🎓 Azərbaycan Texnologiya Universitetində (ATU) Karyera Forumu çərçivəsində tanınmış iqtisadçı Fərhad Pərvizi ilə görüş keçiriləcək. Görüş 15 may 2026-cı il tarixində saat 11:00-da baş tutacaq.

💼 Tədbir zamanı iqtisadi sahədə mövcud karyera imkanları, əmək bazarının aktual tələbləri, peşəkar inkişaf istiqamətləri və gənclərin uğur qazanması üçün vacib məqamlar ətrafında müzakirələr aparılacaq.

📈 İqtisadiyyat sahəsinə maraq göstərən tələbələr və gənc mütəxəssislər üçün faydalı olacaq görüşdə iştirakçılar öz suallarını ünvanlandırmaq və peşəkar tövsiyələr almaq imkanı əldə edəcəklər.

Azərbaycan Texnologiya Universitetinin İnnovasiya Mərkəzi Adobe Photoshop üzrə “Qrafik dizayn” təlimlərinə start verir.

Təlim çərçivəsində iştirakçılar Adobe Photoshop proqramı vasitəsilə vizual estetika, kompozisiya və rəng balansı kimi əsas dizayn prinsiplərini mənimsəyəcə, eyni zamanda fon silmə, maskalama və kreativ manipulyasiya texnikaları ilə peşəkar səviyyədə vizuallar hazırlamağı öyrənərək sosial media və reklam məqsədli yüksək keyfiyyətli dizaynlar yaratmaq bacarıqları əldə edəcəklər.

📅 Tarix: 30 aprel
🕒 Vaxt: 13:00–14:00 (həftənin II və IV günləri)
📍 Məkan: ATU, Dizayn Klubu (2306)

Azərbaycan Texnologiya Universitetində 3337.01 – “İnformasiya-ölçmə və idarəetmə sistemləri” ixtisası üzrə fəlsəfə doktoru imtahanı keçiriləcək.

Elanın verildiyi tarixdən etibarən 1 (bir) ay müddətində iddiaçılardan Magistratura və doktorantura şöbəsinə müraciət etmələri xahiş olunur.

İxtisas fənni üzrə fəlsəfə doktoru imtahanında iştirak etmək üçün aşağıdakı sənədlər təqdim edilməlidir:

   - Şəxsiyyəti təsdiq edən sənədin surəti əlavə olunmaqla iddiaçının ərizəsi; 

   - İddiaçı ixtisas fənni üzrə fəlsəfə doktoru imtahanının keçiriləcəyi elmi

müəssisə və təşkilatın və ya ali təhsil müəssisəsinin doktorantı (dissertantı, adyunktu) olmadığı halda, dissertasiya işinin yerinə yetirildiyi müəssisədən müvafiq müraciət məktubu. 

Müraciət üçün son tarix: 25.05.2026

Ətraflı məlumat üçün: (+994 22) 267 03 91

📢 Azərbaycan Texnologiya Universitetində (ATU) Ümummilli Lider Heydər Əliyevin anadan olmasının 103 illiyinə həsr olunmuş “Beşinci sənaye inqilabına doğru – universitetlərin rolu, çağırışlar və imkanlar” mövzusunda keçiriləcək Beynəlxalq Elmi-Praktik Konfrans üzrə tezislərin qəbulu müddəti uzadılıb.

Tezislərin təqdim edilməsi üçün son müraciət tarixi 25 aprel 2026-cı il olaraq müəyyən edilib. Tədqiqatçılar tezislərini qeyd olunan tarixədək təqdim edə bilərlər. Xatırladaq ki, beynəlxalq konfrans 5–6 may 2026-cı il tarixlərində keçiriləcək.

Ətraflı məlumat: https://conference.atu.edu.az/

İqtisadiyyat Nazirliyi yanında Dövlət Vergi Xidməti tələbələrin bilik, bacarıq və şəxsi inkişafına dəstək vermək məqsədilə 2026-cı ilin yayında ali təhsil müəssisələrinin tələbələri üçün yay düşərgəsi və iş yerində təcrübə olmaqla iki hissədən ibarət Yay Təcrübə Proqramı təşkil edir.   

