“Paşa Holding”in təhsilin inkişafına dəstəyi çərçivəsində Kolumbiya Universitetinin professoru Frederik Mişkin və Şərqi Karolina Universitetinin professoru Stenli İkinsin həmmüəllifi olduğu “Maliyyə bazarları və İnstitutları” (Financial Markets & Institutions. Frederic S. Mishkin, Stanley G. Eakins) kitabı Azərbaycan dilinə tərcümə edilərək çap edilib.
Azərbaycan Respublikası Elm və Təhsil Nazirliyinin xətti ilə Azərbaycan Texnologiya Universitetinə ayrılan müvafiq sayda nəşr hazırda Azərbaycan Texnologiya Universitetinin kitabxanasında tələbələr və akademik heyət üçün əlçatandır.
Tələbələr kitabxanaya müraciət edərək bu dəyərli qaynaqdan istədikləri vaxt istifadə edə bilərlər.
Qeyd edək ki, vəsait maliyyə bazarlarının əsas prinsipləri, institutların strukturu və fəaliyyət mexanizmlərini əhatə edir. Xüsusilə iqtisadiyyat, maliyyə və idarəetmə sahəsində təhsil alan tələbələr üçün nəzərdə tutulmuş bu nəşr nəzəri biliklərin praktikada tətbiqi üçün də mühüm əhəmiyyət daşıyır.
Azərbaycan Texnologiya Universiteti bu töhfəyə görə "Paşa Holding"ə təşəkkürünü bildirir və tələbələrimizi kitabdan yararlanmağa dəvət edir.
Bu təşəbbüs SDG 4 (Keyfiyyətli təhsil) məqsədinə uyğundur. Tədris resurslarının əlçatanlığı tələbələrin bilik səviyyəsini artırır. Keyfiyyətli dərs vəsaitləri təhsilin effektivliyini yüksəldir. Bu da peşəkar kadrların hazırlanmasına töhfə verir.
Əməkdaşlıq çərçivəsində nəzərdə tutulmuş tədbirlərin sistemli icrasını təmin etmək məqsədilə Azərbaycan Texnologiya Universiteti (ATU) ilə ölkənin aparıcı sənaye müəssisələrindən biri olan “AzerGold” QSC arasında birgə fəaliyyət planı hazırlanıb. ATU və “AzerGold”-un əməkdaşlığı çərçivəsində tərtib edilən birgə fəaliyyət planı 2025-ci ili əhatə edir.
Fəaliyyət planında “AzerGold”un təklifi əsasında birgə elmi-tədqiqat işlərinin aparılması, müvafiq ixtisaslar üzrə təhsil alan tələbələrin “AzerGold”da istehsalat təcrübəsinin təşkili, “AzerGold” tərəfindən təşkil olunan layihələrə ATU tələbələrinin cəlb olunması, birgə ustad dərslərinin və seminarların keçirilməsi, ATU-nun karyera sərgilərində “AzerGold”un iştirakı, “AzerGold” əməkdaşlarının tədrisə cəlb olunması, “AzerGold”un ehtiyaclarına uyğun olaraq müvafiq ixtisaslar üzrə tədris planlarına bəzi fənlərin daxil edilməsi və universitetin tələbə heyətinin “AzerGold”un hasilat sahələrinə tanışlıq turlarının təşkili öz əksini tapır.
Bu əməkdaşlıq SDG 8 (Layiqli iş və iqtisadi artım) və SDG 9 (Sənaye, innovasiya və infrastruktur) məqsədlərinə xidmət edir. Tələbələrin istehsalat təcrübəsinə cəlb olunması onların əmək bazarına inteqrasiyasını asanlaşdırır. Sənaye və təhsil əlaqələrinin güclənməsi praktiki biliklərin artırılmasına imkan yaradır. Bu isə iqtisadi inkişaf üçün vacib insan kapitalını formalaşdırır.
