Tədbirlər
Universitetimizdə ən son xəbərləri buradan əldə edin.

ATU-da Milli Qurtuluş Gününə həsr olunmuş tədbir keçirilib

Azərbaycan Texnologiya Universitetində (ATU) 15 iyun Milli Qurtuluş Gününə həsr olunmuş tədbir keçirilib

Əvvəlcə Dövlət Himni səsləndirilib. Daha sonra Ulu Öndər Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Ardınca Azərbaycan Milli Qurtuluş Gününə həsr edilmiş videoçarx nümayiş etdirilib.

Giriş sözü ilə Azərbaycan Texnologiya Universitetinin rektoru v.m.i.e dos. Yaşar Ömərov çıxış edib. Milli Qurtuluş Gününün tarixinə nəzər salaraq bildirib ki, Ümummilli Lider Heydər Əliyev Azərbaycanı real təhlükələrdən xilas etməklə yanaşı, gələcək inkişaf strategiyasını müəyyənləşdirib və bu siyasi kursu Prezident İlham Əliyev uğurla davam etdirib.

Daha sonra tədbirdə iştirak edən Elm və Təhsil Nazirliyinin Elm və ali təhsil siyasəti şöbəsinin müdiri Turxan Süleyman çıxış edib. Tədbir iştirakçılarını Milli Qurtuluş Günü münasibətilə təbrik edib, ölkəmizin müasir inkişafında qurtuluş tarixinin rolundan danışıb. 

Sonra İnsan resursları şöbəsinin müdiri t.f.d. İlham Əlizadə, İctimai elmlər və multikulturalizm kafedrasının dosenti Hüseyn Budaqov çıxış edib. Milli qurtuluş ideologiyasının müstəqil respublikamızın davamlı inkişafındakı rolundan, Ulu Öndər Heydər Əliyevin hakimiyyətə qayıdışından sonra ölkədə baş vermiş sosial-iqtisadi və siyasi inkişafdan bəhs ediblər. 

Sonda 1-ci kurs tələbəsi Turanə Bədəlova Milli Qurtuluş Gününə həsr edilmiş şeir səsləndirib.

Azərbaycan Texnologiya Universitetində Müstəqillik Günü qeyd edilib

Azərbaycan Texnologiya Universitetində (ATU) 28 May - Müstəqillik Gününə həsr olunmuş tədbir keçirilib. Tədbirdə Azərbaycan Respublikasının Dövlət Himni səsləndirilib. Daha sonra Ulu Öndər Heydər Əliyevin və Azərbaycanın müstəqilliyi, ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edilib. Ardınca "Cümhuriyyətin tarixinə nəzər" adlı qısametrajlı film nümayiş etdirilib.
 
Sonra ATU-nun rektoru v.m.i.e. dosent Yaşar Ömərov giriş sözü ilə çıxış edib. Bildirib ki, Azərbaycan Xalq Cümhuriyyəti cəmi 23 ay fəaliyyət göstərməsinə baxmayaraq, ilk respublika dövründə həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsində böyük əhəmiyyət kəsb edib. Y.Ömərov XX əsrin sonlarında yenidən müstəqilliyinə qovuşan Azərbaycanı parçalanmaqdan məhz Ümummilli Lider Heydər Əliyevin xilas etdiyini, Ulu Öndər siyasi kursunun davamçısı Prezident İlham Əliyevin müasir dünyaya səs salan Zəfər salnaməsi ilə Azərbaycanın öz müqəddəratını təyin etməyə qadir olduğunu bir daha sübut etdiyini vurğulayıb. 

Daha sonra ATU-nun sosial məsələlər və ictimaiyyətlə əlaqələr üzrə prorektoru Şahmar Həsənov çıxış edərək Azərbaycan xalqının müstəqillik uğrunda apardığı mübarizələrdən bəhs edib,  istiqlal ideyası uğrunda atılan addımların bu gün Azərbaycanı gələcəyə doğru inamla irəliyə aparan yol olduğunu qeyd edib.

Tədbirdə tələbələrin ifasında şeir və musiqi nömrələri səsləndirilib. Sonda ATU əməkdaşlarının və qazi tələbələrinin iştirakı ilə 28 May Müstəqilik Gününə həsr edilmiş videoçarx nümayiş etdirilib.

