Azərbaycan Texnologiya Universitetinin (ATU) tələbələri növbəti ekoloji aksiya təşkil edərək daha bir nümunəvi təşəbbüsə imza atıblar. Bir qrup könüllü tələbənin qatıldığı ekoloji aksiya Gəncə şəhərində Nizami Məqbərəsi ətrafında baş tutub.
Gəncə şəhər İcra Hakimiyyətinin dəstəyi ilə təşkil olunan aksiyada 30-a yaxın tələbə iştirak edib. Könüllülər məqbərənin ətraf ərazisini tullantılardan təmizləyərək ətraf mühitin qorunmasına töhfə veriblər.
Aksiya çərçivəsində tələbələr ərazini müxtəlif məişət tullantılarından təmizləməklə ictimai məkanların qorunması və ekoloji mühitin yaxşılaşdırılmasının vacibliyinə diqqət çəkiblər.
Qeyd edək ki, analoji tədbiri ATU tələbələri ötən il Gəncəçay çayının hövzəsində təşkil etmişdilər.
Azərbaycan Texnologiya Universitetində (ATU) WUF13-ün əhəmiyyətinin təbliği məqsədilə “Dayanıqlı şəhərsalma və iqtisadi inkişaf: WUF13 kontekstində yeni çağırışlar və idarəetmə yanaşmaları” mövzusunda dəyirmi masa keçirilib.
İqtisadiyyat və idarəetmə fakültəsinin təşkilatçılığı ilə baş tutan tədbirdə fakültənin dekanı Fazil Kərimov, İdarəetmə kafedrasının müdiri Füzuli Məmmədov və İqtisadiyyat kafedrasının müdiri Natiq Cavadov çıxış edərək mövzu ilə bağlı geniş təqdimatlar ediblər.
Çıxış edənlər bildiriblər ki, Azərbaycan Respublikasında 2026-cı ilin “Şəhərsalma və Memarlıq İli” elan edilməsi ölkədə urban inkişafın strateji prioritetə çevrildiyini göstərir. Bu baxımdan BMT-nin Ümumdünya Şəhərsalma Forumunun 13-cü sessiyası – WUF13 ölkəmiz üçün mühüm beynəlxalq platforma olmaqla, qabaqcıl təcrübələrin öyrənilməsi və yeni yanaşmaların tətbiqi baxımından xüsusi əhəmiyyət daşıyır.
Müzakirələrdə şəhərlərin iqtisadi inkişafın əsas hərəkətverici qüvvəsi olduğu vurğulanıb, infrastrukturun səmərəli təşkili, investisiya mühitinin yaxşılaşdırılması və idarəetmədə innovativ yanaşmaların tətbiqinin vacibliyi qeyd edilib. Eyni zamanda “ağıllı şəhər” konsepsiyası, rəqəmsallaşma, süni intellekt və məlumat əsaslı qərarvermə mexanizmlərinin şəhər idarəçiliyində rolu xüsusi olaraq önə çəkilib.
Çıxışlarda Azərbaycanın işğaldan azad olunmuş ərazilərində həyata keçirilən bərpa və yenidənqurma layihələrinin, həmçinin “ağıllı şəhər” və “ağıllı kənd” modellərinin tətbiqinin müasir şəhərsalma yanaşmalarına nümunə olduğu bildirilib.
Tədbirdə Gəncə şəhərinin regional inkişaf mərkəzi kimi potensialı da geniş müzakirə olunub. Şəhərin strateji coğrafi mövqeyi, nəqliyyat-logistika imkanları və iqtisadi inkişaf perspektivləri nəzərə alınaraq inteqrasiya olunmuş planlaşdırma, rəqəmsal həllərin tətbiqi və ekoloji tarazlığın qorunmasının vacibliyi vurğulanıb.
Dəyirmi masa çərçivəsində şəhərsalma siyasətinin institusional və innovativ əsaslarla gücləndirilməsi, “ağıllı şəhər” yanaşmalarının tətbiqi, inklüziv və ekoloji dayanıqlı inkişafın təmin olunması, urban iqtisadiyyatın şaxələndirilməsi və əməkdaşlığın genişləndirilməsi istiqamətində təkliflər irəli sürülüb. Qeyd olunub ki, irəli sürülən təkliflər şəhərsalma siyasətinin modernləşdirilməsinə, dayanıqlı və inklüziv iqtisadi inkişafın təmin olunmasına, eləcə də şəhərlərin rəqabət qabiliyyətinin artırılmasına mühüm töhfə verəcək.