Azərbaycan Texnologiya Universitetində 20 Yanvar faciəsinə həsr edilmiş tədbir keçirilib.
Tədbir çərçivəsində Azərbaycan Texnologiya Universitetinin rektoru Yaşar Ömərov və rəhbər heyət Gəncədə yerləşən 20 Yanvar abidəsini ziyarət edib, önünə gül dəstələri düzüb, şəhidlərin ruhuna dualar oxuyublar.
Daha sonra anım tədbiri ATU-nun böyük akt zalında davam edib. Tədbirdə Azərbaycan Respublikasının Dövlət Himni səsləndirilib, Ulu Öndər Heydər Əliyevin, 20 Yanvar şəhidlərinin, o cümlədən Azərbaycanın müstəqilliyi və ərazi bütövlüyü uğrunda canlarından keçən Vətən övladlarının əziz xatirəsi bir dəqiqəlik sükutla yad edilib.
Sonra 20 Yanvar faciəsindən, sovet hərbi gəmilərinin Bakı buxtasına yan almasının və sovet əsgərlərinin törətdiyi qətliamı davam etdirməsinin qarşısını alan dənizçilərdən, faciəyə siyasi-hüquqi qiymət verilməsində Ümummilli Lider Heydər Əliyevin rolundan bəhs edən “20 Yanvarda doğulanlar” adlı bədii-sənədli film nümayiş etdirilib.
Ardınca ATU TGT-nin təşkilatçılığı ilə ATU tələbələrinin səhnələşdirdiyi “Son həyəcan” adlı tamaşa təqdim edilib. Tamaşada 20 Yanvar tarixinin yalnız matəm günü deyil, həm də milli azadlıq hərəkatımızın, milli birliyin gücünü və iradəsini göstərən bir gün olduğu əks olunub.
Sonda tələbələrdən Həsən Hüseynov və Turanə Bədəlovanın ifasında Müzəffər Məzaimin “20 Yanvar” şeiri səsləndirilib, tələbələrin “Bu tarix unudulmayacaq, gənc nəsillərə çatdırılacaq, Şəhidlərimizin xatirəsi həmişə qəlbimizdə yaşayacaq” kimi şüarları alqışlarla qarşılanıb.
Azərbaycan Texnologiya Universiteti "Şərq-Qərb Nəqliyyat Koridorunda Logistika və İdarəetmə Problemləri" (PLMO 2025) mövzusunda keçiriləcək 4-cü Beynəlxalq Elmi Konfransın həmtəşkilatçısı olacaq.
Konfransın digər həmtəşkilatçıları - İdarəetmə Sistemləri İnstitutu (Azərbaycan), Silesia Texnologiya Universiteti (Polşa), Guangzhou Universiteti (Çin), Gürcüstan Texniki Universiteti (Gürcüstan) və Daşkənd Dövlət Nəqliyyat Universiteti (Özbəkistan).
Konfransın tərəfdaşları Azərbaycan Respublikası Elm və Təhsil Nazirliyi, Azərbaycan Respublikası Rəqəmsal İnkişaf və Nəqliyyat Nazirliyi və Azərbaycanın, Türkiyənin, Çinin, Ukraynanın, Qazaxıstanın, Moldovanın və Gürcüstanı elm və ali təhsil müəssisələridir.
Konfrans bu ilin 13-14 may tarixlərində Bakıda, 15-16 may tarixlərində isə Gəncədə Azərbaycan Texnologiya Universitetində təşkil olunacaq.
https://plmo.cyber.az/2025/index.html
Azərbaycan Texnologiya Universitetinin İctimai Nəzarət Şurasının (İNŞ) növbəti iclası keçirilib. İclasda Azərbaycan Texnologiya Universitetinin rektoru Yaşar Ömərov İctimai Nəzarət Şurası üzvlərini salamlayıb, müzakirə olunacaq məsələlərin, ediləcək təklif və tövsiyələrin, ümumilikdə ictimai rəyin öyrənilməsinin universitetin fəaliyyətində əhəmiyyətini vurğulayıb.
