Azərbaycan Texnologiya Universitetinin rektoru Yaşar Ömərov və universitetin bir qrup əməkdaşı Dünya Azərbaycanlılarının Həmrəyliyi Günü və Yeni il münasibətilə Gəncə şəhərində yerləşən Uşaq evini ziyarət ediblər.
Ziyarət çərçivəsində ATU-nun Bədii Yaradıcılıq Mərkəzinin üzvü olan tələbələr tərəfindən hazırlanmış konsert proqramı təqdim olunub.
Tədbir zamanı uşaqlar üçün müxtəlif musiqi alətlərində mahnı nömrələri səsləndirilib, nəğmələr ifa edilib. Proqram Uşaq evinin sakinləri tərəfindən maraqla qarşılanıb.
Tədbir çərçivəsində Uşaq evinin sakinlərinə müxtəlif hədiyyələr verilib, bayram ovqatı yaradılıb. Görüş qarşılıqlı xoş təəssüratlarla yadda qalıb.
Dünya azərbaycanlılarının Həmrəyliyi Günü Azərbaycan xalqının milli özünüdərkinin, azadlıq ideallarının və dövlətçilik düşüncəsinin təcəssümüdür. Bu tarix təsadüfi seçilməmiş, xalqımızın taleyində baş vermiş mürəkkəb və ziddiyyətli proseslərin məntiqi yekunu kimi formalaşmışdır. XX əsrin sonlarında milli azadlıq hərəkatının yüksəlişi, sovet imperiyasının dağılması və Azərbaycanın müstəqilliyə qovuşması dünya azərbaycanlılarının birliyi ideyasını real tarixi zərurətə çevirmişdir.
1989-cu il dekabrın 31-də Araz çayı boyunca sərhəd məftillərinin sökülməsi Azərbaycan xalqının bölünmüş taleyinə qarşı etirazın, milli birliyin və azadlıq arzusunun simvoluna çevrildi. Məhz bu hadisələr fonunda Dünya azərbaycanlılarının həmrəyliyi ideyası formalaşaraq ümummilli məzmun aldı. 1991-ci ildən etibarən bu gün dövlət səviyyəsində qeyd olunmağa başlandı və xalqın yaddaşında milli birlik günü kimi möhkəmləndi.
Bu tarixin ideoloji-siyasi məzmununun formalaşmasında və onun dövlətçilik konsepsiyasına çevrilməsində Ümummilli Lider Heydər Əliyevin rolu müstəsnadır. Heydər Əliyev həmrəyliyi yalnız emosional çağırış kimi deyil, uzunmüddətli strateji xətt, milli inkişafın əsas dayaqlarından biri kimi qiymətləndirirdi. Onun siyasi baxışlarında dünya azərbaycanlılarının birliyi müstəqil Azərbaycan dövlətinin güclənməsi, beynəlxalq mövqelərinin möhkəmlənməsi və milli maraqların qorunması ilə üzvi şəkildə bağlı idi.
Ulu Öndərin təşəbbüsü ilə dünya azərbaycanlılarının təşkilatlanması prosesi sürətləndi, diaspor fəaliyyətinə sistemli yanaşma formalaşdı. 2001-ci ildə Bakıda keçirilən Dünya Azərbaycanlılarının I Qurultayı bu istiqamətdə dönüş nöqtəsi oldu. Qurultayda Heydər Əliyevin səsləndirdiyi fikirlər azərbaycançılıq ideologiyasının əsasını təşkil etdi və milli birliyin ideoloji platformasını müəyyənləşdirdi. O, açıq şəkildə bəyan edirdi ki, harada yaşamasından asılı olmayaraq, hər bir azərbaycanlının arxasında güclü, müstəqil Azərbaycan dövləti dayanmalıdır.