Azərbaycan Texnologiya Universitetində “EDEN AGRO” MMC-nin əməkdaşları tərəfindən tələbələrin qida sənayesi üzrə bilik və bacarıqlarının artırılmasına yönəlmiş tanıtım sessiyası təşkil olunub.
Tədbir zamanı “EDEN AGRO” nümayəndələri universitet-sənaye əlaqələri üzrə rektor müşaviri Rövşən Əliyev tərəfindən auditoriyaya təqdim edilib. Bildirib ki, sessiyanın əsas məqsədi tələbələrin gələcək karyera inkişafına dəstək göstərmək, onların ixtisas üzrə biliklərinin artırılmasına və əmək bazarına hazırlığının gücləndirilməsinə töhfə verməkdir.
Daha sonra “EDEN AGRO”-nun İnsan Resursları və inzibati işlər departamentinin rəhbəri İbrahim İbrahimov və işə qəbul üzrə aparıcı mütəxəssis Nərmin Hüseynli şirkətin fəaliyyəti, qida sənayesi sahəsində görülən işlər, karyera imkanları və insan resurslarının idarə olunması barədə tələbələrə ətraflı məlumat veriblər. Həmçinin tələbələrin peşəkar inkişafı, işə hazırlıq prosesi və sənaye ilə inteqrasiya mövzularında tövsiyələr səsləndirilib.
Çıxışlarda gələcəkdə universitet-sənaye əməkdaşlığının genişləndirilməsi, o cümlədən tələbələr üçün təqaüd proqramlarının yaradılması imkanları da qeyd olunub.
Tədbirin sonunda tələbələrin sualları cavablandırılıb və mövzu ətrafında fikir mübadiləsi aparılıb.
Azərbaycan Texnologiya Universitetinin (ATU) rektoru Yaşar Ömərovun rəhbərlik etdiyi nümayəndə heyəti Qazaxıstan Respublikasına səfəri çərçivəsində Əl-Farabi adına Qazax Milli Universitetinin innovasiya infrastrukturu və maddi-texniki bazası ilə yaxından tanış olub.
Səfər “Study in Azerbaijan” sərgisi çərçivəsində Almatı şəhərində həyata keçirilib. Nümayəndə heyəti universitetin “Farabi Hub” İnnovasiya Mərkəzi və Superkompüter laboratoriyasına baş çəkərək burada yaradılmış müasir infrastruktur, elmi-tədqiqat imkanları və rəqəmsal həllərlə tanış olub.
Heyətin tərkibində Azərbaycan Texnologiya Universitetinin strateji inkişaf və rəqəmsallaşma məsələləri üzrə müşaviri Toğrul Sadıqov və İnnovasiya Mərkəzinin direktoru Elnur Əhmədov da yer alıb.
Tanışlıq zamanı innovasiya ekosistemi, startap imkanları və yüksək hesablama texnologiyaları yerində qiymətləndirilib. Görüşlər çərçivəsində tərəflər arasında innovasiya və texnologiya sahəsində əməkdaşlıq perspektivləri müzakirə olunub, birgə layihələrin həyata keçirilməsi imkanları nəzərdən keçirilib. Qeyd olunub ki, bu səfər innovasiya sahəsində tərəfdaşlığın genişlənməsinə, eləcə də yaxın perspektivdə real nəticələrə əsaslanan birgə təşəbbüslərin formalaşmasına mühüm töhfə verəcək.
Bu əməkdaşlıq təşəbbüsləri SDG 9: Sənaye, innovasiya və infrastruktur məqsədlərinə uyğun olaraq innovativ texnologiyaların inkişafına və elmi-tədqiqat potensialının gücləndirilməsinə töhfə verir. Eyni zamanda, tərəfdaşlıq əlaqələrinin genişləndirilməsi SDG 17: Məqsədlər üçün tərəfdaşlıq çərçivəsində beynəlxalq əməkdaşlığın dərinləşməsinə xidmət edir.
Azərbaycan Texnologiya Universiteti ilə Qazaxıstanın Menecment, Mühəndislik, Texnologiya və Analitika Universiteti (META), Almatı Texnologiya Universiteti və Kızılorda Bolaşak Universiteti arasında əməkdaşlıq müqavilələri imzalanıb.
