Azərbaycan Texnologiya Universitetində (ATU )qış imtahan sessiyasına hazırlıqla bağlı iclas keçirilib. İclasda akademik və inzibati rəhbər heyət iştirak edib.

İclasda rektor Yaşar Ömərov Elm və Təhsil Nazirliyinin müvafiq əmrinə əsasən İmtahan Qərargahı və Apellyasiya Komissiyasının yaradıldığını bildirib, imtahan sessiyasının şəffaf keçirilməsi və tələbələrin biliyinin obyektiv qiymətləndirilməsi üçün fakültə rəhbərlərinə və kafedra müdirlərinə müvafiq tapşırıqlar verib.

İclasda həmçinin imtahan zallarının, kompüter otaqlarının, müşahidə kameralarının tam hazır vəziyyətə gətirilməsi və s. məsələlərlə bağlı tapşırıqlar verilib.

Azərbaycanın suveren dövlət kimi mövcudluğu yalnız beynəlxalq hüquqi sənədlərlə deyil, həm də xalqımızın qəhrəmanlıq mübarizəsi ilə təmin edilmişdir. Xüsusən 1990-cı illərin əvvəllərində Ermənistanın hərbi təcavüzü nəticəsində ölkəmizin beynəlxalq səviyyədə tanınmış ərazilərinin işğalı, bir milyondan artıq soydaşımızın məcburi köçkünə çevrilməsi, şəhər və kəndlərimizin dağıdılması, Xocalı soyqırımı kimi insanlığa qarşı cinayətlər Azərbaycan xalqının iradəsini ciddi sınağa çəkdi. Lakin bütün bu faciələrə baxmayaraq, Azərbaycan suveren dövlət olaraq mövcudluğunu qorudu və ərazi bütövlüyünün bərpası uğrunda mübarizəsini ardıcıl şəkildə davam etdirdi.

İkinci Qarabağ müharibəsində qazanılan tarixi Zəfər Azərbaycan suverenliyini daha da möhkəmləndirdi və müstəqilliyimizin dönməzliyini bütün dünyaya nümayiş etdirdi. 2023-cü il aprelin 23-də Azərbaycan hakimiyyəti mühüm addım ataraq Laçın–Xankəndi yolunun başlanğıcında nəzarət-buraxılış məntəqəsi yaratdı. Bu addım ölkəmizin suveren hakimiyyətinin bərpasında strateji mərhələ oldu. Azərbaycan Ordusu 2023-cü il sentyabrın 19-da Qarabağ iqtisadi rayonunda separatçıların təxribatlarına cavab olaraq lokal antiterror tədbirləri həyata keçirdi. Cəmi 23 saat 43 dəqiqə davam edən bu əməliyyat nəticəsində Ermənistan silahlı qüvvələrinin qalıqları ərazilərimizdən çıxarıldı, qanunsuz silahlı birləşmələr tərk-silah edildi, qondarma rejim özünü buraxdığını elan etdi.

Beləliklə, Azərbaycanın bütün əraziləri üzərində dövlət suverenliyi tam bərpa olundu. Bu hadisə yalnız hərbi-siyasi deyil, həm də tarixi və mənəvi baxımdan dövlətçiliyimizin möhkəmlənməsində yeni mərhələnin başlanğıcı oldu. Müzəffər Ali Baş Komandan İlham Əliyev 2023-cü il oktyabrın 15-də Xankəndi, Xocalı, Xocavənd və Ağdərə şəhərlərində Azərbaycan Respublikasının üçrəngli, ay-ulduzlu Dövlət Bayrağını ucaltmaqla suverenliyimizin legitimliyini rəsmiləşdirdi. Bununla da hakimiyyətin aliliyi və nəzarət funksiyası respublikamızın bütün ərazisində tam bərpa edildi, inzibati-coğrafi vahidlərimiz bütövləşdirildi.

2024-cü il sentyabrın 19-da Prezident İlham Əliyevin imzaladığı Sərəncamla hər il 20 sentyabr tarixinin Dövlət Suverenliyi Günü kimi qeyd olunması təsis edildi. Bu günün müəyyənləşdirilməsi 1991-ci ildə müstəqilliyin bərpası ilə başlanan tarixi yolun məntiqi nəticəsi, ərazi bütövlüyü və dövlət suverenliyi uğrunda uzun illər aparılan mübarizəmizin kulminasiyasıdır. 2025-ci ildə Azərbaycan xalqı bu əlamətdar günü ilk dəfə rəsmi şəkildə qeyd etdi. Bu hadisə yalnız dövlətçilik tariximiz üçün deyil, eyni zamanda milli kimliyimizin möhkəmləndirilməsi baxımından da böyük əhəmiyyət daşıyır.

