Azərbaycan Texnologiya Universitetində (ATU) rəhbər heyətin iştirakı ilə yeni ilin ilk iclası keçirilib. İclas çərçivəsində rəhbər heyətə yeni təyin olunan əməkdaşlar kollektivə təqdim edilib. Universitetin rektoru Yaşar Ömərov iqtisadi məsələlər üzrə müşavir İlham Vəliyevi, strateji inkişaf və rəqəmsallaşma üzrə müşavir Toğrul Sadıqovu və İnnovasiya Mərkəzinin direktoru Elnur Əhmədovu kollektivə təqdim edərək onlara gələcək fəaliyyətlərində uğurlar arzulayıb.

Yeni təyin olunan rəhbər əməkdaşlar universitetin fəaliyyətinə töhfə vermək, təhsil və elmi-tədqiqat sahəsində keyfiyyət göstəricilərinin artırılması üçün səylərini əsirgəməyəcəklərini qeyd ediblər.

İclas çərçivəsində həmçinin qış imtahan sessiyasının gedişi ətraflı müzakirə olunub, proses zamanı qarşıya çıxan məsələlər nəzərdən keçirilib. Rektor imtahanların şəffaf və qaydalara uyğun təşkili, tələbələrin bilik və bacarıqlarının obyektiv qiymətləndirilməsi ilə bağlı müvafiq tapşırıqlar verib.

Son 20 ildə Azərbaycanın su təhlükəsizliyi və su ehtiyatlarının idarə olunması sahəsində qazanılan nailiyyətlər ölkənin strateji inkişafının əsas istiqamətlərindən birini təşkil edir. Prezident İlham Əliyevin yanvarın 12-də Bakı şəhəri və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026−2035-ci illər üçün Dövlət Proqramına həsr olunan müşavirədəki çıxışı bu sahədəki uğurları və gələcək planları aydın şəkildə əks etdirir.

Prezident İlham Əliyev çıxışında qeyd edib: “Biz son 20 il ərzində dörd böyük su anbarı inşa etmişik və bu su anbarlarının potensialı 500 milyon kubmetrdən çoxdur. Onların arasında xüsusilə “Taxtakörpü”, “Şəmkirçay” su anbarlarını qeyd etməliyəm. Əgər bu su anbarları tikilməsəydi, bu gün həm Bakının su təchizatı, həm də qərb zonasının su təchizatı böyük problemlərlə üzləşə bilərdi. “Taxtakörpü” su anbarı bizə imkan verdi ki, Samur çayının sularını “Ceyranbatan” su anbarına yığaq və orada ehtiyat yaransın. O cümlədən “Ceyranbatan” su anbarı tamamilə yenidən qurulmuşdur, yeni, müasir təmizləyici qurğular kompleksi inşa edilmişdir”.

Bu sitatlar son 20 ildə həyata keçirilən siyasətin əsas nəticələrini vurğulayır. Prezidentin rəhbərliyi ilə su təchizatı və meliorasiya sahəsi daim prioritet olub – 2005-ci ildən başlayaraq su problemləri ən ali səviyyədə müzakirə edilir və həll yolları tapılır.

Dövlət başçısının qeyd etdiyi kimi, ümumi tutumu 500 milyon kubmetrdən artıq olan dörd böyük su anbarı tikilib. Bunlar əsasən içməli su təminatı və suvarma üçün strateji əhəmiyyət daşıyır.