Heydər Əliyevin konsepsiyasına görə, dünya azərbaycanlılarının həmrəyliyi milli kimliyin qorunması, ana dilinin yaşadılması, milli-mənəvi dəyərlərin gələcək nəsillərə ötürülməsi və Azərbaycanın haqq səsinin beynəlxalq aləmdə eşidilməsi üçün əsas vasitələrdən biridir. Bu baxış həm tarixi yaddaşa, həm də müasir qlobal çağırışlara əsaslanırdı. O, yaxşı anlayırdı ki, qloballaşma şəraitində milli varlığın qorunması yalnız güclü dövlət və təşkilatlanmış diaspora ilə mümkündür.
Bu gün Dünya Azərbaycanlılarının Həmrəyliyi Günü artıq təkcə keçmişin xatirəsi deyil, gələcəyə yönəlmiş milli ideyadır. Milyonlarla soydaşımız dünyanın müxtəlif ölkələrində yaşasa da, onları birləşdirən ortaq dəyər Azərbaycan dövlətçiliyinə bağlılıqdır. Bu birliyin ideoloji təməli isə məhz Heydər Əliyev tərəfindən formalaşdırılmış azərbaycançılıq məfkurəsidir.
Müasir Azərbaycan dövləti Ulu Öndərin müəyyənləşdirdiyi bu strateji xətti uğurla davam etdirir. Dünya azərbaycanlılarının həmrəyliyi bu gün dövlət siyasətinin mühüm istiqamətlərindən biri olaraq milli maraqların müdafiəsində, informasiya mübarizəsində və beynəlxalq münasibətlər sistemində Azərbaycanın mövqelərinin gücləndirilməsində əhəmiyyətli rol oynayır.
Dünya azərbaycanlılarının Həmrəyliyi Günü Azərbaycan xalqının tarixi yaddaşını, milli iradəsini və gələcəyə olan inamını ifadə edən əlamətdar gündür. Bu günün dövlət bayramına çevrilməsi isə Heydər Əliyevin uzaqgörən siyasi iradəsinin, milli ideyaya verdiyi böyük dəyərin və Azərbaycan dövlətçiliyinə sədaqətinin parlaq təzahürüdür.
Gülnarə İmamverdiyeva
Azərbaycan Texnologiya Universitetinin
Mətbuat xidmətinin multimedia üzrə mütəxəssisi
Azərbaycan Texnologiya Universitetinin təşkilatçılığı ilə Dünya Azərbaycanlılarının Həmrəyliyi Gününə həsr olunmuş ali təhsil müəssisələri arasında minifutbol birinciliyi keçirilib.
Tədbirin açılış mərasimində Azərbaycan Texnologiya Universitetinin rektoru Yaşar Ömərov və Azərbaycan Dövlət Aqrar Universitetinin rektoru Zəfər Qurbanov çıxış edərək komandalara uğurlar arzu ediblər.
Oyunlara Heydər Əliyev Park Kompleksində yerləşən AzFar futbol meydançası ev sahibliyi edib. Yarışda Azərbaycan Texnologiya Universitetinin (ATU), Azərbaycan Dövlət Aqrar Universitetinin (ADAU), Gəncə Dövlət Universitetinin (GDU) və Mingəçevir Dövlət Universitetinin (MDU) komandaları təmsil olunub.
Püşkatma ilə ilk oyunda ATU-ADAU (7:6) və GDU-MDU (5:1) qarşılaşması baş tutub.
Üçüncü yer uğrunda mübarizədə ADAU 5:1 hesabı ilə qalib gəlib.
Final oyununda ATU və GDU komandaları gərgin mübarizə aparıb və oyun GDU-nun qələbəsi ilə yekunlaşıb (4:1).
Beləliklə, ali təhsil müəssisələri arasında baş tutan minifutbol birinciliyində I yeri GDU, II yeri ATU, III yeri isə ADAU komandası tutub.
Qalib komandalar kubok və medallarla təltif edilib.
Azərbaycan Texnologiya Universitetində (ATU) professor-müəllim heyətinin 2025-ci il üzrə elmi-pedaqoji fəaliyyətinin yekun qiymətləndirilməsinin nəticələri açıqlanıb. Elmi Şuranın bu gün keçirilən iclasında ənənəvi olaraq “İlin alimi”, “İlin kafedrası” və “İlin fakültəsi” nominasiyaları üzrə qaliblər elan olunub.