2025-ci il ölkəmizdə “Konstitusiya və Suverenlik İli” elan edilmişdir. Konstitusiya və suverenlik anlayışlarının birgə vurğulanması Azərbaycanın müstəqil dövlət kimi dünya birliyində mövqelərinin daha da gücləndirilməsinə xidmət edir. Konstitusiya suverenliyin hüquqi əsasını təşkil edir, suverenlik isə Konstitusiyanın qoruduğu və təsbit etdiyi ali dəyərdir. Suverenlik dövlətin öz ərazisində müstəqil qərarlar qəbul etmək, daxili və xarici siyasətini sərbəst şəkildə müəyyənləşdirmək və digər dövlətlərin təsirindən azad olmaq hüququdur. Dövlət Suverenliyi Günü xalqımızın keçdiyi çətin, lakin şərəfli mübarizə yolunun xatırladılması və bu tarixi yaddaşın gələcək nəsillərə ötürülməsi baxımından mühüm əhəmiyyət kəsb edir.

 Zirəddin Cavadlı
Azərbaycan Texnologiya Universitetinin
“Texnoloq” qəzetinin redaktoru

ATU ilə “Qlobal Standart 1 Beynəlxalq Sistemlərin Təbliği” İctimai Birliyi ("GS1 Azerbaijan” İB) arasında mövcud əməkdaşlıq çərçivəsində universitetin Maşın mühəndisliyi və logistika kafedrasının əməkdaşları “GS1 sistemi. Avtomatik identifikasiya texnologiyası və onun tətbiqinin əsasları” adlı onlayn ixtisasartırma kursunda iştirak ediblər.

4 həftə ərzində, ümumilikdə 22 saat davam edən kursda kafedra əməkdaşları Həcər Hüseynzadə və Rizvan Şükürova qlobal əmtəə nömrələməsinin beynəlxalq idarə olunması, ştrixkodların növləri və istifadə qaydaları, məhsul və etiketlər üzərində yerləşdirilən kodlar barədə ətraflı məlumat verilib. Eyni zamanda məhsulların daşınmasında istifadə olunan fərdi aktivlər üçün GS1 identifikasiya açarları, pərakəndə satışda etiketləmə kodları, qida və turizm sektorlarında ştrixkodlaşdırma texnologiyasının tətbiqi məsələləri tədris olunub.

Dərslər nəzəri və praktiki formada keçirilib, mövzular videomaterialların nümayişi ilə izah edilib. Onlayn kurs “Qlobal Standart 1 Beynəlxalq Sistemlərin Təbliği” İctimai Birliyinin əməkdaşları Səbinə Əliyeva, Gülanə Rəsulova, Səfurə Şabanova, Səbinə Rəhimova və Fərid Abbasovun moderatorluğu ilə həyata keçirilib.

Kursun əsas məqsədi “GS1 sistemi. Avtomatik identifikasiya texnologiyası və onun tətbiqinin əsasları” adlı seçmə fənnin növbəti tədris ilindən etibarən ATU-nun müvafiq təhsil proqramlarına daxil edilməsidir. 

Qeyd edək ki, ATU ilə "GS1 Azerbaijan" bu ilin iyul ayından əmkdaşlıq edir, bu çərçivədə birgə “GS1 Beynəlxalq Sistemdə məhsulların və yüklərin avtomatik identifikasiyası” laboratoriyası yaradılıb.

Dayanıqlı inkişafın təmin olunması hər bir müasir dövlətin qarşısında duran əsas vəzifələrdən biridir. Bu prosesin uğurlu şəkildə həyata keçirilməsi isə yalnız iqtisadi göstəricilərlə deyil, həm də möhkəm dövlətçilik ənənələri ilə bağlıdır. Azərbaycan Respublikasında formalaşmış dövlətçilik ənənələri milli maraqların qorunması, hüquqi və demokratik dövlət quruculuğunun möhkəmləndirilməsi, ictimai həmrəyliyin gücləndirilməsi və müstəqilliyin dönməzliyinin təmin olunması kimi prinsiplərə əsaslanır. Məhz bu prinsiplər ölkənin sabit inkişafını, cəmiyyətin rifahını və gələcək nəsillərə ötürüləcək möhkəm təməllərin yaradılmasını təmin edir.

