Azərbaycan Texnologiya Universitetində Struktur Bölmələrin Monitorinqi Komissiyasının 2026–2027-ci tədris ili üzrə ilk iclası keçirilib. 

İclasa komissiyanın sədri, universitetin Sosial məsələlər və ictimaiyyətlə əlaqələr üzrə prorektor Şahmar Həsənov rəhbərlik edib. O komissiyanın fəaliyyət istiqamətləri və qarşıya qoyulan məqsədlər barədə məlumat verərək monitorinq prosesinin universitetdə keyfiyyət təminatı sisteminin inkişafı baxımından əhəmiyyətini vurğulayıb.

İclasda Struktur Bölmələrin Monitorinqi Komissiyasının 2026–2027-ci tədris ili üçün fəaliyyət planının hazırlanması və növbəti tədris ilində struktur bölmələr üzrə monitorinqlərin keçirilmə ardıcıllığı müzakirə olunub.

Komissiyanın katibi, Keyfiyyət Təminatı Şöbəsinin müdiri Arzu Əsgərov fəaliyyət planının hazırlanmasının vacibliyini diqqətə çatdırıb, hər tədris semestrində ən azı bir iclasın keçirilməsinin və nəzərdə tutulan monitorinqlərin vaxtında həyata keçirilməsinin zəruriliyini qeyd edib.

İclas zamanı akkreditasiya üzrə verilmiş tövsiyələrin icrası, fəaliyyət planının hazırlanması və monitorinqlərin təşkili ilə bağlı fikir mübadiləsi aparılıb. Müzakirələrin yekununda monitorinqlərin ilkin mərhələdə şöbələrdən başlanılması, daha sonra isə kafedra və dekanlıqlarda planlı şəkildə həyata keçirilməsi qərara alınıb.

Azərbaycan Texnologiya Universiteti (ATU), Türkiyənin İqtisadi İnkişaf və Sosial Araşdırmalar İnstitutu (İKSAD), Qazaxıstanın Kızılorda Bolaşak Universiteti (BU) və Özbəkistanın Fərqanə Dövlət Universitetinin (FDU) birgə təşkilatçılığı ilə “Nəsirəddin Tusi II Beynəlxalq Mühəndislik və Tətbiqi Elmlər Konfransı” keçirilib.

Konfransın açılışında Azərbaycan Respublikasının Dövlət Himni səsləndirilib, Ulu Öndər Heydər Əliyevin və Azərbaycanın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.

Elm və innovasiya məsələləri üzrə prorektor Sahil Həmidov açılış nitqi ilə çıxış edib. O, müasir dövrdə rəqəmsallaşma, süni intellekt, ağıllı texnologiyalar və innovativ həllərin mühəndislik və tətbiqi elmlərin inkişafında həlledici rol oynadığını vurğulayıb. Bildirib ki, qlobal çağırışlar fonunda elmi biliklərin beynəlxalq əməkdaşlıq müstəvisində paylaşılması, birgə tədqiqatların aparılması və innovativ həllərin hazırlanması xüsusi əhəmiyyət kəsb edir. Prorektor qeyd edib ki, "Nəsirəddin Tusi II Beynəlxalq Mühəndislik və Tətbiqi Elmlər Konfransı" müxtəlif ölkələrdən olan alim və tədqiqatçıları bir araya gətirərək yeni elmi tərəfdaşlıqların qurulmasına, təcrübə mübadiləsinin genişlənməsinə və mühəndislik sahəsində aktual problemlərin müzakirəsinə mühüm töhfə verir.

Plenar iclasın açılış hissəsində BU-nun elm və beynəlxalq əlaqələr üzrə prorektoru Muratbek Embergenov, FDU-nun elm və beynəlxalq əlaqələr üzrə prorektoru Aziza Bazarbayeva, Azərbaycan Dövlət Pedaqoji Universitetinin əməkdaşı və İKSAD Azərbaycanın baş direktoru Əlvan Cəfərov, BU-nun professoru Maksud Doscanov, FDU-nun dosenti Cövhər Müseyibzadə, ATU-nun Elmi fəaliyyətin təşkili və idarə edilməsi şöbəsinin müdiri Qalibə Məmmədova çıxış edərək beynəlxalq elmi əməkdaşlığın genişləndirilməsinin, ortaq tədqiqatların aparılmasının və mühəndislik sahəsində innovativ yanaşmaların tətbiqinin əhəmiyyətindən danışıblar.

