Milli Qurtuluş Günü Azərbaycanın müasir tarixində dönüş nöqtəsi kimi qiymətləndirilir. 1993-cü ilin iyun ayında ölkədə hökm sürən siyasi böhran və idarəçilikdəki xaos dövlətin müstəqilliyini ciddi təhlükə altına almışdı. Hakimiyyət böhranı, iqtisadi geriləmə və sosial gərginlik xalqın gələcəyinə dair narahatlıqları artırırdı. Bu şəraitdə Azərbaycanın dövlətçiliyi real olaraq dağılma riski ilə üz-üzə qalmışdı. Xalqın tələbi ilə Heydər Əliyevin hakimiyyətə qayıdışı milli dövlətçiliyin qorunması üçün həyati əhəmiyyət daşıdı. Onun qayıdışı yalnız siyasi sabitliyin bərpası deyil, həm də milli həmrəyliyin güclənməsi baxımından mühüm tarixi hadisə oldu. Heydər Əliyev böhranlı vəziyyətdə xalqın ümid yeri kimi çıxış edərək dövlətin dağılmasının qarşısını aldı və müstəqilliyin möhkəmlənməsi üçün yeni mərhələ açdı. Bu səbəbdən Milli Qurtuluş Günü dövlətçilik tariximizin ən mühüm səhifələrindən biri hesab olunur. Bu günün mahiyyəti gənc nəsil üçün xüsusi əhəmiyyət daşıyır, çünki liderlik və məsuliyyət dərsi kimi onların siyasi şüurunun formalaşmasına təsir göstərir.

O dövrdə böyük təhlükə qarşısnda olan ölkəmizdə siverenliyin müdafiəsi və möhkəmləndirilməsi real təhdidlər qarşısında həyata keçirilirdi. Çünki, 1990-cı illərin əvvəllərində Azərbaycan müstəqilliyini yenicə bərpa etmişdi, lakin ölkədə siyasi böhran, iqtisadi geriləmə və sosial gərginlik hökm sürürdü. Hakimiyyət böhranı, silahlı qarşıdurmalar və idarəçilikdəki xaos dövlətin gələcəyini ciddi təhlükə altına salmışdı. Bu dövrdə xalqın milli dövlətçilik arzuları reallaşmaq əvəzinə dağılma riski ilə üz-üzə qalmışdı. Belə bir şəraitdə Heydər Əliyevin hakimiyyətə qayıdışı tarixi zərurət idi və bu hadisə Azərbaycanın müasir tarixində dönüş nöqtəsi oldu. Onun qayıdışı ilə ölkədə siyasi sabitlik bərpa edildi, dövlətin dağılmasının qarşısı alındı və müstəqilliyin möhkəmlənməsi üçün yeni mərhələ açıldı. Ulu Öndərin “mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” sözləri gənclərə dövlətin taleyinə biganə qalmamağı, milli maraqları şəxsi maraqlardan üstün tutmağı və müstəqilliyin qorunması uğrunda məsuliyyətli mövqe sərgiləməyi öyrədirdi.

Heydər Əliyevin hakimiyyətə qayıdışı gənc nəsil üçün liderlik dərsi kimi mühüm əhəmiyyət daşıyır. Böhranlı şəraitdə düzgün qərarların qəbul edilməsi, milli maraqların şəxsi maraqlardan üstün tutulması və xalqın taleyinə məsuliyyətlə yanaşma gənclərə nümunə oldu. Ümummilli Liderin cəsarətli addımları göstərdi ki, dövlətin gələcəyi yalnız güclü iradə və milli maraqlara sadiqliklə qoruna bilər. Bu, gənclərə öyrədir ki, liderlik yalnız hakimiyyət sahibi olmaq deyil, həm də xalqın taleyinə cavabdehlik daşımaq deməkdir.

Milli Qurtuluş Günü gənclərə məsuliyyət dərsi də verir. Bu günün mahiyyəti göstərir ki, heç bir vətəndaş dövlətin taleyinə biganə qalmamalıdır. Gənclər bu tarixi hadisəni öyrənməklə ictimai-siyasi həyatda fəal mövqe tutmağın vacibliyini dərk edirlər. Onlar anlayırlar ki, müstəqilliyin qorunması yalnız liderin deyil, bütün xalqın, xüsusilə gənc nəslin üzərinə düşən məsuliyyətdir.