İclasda İNŞ sədri, Azərbaycan Milli Elmlər Akademiyasının Gəncə Bölməsinin sədri akademik Fuad Əliyev, üzvlərdən millət vəkilləri Naqif Həmzəyev, Müşfiq Cəfərov, “Respublika” qəzetinin bölgə müxbiri Zabit Xəlilov, “Regional İnkişaf” İB-nin Gəncə-Daşkəsən bölməsinin nümayəndəsi Aişə Osmanlı, “Təşəbbüslərin İnkişaf Mərkəzi” İB-nin sədri Azad Rəhimov, ATU-nun sosial məsələlər və ictimaiyyətlə əlaqələr üzrə prorektoru Şahmar Həsənov, elm və innovasiyalar üzrə prorektoru v.m.i.e. Sahil Həmidov, Tədris şöbəsinin müdiri Cəsarət Şabanov iştirak edib.
İNŞ sədri və üzvləri 2024/2025-ci tədris ilinin qış imtahan sessiyası ilə tanış olub, prosesi monitor vasitəsilə izləyiblər. Onlara imtahanların gedişi və təşkili, İmtahan Komissiyası, Apellyasiya Komissiyasının fəaliyyəti ilə bağlı məlumatlar təqdim edilib.
İclasda qış imtahan sessiyasının ardından ATU-nun inkişafı ilə bağlı mövcud vəziyyət və qarşıda duran məsələlər müzakirə edilib. Yekunda şura tərəfindən universitet rəhbərliyinə təklif və tövsiyələr təqdim edilib.
Qeyd edək ki, 2023-cü ildə əsası qoyulan ATU İctimai Nəzarət Şurası ictimai rəyin əhəmiyyəti əsas götürülərək Gəncə universitetləri arasında ilk dəfə Azərbaycan Texnologiya Universitetində yaradılıb.
Bu fəaliyyət SDG 16 (Sülh, ədalət və güclü institutlar) ilə uyğunluq təşkil edir. Şəffaflıq və ictimai nəzarət mexanizmlərinin tətbiqi idarəetmədə etibarlılığı artırır. İctimai rəyin nəzərə alınması inklüziv qərarverməni gücləndirir. Bu isə dayanıqlı və məsuliyyətli idarəetmə modelinin formalaşmasına töhfə verir.
Azərbaycan Texnologiya Universiteti ilə Macarıstanın Sopron Universiteti arasında ikili diplom müqaviləsi imzalanıb.
Magistratura səviyyəsində "Ekologiya mühəndisliyi" proqramı üzrə ikili diplom müqaviləsi Azərbaycan Texnologiya Universitetinin rektoru dos.Yaşar Ömərovla Sopron Universitetinin rektoru prof.dr. Attila Fabian tərəfindən imzalanıb.
2025/2026-cı tədris ilindən başlayaraq innovativ proqram magistr tələbələrinə unikal mədəniyyətlərarası və təhsil təcrübəsi təqdim edəcək. İngilis dilində tədris olunacaq proqramın iştirakçıları iki semestr Azərbaycan Texnologiya Universitetində, digər iki semestr isə Sopron Universitetində təhsil alaraq iki müxtəlif akademik mühit təcrübəsi qazanmaq imkanı əldə edəcəklər. Proqram çərçivəsində təhsilini başa vuran məzunlara hər iki ali təhsil müəssisəsinin magistr dərəcələri veriləcək.
Bu proqram SDG 4 (Keyfiyyətli təhsil) və SDG 17 (Tərəfdaşlıqlar) məqsədlərinə birbaşa töhfə verir. Tələbələrin beynəlxalq təhsil mühitində təcrübə qazanması onların qlobal kompetensiyalarını artırır. Eyni zamanda mədəniyyətlərarası dialoq güclənir. Bu cür təşəbbüslər rəqabətqabiliyyətli kadrların hazırlanmasına xidmət edir.