Tədbirdə Əl-Fərabi adına Qazax Milli Universitetinin professoru Yerlan Doscanov “Torpağın münbitliyinin artırılması və bitkilərin stres amillərinə davamlılığının yüksəldilməsi məqsədilə zeolitlər və nanosorbentlər əsasında kompleks substratların işlənib hazırlanması” mövzusunda məruzə ilə çıxış edib.

Hibrid formatda təşkil olunan iki günlük konfrans işini 9 istiqamət üzrə bölmə iclaslarında davam etdirir. Beynəlxalq tədbirdə 8 ölkədən 23 universitet, 2 akademiya, 6 elmi-tədqiqat institutu və 1 dövlət qurumunun nümayəndələri iştirak edirlər. Konfransın materiallar toplusuna 100-dən çox elmi tezis qəbul olunub.

Azərbaycan Texnologiya Universiteti (ATU) ilə dəmir yolu nəqliyyatı sahəsində dünyanın aparıcı şirkətlərindən olan “ALSTOM”un Azərbaycandakı nümayəndəsi – “ALSTOM Transport Azərbaycan” MMC arasında əməkdaşlıq haqqında memorandum imzalanıb.

Sənədə ATU-nun rektoru Yaşar Ömərov və “ALSTOM Transport Azərbaycan” MMC-nin direktoru Elşən Zeynalov Bakı şəhərində imza atıb. 

Memorandumun məqsədi universitet ilə sənaye arasında əməkdaşlığın genişləndirilməsi, tələbələrin praktiki bilik və bacarıqlarının artırılması, eləcə də elmi-tədqiqat və innovasiya fəaliyyətinin dəstəklənməsidir.

Sənədə əsasən, tərəflər tələbələrin istehsalat təcrübəsinin təşkili, mütəxəssislərin tədris prosesinə cəlb olunması, müasir təhsil proqramlarının hazırlanması, birgə elmi araşdırmaların aparılması, master-klassların təşkili və məzunların şirkətdə təcrübə və iş imkanlarının yaradılması istiqamətində birgə əməkdaşlıq edəcəklər.

Memorandum çərçivəsində həmçinin dəmir yolu nəqliyyatı sahəsində elmi potensialın gücləndirilməsi, innovativ ideyaların istehsalata tətbiqi və universitet–sənaye əlaqələrinin daha da inkişaf etdirilməsi nəzərdə tutulur.

Əməkdaşlıq memorandumu 3 il müddətinə imzalanıb.

Azərbaycanın dəmir yolu infrastrukturunun inkişafında aktiv iştirak edən, dəmir yolu nəqliyyat sistemləri istehsalı üzrə qlobal liderlərdən biri olan "ALSTOM" transmilli maşınqayırma şirkətidir. Şirkət yüksək sürətli qatarlar, metrolar, tramvaylar, elektrik lokomotivləri, həmçinin rəqəmsal siqnal və infrastruktur həllərinin layihələndirilməsi və istehsalı ilə məşğuldur.

Hər il 26 iyun tarixi Azərbaycan xalqı tərəfindən böyük qürur və ehtiram hissi ilə qeyd olunur. Bu əlamətdar gün Azərbaycan Respublikasının Silahlı Qüvvələr Günü kimi tariximizdə xüsusi yer tutur. Silahlı Qüvvələr ölkənin müstəqilliyinin, suverenliyinin və ərazi bütövlüyünün əsas təminatçısıdır. Güclü ordu hər bir dövlətin təhlükəsizliyinin və sabit inkişafının vacib şərtidir. Azərbaycan Ordusu da keçdiyi şərəfli inkişaf yolu ilə regionun ən güclü ordularından birinə çevrilmişdir.