Qurtuluş Gününün sosial və mədəni təsirləri də diqqətəlayiqdir. Bu gün kollektiv yaddaşda birlik və həmrəylik ideyasını gücləndirir, gənclərdə milli kimliyin formalaşmasına mühüm təsir göstərir. Onlar bu günün mahiyyətini dərk etməklə milli dəyərlərə daha sıx bağlanır, dövlətçilik ənənələrinin qorunmasının vacibliyini anlayırlar. Beləliklə, Milli Qurtuluş Günü gənclərin həm siyasi şüurunun formalaşmasına, həm də milli ruhda yetişməsinə xidmət edən ideoloji dayağa çevrilir.

Milli Qurtuluş Günü Azərbaycanın müasir tarixində yalnız siyasi sabitliyin bərpası ilə məhdudlaşmır, həm də milli dövlətçiliyin möhkəmlənməsi və gələcək inkişafın ideoloji əsaslarını formalaşdırır. 1993-cü ilin iyun hadisələri göstərdi ki, böhranlı şəraitdə xalqın iradəsi və uzaqgörən liderlik dövlətin taleyini dəyişdirə bilər. Heydər Əliyevin hakimiyyətə qayıdışı ilə ölkə dağılmaq təhlükəsindən xilas oldu, müstəqillik qorundu və inkişaf üçün yeni mərhələ açıldı. Bu tarixi hadisə gənc nəsil üçün həm liderlik, həm məsuliyyət, həm də milli həmrəylik dərsi kimi dəyərləndirilir.

Gənclər Qurtuluş Gününün mahiyyətini öyrənməklə dövlətçilik ənənələrinin qorunmasının vacibliyini dərk edir, ictimai-siyasi həyatda fəal mövqe tutmağın əhəmiyyətini anlayırlar. Bu gün onlara göstərir ki, müstəqilliyin qorunması yalnız liderin deyil, bütün xalqın, xüsusilə gənc nəslin üzərinə düşən məsuliyyətdir. Liderlik nümunəsi gənclərə böhranlı anlarda cəsarətli qərarların gücünü, məsuliyyət dərsi isə dövlətin gələcəyi üçün fəal mövqe tutmağın vacibliyini öyrədir. Milli Qurtuluş Gününü Azərbaycan tarixində dönüş nöqtəsi kimi qiymətləndirən Prezident İlham Əliyev çox doğru olaraq  vurğulayır: “Danılmaz həqiqətdir ki, Azərbaycanın müasir və müstəqil dövlət kimi mövcudluğu, inkişafı XX əsrdə ikinci dəfə qazandığımız müstəqilliyin ilk illərinə təsadüf edən Milli Qurtuluş Günü ilə əlaqədardır”.

Beləliklə, Milli Qurtuluş Günü gənc nəsil üçün sadəcə tarixi bir hadisə deyil, həm də milli kimliyin möhkəmlənməsi, vətənpərvərlik ruhunun güclənməsi və dövlətçilik dəyərlərinə sadiqlik baxımından strateji əhəmiyyətə malikdir. Bu günün dəyərləri gənclərin gələcəkdə daha güclü, milli ruhlu və məsuliyyətli vətəndaşlar kimi yetişməsinə zəmin yaradır.

Azərbaycan Texnologiya Universitetinin

Humanitar elmlər və multikulturalizm kafedrasının

baş müəllimi Zəminə Novruzova

Azərbaycan Texnologiya Universitetinin Dövlət və Bələdiyyə İdarəetməsi ixtisasının III kurs tələbəsi Əsmər Əhmədova Bakı şəhərində keçirilən “Swimming for All Finals” beynəlxalq yarışında uğurla çıxış edərək I yerə layiq görülüb.

Bu nailiyyətinə görə Əsmər Əhmədova Azərbaycan Respublikasının Gənclər və İdman Nazirliyi tərəfindən qızıl medal və diplomla təltif olunub.