Azərbaycan xalqının Ümummilli Lideri Heydər Əliyevin dövlətçilik siyasətində ümummilli dəyərlər, xalqın mənafeyi hər zaman üstün tutulmuş, dövlətin uzunmüddətli inkişafını təmin edən strateji xətt kimi qəbul olunmuşdur. Çünki, daha çox siyasi və hüquqi müstəvidə özünü göstərən dövlət maraqları cəmiyyətin bütövlükdə rifahını nəzərdə tutan ümumi mənafeləri əks etdirir. İnkişaf strategiyasını göstərən milli prioritetlər dövlətin və xalqın uzunmüddətli hədəflərini ifadə edən milli məqsədlərdir. Əgər milli maraqların qorunması dövlətin strateji müstəqilliyini və uzunmüddətli inkişafını təmin edirsə, ictimai həmrəylik sosial inteqrasiyanı və milli birliyi möhkəmləndirir. Bu gün dövlət idarəçiliyində özünü göstərən demokratik prinsiplər cəmiyyətin sosial sabitliyini gücləndirir.

Ulu Öndər Heydər Əliyevin rəhbərliyi ilə qəbul edilən və müasir dövlətçiliyimizin hüquqi təməlini formalaşdıran Azərbaycan Respublikasının Konstitusiyası hüquqi, demokratik və dünyəvi dövlətin formalaşması üçün əsas qanuni baza yaratdı, dövlətçilik ənənələrinin hüquqi təminatını möhkəmləndirdi.

Dövlət idarəçiliyində insan mərkəzli yanaşmanı ifadə edən humanizm, insan hüquq və azadlıqlarının qorunması Azərbaycan Respublikası Konstitusiyasında təsbit olunmuş əsas hüquqların təminatı, vətəndaşların sosial rifahının yüksəldilməsi, bərabərlik və ədalət prinsiplərinin həyata keçirilməsi ilə özünü göstərir. Prezident İlham Əliyevin siyasətində humanizm prinsipləri əsas ideoloji dayaqlardan biridir. Onun dövlət idarəçiliyində insan amili, hüquq və azadlıqların qorunması, sosial rifahın yüksəldilməsi və amnistiya kimi humanist addımlar xüsusi yer tutur. Əhalinin sosial müdafiəsi, aztəminatlı ailələrə dəstək, təhsil və səhiyyə sahəsində islahatlar, 44 günlük Vətən müharibəsindən sonra azad edilmiş ərazilərdə bərpa işləri və əhalinin geri dönüşü məhz humanizm prinsiplərinə əsaslanır.

Ulu Öndər Heydər Əliyevin siyasi xəttini müasir dövrün çağırışlarına uyğun şəkildə davam etdirərək Azərbaycanın müstəqilliyini möhkəmləndirən, ərazi bütövlüyünü bərpa edən və ölkənin beynəlxalq nüfuzunu artıran Prezident İlham Əliyev dövlət siyasətinin bariz nümunəsi, insan amilinə verilən dəyərin göstəricisi olaraq bir neçə dəfə geniş amnistiya elan edib. 2021-ci ildə Böyük Qələbəmizin ildönümü ərəfəsində elan edilən amnistiya aktı 17 mindən artıq insana şamil edildi, onların və doğmalarının sevincinə səbəb oldu. Bütövlükdə, Prezident İlham Əliyev tərəfindən 22 il ərzində 39 əfv sərəncamı, 5 amnistiya aktı qəbul edilib. Bu, bir daha sübut edir ki, Ulu Öndərin müəyyənləşdirdiyi xəttin davamı olaraq dövlət siyasətində insan faktoru hər zaman prioritet kimi götürülür. Ümumilikdə, 1995-ci ildən etibarən qəbul edilən amnistiya aktları 140 minə yaxın insana şamil edilib.

