Sənədi ATU-nun rektoru v.m.i.e. dos. Yaşar Ömərovla "Nar"ın Baş İcraçı Direktoru Qunnar Panke imzalayıb.
Memorandumun məqsədi texniki ixtisaslar üzrə təhsil alan tələbələrin peşə hazırlığının yüksəldilməsidir. Bu əməkdaşlıq çərçivəsində “Nar”ın peşəkar texniki heyəti öz nəzəri və praktiki biliklərini universitetin tələbələri ilə bölüşəcək, eləcə də, tələbələr “Nar”ın ixtisaslarına uyğun departamentlərində təcrübə keçərək gələcək karyeraları üçün əvəzsiz üstünlük əldə edəcəklər.
Bu təşəbbüs Azərbaycan Texnologiya Universitetinin Strateji inkişaf planına və Elmi tədqiqat strategiyası, Beynəlmiləlləşmə və Keyfiyyət təminatı siyasətlərinə uyğun olaraq, elmi-tədqiqat fəaliyyətinin dəstəklənməsi, universitet-sənaye əməkdaşlığının gücləndirilməsi, tələbələrin peşə bacarıqlarının artırılması və keyfiyyət siyasətinin inkişaf etdirilməsi məqsədini daşıyır.
Qeyd edək ki, universitet-sənaye əlaqələrinin gücləndirilməsini hədəfləyən Azərbaycan Texnologiya Universiteti son 1 ildə bir çox iri sənaye müəssisələri ilə əməkdaşlıq memorandumları imzalayıb, mövcud əlaqələri genişləndirib.
"Nar" əmtəə nişanı ilə fəaliyyət göstərən "Azerfon" isə 2007-ci ildən rabitə xidmətləri sektorundadır. Son 5 ildir Müştəri Loyallığı İndeksinə görə ölkədə lider operator olan "Nar" hazırda 2.2 milyon abunəçiyə xidmət göstərməkdədir.
Azərbaycan Texnologiya Universiteti (ATU), Azərbaycan Respublikası Gənclər Fondu və Gənclərin Həmrəyliyi İctimai Birliyinin birgə təşkilatçılığı ilə ATU-da “Biznesini birgə yaradaq” layihəsi çərçivəsində forum keçirilib.
Forumun keçirilməsində məqsəd regionların sosial-iqtisadi inkişafında gənclərin rolunu artırmaq, yeni ideaların mübadiləsinə və uğurlu təcrübənin tətbiqinə nail olmaq, eləcə də gənclərin biznes bacarıqlarının artırılmasına dəstək olmaqdır.
Forumda iştirak edən tələbələr hədiyyə və sertifikatlarla təltif edilib.
19 fevral tarixində “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 layihəsinin Keyfiyyətin Təminatı Şurasının 2-ci iclası keçirilib.
Layihə konsorsiumuna daxil olan 6 yerli və 4 xarici universitetin nümayəndələrinin iştirak etdiyi görüş onlayn qaydada baş tutub.
İclasda Azərbaycan Texnologiya Universitetini REFRESH layihəsi üzrə meneceri, tədris işləri üzrə prorektor Raqif Hüseynov və Beynəlxalq əməkdaşlıq şöbəsinin müdiri v.m.i.e. Ramidə Xəlilova təmsil edib.
Görüşdə layihənin tanıdılması və dayanıqlığı məqsədilə təcrübə səfərlərindən sonra Bakıda yekun konfransın keçirilməsi, R. Dunlapın müəllifi olduğu “Dayanıqlı Enerji” kitabının Azərbaycan dilinə tərcümə edilməsi təklif edilib, keyfiyyətə nəzarət məsələlərinin detalları müzakirə olunub və yekun olaraq vahid keyfiyyətə nəzarət sənədinin yaradılması haqqında qarşılıqlı razılıq əldə edilib.
Azərbaycan Texnologiya Universiteti ilə BP şirkətinin Azərbaycandakı nümayəndəliyi arasında imzalanmış qrant müqaviləsinə əsasən universitetin Avtomatika, telekommunikasiya və informatika fakültəsinin nəzdində “Kibertəhlükəsizlik üzrə elmi, metodiki, tədqiqat və təlim mərkəzinin (layihəsinin) təşkili” adlı layihənin icrasına start verilir.
Layihənin əsas məqsədi ATU tələbələrinin kriptoqrafiya və kriptologiya sahəsi üzrə qabaqcıl biliyə malik mütəxəssis kimi hazırlanmasına dəstək göstərmək, onlar üçün xüsusi hazırlanmış kurikuluma uyğun kibertəhlükəsizlik sahəsində təlimlər təşkil etmək, eləcə də Gəncə və ətraf ərazilərdə fəaliyyət göstərən vətəndaş cəmiyyəti, biznes və dövlət orqanları nümayəndələrinin İKT sahəsində ixtisaslaşmasını və təlimini təşkil etmək, onların kiberhücum risklərinə qarşı rəqəmsal savadlılıq səviyyəsinin artırılmasıdır.