Qeyd edək ki, Əsmər Əhmədova Vətən müharibəsi şəhidi Amal Əhmədovun bacısıdır.

Tələbəmizi bu uğuru münasibətilə təbrik edir, ona gələcək yarışlarda yeni qələbələr arzulayırıq!

Gəncə şəhərində Təhsilin İnkişafı Fondu, Kapital Bank və “Mastercard” şirkətinin birgə əməkdaşlığı ilə hazırlanmış TəhsilPlus kartı layihəsinin təqdimetmə mərasimi keçirilib.

Tədbirdə Azərbaycan Texnologiya Universitetinin (ATU) rektoru Yaşar Ömərov, Gəncə Dövlət Universitetinin rektoru Yusif Yusibov, Azərbaycan Dövlət Aqrar Universitetinin rektoru Zəfər Qurbanov, eləcə də Təhsilin İnkişafı Fondunun İdarə Heyətinin sədri Nicat Məmmədli, Kapital Bank-ın İdarə Heyəti sədrinin müavini Fərid Hidayətzadə və digər rəsmilər iştirak ediblər.

Azərbaycan Texnologiya Universitetinin rektoru Yaşar Ömərov tədbirdə çıxış edib. Rektor bildirib ki, TəhsilPlus kartı təhsil işçilərinin sosial rifahının gücləndirilməsi istiqamətində mühüm təşəbbüsdür. O qeyd edib ki, müəllim və təhsil işçilərinə təqdim olunan güzəşt və üstünlüklər onların gündəlik həyatına əlavə dəyər qatmaqla yanaşı, əməyinə verilən qiymətin göstəricisidir. Rektor bu kimi layihələrin təhsil işçilərinin motivasiyasının artırılmasına və sosial müdafiəsinin gücləndirilməsinə xidmət etdiyini vurğulayıb.

Tədbirdə çıxış edən digər rəsmilər layihənin təhsil işçilərinin sosial rifahının yaxşılaşdırılması, rəqəmsal xidmətlərə çıxış imkanlarının genişləndirilməsi və təhsil sistemində innovativ yanaşmaların tətbiqi baxımından əhəmiyyətini vurğulayıblar.

Sonda  əməkdaşlara TəhsilPlus kartları təqdim olunub.

Azərbaycan Texnologiya Universitetinin (ATU) İctimai Nəzarət Şurasının (İNŞ) növbəti iclası keçirilib. Tədbirdə Azərbaycan Texnologiya Universitetinin rektoru Yaşar Ömərov İctimai Nəzarət Şurası üzvlərini salamlayaraq universitetdə son dövrlərdə həyata keçirilən yeniliklər və strateji inkişaf istiqamətləri, o cümlədən rəqəmsallaşma prosesinin sürətləndirilməsi barədə ətraflı məlumat verib.

İclasda İctimai Nəzarət Şurasının sədri – AMEA-nın Gəncə Bölməsinin direktoru akademik Fuad Əliyev, üzvlərdən millət vəkili Naqif Həmzəyev, “Respublika” qəzetinin sabiq bölgə müxbiri, “Əmək veteranı” Zabit Xəlilov, “Təşəbbüslərin İnkişaf Mərkəzi” İB-nin sədri Azad Rəhimov, “Təmas” Regional İnkişaf İB-nin sədri Südabə Məmmədova iştirak edib.

İNŞ üzvləri 2025/2026-cı tədris ilinin yaz imtahan sessiyası ilə tanış olub, prosesi monitor vasitəsilə izləyiblər. Onlara imtahanların təşkili, tətbiq olunan rəqəmsal yeniliklər, İmtahan Komissiyası və Apellyasiya Komissiyasının fəaliyyəti barədə məlumat verilib.

Daha sonra qarşıda duran vəzifələr ətrafında fikir mübadiləsi aparılıb. Şura üzvləri həyata keçirilən yenilikləri müsbət qiymətləndirərək öz təklif və tövsiyələrini universitet rəhbərliyinə təqdim ediblər.

