Azərbaycan Texnologiya Universiteti ilə “Alexandru İoan Cuza” Universiteti arasında görüş keçirilib   Azərbaycan Texnologiya Universiteti ilə “Alexandru İoan Cuza” Universiteti arasında görüş keçirilib. Rumıniyada, “Alexandru İoan Cuza” Universitetində baş tutan görüşdə Azərbaycan Texnologiya Universitetini Tədris şöbəsinin müdiri Raqif Hüseynov və Elektron xidmətlərin təşkili və informasiya şöbəsinin müdiri Arzu Əsgərov təmsil edib. Görüş hər iki universitet arasında imzalanacaq əməkdaşlıq memorandumunun detallarının müzakirə edilməsi məqsədilə təşkil olunub. Görüş zamanı R.Hüseynov Azərbaycan Texnologiya Universitetinin rektoru v.m.i.e. dos. Yaşar Ömərovun qarşılıqlı əməkdaşlığın perspektivlərinə dair təkliflərini təqdim edib. Memorandumun detallarının müzakirəsi zamanı fakültələrarası əlaqələrə də toxunulub, Azərbaycan Texnologiya Universitetinin İqtisadiyyat və idarəetmə fakültəsi ilə “Alexandru İoan Cuza” Universitetinin İqtisadiyyat və biznesin idarəetməsi fakültəsi arasında tərəfdaşlıq müqaviləsinin imzalanmasına dair razılıq əldə edilib.  

Azərbaycan Texnologiya Universitetinin tərəfdaş qismində çıxış etdiyi “Azərbaycan Rektorlar Konfransının yaradılması”-ECAR Erasmus+ layihəsi çərçivəsində növbəti səfər İspaniyanın Madrid şəhərinə baş tutub. 10-14 iyul tarixlərini əhatə edən səfər çərçivəsində tələbə və məzun işləri üzrə İspaniya Rektorlar Konfransının, eləcə də və İspaniya ali təhsil müəssisələrinin, həmçinin Fransa, Polşa və Litvadan olan tərəfdaşların iştirakı ilə həmin ölkələrin təcrübələri öyrənilib. Səfərdə Milli Məclisin deputatı, Elm və Təhsil Komitəsinin üzvü Tamam Cəfərova, elm və təhsil nazirinin müşaviri Nicat Məmmədli, Azərbaycan Respublikası Elm və Təhsil Nazirliyinin Elm sektorunun müdiri Süleyman Turxan, o cümlədən layihə konsorsiumunun üzvü olan 16 ali təhsil müəssisəsinin rektorları, prorektorları və digər məsul şəxslərindən ibarət 40 nəfərlik nümayəndə heyəti iştirak edib. Azərbaycan Texnologiya Universitetini sosial məsələlər və ictimaiyyətlə əlaqələr üzrə müşavir Şahmar Həsənov və Tədris şöbəsinin müdiri Raqif Hüseynov təmsil ediblər. Tədbirdə İspaniya Rektorlar Konfransının Baş katibi Maria Teresa Rektorlar Konfransının yaranması, İspaniya ali təhsil sistemində rolu, strukturu, fəaliyyət istiqamətləri, müvafiq komitələri haqqında təqdimatla çıxış edərək ünvanlanan sualları cavablandırıb. İspaniya Rektorlar Konfransının Tələbələrlə iş üzrə komissiyasının icraçı katibi prof. Angela Alcala isə məzmunlu təqdimatla çıxış edərək İspaniya universitetlərində tələbələrlə iş üzrə məsələlərdə yeni strateji baxış, o cümlədən sektorlararası münasibətlər və koordinasiyanın vacibliyindən danışıb. Yekunda sual-cavab sessiyası baş tutub, xarici ekspertlərlə faydalı fikir mübadiləsi aparılıb. Qeyd edək ki, Bakı Biznes Universitetinin kordinatorluğu ilə reallaşdırılan “Azərbaycan Rektorlar Konfransının yaradılması”- ECAR Erasmus+ layihəsi Avropa Komissiyası tərəfindən maliyyələşdirilir.   

Azərbaycan Texnologiya Universitetinin (ATU) magistratura səviyyəsinə I turun nəticələrinə əsasən 172 nəfər qəbul olub. Bu göstərici plan yerlərinin 96%-ni təşkil edir. ATU-nun magistratura səviyyəsi üzrə boş qalan plan yerlərinin sayı 7-dir:

• 256468 MBA proqramı üzrə Biznesin təşkili və idarə edilməsi (menecment) (tədris ingilis dilində) ixtisaslaşması - 4 yer – 1750 AZN

• 256151 Nəqliyyat xidmətləri üçün böhran və risklərin idarə edilməsi ixtisaslaşması - 2 yer – 1350 AZN

• 256143 Şəhər nəqliyyat şəbəkəsi və nəqliyyat xidmətlərinin təşkili ixtisaslaşması - 1 yer – 1350 AZN

Boş qalan plan yerlərinə əlavə yerləşdirmənin vaxtı DİM tərəfindən elan olunacaq. Qeyd edək ki, magistraturaya qəbul olmuş şəxslər 2023-cü il 21 iyul saat 11:00-dan 31 iyul saat 18:00 dək elektron qaydada qeydiyyatdan keçməlidirlər. Bunun üçün, https://portal.edu.az/ platformasında qeydiyyatdan keçmək, yaradılmış kabinetə daxil olduqdan sonra təqdim edilən xidmətlər sırasında “Ali və orta ixtisas təhsili müəssisələrinə təhsilalan qeydiyyatı” xidmətini seçmək lazımdır. Qəbul olan bütün magistrlərimizi təbrik edir, onlara təhsildə uğurlar arzulayırıq.

