ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2024-03-15

ATU-da "Narkotikə yox deyək" mövzusunda maarifləndirici görüş keçirilib

Tədbirdə ATU-nun sosial məsələlər və ictimaiyyətlə əlaqələr üzrə müşaviri Şahmar Həsənov, Gəncə şəhər Narkoloji Dispanserin baş həkimi Etibar Xəlilov, Gəncə şəhər Baş Polis İdarəsinin Narkotiklərlə mübarizə bölməsinin rəisi polis mayoru Rəşad Musayev, universitetin professor-müəllim heyəti və tələbələr iştirak edib.

Tədbirdə Şahmar Həsənov çıxış edərək bildirib ki, gəncləri sağlam həyat tərzinə təşviq etməkdə, narkomaniyanın mənfi təsirləri ilə bağlı maarifləndirmə işlərinin aparılmasında, xalqımızın milli dəyərlərinə, düşüncəsinə zərbə vuran hərəkətlərdən qorunmasında bu cür maarifləndirmənin aparılması təqdirəlayiqdir.

Etibar Xəlilov mövzunun əhəmiyyətindən, narkomaniyanın gənclərin şəxsiyyətininin, sağlamlığının inkişafına göstərdiyi mənfi təsirlərdən bəhs edərək, bu bəladan qorunmanın vacibliyini qeyd edib.

Rəşad Musayev narkomaniyanın törətdiyi fəsadlardan danışıb, gənclərə bu kimi zərərli vərdişlərdən uzaq olmağı tövsiyə edib.

Sonda tələbələrin sualları cavablandırılıb.

2024-03-14

ATU tələbələri üçün təsis edilən təqaüdlər ilk sahiblərinə təqdim edilib

“Azəralüminium” və “ATS Food” tərəfindən Azərbaycan Texnologiya Universiteti tələbələri üçün təsis edilən təqaüdlər ilk sahiblərinə təqdim edilib.

Bununla bağlı baş tutan görüşdə rektor v.m.i.e. dos.Yaşar Ömərov təqaüdə layiq görülən tələbələri təbrik edib, bildirib ki, bu nailiyyət ikiqat məsuliyyətdir, onlar etimadı doğrultmalı və müvəffəqiyyət göstəricilərini daha da yüksəltməlidirlər.

Görüşdə ən yüksək akademik göstəricilərə malik olan tələbələrə təqaüdü “Azəralüminium” Gəncə istehsalat kompleksinin direktoru Cəmil Səfərov və “ATS Food” MMC-nin Şəmkir filialının direktoru Rasim Səfərov təqdim edib.

Təqaüdü qazananlar Avtomatika Telekommunikasiya və İnformatika fakültəsinin informasiya texnologiyaları ixtisasının III kurs tələbəsi, 99,9 ballıq ümumi ortalama müvəffəqiyyət göstəricisi (ÜOMG) ilə Zibeydə Adişirinova, kompyuter mühəndisliyi ixtisasının IV kurs tələbəsi Ləman Mamedova (ÜOMG 99.36), Qida mühəndisliyi fakültəsinin şərabçılıq ixtisasının IV kurs tələbələri Sürəyya Məhərrəmova (ÜOMG 96.4) və Dürdanə Dadaşovadır (ÜOMG 96).

Onların arasında ən yüksək göstəriciyə malik Zibeydə artıq üçüncü ildir ki, ÜOMG üzrə fakültə birinciliyini qoruyur. Ləman isə ÜOMG göstəriciləri ilə bu semestr daha bir – Təhsilin İnkişafı Fondu və “NEQSOL Holding” in tələbə qızlar təqaüdünü qazanıb.

2024-03-12

Azərbaycan Texnologiya Universiteti sənaye əlaqələrini genişləndirir

Universitet sənaye əlaqələrini gücləndirmək məqsədilə bu dəfə "Şəki Şərab" və GİLTEX zavodları ilə əməkdaşlıq memorandumları imzalayıb.

Belə ki, 2024-cü ilin 6 mart tarixində Azərbaycan Texnologiya Universiteti ilə "Şəki Şərab" MMC arasında baş tutan görüşdə əməkdaşlıq memorandumu imzalanıb. Sənədi Azərbaycan Texnologiya Universitetinin rektor əvəzi dos.Yaşar Ömərovla "Şəki Şərab" zavodunun direktoru İqoşin Adam imzalayıb.

Sumqayıt şəhərində yerləşən GİLTEX MMC müəssisəsi ilə əməkdaşlıq memorandumu isə 11 mart 2024-cü il tarixində imzalanıb. Yüngül sənaye müəssisəsi ilə əməkdaşlıq sənədini rektor v.m.i.e. dos. Yaşar Ömərovla GİLTEX-in İcraçı direktoru Esmin Xəlilov imzalayıb.