Qeyd edək ki, ATU İctimai Nəzarət Şurası 3 ildir fəaliyyət göstərir. Şuranın hər imtahan sessiyasında iclası təşkil edilir, imtahanların gedişi yerində izlənilir, tədris prosesinin təşkili və universitetin fəaliyyəti ilə bağlı məsələlər müzakirə olunur, təklif və tövsiyələr hazırlanaraq universitet rəhbərliyinə təqdim edilir, eyni zamanda universitetin fəaliyyəti ilə bağlı ictimai rəy öyrənilir.

Azərbaycan Respublikasında qeyri-neft sektorunun inkişafı dövlət siyasətinin əsas istiqamətlərindən biri kimi müəyyən edilmişdir. Bu baxımdan kənd təsərrüfatı sahəsinin inkişafı, ərzaq təhlükəsizliyinin möhkəmləndirilməsi, regionlarda məşğulluğun artırılması və ixrac potensialının genişləndirilməsi xüsusi əhəmiyyət daşıyır. Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər və verdiyi tapşırıqlar da bu sahənin ölkə iqtisadiyyatındakı strateji rolunu bir daha nümayiş etdirmişdir. Dövlət başçısı müşavirədə qeyd etmişdir ki, kənd təsərrüfatı yalnız iqtisadi sahə deyil, həm də sosial rifahın təmin edilməsində mühüm vasitədir. Azərbaycanın əhalisinin əhəmiyyətli hissəsi kənd yerlərində yaşayır və onların əsas gəlir mənbələrindən biri məhz kənd təsərrüfatıdır. Buna görə də aqrar sektorun inkişafı regionların sosial-iqtisadi tərəqqisinə, yeni iş yerlərinin yaradılmasına və əhalinin həyat səviyyəsinin yüksəlməsinə birbaşa təsir göstərir. Son illər ölkədə kənd təsərrüfatının inkişafı istiqamətində genişmiqyaslı islahatlar həyata keçirilmişdir. Fermerlərə subsidiyaların verilməsi, müasir texnikanın lizinq yolu ilə təqdim olunması, suvarma sistemlərinin yenilənməsi və aqrar sahədə rəqəmsal idarəetmə mexanizmlərinin tətbiqi bu siyasətin əsas istiqamətlərini təşkil edir. Prezident İlham Əliyev müşavirədə bu tədbirlərin müsbət nəticələr verdiyini vurğulayaraq, əldə olunan nailiyyətlərlə kifayətlənməməyin vacibliyini qeyd etmişdir.

Müşavirədə ərzaq təhlükəsizliyi məsələsi xüsusi diqqət mərkəzində olmuşdur. Qlobal miqyasda baş verən iqtisadi və siyasi proseslər, iqlim dəyişiklikləri və beynəlxalq bazarlarda qiymət dalğalanmaları göstərir ki, hər bir ölkə öz daxili istehsal imkanlarını artırmalıdır. Prezident İlham Əliyev vurğulamışdır ki, strateji ərzaq məhsulları üzrə özünütəminetmə səviyyəsinin yüksəldilməsi dövlətin qarşısında duran əsas vəzifələrdəndir. Bu məqsədlə əkin sahələrinin genişləndirilməsi, məhsuldarlığın artırılması və müasir aqrotexniki üsulların tətbiqi daha da sürətləndirilməlidir.

Kənd təsərrüfatında su təminatı məsələsi də müşavirənin əsas mövzularından biri olmuşdur. Məlumdur ki, su ehtiyatlarından səmərəli istifadə aqrar istehsalın dayanıqlılığında mühüm rol oynayır. Son illərdə ölkədə yeni su anbarlarının tikilməsi, meliorasiya və irriqasiya layihələrinin həyata keçirilməsi bu sahədə əhəmiyyətli irəliləyişlərə səbəb olmuşdur. Bununla belə, mövcud çağırışlar daha müasir yanaşmaların tətbiqini tələb edir. Dövlət başçısı aidiyyəti qurumlara su itkilərinin minimuma endirilməsi və damcı suvarma kimi innovativ texnologiyaların geniş tətbiqi ilə bağlı tapşırıqlar vermişdir.