Azərbaycan Silahlı Qüvvələrinin yaranma tarixi 1918-ci il iyunun 26-na təsadüf edir. Həmin gün Azərbaycan Xalq Cümhuriyyətinin qərarı ilə ilk milli hərbi hissə – Əlahiddə Azərbaycan Korpusu yaradılmışdır. Bu hadisə milli ordunun formalaşmasının başlanğıcı hesab olunur. Sonrakı dövrlərdə ölkəmizin müstəqilliyini itirməsi nəticəsində milli ordu quruculuğu prosesi dayandırılsa da, xalqımızın azadlıq və müstəqillik arzusu heç zaman sönməmişdir.

1991-ci ildə Azərbaycan dövlət müstəqilliyini bərpa etdikdən sonra milli ordu quruculuğu yenidən gündəmə gəldi. Lakin həmin dövrdə ölkədə mövcud olan siyasi və iqtisadi çətinliklər, eləcə də Ermənistanın Azərbaycana qarşı hərbi təcavüzü Silahlı Qüvvələrin formalaşmasını mürəkkəbləşdirirdi. Ümummilli Lider Heydər Əliyevin hakimiyyətə qayıdışından sonra ordu quruculuğu sahəsində mühüm islahatlar həyata keçirildi. Peşəkar hərbi kadrların hazırlanması, hərbi intizamın möhkəmləndirilməsi və ordunun maddi-texniki bazasının gücləndirilməsi istiqamətində mühüm addımlar atıldı.

Müstəqillik illərində Azərbaycan Ordusunun inkişafı dövlət siyasətinin əsas prioritetlərindən birinə çevrildi. Ordunun müasir silah və texnika ilə təchiz olunması, beynəlxalq standartlara uyğun hərbi hazırlıq sisteminin yaradılması və hərbi qulluqçuların sosial təminatının yaxşılaşdırılması istiqamətində ardıcıl tədbirlər həyata keçirildi. Bu siyasət nəticəsində Azərbaycan Silahlı Qüvvələri regionun ən güclü hərbi qüvvələrindən biri statusunu qazandı.

Azərbaycan Ordusunun gücü xüsusilə 2020-ci ildə baş vermiş 44 günlük Vətən müharibəsində özünü bütün dünyaya nümayiş etdirdi. Ali Baş Komandanın rəhbərliyi altında Azərbaycan Ordusu yüksək peşəkarlıq, döyüş ruhu və vətənpərvərlik nümayiş etdirərək torpaqlarımızın böyük hissəsini işğaldan azad etdi. Bu tarixi Qələbə xalqımızın milli birlik və həmrəyliyinin, eyni zamanda Silahlı Qüvvələrimizin qüdrətinin bariz nümunəsi oldu. Şəhidlərimizin qəhrəmanlığı və qazilərimizin fədakarlığı xalqımızın yaddaşında əbədi yaşayacaqdır.

2023-cü ildə ölkəmizin bütün ərazisində dövlət suverenliyinin tam bərpa olunması da Azərbaycan Ordusunun peşəkarlığının və gücünün növbəti göstəricisi oldu. Bu uğurlar göstərdi ki, güclü dövlətin əsas dayaqlarından biri güclü ordudur. Azərbaycan əsgəri hər zaman Vətənin keşiyində ayıq-sayıq dayanaraq ölkəmizin təhlükəsizliyini qoruyur.

Silahlı Qüvvələr Günü yalnız hərbi qulluqçuların deyil, bütün xalqın bayramıdır. Bu gün vətən uğrunda canından keçən şəhidlərimizin əziz xatirəsi dərin ehtiramla yad edilir, qazilərimizin göstərdiyi qəhrəmanlıqlar yüksək qiymətləndirilir. Eyni zamanda gənc nəslin vətənpərvərlik ruhunda tərbiyə olunması, dövlətə və xalqa xidmət hissinin gücləndirilməsi baxımından da bu bayramın böyük əhəmiyyəti vardır.