“Taxtakörpü” su anbarı Samur-Abşeron suvarma sisteminin yenidən qurulması layihəsi çərçivəsində Şabran rayonu ərazisində inşa edilib. İnşasına 2007-ci ildə başlanılıb, açılış mərasimi Azərbaycan Respublikasının Prezidenti İlham Əliyev və xanımı Mehriban Əliyevanın iştirakı ilə 28 sentyabr 2013-cü ildə baş tutub. 8,71 kvadratkilometr sahəyə malik “Taxtakörpü” su anbarının ümumi su tutumu 270 milyon kubmetrdir. Gölün faydalı su həcmi 238,4 milyon kubmetrdir. Gil nüvəli torpaq bənd olan bu hidrotexniki qurğunun dibdən eni 754, hündürlüyü 142,5 metrdir. “Taxtakörpü” su anbarı Azərbaycanın ən hündür torpaq bəndli su anbarıdır. Bu da nəinki regionda, o cümlədən Avropada ən hündür torpaq bəndlərdən biridir. Buradakı qəza sutullayıcının uzunluğu 891, suqəbuledici qurğunun uzunluğu 43,6, enerji tunelinin uzunluğu isə 543 metrdir. Qapı şaxtası 56 metr dərinlikdədir.

Eyniadlı rayonda yerləşən “Şəmkirçay” su anbarının tutumu isə 164,5 milyon kubmetr, faydalı həcmi isə 156,3 milyon kubmetrdir. “Şəmkirçay” su anbarı bəndinin nüvə hissəsindən hündürlüyü 196 metrdir. Layihəyə əsasən orta illik su ehtiyatı 265,2 milyon kubmetr olan Şəmkirçay çayının sularını bu anbarda nizamlamaqla ildə 207,9 milyon kubmetr sudan istifadə olunur. 2014-cü ildə istismara verilən “Şəmkirçay” su anbarı regionların sosial-iqtisadi inkişafına olduqca vacib töhfədir və müstəqillik illərində reallaşdırılan ən mühüm layihələrdən biri kimi Azərbaycanın müasir tarixində mühüm yer tutur.

20 ildə tikilən və ya əsaslı yenidən qurulan iri su anbarlarıı sırasında ümumi su tutumu 20 milyon kubmetr, faydalı həcmi 18 milyon kubmetr olan “Tovuzçay” su anbarı  da yer alır. Bu layihə 2016-cə ildə istifadəyə verilməklə regionun su təminatını gücləndirib. Layihənin icrası zamanı Tovuzçay çayı üzərində 8 aşırımlı avtomobil körpüsü tikilib, bəndə və ətraf kəndlərə gedən, ümumi uzunluğu 6800 metr olan avtomobil yolu yenidən qurulub.

Cəlilabad rayonu ərazisində Göytəpəçay məcrasında yerləşən, tənəzzül dövründə tikintisi yarımçıq alan “Göytəpə” su anbarı bərpa və tikinti işləri aparıldıqdan sonra  2010-cu ildə istifadəyə verilib. Ümumi həcmi 3,7 milyon kubmetr, faydalı həcmi isə 3,3 milyon kubmetr olan bu su anbarının istifadəyə verilməsi ilə Cəlilabadda kənd təsərrüfatının inkişafı sürətlənib və uzun müddət suvarma suyundan korluq çəkən ərazilərin su ilə təmin edilməsinə imkan yaranıb.

2005-ci ildə Prezident İlham Əliyevin iştirakı ilə Naxçıvan Muxtar Respublikasında istifadəyə verilən “Heydər Əliyev” su anbarı 16 min hektardan artıq ərazini suvarma suyu ilə təmin etməklə yanaşı, həm də elektrik enerjisinə olan tələbatı qismən ödəyir. Qeyd edim ki, 100 milyon kubmetr su tutumu olan bu anbarın tikintisinə 1980-ci ildə ümummilli lideri Heydər Əliyevin təşəbbüsü ilə başlanmışdı. Lakin o, Moskvaya getdikdən sonra inşaat işləri yarımçıq qalmışdı. Heydər Əliyev yenidən siyasi hakimiyyətə qayıtdıqdan sonra bu nəhəng obyektin tikintisi bərpa olunmuşdu.

İşğaldan azad olunmuş torpaqlarda aparılan quruculuq işləri çərçivəsində su anbarlarının bərpası və tikintisi xüsusi yer tutur. Qarabağ və Şərqi Zəngəzurun azad olunmasından sonra işğal dövründə dağıdılmış və ya nəzarətdən çıxmış “Sərsəng”, “Suqovuşan”, “Xaçınçay”, “Köndələnçay”, “Zabuxçay” kimi su anbarları yenidən qurulub. Hazırda “Həkəriçay” və “Bərgüşadçay” su anbarlarının tikintisi davam etdirilir.