Hər iki müəssisə ilə görüş zamanı zavodların kadr tələbatı, kadr hazırlğınının müəssisələrin tələblərinə uyğunlaşdırılması, müasir texnologiyaların elmi əsaslarla tətbiqinin gücləndirilməsi, elmi-praktik təcrübələrin birgə aparılması, şərab turizminin inkişaf etdirilməsi kimi məsələlər müzakirə edilib, təkliflər irəli sürülüb.

Qeyd edək ki, əsası 2006-cı ildə qoyulmuş "Şəki Şərab" zavodunun illik istehsal gücü 200 min dekalitr və ya 2,66 milyon şüşə şərab təşkil edir.

2012-ci ildən fəaliyyət göstərən GİLTEX isə 8 fabrikdən ibarət olmaqla Cənubi Qafqaz regionunda vertikal inteqrasiya sistemi ilə qurulmuş yeganə yüngül sənaye müəssisəsidir.

2024-03-12

Azərbaycan Texnologiya Universitetinin nümayəndələri GİLTEX zavoduna səfər edib

Yüngül sənaye mühəndisliyi və logistika fakültəsinin dekanı Şakir Əliyev və Yüngül sənaye mühəndisliyi və Dizayn kafedrasının professoru Cahangir Hacıyev Sumqayıtda yerləşən GİLTEX zavodunun İplik, Toxuma, Boyama, Tikiş və Tibbi maska fabriklərində olublar.

Onlar vertikal inteqrasiya sistemi ilə qurulmuş və tekstil istehsalı üzrə bütövlükdə texnoloji ardıcıllığı tam əhatə etmiş fabriklərin iş prinsipi, tətbiq olunan müasir texnologiyaları, kadr tələbatı ilə yaxından tanış olub, mütəxəssisləri ilə müzakirələr aparıblar.

Qeyd edək ki, GİLTEX-də hazırda iplik, müxtəlif növ parça, yataq dəstləri, toxuculuq və hörgü məhsulları, oda və suya davamlı xüsusi geyimlər, müxtəlif təyinatlı uniformalar istehsal edilir.

2024-03-11

Azərbaycan Texnologiya Universitetinin əməkdaşı dosent adına layiq görülüb

Azərbaycan Respublikasının Prezidenti yanında Ali Attestasiya Komissiyasının 23.02.2024-cü il tarixli qərarı ilə Azərbaycan Texnologiya Universitetinin Qida mühəndisliyi və ekspertiza kafedrasının əməkdaşı, texnika üzrə fəlsəfə doktoru Müşfiq Xəlilova elmi-pedaqoji fəaliyyətinə görə texnika ealmləri elm sahəsinin Qida məhsullarının texnologiyası ixtisası üzrə dosent elmi adı verilib.

Təbrik edirik!

2024-03-11

Asiya İnkişaf Bankı (AİB) Seul şəhərinə startap sahəsi üzrə səfər təşkil edib

Asiya İnkişaf Bankı (AİB), “Asian Development Bank Institute” və CAREC Proqramı Azərbaycan, Gürcüstan Qazaxıstan və Özbəkistandan olan dövlət nümayəndələri və ali təhsil müəssisələrinin əməkdaşları üçün Koreya Respublikasının Seul şəhərinə startap sahəsi üzrə tədris səfəri təşkil edib.

"Təlim və Koreya nümunəsi: Universitetlər zəngin startap ekosistemlərinin qurucusu kimi" adlı tədbirdə Azərbaycan Texnologiya Universitetini strateji inkişaf və rəqəmsallaşma məsələləri üzrə rektor müşaviri Mehman Kərimov və İnnovasiya Mərkəzinin mütəxəssisi Tural Rüstəmov təmsil edib.

4 günlük tədbir çərçivəsində iştirakçılar Koreyanın startap mərkəzlərinə səfər edib, AİB İnstitutu, habelə Koreya ali təhsil müəssisələri və elm mərkəzlərinin ekspertləri ilə uğurlu startap ekosisteminin müxtəlif aspektlərini müzakirə edib, təcrübə mübadiləsi aparıblar.

Səfərin məqsədi startap sahəsində Koreya və iştirakçı ölkələr arasında bilik və bacarıqların mübadiləsini həyata keçirmək, habelə Koreyanın uğurlu startap nümunələrinin öyrənilməsini təşkil etməkdir.

Səfər AİB və Vətəndaşlara Xidmət və Sosial İnnovasiyalar üzrə Dövlət Agentliyinin birgə reallaşdırdığı "Azərbaycanda Yerli Texnoloji Startapların İnkişafına Dəstək" texniki yardım layihəsi çərçivəsində təşkil olunub. Layihə Koreya Respublikasının E-Asiya və Bilik Tərəfdaşlığı Fondu tərəfindən maliyyələşdirilir.