Bu gün Azərbaycan Silahlı Qüvvələri müasir texnologiyalarla təchiz olunmuş, yüksək hazırlıqlı və peşəkar bir ordu kimi ölkəmizin təhlükəsizliyini etibarlı şəkildə təmin edir. Ordumuzun əldə etdiyi nailiyyətlər hər bir azərbaycanlının qürur mənbəyidir. Dövlətimizin müdafiə qabiliyyətinin daha da möhkəmləndirilməsi istiqamətində həyata keçirilən tədbirlər Azərbaycanın gələcək inkişafı və təhlükəsizliyi üçün mühüm əhəmiyyət daşıyır.

26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı və Azərbaycan xalqını ürəkdən təbrik edir, ordumuza yeni uğurlar arzulayırıq. Azərbaycan Ordusu daim güclü olsun, dövlətimizin müstəqilliyi və ərazi bütövlüyü əbədi yaşasın!

Yaşasın Azərbaycan Ordusu! Yaşasın müstəqil Azərbaycan!

Azərbaycan Texnologiya Universiteti

Social məsələlər və ictimaiyyətlə əlaqələr üzrə prorektor

Şahmar Umud oğlu Həsənov

Azərbaycan Texnologiya Universitetində 26 İyun – Azərbaycan Respublikasının Silahlı Qüvvələri Gününə həsr olunmuş tədbir keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Vətənin azadlığı və ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad olunub.

İştirakçılara Azərbaycan Ordusunun keçdiyi şərəfli döyüş yolunu, əldə etdiyi uğurları və qazandığı tarixi Zəfəri əks etdirən sənədli film nümayiş etdirilib.

Tədbirin açılışında çıxış edən sosial məsələlər və ictimaiyyətlə əlaqələr üzrə prorektor Şahmar Həsənov Azərbaycan Ordusunun yaranma tarixindən, Ulu Öndər Heydər Əliyevin ölkəmizdə müasir ordu quruculuğunun formalaşdırılması istiqamətində həyata keçirdiyi mühüm tədbirlərdən, Silahlı Qüvvələrimizin keçdiyi inkişaf yolundan, Vətən müharibəsində nümayiş etdirdiyi qəhrəmanlıq nümunələrindən və ölkəmizin müdafiə qüdrətinin möhkəmləndirilməsi istiqamətində görülən işlərdən bəhs edib. O, Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun tarixi Zəfər qazandığını, ölkəmizin ərazi bütövlüyü və suverenliyinin tam bərpa olunduğunu vurğulayıb.

Daha sonra Azərbaycan Respublikası Qarabağ Qaziləri İctimai Birliyinin sədri Eyvaz Hüseynov və birliyin Gəncə filialı sədrinin müavini, ehtiyatda olan polkovnik-leytenant Ceyhun Əliyev çıxış edərək Silahlı Qüvvələrimizin keçdiyi şərəfli döyüş yolundan, xalq-ordu birliyinin əhəmiyyətindən və gənclərin vətənpərvərlik ruhunda tərbiyəsinin vacibliyindən danışıblar.

Tədbirdə Humanitar elmlər və multikulturalizm kafedrasının müəllimi, Vətən müharibəsi qazisi, ehtiyatda olan zabit Xəlil İbrahimov da çıxış edib. O, Azərbaycan Ordusunun hərbi sahədə qazandığı nailiyyətlərdən, müasir döyüş təcrübəsindən, Prezident, Müzəffər Ali Baş Komandan İlham Əliyevin rəhbərliyi ilə həyata keçirilən "Dəmir Yumruq" əməliyyatı nəticəsində qazanılan tarixi Zəfərdən və sonrakı dövrdə uğurla icra olunan hərbi əməliyyatlardan söz açıb, şanlı Zəfər tariximizin əhəmiyyətini vurğulayıb.

Çıxışlarda Azərbaycan Ordusunun regionun ən güclü ordularından biri olduğu qeyd olunub, Silahlı Qüvvələrimizin qazandığı qələbələrin xalqımızın qürur mənbəyi olduğu bildirilib.