Prezident İlham Əliyevin su siyasəti uzunmüddətli və sistemli xarakter daşıyır. 2004-cü ildən başlayaraq içməli su proqramları qəbul olunub, ölkə üzrə su təminatı 40%-dən 73%-ə, Bakı və Abşeron üzrə 29%-dən 70%-ə çatdırılıb. Fasiləsiz su təminatı isə 95%-ə yüksəlmək üzrədir.

Bu siyasət nəticəsində Bakı və Abşeronun su təhlükəsizliyi təmin olunub.Qərb bölgəsi və digər rayonlar suvarma ilə təmin edilib. Azad edilmiş ərazilərdə su anbarlarının bərpası ilə Ermənistanın keçmiş su terroruna qarşı effektiv cavab verilib. Gələcək üçün 30-a yaxın yeni su anbarının tikintisi, magistral kanalların yenidən qurulması və Xəzər suyunun duzsuzlaşdırılması planlaşdırılır.

Azərbaycan su probleminə qarşı qlobal çağırışlara qarşı uğurlu model yaradıb. Prezidentin şəxsi nəzarəti və qətiyyəti sayəsində su təhlükəsizliyi ölkənin davamlı inkişafının ayrılmaz hissəsinə çevrilib ki, bu nailiyyətlər gələcək nəsillər üçün dayanıqlı su ehtiyatı vəd edir.

Xəyalə Məmmmədova

Azərbaycan Texnologiya Universitetinin Mətbuat xidmətinin rəhbəri

Azərbaycan Texnologiya Universitetində (ATU) iqtisadi məsələlər üzrə rektor müşaviri vəzifəsinə İlham Vəliyev təyin edilib.

İqtisad elmləri namizədi, dosent İlham Əli oğlu Vəliyev 9 oktyabr 1959-cu ildə Tovuz rayonunun Əlibəyli kəndində anadan olub. O, Azərbaycan Dövlət Pedaqoji Universitetinin riyaziyyat ixtisası üzrə məzunudur. Müxtəlif illərdə Sənaye Pedaqoji Texnikumunda, Azərbaycan Dövlət Pedaqoji Universitetində müəllim və laborant, Bakı İdarəetmə və Texnologiya Kollecində direktor müavini, Azərbaycan Kooperasiya Universitetində prorektor, Bakı Dövlət Sosial-İqtisadi Kollecinin və Şamaxı Dövlət Regional Kollecinin direktoru vəzifələrində çalışıb.

İlham Vəliyev Yeni Azərbaycan Partiyasının üzvüdür.

Azərbaycan Respublikasının Prezidenti cənab İlham Əliyev 8 yanvar 2026-cı ildə “Xızı-Abşeron” Külək Elektrik Stansiyasının açılış mərasimindəki çıxışında ölkəmizin güclü və cəlbedici investisiya iqliminə malik olduğunu xüsusi qeyd etdi. Dövlət başçısı vurğuladı ki, Azərbaycanın sabit inkişaf siyasəti, iqtisadi dayanıqlığı və əlverişli investisiya mühiti xarici şirkətlərin ölkəmizə marağını artırır. Ölkə başçısının çıxışından bu da məlum oldu ki, “Xızı-Abşeron” Külək Elektrik Stansiyası Azərbaycanın enerji siyasətində dönüş nöqtəsidir. Belə ki, 240 MVt gücə malik bu stansiya ölkənin enerji təhlükəsizliyini möhkəmləndirəcək, alternativ enerji mənbələrinin payını artıracaq və Azərbaycanın yaşıl inkişaf yolunda mühüm addım olacaq. Layihə Səudiyyə Ərəbistanının “ACWA Power” şirkəti ilə birgə həyata keçirilib. Bu əməkdaşlığı yüksək qiymətləndirən Prezident İlham Əliyev qeyd etdi ki, Azərbaycanın beynəlxalq tərəfdaşlığa açıq olması və xarici investorlar üçün etibarlı mühit yaratması ölkəmizin qlobal enerji bazarında mövqeyini daha da gücləndirəcək. Ölkəmizin yaşıl hidrogen istehsalı və ixracı üçün möhkəm baza formalaşdıran bu layihə regionun infrastruktur imkanlarını genişləndirməklə yeni iş yerlərinin yaradılmasına,  Xızı və Abşeron bölgələrində sosial-iqtisadi inkişafın sürətlənməsinə səbəb olacaq.