  Dövlət Məşğulluq Agentliyi arasında əməkdaşlıq memorandumu imzalanıb   Azərbaycan Texnologiya Universiteti ilə Dövlət Məşğulluq Agentliyi arasında əməkdaşlıq memorandumu imzalanıb. Sənəd Azərbaycan Texnologiya Universitetinin rektoru v.m.i.e. dos. Yaşar Ömərovla Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin İdarə Heyətinin sədri Mustafa Abbasbəyli tərəfindən Gəncədə baş tutan əmək yarmarkası çərçivəsində imzalanıb. Memorandumda universitetin profilinə uyğun olaraq mütəxəssislərə olan tələbatın müəyyən edilməsi məqsədilə əmək bazarının araşdırılması, tədris prosesinin keyfiyyətinin yüksəldilməsi məqsədi ilə əmək bazarının tələblərinə uyğun tədris proqramlarının birgə təkmilləşdirilməsi, məzunların məşğulluğu və əmək bazarına inteqrasiyası, birgə peşəyönümünə dair məsləhət xidmətlərinin, startap və inkubasiya mərkəzlərinin yaradılması, innovativ layihələrin həyata keçirilməsi, ekspertlərin və mentorların, habelə ən qabaqcıl təcrübələrin mübadiləsi kimi bir sıra bəndlər öz əksini tapır.  

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin İdarə Heyətinin sədri Mustafa Abbasbəylinin rəhbərlik etdiyi nümayəndə heyəti Azərbaycan Texnologiya Universitetində olub. Heyət əvvəlcə Azərbaycan Texnologiya Universitetinin rektoru v.m.i.e. dos. Yaşar Ömərovla görüşüb. Görüş zamanı 20 iyul 2023-cü il tarixində imzalanmış memorandumun icrası, eləcə də əməkdaşlığın genişləndirilməsi məsələləri müzakirə edilib. Daha sonra nümayəndə heyəti tələbələrlə görüşüb. Təqdimat zamanı Azərbaycan Texnologiya Universitetinin rektoru v.m.i.e. dos. Yaşar Ömərov tələbələrə bildirib ki, Dövlət Məşğulluq Agentliyi ilə qurulan əlaqələr ATU məzunlarının, eləcə də tələbələrinin gələcəkdə iş əlçatanlığının təmin edilməsinə, karyera inkişafını daim diqqətdə saxlamağa hesablanıb. Dövlət Məşğulluq Agentliyinin İdarə Heyətinin sədri Mustafa Abbasbəyli əmək bazarının mahiyyətindən və vətəndaşların məşğulluğu ilə bağlı tələblərdən, ixtisasla yanaşı peşə bacarıqlarına yiyələnməyin vacibiliyindən danışıb. Sədr 10 universitetin müvafiq məlumatlarının əks olunduğu “Məzunların məşğulluq reytinqi” portalı barədə məlumat verib. Bildirib ki, portalda tezliklə ATU məzunlarının bazası da əks olunacaq və portal real vaxt rejimində universitet məzunlarının əmək bazarına giriş müddətini, hansı əməkhaqqı ilə işlədiyini, öz ixtisasları üzrə işləyib-işləmədiyini, eləcə də 20-yə yaxın digər meyar üzrə reytinqini müəyyən edəcəkdir. Peşələr atlası sistemi barədə də məlumat verən sədr Texnologiya Universitetində yaradılan yeni Karyera Mərkəzinin fəaliyyətinə dəstək göstəriləcəyini qeyd edib. Görüş zamanı tələbələri maraqlandıran suallar cavablandırılıb.   

Azərbaycan Texnologiya Universitetinin strateji inkişaf və rəqəmsallaşma üzrə rektor müşaviri vəzifəsinə Mehman Kərimov təyin olunub. Kərimov Mehman İlham oğlu 21 noyabr 1993-cü ildə Gəncə şəhərində ziyalı ailəsində doğulub. 2014-cü ildə Azərbaycan Dövlət Aqrar Universitetinin mühasibat uçotu və audit ixtisası üzrə bakalavr məzunu olub. Həqiqi hərbi xidmətdən sonra, 2016/2018-ci illərdə Hökumətlərarası Təqaüd Proqramı (HTP) ilə Macarıstan Respublikasının Kaposvar Universitetində regional və ətraf mühit iqtisadiyyatı ixtisası üzrə magistr təhsili alıb. Magistratura təhsil səviyyəsini fərqlənmə ilə başa vurduqdan sonra akademik karyerasını davam etdirərək HTP ilə Macarıstan Kənd Təsərrüfatı və Təbiət Elmləri Universitetində doktorantura təhsilinə başlayıb. 2022-ci ildə “Birbaşa xarici investisiyaların Türkiyə iqtisadiyyatına təsiri” mövzusunda dissertasiya işini uğurla müdafiə edərək fəlsəfə doktoru elmi dərəcəsinə layiq görülüb. Azərbaycan Prezidenti yanında Ali Attestasiya Komissiyasının 3 mart, 2023-cü il tarixli qərarı ilə Ümumi iqtisadiyyat ixtisasında iqtisad elmləri elm sahəsi üzrə fəlsəfə doktoru elmi dərəcəsi verilib.Əmək fəaliyyətinə 2020-ci ildə ADAU-da assistent olaraq başlayıb. 13 senytyabr 2021-ci ildə həmin universitetin Keyfiyyətin təminatı və strateji inkişaf şöbəsinin müdiri vəzifəsinə təyin edilib.Akademik fəaliyyətini paralel olaraq davam etdirib. Təhsildə Keyfiyyət Təminatı Agentliyinin bir sıra qiymətləndirmə meyarları üzrə ekspert təlimlərini uğurla başa vuraraq həmin qurumun eksperti kimi fəaliyyət göstərir. 20-dən çox elmi əsərin müəllifi və həmmüəllifidir.