Müşavirədə kənd təsərrüfatı məhsullarının ixrac potensialının artırılması məsələləri də geniş müzakirə edilmişdir. Azərbaycan bir sıra kənd təsərrüfatı məhsullarının istehsalında və ixracında mühüm üstünlüklərə malikdir. Meyvəçilik, tərəvəzçilik, pambıqçılıq, üzümçülük və fındıqçılıq kimi sahələr ölkənin ixrac gəlirlərinin artırılmasında mühüm rol oynayır. Prezident İlham Əliyev qeyd etmişdir ki, yerli məhsulların beynəlxalq bazarlarda rəqabət qabiliyyətinin yüksəldilməsi üçün keyfiyyət standartlarına ciddi əməl olunmalı, logistika imkanları genişləndirilməli və yeni bazarlara çıxış təmin edilməlidir. Aqrar sahənin inkişafında innovasiyaların rolu da xüsusi vurğulanmışdır. Müasir dövrdə kənd təsərrüfatında yüksək məhsuldarlığa nail olmaq üçün rəqəmsal texnologiyaların tətbiqi böyük əhəmiyyət daşıyır. Elektron kənd təsərrüfatı sistemləri, peyk monitorinqi, ağıllı suvarma texnologiyaları və müasir laborator xidmətlər fermerlərin fəaliyyətini daha səmərəli edir. Dövlət başçısı bu istiqamətdə həyata keçirilən layihələrin davam etdirilməsinin vacibliyini qeyd etmiş və innovativ yanaşmaların genişləndirilməsini tövsiyə etmişdir.

İşğaldan azad olunmuş ərazilərdə kənd təsərrüfatının inkişafı da müşavirədə diqqət çəkən məsələlərdən biri olmuşdur. Qarabağ və Şərqi Zəngəzur iqtisadi rayonları zəngin torpaq və su ehtiyatlarına malikdir. Bu ərazilərdə müasir kənd təsərrüfatı infrastrukturunun qurulması, aqroparkların yaradılması və yüksək məhsuldar istehsal sahələrinin təşkili ölkənin ümumi aqrar potensialını əhəmiyyətli dərəcədə artıracaqdır. Cənab Prezident İlham Əliyev həmin ərazilərin “ağıllı kənd” və “ağıllı təsərrüfat” konsepsiyaları əsasında inkişaf etdirilməsinin vacibliyini vurğulamışdır.

Fermerlərin sosial müdafiəsi və dövlət dəstəyi tədbirləri də müşavirədə müzakirə olunmuşdur. Dövlət tərəfindən verilən subsidiyalar, güzəştli kreditlər və digər maliyyə mexanizmləri kənd təsərrüfatı istehsalçılarının fəaliyyətinə mühüm stimul verir. Prezident qeyd etmişdir ki, bu dəstək tədbirləri daha şəffaf və səmərəli şəkildə həyata keçirilməli, hər bir fermer dövlət proqramlarından bərabər şəkildə yararlana bilməlidir.

Nəticə etibarilə, Azərbaycan Respublikasının Prezident İlham Əliyevin kənd təsərrüfatı məsələlərinə həsr olunmuş müşavirəsi aqrar sektorun inkişafının dövlət siyasətində mühüm yer tutduğunu bir daha göstərmişdir. Müşavirədə səsləndirilən fikirlər və verilən tapşırıqlar kənd təsərrüfatının modernləşdirilməsi, ərzaq təhlükəsizliyinin möhkəmləndirilməsi, ixrac imkanlarının genişləndirilməsi və regionların davamlı inkişafı baxımından mühüm əhəmiyyət daşıyır. Həyata keçirilən islahatlar və dövlət dəstəyi tədbirləri nəticəsində Azərbaycan kənd təsərrüfatının yaxın illərdə daha yüksək inkişaf mərhələsinə qədəm qoyacağı gözlənilir. Bu isə həm ölkə iqtisadiyyatının şaxələndirilməsinə, həm də vətəndaşların rifahının yüksəlməsinə mühüm töhfə verəcəkdir.

 Azərbaycan Texnologiya Universiteti

Sosial məsələlər və ictimaiyyətlə əlaqələr üzrə prorektor

Şahmar Umud oğlu Həsənov