Azərbaycanın enerji siyasəti yalnız daxili tələbatı ödəmək deyil, həm də beynəlxalq bazarlara ekoloji təmiz enerji ixracını təmin etmək məqsədi daşıyır. Bu yanaşma ölkəmizin enerji strategiyasının əsas sütunlarından biridir. Azərbaycan uzun illərdir ki, neft və qaz ixracatçısı kimi tanınsa da, son illərdə yaşıl enerji sahəsində atılan addımlar ölkəmizi yeni bir mərhələyə çıxarır.

Hidrogenin Avropa və dünya bazarlarında artan tələbatı nəzərə alınarsa, bu stansiya Azərbaycanın ixrac imkanlarını genişləndirəcək və ölkəmizi regionda ekoloji təmiz enerji sahəsində lider mövqeyə yüksəldəcək.

Beynəlxalq bazarlara ekoloji təmiz enerji ixracı Azərbaycanın iqtisadiyyatını şaxələndirəcək, yeni gəlir mənbələri yaradacaq və ölkəmizin qlobal enerji xəritəsində rolunu daha da gücləndirəcək. Bu, həm də Azərbaycanın COP29 konfransında götürdüyü öhdəliklərin davamı olaraq, karbon emissiyalarının azaldılması və dayanıqlı inkişaf hədəflərinin reallaşdırılması üçün mühüm addımdır.

Beləliklə, Səudiyyə Ərəbistanının “ACWA Power” şirkəti ilə enerji siyasətində yeni mərhələyə qədəm qoyan ölkəmiz arasında reallaşdırılan bu layihə yalnız “Xızı-Abşeron” Külək Elektrik Stansiyası ilə məhdudlaşmır, həm də Azərbaycanın gələcək enerji strategiyasının simvolu kimi çıxış edir. Daxili tələbatın ödənilməsi ilə yanaşı, beynəlxalq bazarlara ekoloji təmiz enerji ixracını təmin etməyin başlanğıcı olan bu layihə yaşıl inkişaf yolunda irəliləyişimizi daha da sürətləndirir. 

Layihənin həyata keçirilməsinin əsas strateji əhəmiyyəti ondan ibarətdir ki, o, Azərbaycanın enerji siyasətində dönüş nöqtəsi olmaqla yanaşı, ölkəmizin beynəlxalq öhdəliklərinin icrasına da mühüm töhfə verir. Buraya neft və qazla yanaşı günəş və külək enerjisi balansını təmin edən enerji şaxələndirilməsi, Azərbaycanın yaşıl hidrogen istehsalı və ixracı üçün günəş enerjisinin mühüm baza rolunu oynadığı ixrac imkanları, xarici sərmayələrin cəlb edilməsi ilə ölkəmizin iqtisadiyyatında sabitliyin möhkəmlənməsi, külək stansiyalarının enerji balansında alternativ mənbələrin payını artırmaqla enerji müstəqilliyinə verdiyi töhfə, yeni iş yerlərinin açılması və sosial-iqtisadi inkişafın gücləndiyi regional inkişaf daxildir.