Elm və innovasiya məsələləri üzrə prorektor Sahil Həmidovun təqdim etdiyi hesabat əsasında “İlin alimi” nominasiyasına professor Əhəd Nəbiyev, “İlin kafedrası” nominasiyasına Qida mühəndisliyi və ekspertiza kafedrası, “İlin fakültəsi” nominasiyasına isə Qida mühəndisliyi fakültəsi layiq görülüb.
Mükafatlar universitetin rektoru, Elmi Şura sədri Yaşar Ömərov tərəfindən təqdim edilib. “İlin alimi” və “İlin kafedrası” nominasiyaları üzrə mükafatlar Qida mühəndisliyi və ekspertiza kafedrasının müdiri, professor Əhəd Nəbiyevə, “İlin fakültəsi” nominasiyası isə Qida mühəndisliyi fakültəsinin dekanı Mehman İsmayılova təqdim olunub.
İclas çərçivəsində rektor Azərbaycan Respublikasının Prezidenti yanında Ali Attestasiya Komissiyası tərəfindən dosent elmi adına layiq görülən əməkdaş Minurə Kərimovanı, eləcə də fəlsəfə doktoru elmi dərəcəsi verilən əməkdaşlar Razil Mirzəyev və Afaq Bağırzadəni təbrik edib.
Elmi Şuranın iclasında sosial məsələlər və ictimaiyyətlə əlaqələr üzrə prorektor Şahmar Həsənovun, Avtomatika, telekommunikasiya və informatika fakültəsinin dekanı Rövşən Hacıyevin və Tələbə Gənclər Təşkilatının sədri Həsən Hüseynovun hesabatları dinlənilib, həmçinin, 2026-cı ildə keçiriləcək elmi konfranslar və ştat cədvəlində dəyişikliklə bağlı məsələlər müzakirə olunaraq müvafiq qərarlar qəbul edilib.
Azərbaycan Texnologiya Universitetində (ATU )qış imtahan sessiyasına hazırlıqla bağlı iclas keçirilib. İclasda akademik və inzibati rəhbər heyət iştirak edib.
İclasda rektor Yaşar Ömərov Elm və Təhsil Nazirliyinin müvafiq əmrinə əsasən İmtahan Qərargahı və Apellyasiya Komissiyasının yaradıldığını bildirib, imtahan sessiyasının şəffaf keçirilməsi və tələbələrin biliyinin obyektiv qiymətləndirilməsi üçün fakültə rəhbərlərinə və kafedra müdirlərinə müvafiq tapşırıqlar verib.
İclasda həmçinin imtahan zallarının, kompüter otaqlarının, müşahidə kameralarının tam hazır vəziyyətə gətirilməsi və s. məsələlərlə bağlı tapşırıqlar verilib.
Azərbaycanın suveren dövlət kimi mövcudluğu yalnız beynəlxalq hüquqi sənədlərlə deyil, həm də xalqımızın qəhrəmanlıq mübarizəsi ilə təmin edilmişdir. Xüsusən 1990-cı illərin əvvəllərində Ermənistanın hərbi təcavüzü nəticəsində ölkəmizin beynəlxalq səviyyədə tanınmış ərazilərinin işğalı, bir milyondan artıq soydaşımızın məcburi köçkünə çevrilməsi, şəhər və kəndlərimizin dağıdılması, Xocalı soyqırımı kimi insanlığa qarşı cinayətlər Azərbaycan xalqının iradəsini ciddi sınağa çəkdi. Lakin bütün bu faciələrə baxmayaraq, Azərbaycan suveren dövlət olaraq mövcudluğunu qorudu və ərazi bütövlüyünün bərpası uğrunda mübarizəsini ardıcıl şəkildə davam etdirdi.
