nəqliyyat dəhlizi layihələri, Avropanın enerji təhlükəsizliyi ilə bağlı təşəbbüsləri, yaşıl enerjinin inkişafı və ötürülməsi ilə bağlı Bakının gördüyü işlər və bu sahədə əməkdaşlıq Litva üçün həm təhlükəsizlik, həm də iqtisadi baxımdan strateji maraq doğurur. Prezident İlham Əliyev Vilnüs şəhərində keçirilmiş Azərbaycan-Litva biznes forumunda çıxışı zamanı bildirmişdi ki, “İqtisadi sabitlik uğurlu əməkdaşlığın təminatıdır. Azərbaycanın xarici borcu çox aşağıdır, ümumi daxili məhsulun 10 faizindən azdır. Milli valyutamız sabitdir. Dövlət Neft Fondumuzda topladığımız valyuta ehtiyatlarımız və Mərkəzi Bankın ehtiyatları xarici borcu on dəfədən çox üstələyir”. Nəticədə Azərbaycanın valyutasının sabitliyi, xarici borcumuzun aşağı səviyyədə olması, Azərbaycanda olan sabitlik, qonşu bazarlara çıxışın olması litvalı biznes dairələri üçün cəlbedici olacaqdır. Prezident İlham Əliyev Azərbaycan-Litva biznes forumunda çıxış edərkən həmçinin qeyd etdi ki, Azərbaycan iqtisadiyyatı sabitdir, münbit investisiya şəraiti var və o, təbii sərvətlərə əsaslanır. Əsas hədəf şaxələndirmədir. Ölkəmiz iqtisadiyyatı şaxələndirəcək və enerji sektorundan asılılığı azaldacaq. Prezident İlham Əliyevin apardığı daxili və xarici siyasət nəticəsində Azərbaycanın xarici dövlətlərlə olan dostluq və tərəfdaşlıq münasibətləri daha da möhkəmlənir.
Azərbaycan Texnologiya Universiteti
İctimai elmlər və multikulturalizm kafedrasının
Dos.əvəzi Mehriban İmran qızı Tağıyeva
Azərbaycan Texnologiya Universiteti və Dövlət Məşğulluq Agentliyinin birgə təşkilatçılığı ilə əmək yarmarkası keçirilibTədbirin rəsmi hissəsi Dövlət Himni səsləndirilməsi və Vətən uğrunda canından keçən şəhidlərin əziz xatirəsinin bir dəqiqəlik sükutla yad olunması ilə açıq elan edilib.Daha sonra Azərbaycan Texnologiya Universitetinin rektoru v.m.i.e. dos.Yaşar Ömərov giriş sözü ilə çıxış edib, universitetdə əmək bazarının tələblərinə uyğun kadr hazırlanması istiqamətində görülən işlərdən danışıb.Daha sonra Gəncə şəhər İcra Hakimiyyəti başçısının müavini Adil Tağıyev, millət vəkili Müşfiq Cəfərov, YAP Gəncə Şəhər Təşkilatının sədri Bayram Aslanov, Gəncə-Daşkəsən Regional Məşğulluq filialının müdiri Elməddin Qurbanov, Dövlət Məşğulluq Agentliyinin tabeliyində Gəncə Peşə Hazırlığı Mərkəzinin müdir müavini Toğrul Yusifli çıxış edərək işə götürənlərə və iş axtaranlara uğurlar arzulayıblar.Daha sonra ATU-nun bu il məzun olacaq 660 tələbə və magistrantları, eləcə də ötən illər üzrə məzunları işəgötürənlərin stendlərinə yaxınlaşaraq vakansiyalarla yaxından tanış olub, şəxsi məlumatlarını təqdim ediblər. İşaxtaranlara CV formalarını həm də onlayn təqdim etmək üçün internetə çıxış təmin edilib.Azəralüminium, AzerGold, Azərsun Holding, Qəbələ Konserv zavodu, Azərbaycan Qida Təhlükəsizliyi Agentliyi, KOBİA, Şəmkir Aqroparkı kimi dövlət və özəl müəssisələri, Kapital Bank, Bank of Baku, Paşa Bank və.s banklar yarmarkada işəgötürənlər qismində çıxış edib.Ümumilikdə əmək yarmarkasında 40-dan çox müəssisə tərəfindən 400-dən çox vakansiya təqdim olunub. Tədbir universitet tarixində miqyasına görə ən böyük məzun yarmarkası olaraq qeydə alınıb.
Universitetin rektoru v.m.i.e. dos. Yaşar Ömərov ilk üçlükdə yer alan ATU tələbələri ilə görüşüb. O, tələbələri müvəffəqiyyətləri münasibətilə təbrik edərək uğurlar arzulayıb. Y.Ömərov tələbələrə universitetin startap ekosisteminin zənginləşdirilməsi istiqamətində dəstəyinin davamlı olacağını ifadə edərək məsləhət və tövsiyələrini verib.Qeyd edək ki, Azərbaycan Texnologiya Universitetinin də tərəfdaş olduğu, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və İnnoland-in partnyorluğu və Koreya Respublikasının E-Asiya və Bilik Tərəfdaşlığı Fondunun (EAKPF) maliyyə dəstəyi və Asiya İnkişaf Bankının (ADB) təşəbbüsü ilə həyata keçirilən, Gəncə və Şamaxı şəhərlərini əhatə edən"Azərbaycan Respublikasında Yerli Texnoloji Startapların İnkişafı üzrə" layihəsi çərçivəsində baş tutan StartapFest Gəncə proqraml 2 ay davam edib.Finala 70 komandadan 10-u vəsiqə qazanıb ki, onlardan da 4-ü Azərbaycan Texnologiya Universitetini təmsil edib. Onlardan ikisi 2-ci və 3-cü yerləri qazanıb.Gərgin keçən final mübarizələrinin sonunda Azərbaycan Texnologiya Universitetinin tələbələrindən ibarət DremO və Kaizen komandalarının "DremO" və "Ship of Theseus" layihələri münsiflər heyəti tərəfindən müvafiq olaraq ikinci və üçüncü yerlərə, Aqrar İnnovasiya Mərkəzinin AgroBot komandası isə birinci yerə layiq görülüb.Qalib komandalara təhsil paketi və səfər mükafatları təqdim edilib.