Nəticə etibarilə, Azərbaycanın yaşıl enerji strategiyasının mühüm göstəricisi olan bu layihə ölkənin enerji balansında alternativ mənbələrin payını artıraraq ekoloji təmiz istehsalın genişlənməsinə şərait yaradır. Bu, karbon emissiyalarının azalmasına xidmət etməklə yanaşı, dayanıqlı inkişaf hədəflərinin reallaşmasına da mühüm töhfə verir. Sabitlik, inkişaf və beynəlxalq əməkdaşlıq prinsiplərinə əsaslanan, güclü investisiya iqliminə malik olan Azərbaycan bu layihə ilə enerji potensialını daha da gücləndirir və beynəlxalq investorların etimadını bir daha təsdiqləyir.

Azərbaycan Texnologiya Unuiversitetinin

İctimai elmlər və multikulturalizm kafedrasının baş müəllimi

Zəminə Novruzova

Azərbaycan Texnologiya Universiteti (ATU) beynəlxalq elmi reytinq platforması “AD Scientific Index” tərəfindən açıqlanan 2024–2026-cı illər üzrə proqnoz göstəricilərinə əsasən mövqeyini əhəmiyyətli dərəcədə gücləndirib. Universitet Azərbaycan üzrə ali təhsil müəssisələrinin reytinqində ən sürətlə yüksələn universitetlərdən biri kimi ölkə miqyasında lider mövqeyə doğru irəlilədiyini təsdiqləyib.

Reytinq nəticələrinə əsasən, ATU xüsusilə elmi məhsuldarlıq və sitatlanma göstəriciləri üzrə mühüm nailiyyətlər əldə edib və son beş ilin nəticələrinə görə ölkənin aparıcı universitetləri sırasında yer alıb.

Belə ki, son 5 ilin H-indeksi üzrə Azərbaycan Texnologiya Universiteti 2024-cü ildə 11-ci yerdə qərarlaşdığı halda, 2026-cı ildə 2-ci yerə yüksəlib. Eyni zamanda, son 5 ilin “i10” indeksi üzrə universitet 2024-cü ildə 9-cu yerdən 2026-cı ildə 2-ci yerə yüksəlməklə əhəmiyyətli irəliləyiş nümayiş etdirib. Bu göstəricilər ATU-da elmi fəaliyyətin keyfiyyətcə yeni mərhələyə qədəm qoyduğunu və universitetdə tədqiqat əsaslı inkişaf modelinin uğurla tətbiq edildiyini aydın şəkildə ortaya qoyur.

Əldə olunan müsbət dinamika əsasında Azərbaycan Texnologiya Universiteti yaxın illərdə ölkənin aparıcı tədqiqat universitetlərindən birinə çevrilməyi və beynəlxalq elmi rəqabətdə mövqeyini daha da möhkəmləndirməyi qarşısına məqsəd qoyur.

Qeyd edək ki, “AD Scientific Index” reytinqi universitetlərin elmi fəaliyyətini obyektiv və ölçülə bilən göstəricilər əsasında qiymətləndirir. Reytinqin hesablanmasında “Google Scholar” məlumat bazasına əsaslanan üç əsas indikator – H-indeks, “i10”-indeks və ümumi sitat sayı nəzərə alınır. Göstəricilər həm universitetin ümumi elmi fəaliyyətini, həm də son beş ilin elmi məhsuldarlığını ayrıca əhatə edir.

     Müasir dünyada dövlətlərin gücü təkcə iqtisadi resursları və hərbi potensialı ilə deyil, eyni zamanda elm, təhsil və milli-mənəvi dəyərlərə verdiyi önəmlə ölçülür. Azərbaycan Respublikasının Prezidenti cənab İlham Əliyevin yanvarın 5-də yerli televiziya kanallarına verdiyi geniş müsahibə ölkəmizin qarşıdakı inkişaf strategiyasının əsas istiqamətlərini bir daha təsdiqlədi. Bu müsahibədə dövlət başçısı iqtisadi, siyasi və sosial sahələrlə yanaşı, ölkəmizin gələcəyi üçün həyati əhəmiyyət daşıyan elm və təhsil sahəsində gedən islahatlar və Azərbaycan dilinin qorunması məsələləri barədə də geniş fikir bildirdi.

