Azərbaycan Respublikasının Prezidenti İlham Əliyevin 21 iyul 2026-cı ildə Almaniya Federativ Respublikasına rəsmi səfəri iki dövlət arasındakı münasibətlərin yeni strateji mərhələsinin başlanğıcı kimi tarixə düşdü. Səfər çərçivəsində Azərbaycan və Almaniya arasında enerji, ticarət, nəqliyyat və innovasiya sahələrində əməkdaşlığın genişləndirilməsi barədə mühüm sənədlər imzalandı. Prezident İlham Əliyev Ermənistanla sülh sazişini regionda uzunmüddətli sabitlik üçün tarixi dönüş nöqtəsi adlandıraraq, Avropa İttifaqının bu prosesə verdiyi dəstəyi də yüksək qiymətləndirdi. 

Azərbaycan-Almaniya münasibətlərinin strateji sütunlarından biri enerji sahəsidir. Avropanın enerji təhlükəsizliyinin gücləndirilməsi fonunda Azərbaycanın etibarlı tərəfdaş kimi rolu xüsusi əhəmiyyət kəsb edir. Prezident İlham Əliyev Berlində bəyan etdi ki, Azərbaycan Almaniyaya qaz və neft tədarükünü artırmağa hazırdır. SOCAR vasitəsilə illik 2 milyard kubmetr qaz ixracı planı Avropanın enerji xəritəsində mühüm dəyişiklik yaradır və Almaniyanın enerji diversifikasiyası strategiyasına uyğun gəlir. Bu addım həm Avropanın enerji asılılığını azaltmaq, həm də Azərbaycanı Avropanın enerji təhlükəsizliyində aparıcı oyunçuya çevirmək baxımından tarixi əhəmiyyət daşıyır.

Enerji əməkdaşlığının davamlılığı bölgədə sabitlikdən asılıdır. Məhz bu səbəbdən Prezident İlham Əliyev Ermənistanla sülh sazişini regionda sabitlik və yeni iqtisadi imkanların açılması baxımından tarixi addım kimi təqdim etdi: “Bu il biz həm Avropa İttifaqı Şurasının Prezidenti cənab Koştanın, həm Avropa Komissiyasının Prezidenti xanım Fon der Lyayenin Azərbaycana səfərlərinin şahidi olmuşuq. Bu səfərlərin çox böyük siyasi mənası var. Bu, Avropa İttifaqı ilə Azərbaycan arasındakı əlaqələri daha da gücləndirəcək. Almaniya Avropa İttifaqına üzv olan ölkələr arasında lider olduğu üçün burada təbii ki, həm Almaniyanın rolu çox böyükdür, eyni zamanda, gələcək əməkdaşlıq üçün də əminəm ki, Almaniya öz səylərini göstərəcək”. Bu saziş Cənubi Qafqazda uzunmüddətli sülhün bərqərar olunmasına, sərhədlərin açılmasına və regional əməkdaşlığın genişlənməsinə şərait yaradır. Almaniya tərəfi də bu prosesi yüksək qiymətləndirərək, Avropa İttifaqının bölgədə sabitlik və inkişafı dəstəklədiyini vurğuladı. Sülh sazişi yalnız siyasi müstəvidə deyil, həm də iqtisadi və sosial sahələrdə yeni imkanların açılmasına zəmin yaradır.

Azərbaycan–Almaniya münasibətlərinin mühüm istiqamətlərindən digəri iqtisadi əməkdaşlıqdır. Səfər çərçivəsində “Azərbaycan–Almaniya Biznes Şurası”nın yaradılması barədə Birgə Bəyannamə imzalandı. Bu yeni platforma iki ölkənin özəl sektorları arasında davamlı dialoq və əməkdaşlıq üçün institusional çərçivə yaradır. Biznes Şurası vasitəsilə şirkətlər arasında birbaşa əlaqələrin gücləndirilməsi, investisiya imkanlarının genişləndirilməsi və qarşılıqlı ticarət dövriyyəsinin artırılması nəzərdə tutulur. Bu addım Azərbaycan–Almaniya iqtisadi münasibətlərinin uzunmüddətli inkişafına xidmət etməklə yanaşı, Avropa bazarında Azərbaycanın mövqeyini daha da möhkəmləndirəcək.