31 Mart Azərbaycanlıların Soyqırımı Gününə həsr edilmiş tədbir keçirilib

Azərbaycan Texnologiya Universitetində 31 Mart Azərbaycanlıların Soyqırımı Gününə həsr edilmiş tədbir keçirilib.
Azərbaycan Respublikasının Dövlət Himninin səsləndirilməsilə açıq elan olunan tədbirdə soyqırımı qurbanlarının və Vətən uğrunda canından keçən şəhidlərin xatirəsi bir dəqiqəlik sükutla yad edilib.
Tədbirdə giriş sözü ilə universitetin sosial məsələlər və ictimaiyyətlə əlaqələr üzrə prorektoru Şahmar Həsənov çıxış edərək bildirib ki, martın 31-i Azərbaycan tarixində unudulmayan, qan yaddaşımızdan silinməyən izlər buraxıb. Soyqırım ən ağır beynəlxalq cinayət, sülh, insanlıq əleyhinə yönəlmiş terrordur.
Tədbirdə İctimai elmlər və multikulturalizm kafedrasının əməkdaşları Zəminə Novruzova “Mart soyqırımları ədəbiyyatda”, Mehriban Tağıyeva “Tarixin yaddaşından silinməyən soyqırım”, Mətanət Mustafayeva “Mart soyqırımları dövrün milli mətbuat səhifələrində”, Qida mühəndisliyi fakültəsinin IV kurs tələbəsi Namiq Muradov "Soyqırımı gənclərin yaddaşında" başlıqlı məruzələrlə çıxış ediblər.
Müəllim və tələbələrin çıxışlarında 1918-ci ilin 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak erməni silahlı dəstələrinin azərbaycanlıları kütləvi şəkildə vəhşicəsinə qətlə yetirməsindən, nəticədə 12 minə yaxın azərbaycanlının amansızcasına öldürülməsindən, on minlərlə insanın itkin düşməsindən danışılıb. Qeyd olunub ki, Ulu Öndər Heydər Əliyev 1998-ci ildə 31 mart tarixinin Azərbaycanlıların Soyqırımı Günü kimi qeyd olunması barədə Sərəncam imzalayıb. Nitqlərdə Azərbaycanlılara qarşı törədilmiş soyqırımlarla bağlı tarixi həqiqətlərin dünya ictimaiyyətinə çatdırılması istiqamətində ölkə başçısı Prezident İlham Əliyevin həyata keçirdiyi hücum diplomatiyası xəttinin əhəmiyyəti vurğulanıb.
Tədbirin sonunda 31 mart soyqırımına həsr edilmiş videoçarx nümayiş etdirilib.


Azərbaycan Texnologiya Universitetində Dünya Ekoloji Təhsil Gününə həsr edilmiş dəyirmi masa təşkil edilib

"Yaşıl dünya naminə həmrəylik ili" çərçivəsində baş tutan tədbirdə Göygöl Milli Parkının, 10 saylı Regional Ekologiya və Təbii Sərvətlər İdarəsinin nümayəndələri, Ətraf mühitin mühafizəsi kafedrasının əməkdaşları və ekologiya, ekologiya mühəndisliyi ixtisaslarının tələbələri iştirak edib.
 
Tədbirdə Azərbaycan Texnologiya Universitetinin sosial məsələlər və ictimaiyyətlə əlaqələr üzrə rektor müşaviri Şahmar Həsənov bildirib ki, bu günün qeyd edilməsində əsas məqsəd ictimai diqqəti ətraf mühit problemlərinə, onların həllinə yönəltməkdə və gələcəkdə mümkün fəsadların qarşısını almaqda ekoloji təhsilin və bu istiqamətdə maarifləndirmənin vacibliyini vurğulamaqdır.
 
Daha sonra Göygöl Milli Parkının direktoru Fuad Quliyev, 10 saylı Regional Ekologiya və Təbii Sərvətlər İdarəsinin sektor müdiri Natiq Bayramov çıxış edib, qeyd edilib ki, cəmiyyətin hər bir üzvünün ekoloji fəaliyyətlərdə aktiv iştirakı bəşəriyyət üçün olduqca vacibdir. Tədbir iştirakçılarına Azərbaycan təbiəti, flora və faunası, ətraf mühitin qorunması ilə bağlı maarifləndirici məlumatlarlar verilib, bukletlər paylanıb, tədbir diskussiya şəklində davam edib.

Azərbaycan Texnologiya Universitetində 20 Yanvar faciəsinə həsr edilmiş anım tədbiri keçirilib