İkinci Qarabağ müharibəsində qazanılan tarixi Zəfər Azərbaycan suverenliyini daha da möhkəmləndirdi və müstəqilliyimizin dönməzliyini bütün dünyaya nümayiş etdirdi. 2023-cü il aprelin 23-də Azərbaycan hakimiyyəti mühüm addım ataraq Laçın–Xankəndi yolunun başlanğıcında nəzarət-buraxılış məntəqəsi yaratdı. Bu addım ölkəmizin suveren hakimiyyətinin bərpasında strateji mərhələ oldu. Azərbaycan Ordusu 2023-cü il sentyabrın 19-da Qarabağ iqtisadi rayonunda separatçıların təxribatlarına cavab olaraq lokal antiterror tədbirləri həyata keçirdi. Cəmi 23 saat 43 dəqiqə davam edən bu əməliyyat nəticəsində Ermənistan silahlı qüvvələrinin qalıqları ərazilərimizdən çıxarıldı, qanunsuz silahlı birləşmələr tərk-silah edildi, qondarma rejim özünü buraxdığını elan etdi.
Beləliklə, Azərbaycanın bütün əraziləri üzərində dövlət suverenliyi tam bərpa olundu. Bu hadisə yalnız hərbi-siyasi deyil, həm də tarixi və mənəvi baxımdan dövlətçiliyimizin möhkəmlənməsində yeni mərhələnin başlanğıcı oldu. Müzəffər Ali Baş Komandan İlham Əliyev 2023-cü il oktyabrın 15-də Xankəndi, Xocalı, Xocavənd və Ağdərə şəhərlərində Azərbaycan Respublikasının üçrəngli, ay-ulduzlu Dövlət Bayrağını ucaltmaqla suverenliyimizin legitimliyini rəsmiləşdirdi. Bununla da hakimiyyətin aliliyi və nəzarət funksiyası respublikamızın bütün ərazisində tam bərpa edildi, inzibati-coğrafi vahidlərimiz bütövləşdirildi.
2024-cü il sentyabrın 19-da Prezident İlham Əliyevin imzaladığı Sərəncamla hər il 20 sentyabr tarixinin Dövlət Suverenliyi Günü kimi qeyd olunması təsis edildi. Bu günün müəyyənləşdirilməsi 1991-ci ildə müstəqilliyin bərpası ilə başlanan tarixi yolun məntiqi nəticəsi, ərazi bütövlüyü və dövlət suverenliyi uğrunda uzun illər aparılan mübarizəmizin kulminasiyasıdır. 2025-ci ildə Azərbaycan xalqı bu əlamətdar günü ilk dəfə rəsmi şəkildə qeyd etdi. Bu hadisə yalnız dövlətçilik tariximiz üçün deyil, eyni zamanda milli kimliyimizin möhkəmləndirilməsi baxımından da böyük əhəmiyyət daşıyır.
2025-ci il ölkəmizdə “Konstitusiya və Suverenlik İli” elan edilmişdir. Konstitusiya və suverenlik anlayışlarının birgə vurğulanması Azərbaycanın müstəqil dövlət kimi dünya birliyində mövqelərinin daha da gücləndirilməsinə xidmət edir. Konstitusiya suverenliyin hüquqi əsasını təşkil edir, suverenlik isə Konstitusiyanın qoruduğu və təsbit etdiyi ali dəyərdir. Suverenlik dövlətin öz ərazisində müstəqil qərarlar qəbul etmək, daxili və xarici siyasətini sərbəst şəkildə müəyyənləşdirmək və digər dövlətlərin təsirindən azad olmaq hüququdur. Dövlət Suverenliyi Günü xalqımızın keçdiyi çətin, lakin şərəfli mübarizə yolunun xatırladılması və bu tarixi yaddaşın gələcək nəsillərə ötürülməsi baxımından mühüm əhəmiyyət kəsb edir.
Zirəddin Cavadlı
Azərbaycan Texnologiya Universitetinin
“Texnoloq” qəzetinin redaktoru