Tarixi kontekstdən  yanaşsaq, 15 dekabr 2025-ci ildə amnistiya elan edilməsi Prezident İlham Əliyevin ümumbəşəri humanizm dəyərlərinə sadiqliyini əks etdirən mühüm təşəbbüs olmaqla yanaşı, həm də 2025-ci ilin “Konstitusiya və Suverenlik İli” elan olunması ilə bağlıdır.  Bu, Azərbaycanın suverenliyinin bərpası və Konstitusiyanın ali hüquqi qüvvəsinin bütün ərazilərdə təmin olunması ilə əlaqələndirilir. Qərar humanizm və mərhəmət ənənələrinə sadiqlik, cəzadan azad etmənin tərbiyəvi əhəmiyyəti və insanların qanunlara əməl edəcəklərinə inam üzərində qurulub. Amnistiya qərarının şamil olunduğu kateqoriyalara baxdıqda bunu bir daha görmək mümkündür – Azərbaycanın suverenliyi və ərazi bütövlüyü uğrunda döyüşlərdə iştirak etmiş şəxslər, həlak olmuş və ya itkin düşmüş şəxslərin yaxın qohumları, Ermənistanın mülki əhaliyə qarşı hərbi təxribatı nəticəsində əlil olmuş şəxslər, qadınlar, 60 yaşına çatmış şəxslər, eləcə də cinayət törədərkən yetkinlik yaşına çatmayanlar.

Prezident İlham Əliyevin siyasətində humanizm prinsipləri nəzəri konsepsiya olmaqla kifayətlənmir, dövlət idarəçiliyinin praktik əsasını təşkil edir, yəni bu prinsiplər dövlət idarəçiliyinin canlı dayağıdır. Qətiyyətlə deyə bilərik ki, bu amnistiya qərarı dövlət idarəçiliyində humanizm prinsiplərinin tətbiqini gücləndirməklə yanaşı, azad edilən şəxslərin cəmiyyətə inteqrasiyasını təmin edəcək və bununla da dövlətin inkişafına mühüm töhfə verəcək. 

Beləliklə, qəbul olunmuş amnistiya qərarı Azərbaycan dövlətinin humanizm prinsiplərinə sadiqliyinin bariz nümunəsidir. Bu addım yalnız hüquqi akt kimi deyil, həm də cəmiyyətin sosial inteqrasiyasına, milli həmrəyliyin möhkəmlənməsinə və insan amilinin dövlət siyasətində prioritet olmasına xidmət edir. Prezident İlham Əliyevin rəhbərliyi ilə həyata keçirilən bu siyasət, Ulu Öndər Heydər Əliyevin müəyyənləşdirdiyi dövlətçilik ənənələrinin müasir dövrün çağırışlarına uyğun davamı olaraq, ədalət, mərhəmət və tolerantlıq prinsiplərinin praktik təzahürüdür və dövlətçilik tarixində hər zaman mühüm mərhələ kimi qiymətləndiriləcək, gələcək nəsillərə örnək olacaq.

  Azərbaycan Texnologiya Universitetinin

 İctimai elmlər və multikulturalizm kafedrasının

baş müəllimi Zəminə Rəsul qızı Novruzova

“Nar” şirkətinin baş icraçı direktoru Özgür Gencin başçılıq etdiyi nümayəndə heyəti Azərbaycan Texnologiya Universitetinə (ATU) səfər edib. 

Səfər çərçivəsində nümayəndə heyətinin rektor Yaşar Ömərovla görüşü baş tutub. Görüş zamanı Yaşar Ömərov “Nar”ın baş icraçı direktoru Özgür Genci təyinatı münasibətilə təbrik edib, fəaliyyətində uğurlar arzulayıb. 

İşgüzar görüşdə “Nar” ilə ATU arasında mövcud əməkdaşlıq əlaqələrinin genişləndirilməsi məsələləri əsas müzakirə mövzusu olub. Regionlarda peşəkar kadr hazırlığı istiqamətində həyata keçirilən təşəbbüslər, bu sahədə institusional əməkdaşlığın gücləndirilməsi, eləcə də qarşılıqlı maraq doğuran istiqamətlər üzrə fikir mübadiləsi aparılıb.

Görüş zamanı təhsil və sənaye arasında əlaqələrin möhkəmləndirilməsinin əhəmiyyəti vurğulanıb, həmçinin, gələcək dövrdə birgə fəaliyyət imkanları dəyərləndirilib, əməkdaşlığın daha da inkişaf etdirilməsi məqsədilə atıla biləcək növbəti addımlar müzakirə edilib.