Prezident İlham Əliyev nəqliyyat və logistika sahəsini də Azərbaycan–Almaniya əməkdaşlığının mühüm istiqamətlərindən biri olduğunu qeyd etdi, xüsusi olaraq Orta Dəhlizin strateji əhəmiyyətini vurğuladı: “Azərbaycan öz nəqliyyat infrastrukturunu təkmilləşdirir. Keçən il Orta Asiya məşvərət formatına tamhüquqlu üzv olmaqla, Azərbaycan bir növ Orta Asiya ilə Avropa arasında körpü rolunu oynayır və bu rol getdikcə artacaqdır. Bir çox istiqamətlər üzrə konkret fəaliyyət planı nəzərdə tutulur”. O, Alat limanına qoyulan sərmayələrin Çin–Avropa yükdaşımalarını artıracağını qeyd edərək, Azərbaycanın qlobal tranzit mərkəzinə çevrilmək potensialını ön plana çıxardı. Bu təşəbbüs yalnız regional iqtisadi əlaqələri gücləndirmir, həm də Avropa ilə Asiya arasında etibarlı və sürətli nəqliyyat marşrutlarının formalaşmasına xidmət edir. Almaniya tərəfi də Orta Dəhlizin Avropa sənayesi üçün strateji imkanlar yaratdığını vurğuladı.

Tarixi səfər zamanı Azərbaycan–Almaniya əməkdaşlığının mühüm istiqamətlərindən biri olaraq elm və innovasiya sahəsinə də diqqət yetirildi. Rəqəmsal transformasiya, ERP sistemlərinin tətbiqi və vahid ekosistemə inteqrasiya məsələləri müzakirə olundu. Qeyd edildi ki, bu əməkdaşlıq iki ölkə arasında texnoloji tərəfdaşlığın güclənməsinə, rəqəmsal iqtisadiyyatın inkişafına və innovasiya layihələrinin həyata keçirilməsinə şərait yaradır. Prezident İlham Əliyev vurğuladı ki, Azərbaycanın rəqəmsal transformasiya strategiyası Avropa təcrübəsi ilə birləşdirildikdə, ölkənin iqtisadi modernləşməsi daha sürətli və davamlı olacaq. Almaniya tərəfi də bu sahədə birgə layihələrin genişləndirilməsini dəstəklədiyini bəyan etdi.

Prezident İlham Əliyevin Almaniyaya rəsmi səfəri yalnız iki ölkə arasında imzalanan sənədlərlə məhdudlaşmadı, həm də gələcək əməkdaşlığın yol xəritəsini müəyyənləşdirdi. Enerji təhlükəsizliyi, sülhün möhkəmlənməsi, iqtisadi tərəfdaşlıq, nəqliyyat-logistika və innovasiya sahələrində atılan addımlar Azərbaycan–Almaniya münasibətlərini yeni keyfiyyət mərhələsinə yüksəltdi. Bu səfər göstərdi ki, tərəflər yalnız bu günün ehtiyaclarını deyil, həm də sabahın çağırışlarını birlikdə qarşılayacaq. Azərbaycan və Almaniya arasında qurulan yeni strateji çərçivə gələcəkdə regional və qlobal miqyasda əməkdaşlığın daha da dərinləşməsinə imkan verəcək.

Azərbaycan Texnologiya Universiteti

Humanitar elmlər və multikulturalizm kafedrasının

baş müəllimi Zəminə Novruzova

Azərbaycan Texnologiya Universitetinin (ATU) rektoru Yaşar Ömərov  “Yay Fest 2026”nın Nəsrəddin Tusi adına Şamaxı Astrofizika Rəsədxanasında təşkil olunan "Rəqəmsal dövlət" düşərgəsinin "Gələcəyin insanı: Bacarıq, yoxsa diplom?" adlı panel sessiyasında spiker qismində çıxış edib.