Universitet kollektivi əvvəlcə Gəncədə yerləşən 20 Yanvar Şəhidləri abidəsini, daha sonra ATU şəhidlərinin abidəsini ziyarət edib, önünə gül dəstələri düzüb, torpaqlarımızın müstəqilliyi və ərazi bütövlüyü uğrunda canından keçən şəhidlərin ruhlarına dualar oxuyublar.
Sonra tədbir universitetdə davam edib. Azərbaycan Respublikasının Dövlət Himni səsləndirilib, daha sonra respublikamızın ərazi bütövlüyü və müstəqilliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib. Ardınca 20 yanvar hadisələrinə həsr edilmiş videoçarx nümayiş olunub.
Tədbirdə giriş sözü ilə Azərbaycan Texnologiya Universitetinin rektoru v.m.i.e dos Yaşar Ömərov çıxış edib. 20 yanvar hadisələrinə siyasi və hüquqi qiymətin məhz Ulu Öndər Heydər Əliyev tərəfindən verildiyindən, Azərbaycan xalqının keşməkeşli tarixinin səhifələrindən bəhs edib. Qanlı yanvar gününün hər il böyük hüznlə yad edildiyini bildirərək bütün şəhidlərimizə rəhmət diləyib.
Daha sonra anım tədbirinin xüsusi qonağı Şamaxı Dövlət Regional Kollecinin direktoru dos. İlham Vəliyev çıxış edib, qan yaddaşımızdan, 20 Yanvar şəhidlərinin qəhrəmanlığından danışıb.
Tədbirdə universitet əməkdaşları - tarix üzrə fəlsəfə doktoru İlham Əlizadə, Yüngül sənaye mühəndisliyi və dizayn kafedrasının müdiri Tofiq Mirzəyev, İctimai elmlər və multikulturalizm kafedrasının baş müəllimi Zəminə Novruzova çıxış edib, tarixin xronologiyasına nəzər salınıb, faciəvi günün acı xatirələrindən bəhs edilib.
Sonda Azərbaycan Texnologiya Universitetinin tələbəsi Turanə Bədəlovanın 20 Yanvara həsr edilmiş şeiri dinlənilib.

ATU-da zəfər gününə həsr edilmiş konfrans keçirilib

Azərbaycan Texnologiya Universitetində 8 Noyabr – Zəfər Gününə həsr olunmuş “Elm və texnologiyaların müasir trendləri” adlı Respublika Elmi-Praktik Konfransı keçirilib.
Tədbirdən əvvəl Ümummilli lider Heydər Əliyevin büstü və universitet ərazisində ucaldılmış Şəhidlər abidəsi ziyarət edilib, önünə gül dəstələri düzülüb.
Konfrans Azərbaycan Respublikasının Dövlət Himninin səsləndirilməsi, Ulu Öndər Heydər Əliyevin və torpaqlarımızın azadlığı uğrunda canından keçmiş şəhidlərin əziz xatirəsinin bir dəqiqəlik sükutla yad edilməsilə açıq elan edilib.
Azərbaycan Texnologiya Universitetinin rektoru v.m.i.e Yaşar Ömərov giriş sözü ilə çıxış edərək Ali Baş Komandan İlham Əliyevin rəhbərliyi ilə rəşadətli Azərbaycan Ordusunun torpaqlarımızı 30 illik işğaldan azad etməsindən və bu zəfərin qazanılmasında xalq-dövlət-ordu birliyi ilə bərabər yüksək texnologiyaların rolundan danışıb, işğaldan azad olunmuş ərazilərdə ağıllı kənd, ağıllı şəhər konsepsiyası əsasında aparılan quruculuq işlərində əks olunan müasir texnoloji trendləri vurğulayaraq konfransın mövzusunun aktuallığına diqqət çəkib.
Daha sonra Gəncə şəhər İcra Hakimiyyətinin başçısı Niyazi Bayramov, Azərbaycan Respublikası Elm və Təhsil Nazirliyinin tabeliyində Elm və Ali Təhsil Dövlət Agentliyinin sədri Ülkər Səttarova, Gəncə Dövlət Universitetinin prorektoru, millət vəkili Pərvin Kərimzadə, Dördüncü Sənaye İnqilabının Təhlili və Koordinasiya mərkəzinin baş icraçı direktoru Fariz Cəfərov, Azərbaycan Respublikası Dövlət Turizm Agentliyinin Gəncə Regional Turizm İdarəsinin direktoru Zaur Bayramov, “AzerGold” QSC-dən Valid Əliyev, Azərbaycan Respublikası Kosmik Agentliyin nümayəndəsi Aytən Zeynallı çıxış edərək konfransın işinə uğurlar arzulayıblar.
Konfransın plenar iclasında strateji inkişaf və rəqəmsallaşma üzrə müşavir Mehman Kərimovun təqdimatında “Sinerji və Tərəqqi: Universitet-Elm-Texnologiya-Sənayedə qarşılıqlı inkişaf trendləri” mövzusunda, Yüngül sənaye mühəndisliyi və dizayn kafedrasının dosenti, sənaye dizaynı üzrə elmlər doktoru İmaş Hacıyevin təqdimatında “Müasir dövrdə elm və texnologiyaların inkişafında dizaynın rolu” mövzusunda məruzələr dinlənilib.
İki gün davam edəcək konfrans plenar iclasdan sonra öz işini 12 istiqamət üzrə bölmələrdə davam etdirib. Konfransın məcmuələr toplusuna 300-ə yaxın tezis daxil edilib.