Yay düşərgəsi 7 gün müddətində Dövlət Vergi Xidmətinin Şamaxı rayonunda yerləşən Tədris Mərkəzində təşkil ediləcək. İş yerində təcrübə 8 həftə müddətində Dövlət Vergi Xidmətinin Bakıda və regionlarda yerləşən struktur bölmələrində keçiriləcək. 

Yay Təcrübə Proqramının müddəti 6 iyul 2026-cı il tarixdən 4 sentyabr 2026-cı il tarixədək davam edəcək. 

Təcrübə proqramının üstünlükləri: 
✓ Tələbələr üçün nəzəri biliklərini praktikada tətbiq etmək və dövlət vergi orqanlarının işi ilə tanış olmaq imkanı; 
✓ İqtisadiyyat və vergi sahəsində praktiki bilik və bacarıqların formalaşdırılması məqsədilə keçiriləcək təlimlərdə iştirak imkanı; 
✓Təcrübə keçən tələbələrə proqramda iştirakla bağlı sertifikatın verilməsi; 
✓ Təcrübə proqramını uğurla tamamlayan tələbələrin dövlət vergi orqanlarına daimi işə qəbulu üçün dəyərləndirilməsi. 

Proqramda iştirak etmək üçün namizədlərə qoyulan tələblər: 
✓ Azərbaycan Respublikasının vətəndaşı olmalı; 
✓ Yerli və ya xarici dövlətlərin ali təhsil müəssisələrinin sonuncu kurs bakalavriat pilləsində və ya 
1-ci və ya 2-ci kurs magistratura pilləsində iqtisadiyyat, hüquq və ya idarəetmə ixtisas istiqamətləri üzrə təhsil almalı; 
✓ Cari tədris ilinin payız semestri üzrə Ümumi Orta Müvəffəqiyyət Göstəricisi 80 baldan (4 ballıq sistem üzərindən 3 baldan) yuxarı olmalıdır. 

Proqramda iştirak etmək üçün seçim mərhələləri: 
I mərhələ: Sənəd qəbulu üzrə ilkin yoxlamanın aparılması. 
II mərhələ: Namizədlərin özünütəqdimat video çıxışlarının qiymətləndirilməsi.  
III mərhələ: Namizədlərin qrup tapşırıqları üzrə qiymətləndirilməsi.   

Proqramda iştirak etmək üçün sənəd qəbulu tecrube@taxes.gov.az elektron poçt ünvanı vasitəsilə 10 aprel 2026-cı il saat 09:00-dan 10 may 2026-cı il saat 23:59-dək həyata keçiriləcək. 

Müraciətlər göndərilərkən (mövzu hissəsində “Yay Təcrübə Proqramı 2026” qeyd etməklə) şəxsiyyət vəsiqəsi, tələbə bileti və akademik transkript mütləq qaydada fayl şəklində məktuba əlavə olunmalıdır. 

Namizədin müraciəti tecrube@taxes.gov.az elektron poçt ünvanına daxil olduqdan sonra 10 iş günü ərzində yoxlanılacaq və müraciətin nəticəsi barədə onun elektron poçt ünvanına məlumat göndəriləcəkdir. Müəyyən edilən sənədlərdən hər hansı birini təqdim etməyən və ya elanda 
göstərilən tələblərə uyğun olmayan namizədlərin müraciətləri qəbul edilməyəcək. Müraciətlərin göndərilməsi zamanı hər hansı texniki problem yarandıqda namizədlər 012-403-81-35 nömrəli telefonla Dövlət Vergi Xidmətinə müraciət edə bilərlər.  
  
Müraciətləri qəbul edilmiş namizədlərə ilkin seçim mərhələsində iştirak barədə məlumatlar əvvəlcədən veriləcək.