Çıxışı zamanı Yaşar Ömərov müasir dövrdə ali təhsilin yalnız nəzəri biliklərin ötürülməsi ilə məhdudlaşmadığını, universitetlərin tələbələrə əmək bazarının tələblərinə uyğun praktik bacarıqlar, rəqəmsal səriştələr və innovativ düşüncə formalaşdırmalı olduğunu vurğulayıb. Bildirib ki, rəqabətqabiliyyətli insan kapitalının yetişdirilməsi, innovasiya ekosisteminin gücləndirilməsi və ölkənin rəqəmsal inkişaf hədəflərinə nail olunmasında ali təhsil müəssisələrinin üzərinə mühüm məsuliyyət düşür. Rektor qeyd edib ki, rəqəmsallaşma şəraitində diplom öz əhəmiyyətini qorusa da, onun real bacarıqlar və praktiki təcrübə ilə tamamlanması məzunların rəqabətqabiliyyətliliyinin əsas şərtidir.

Panel sessiyasının sonunda Yaşar Ömərov festival iştirakçılarını maraqlandıran sualları cavablandırıb, ali təhsildə rəqəmsallaşma, innovasiya və gənclərin gələcəyin çağırışlarına hazırlanması ilə bağlı fikirlərini bölüşüb.

Qeyd edək ki, Azərbaycan Tələbə Gənclər Təşkilatı İttifaqının təşkilatçılığı ilə keçirilən "Yayfest" gənclər festivalı gənclərin bilik və bacarıqlarının inkişafı, şəbəkələşməsi və müxtəlif istiqamətlər üzrə təcrübə mübadiləsinin təşviqi məqsədilə 8 fərqli mövzu üzrə düşərgələr formatında təşkil olunur.

Xəzərdən Avropaya uzanan marşrut: Son illərdə qlobal ticarət marşrutlarında baş verən dəyişikliklər Avrasiya məkanında alternativ nəqliyyat dəhlizlərinin əhəmiyyətini daha da artırıb. Xüsusilə Yaxın Şərqdə və dəniz daşımalarında müşahidə olunan risklər fonunda Orta Dəhliz beynəlxalq yükdaşımalarının etibarlı istiqamətlərindən biri kimi ön plana çıxır. Bu marşrutun əsas həlqələrindən biri olan Azərbaycan isə nəqliyyat və logistika infrastrukturunu yeni tələblərə uyğun genişləndirməyə davam edir. Şuşada keçirilən IV Qlobal Media Forumunda Azərbaycan Respublikasının Prezidenti cənab İlham Əliyev də Azərbaycanın son illərdə məhz bu istiqamətdə ardıcıl fəaliyyət göstərdiyini diqqətə çatdırıb. Dövlət başçısının sözlərinə görə, ölkə coğrafi mövqeyinin üstünlüklərindən istifadə edərək beynəlxalq nəqliyyat bağlantılarının inkişafına uzunmüddətli investisiyalar yatırıb, müasir infrastruktur yaradıb və qonşu dövlətlərlə əməkdaşlığı genişləndirib. Ölkə başçısı qeyd edib ki, hazırda dünyada baş verən geosiyasi proseslər Azərbaycanın tranzit imkanlarının əhəmiyyətini daha da artırır.

"Dəniz ticarət limanımıza gəldikdə, hazırda o, 15 milyon ton imkanı ilə Xəzərdə ən iri limandır və onun həcmi 25 milyon tonu təmin etmək üçün artırılacaq".

Cənab Prezident bildirib ki, artan yük axını mövcud nəqliyyat infrastrukturunun genişləndirilməsini zəruri edib. Bu baxımdan Xəzər dənizində yerləşən Bakı Beynəlxalq Dəniz Ticarət Limanının inkişafı xüsusi əhəmiyyət daşıyır. Dövlət başçısı forumda çıxışı zamanı liman infrastrukturunun genişləndirilməsi ilə yanaşı, Azərbaycanın dəniz daşımaları imkanlarının da artırıldığını bildirib. Onun sözlərinə görə, hazırda ölkənin gəmiqayırma zavodunda Avropa istiqamətində yükdaşımalarını gücləndirmək məqsədilə 10 yeni gəmi inşa edilir. Ölkə rəhbəri, həmçinin Mərkəzi Asiya ölkələri və Avropa Komissiyası ilə əməkdaşlığın Orta Dəhlizin inkişafında mühüm rol oynadığını vurğulayıb.