    Cənab Prezidentin dəfələrlə vurğuladığı kimi, Azərbaycanın dayanıqlı və uzunmüddətli inkişafı məhz bu sahələrin harmonik şəkildə inkişafından asılıdır. Xüsusilə elm və təhsilin müasirləşdirilməsi ilə yanaşı, Azərbaycan dilinin qorunması və inkişaf etdirilməsi dövlət siyasətinin əsas istiqamətlərindən biri kimi diqqət mərkəzində saxlanılır. Prezidentin bu müsahibəsi yalnız cari dövrün məsələlərini şərh etməklə məhdudlaşmır – Azərbaycanın gələcəyinə strategiya baxışı təqdim edir. Bu baxışda elm, təhsil və ana dilinin qorunması üç ən vacib sütun kimi önə çıxır.

      Müsahibədə cənab Prezident qeyd etdi ki, ölkədə elm və təhsil sahəsində struktur islahatları aparılır və bu iki sahənin daha da inteqrasiya olunması vacibdir. Dövlət siyasətində elm və təhsilin ayrılmaz hissə olması yalnız təcrübi biliklərin deyil, mütəxəssis kadrların hazırlanması sisteminin yenidən qurulması deməkdir.  Müasir  dünyada rəqabətə davamlı olmaq üçün yüksək ixtisaslı kadrların hazırlanması, elmi araşdırmaların stimullaşdırılması və innovativ düşüncənin formalaşdırılması zəruridir. Bu baxımdan son illərdə Azərbaycanda təhsil infrastrukturunun yenilənməsi, məktəblərin və ali təhsil müəssisələrinin maddi-texniki bazasının gücləndirilməsi, beynəlxalq təcrübənin öyrənilməsi və tətbiqi istiqamətində mühüm addımlar atılmışdır.

      Prezident bildirdi ki, inkişaf etmiş ölkələrdə elm və təhsil bir yerdə vəhdət təşkil edir, bunun nəticəsində yüksək texnologiyalı sənayelər, innovativ startaplar və rəqabətqabiliyyətli iqtisadiyyat yaranır. Biz də bu modeli Azərbaycan üçün seçmişik. Bu isə yalnız məktəblərdə və universitetlərdə  yaxşı təhsil almaq deyil, eyni zamanda elmi tədqiqatların gücləndirilməsi ilə milli potensialın artırılması deməkdir. Prezident müsahibəsində bildirdi ki, elmi-tədqiqat institutları modernləşdirilir və bir-biri ilə əlaqələndirilir daha müasir və dinamik kadrlar önə çəkilir. Bu, yalnız idarəetmə strukturunun dəyişməsi deyil, həm də elm və təhsilə investisiyaların artırılması ilə  nəticələnməlidir.

Paralel olaraq, Cənab Prezidentin dəfələrlə vurğuladığı kimi, təhsil yalnız bilik ötürülməsi deyil, həm də vətənpərvər, milli kimliyinə bağlı, dünyagörüşü geniş gənclərin formalaşdırılması prosesidir. Elmə əsaslanan iqtisadiyyatın qurulması, rəqəmsal texnologiyaların tətbiqi, süni intellekt və innovasiya sahələrində irəliləyiş məhz savadlı və hazırlıqlı gənclərin hesabına mümkün ola bilər.

      Cənab Prezident müsahibəsində bildirdiyi kimi, yalnız təhsilin miqdarı ilə deyil, təhsilin keyfiyyəti ilə də maraqlanmalıyıq. Bu özünü müəllim hazırlığında, dərsliklərin səviyyəsində, təhsil sisteminin beynəlxalq standartlara uyğunlaşdırılmasında göstərməlidir. Belə bir yanaşma ölkənin gələcək nəslinin rəqabətə davamlı olmasını təmin edəcək və hər bir gəncin yalnız bilikli deyil, həm də düşünən, tənqidi analiz qabiliyyətinə malik bir şəxs kimi yetişməsinə şərait yaradacaq.