Müqavilələrə Azərbaycan Texnologiya Universitetinin rektoru Yaşar Ömərov ilə META Universitetinin, Almatı Texnologiya Universitetinin, eləcə də Kızılorda Bolaşak Universitetinin rektorları tərəfindən Azərbaycan–Qazaxıstan İkinci Rektorlar Forumu çərçivəsində imza atılıb.
İmzalanmış müqavilələr ali təhsil müəssisələri arasında elmi və akademik əlaqələrin genişləndirilməsini, birgə tədqiqat layihələrinin həyata keçirilməsini, tələbə və müəllim mübadiləsini, ortaq təlim proqramlarının hazırlanmasını, innovasiya və texnologiya sahəsində əməkdaşlığın qurulmasını nəzərdə tutur.
Bu əməkdaşlıqlar Birləşmiş Millətlər Təşkilatının Dayanıqlı İnkişaf Məqsədlərinə (SDG) də töhfə vermək məqsədi daşıyır. Xüsusilə keyfiyyətli təhsilin təşviqi (SDG 4), sənaye, innovasiya və infrastrukturun inkişafı (SDG 9), eləcə də məqsədlər üçün tərəfdaşlıqların gücləndirilməsi (SDG 17) istiqamətində birgə fəaliyyətlərin həyata keçirilməsi nəzərdə tutulur. Universitetlər arasında qurulan bu tərəfdaşlıqlar bilik və texnologiya mübadiləsini artırmaqla yanaşı, regionlararası akademik inteqrasiyanı və davamlı inkişaf prinsiplərinin tətbiqini dəstəkləyəcəkdir.
2026-cı il aprelin 6-da Prezident İlham Əliyev-in Gürcüstana səfəri Azərbaycan–Gürcüstan əlaqələrinin güclü və davamlı xarakterini bir daha təsdiqlədi. Bu münasibətlər yalnız diplomatik əlaqələr deyil, həm də tarixi, iqtisadi və strateji maraqlara əsaslanan uzunmüddətli tərəfdaşlıqdır. Azərbaycan və Gürcüstan xalqları əsrlər boyu birgə yaşamış və ortaq mədəniyyətə sahib olmuşdur. Bu tarixi əlaqələr dövlətlərarası münasibətlərin möhkəm təməlini təşkil edir və qarşılıqlı etimadın inkişafına imkan yaradır. Bugünkü əməkdaşlıq bu köklərə əsaslanaraq daha strukturlaşdırılmış formada davam etdirilir.
İki ölkənin beynəlxalq platformalarda bir-birini dəstəkləməsi, suverenlik və ərazi bütövlüyünün qorunması siyasəti regionda sabitliyin təmin olunmasında mühüm rol oynayır. Bu dəstək həm də iqtisadi və sosial layihələrin təhlükəsiz və davamlı şəkildə həyata keçirilməsinə zəmin yaradır. Azərbaycan və Gürcüstan arasında ticarət dövriyyəsi artmaqda davam edir və iki ölkə birgə investisiya layihələrini genişləndirməyi planlaşdırır. Enerji və nəqliyyat sahəsində həyata keçirilən iri layihələr, o cümlədən Bakı-Tbilisi-Ceyhan neft kəməri, Cənub Qaz Dəhlizi və Orta Dəhliz həm iqtisadi, həm də regional sabitlik baxımından strateji əhəmiyyət daşıyır. Gürcüstan bu layihələrdə yalnız tranzit rolu oynamır, həm də regional əməkdaşlığın gücləndirilməsində aktiv tərəfdaşdır.
Cənubi Qafqazda formalaşan yeni regional vəziyyət Azərbaycan və Gürcüstan üçün həm imkan, həm də məsuliyyət yaradır. Sülh, təhlükəsizlik və əməkdaşlıq mühitinin qorunması üçün ikitərəfli əlaqələr strateji alət rolunu oynayır. Ticarət və investisiya mübadiləsi isə bu proseslərin əsas dayaq nöqtələrindən biridir. Bir sözlə, Azərbaycan–Gürcüstan münasibətləri tarixi yaxınlıq, qarşılıqlı hörmət və strateji maraqlara əsaslanan davamlı tərəfdaşlıq modelidir. Bu əlaqələr region üçün sabitlik və inkişafın nümunəsi olaraq qalır və gələcəkdə yeni əməkdaşlıq sahələrinin formalaşmasına zəmin yaradır.