IV Şuşa Qlobal Media Forumunda səsləndirilən bu fikirlər göstərir ki, qlobal nəqliyyat marşrutlarında baş verən dəyişikliklər fonunda Azərbaycan tranzit potensialının gücləndirilməsini strateji prioritetlərdən biri kimi müəyyənləşdirib. Xəzərdəki limanın genişləndirilməsi, yeni gəmi parkının formalaşdırılması və beynəlxalq tərəfdaşlarla əməkdaşlığın dərinləşdirilməsi ölkənin Orta Dəhlizdə mövqeyinin daha da möhkəmlənməsinə xidmət edir.

 Azərbaycan Texnologiya Universiteti

Mətbuat xidmətinin rəhbəri Xəyalə Məmmədova

Azərbaycan Texnologiya Universitetində (ATU) Elmi Şuranın 2025/2026-cı tədris ili üzrə son iclası keçirilib. Universitetin rektoru, Elmi Şuranın sədri Yaşar Ömərov gündəlikdə duran məsələləri şura üzvlərinin diqqətinə çatdırıb.

İclasda rektor Yaşar Ömərov cari tədris ilində universitetin fəaliyyəti, əldə olunan nəticələr və qarşıdakı dövr üçün inkişaf perspektivləri barədə hesabat məruzəsi ilə çıxış edib. Məruzə zamanı tədris, elm, beynəlxalq əməkdaşlıq, rəqəmsal transformasiya və innovasiya istiqamətlərində əldə olunan nəticələr slaydlar vasitəsilə təqdim olunub, universitetin əsas fəaliyyət istiqamətləri üzrə müsbət inkişaf dinamikası nümayiş etdirilib.

Daha sonra Tədrisin təşkili və idarə edilməsi şöbəsinin müdiri Cəsarət Şabanov 2026/2027-ci tədris ili üzrə qəbul planı barədə məlumat verib. Ardınca elmi katib Sevda Qurbanova 2026/2027-ci tədris ilinin birinci yarımili üçün Elmi Şuranın iş planını təqdim edib.

İclasda Tədris-Metodiki Komissiyanın rəhbəri, sosial məsələlər və ictimaiyyətlə əlaqələr üzrə prorektor Şahmar Həsənovun təqdimatı ilə tədris-metodiki vəsaitlərin təsdiqi, Cəsarət Şabanovun təqdimatı əsasında yeni ixtisasın açılması ilə bağlı işçi qrupunun yaradılması, İnsan Resursları şöbəsinin müdiri İlham Əlizadənin təqdimatı ilə ştat cədvəlində dəyişikliklərin edilməsi, hüquqşünas Müşfiq Məmmədovun təqdimatı əsasında isə imtiyazlı tələbələrin təhsil haqları məsələləri müzakirə olunaraq müvafiq qərarlar qəbul edilib.

Həmçinin Rəqəmsal texnologiyalar fakültəsinin dekanı Rövşən Hacıyevə professor elmi adının verilməsi məqsədilə Azərbaycan Respublikasının Prezidenti yanında Ali Attestasiya Komissiyası qarşısında vəsatət qaldırılması məsələsi səsverməyə çıxarılıb və müsbət qərar qəbul edilib.

İclas çərçivəsində İqtisadiyyat kafedrasının dosenti Nüşabə Hacıyeva 75 illik yubileyi münasibətilə təltif edilib.

Azərbaycan Texnologiya Universitetində (ATU) 2025–2026-cı tədris ilinin yekunlarına həsr olunmuş elmi əsərlərin və tədris-metodiki vəsaitlərin sərgisi təşkil edilib.

Universitetin rektoru Yaşar Ömərov sərgi ilə yaxından tanış olub, nümayiş etdirilən tədris-metodiki və elmi nəşrlərə baxış keçirib, müəlliflərlə fikir mübadiləsi aparıb.