      Elmin inkişafı beynəlxalq əməkdaşlıq tələb etsə də, bu proses milli maraqlara uyğun şəkildə həyata keçirilməlidir. Prezidentin müsahibələrində qeyd edildiyi kimi, Azərbaycan alimləri dünya elmi məkanına inteqrasiya etməli, lakin eyni zamanda ölkənin prioritet problemlərinin həllinə yönəlmiş tədqiqatlara üstünlük verməlidirlər. Enerji təhlükəsizliyi, ekologiya, kənd təsərrüfatı, informasiya texnologiyaları və humanitar elmlər bu baxımdan xüsusi əhəmiyyət kəsb edir.

     Humanitar elmlərin, xüsusilə dilçilik, tarix və ədəbiyyat sahələrinin inkişafı milli kimliyin qorunmasında mühüm rol oynayır. Bu sahələrdə aparılan elmi tədqiqatlar xalqın keçmişini, mədəniyyətini və mənəvi dəyərlərini gələcək nəsillərə ötürmək baxımından əvəzsizdir.

      Dil məsələsinə də toxunan Cənab Prezident bildirdi ki, Azərbaycan dilinin qorunması – milli varlığımızın əsasıdır. Ana dili hər bir xalqın milli varlığının, mədəni irsinin və mənəvi dəyərlərinin daşıyıcısıdır. Dilini itirən xalq öz kimliyini də itirmək təhlükəsi ilə üz-üzə qalır. Buna görə də Azərbaycan dilinin saflığının qorunması, onun dövlət idarəçiliyində, təhsildə, elmdə və kütləvi informasiya vasitələrində düzgün və səlis şəkildə işlədilməsi son dərəcə vacibdir. Qloballaşma və xarici dillərin təsirinin artdığı bir dövrdə ana dilinə biganə yanaşma yolverilməzdir. Xarici dillərin öyrənilməsi zəruridir, lakin bu, ana dilinin hesabına olmamalıdır. Gənclər bir neçə dil bilməli, lakin hər şeydən əvvəl Azərbaycan dilində düzgün danışmalı, yazmalı və düşünməlidirlər.

      Cənab Prezident qeyd etdi ki, əgər bir xalq öz dilini qoruyub saxlayıbsa və bunu nəsillər boyu edibdirsə, bu – böyük nailiyyətdir. Ancaq bugünkü  dünyada ana dili qorumaq yalnız keçmişin irsini yaşatmaq deyil, həm də gələcəyə toxunmaqdır.

      Nəticə etibarilə, cənab Prezidentin mətbuata verdiyi müsahibələrdə səsləndirdiyi fikirlər göstərir ki, elm, təhsil və Azərbaycan dilinin qorunması bir-biri ilə sıx bağlı olan strateji istiqamətlərdir. Güclü dövlət qurmaq üçün savadlı gənclər, inkişaf etmiş elm və möhkəm milli-mənəvi dəyərlər zəruridir. Azərbaycan dili isə bu dəyərlərin mərkəzində dayanır. Hər bir vətəndaş, xüsusilə gənclər ana dilinə hörmət etməli, onu qorumalı və inkişaf etdirməlidir. Çünki dilimizi qorumaq – tariximizi, mədəniyyətimizi və gələcəyimizi qorumaq deməkdir.

      Cənab Prezidentin yanvarın 5-də verdiyi müsahibə bir daha təsdiqlədi ki, Azərbaycan üçün elm, təhsil və ana dilinin qorunması yalnız ayrı-ayrı sahələr deyil, milli inkişaf strategiyasının üç əsas sütunudur. Bu üç istiqamət birlikdə Azərbaycan üçün dayanıqlı və güclü gələcəyin təminatıdır.

Azərbaycan Texnologiya Universiteti

sosial məsələlər və ictimaiyyətlə əlaqələr üzrə prorektor

Şahmar Umud oğlu Həsənov