Rektor qeyd edib ki, süni intellekt və rəqəmsal texnologiyaların sürətlə inkişaf etdiyi müasir dövrdə universitetlərin rəqabət qabiliyyəti ilk növbədə keyfiyyətli tədris resursları və güclü elmi tədqiqatlarla müəyyən olunur. O bildirib ki, müasir dərslik və tədris-metodiki vəsaitlərin hazırlanması, eləcə də universitet alimlərinin Scopus kimi nüfuzlu beynəlxalq elmmetrik bazalarda təmsilçiliyinin artırılması ATU-da təhsil və elmin inkişafı istiqamətində həyata keçirilən strateji hədəflər sırasında yer alır.

Sərgi çərçivəsində  Qida mühəndisliyi və şərabçılıq kafedrasının əməkdaşlarının həmmüəllifliyi ilə ərsəyə gələn “Qida təhlükəsizliyi” və “Akademik yazı və etika” adlı dərsliklərin, İnformasiya texnologiyaları və təhlükəsizliyi kafedrasının əməkdaşlarının müəllifliyi ilə hazırlanmış “Kompüter arxitekturası” adlı dərsliyin, İqtisadiyyat kafedrasının əməkdaşlarının müəllifi olduqları “Statistika (I hissə)” və “Mühasibat uçotu” adlı dərsliklərin, həmçinin I, II və III cildlərdən ibarət “Karyera planlaması” adlı dərs vəsaitlərinin, eləcə də Dizayn və sənaye texnologiyaları kafedrasının əməkdaşlarının həmmüəllifliyi ilə çap olunmuş “Geyimlərin modelləşdirilməsi”, Humanitar elmlər və multikulturalizm kafedrasının əməkdaşlarının müəllifi olduqları “Birinci və ikinci Qarabağ müharibəsi: müqayisəli təhlil” və Xarici dillər kafedrasının əməkdaşlarının həmmüəllifliyi ilə nəşr olunan "Technical Dictionary" adlı dərs vəsaitlərinin təqdimatı baş tutub.

Universitetin bütün kafedralarının təmsil olunduğu sərgidə professor-müəllim heyəti tərəfindən tədris ili ərzində hazırlanmış dərsliklər, dərs vəsaitləri, metodik vəsaitlər, metodik göstərişlər, laboratoriya işləri üzrə vəsaitlər, fənn proqramları, eləcə də müxtəlif istiqamətlər üzrə hazırlanmış digər tədris resursları nümayiş etdirilib. Bununla yanaşı universitet tədqiqatçılarının Scopus, “Web of Science” və digər nüfuzlu beynəlxalq elmmetrik bazalarda indekslənən elmi nəşrləri də sərgidə yer alıb.

Azərbaycan Texnologiya Universitetində Struktur Bölmələrin Monitorinqi Komissiyasının 2026–2027-ci tədris ili üzrə ilk iclası keçirilib. 

İclasa komissiyanın sədri, universitetin Sosial məsələlər və ictimaiyyətlə əlaqələr üzrə prorektor Şahmar Həsənov rəhbərlik edib. O komissiyanın fəaliyyət istiqamətləri və qarşıya qoyulan məqsədlər barədə məlumat verərək monitorinq prosesinin universitetdə keyfiyyət təminatı sisteminin inkişafı baxımından əhəmiyyətini vurğulayıb.

İclasda Struktur Bölmələrin Monitorinqi Komissiyasının 2026–2027-ci tədris ili üçün fəaliyyət planının hazırlanması və növbəti tədris ilində struktur bölmələr üzrə monitorinqlərin keçirilmə ardıcıllığı müzakirə olunub.

Komissiyanın katibi, Keyfiyyət Təminatı Şöbəsinin müdiri Arzu Əsgərov fəaliyyət planının hazırlanmasının vacibliyini diqqətə çatdırıb, hər tədris semestrində ən azı bir iclasın keçirilməsinin və nəzərdə tutulan monitorinqlərin vaxtında həyata keçirilməsinin zəruriliyini qeyd edib.

İclas zamanı akkreditasiya üzrə verilmiş tövsiyələrin icrası, fəaliyyət planının hazırlanması və monitorinqlərin təşkili ilə bağlı fikir mübadiləsi aparılıb. Müzakirələrin yekununda monitorinqlərin ilkin mərhələdə şöbələrdən başlanılması, daha sonra isə kafedra və dekanlıqlarda planlı şəkildə həyata keçirilməsi qərara alınıb.