18 may 2026-cı il tarixlərində Bakıda açılışı keçirilən “Şərq-Qərb Nəqliyyat Dəhlizində Logistika, İdarəetmə və İstismar Problemləri üzrə V Beynəlxalq Konfrans” (PLMO 2026) Gəncədə - Azərbaycan Texnologiya Universitetində öz işini davam etdirib.
Konfrans Azərbaycan Texnologiya Universiteti, Azərbaycan Respublikası Elm və Təhsil Nazirliyinin Riyaziyyat İnstitutu, Polşa Respublikasının Sileziya Texnologiya Universiteti, Çin Xalq Respublikasının Guancou Universiteti, Gürcüstan Respublikasının Texniki Universiteti və Özbəkistan Respublikasının Daşkənd Dövlət Nəqliyyat Universitetinin həmtəşkilatçılığı ilə keçirilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ulu Öndər Heydər Əliyevin və Azərbaycanın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Tədbirdə ATU-nun rektoru Yaşar Ömərov açılış nitqi ilə çıxış edib. Bildirib ki, “Şərq-Qərb” nəqliyyat dəhlizi region ölkələri arasında iqtisadi, elmi və texnoloji əməkdaşlığın genişlənməsində mühüm strateji əhəmiyyət daşıyır. Rektor qeyd edib ki, qlobal logistika sistemində baş verən dəyişikliklər fonunda nəqliyyat və idarəetmə sahəsində innovativ yanaşmaların tətbiqi, rəqəmsallaşma proseslərinin sürətləndirilməsi və elmi tədqiqatların istehsalatla inteqrasiyası xüsusi aktuallıq kəsb edir. Yaşar Ömərov universitetlərin beynəlxalq elmi platformalarda fəal iştirakının, təcrübə mübadiləsinin və ortaq layihələrin gələcək inkişaf baxımından mühüm rol oynadığını da vurğulayıb.
Daha sonra Azərbaycan Respublikası Elm və Təhsil Nazirliyinin Riyaziyyat İnstitutunun direktoru Elxan Səbziyev çıxış edib. O nəqliyyat dəhlizlərinin inkişaf perspektivləri, rəqəmsallaşma və beynəlxalq elmi əməkdaşlıq haqqında danışaraq bölmənin işinə uğurlar arzu edib.
Açılış hissəsində Sileziya Texnologiya Universitetinin “Nəqliyyat problemləri” jurnalının baş redaktoru Aleksander Sladkovski və ATU-nun Mexanika və nəqliyyat texnologiyaları kafedrasının müdiri Şahin Quliyev məruzə ilə çıxış ediblər.
Daha sonra konfrans alt bölmədə müxtəlif elmi məruzələrin təqdimatı ilə davam edib.
Konfransda müxtəlif ölkələrdən ATU-ya gələn 50-yə yaxın xarici alim və tədqiqatçı da iştirak edib. Tədbir zamanı logistika, nəqliyyat və idarəetmə sahələrində müasir çağırışlar, innovativ yanaşmalar və regional əməkdaşlıq imkanları ətrafında geniş fikir mübadiləsi aparılıb.
Azərbaycan Texnologiya Universiteti (ATU), Azərbaycan Basketbol Federasiyası (ABF) və Gəncə-Daşkəsən Regional Gənclər və İdman İdarəsinin birgə təşkilatçılığı ilə Ümummilli Lider Heydər Əliyevin anadan olmasının 103 illiyinə həsr olunmuş region ali təhsil müəssisələrinin tələbələri arasında basketbol turniri keçirilib.
Gəncə İdman Sarayında baş tutan turnirin açılış mərasimində Azərbaycan Texnologiya Universitetinin rektoru Yaşar Ömərov, şəhər və region ictimaiyyətinin nümayəndələri, ali təhsil müəssisələrinin rəhbər şəxsləri, tələbələr və idmançılar iştirak ediblər.
Əvvəlcə Azərbaycan Respublikasının Dövlət Himni səsləndirilib, Ümummilli Lider Heydər Əliyevin və Vətən uğrunda canından keçən şəhidlərin əziz xatirəsi bir dəqiqəlik sükutla yad olunub. Daha sonra turnirə püşkatma mərasimi ilə start verilib. İki gün davam edən yarış Azərbaycan Basketbol Federasiyasının hakimlər kollegiyasının müvafiq lisenziyaya malik meydan və masa hakimləri tərəfindən idarə olunub.
Kubok uğrunda Azərbaycan Texnologiya Universiteti, Azərbaycan Dövlət İqtisad Universitetinin Zaqatala filialı, Azərbaycan Dövlət Aqrar Universiteti, Gəncə Dövlət Universiteti və Mingəçevir Dövlət Universitetinin tələbə komandaları mübarizə aparıblar.
Turnirin final mərhələsində üçüncü yer uğrunda keçirilən oyunda Azərbaycan Dövlət Aqrar Universiteti ilə Mingəçevir Dövlət Universitetinin komandaları qarşılaşıb. Oyun 85:31 hesabı ilə Azərbaycan Dövlət Aqrar Universitetinin qələbəsi ilə yekunlaşıb və komanda turnirin bürünc medalına sahib olub.
Final oyununda isə Azərbaycan Texnologiya Universiteti ilə Gəncə Dövlət Universitetinin komandaları mübarizə aparıb. Gərgin və maraqlı keçən qarşılaşma 107:96 hesabı ilə Azərbaycan Texnologiya Universitetinin qələbəsi ilə başa çatıb. Bununla da ATU basketbol üzrə regional turnirin qalibi olub.
Yarışın sonunda qaliblərə medal, diplom və kubok təqdim olunub.
Qeyd edək ki, Azərbaycan Texnologiya Universiteti universitetlərarası basketbol yarışını artıq ənənəvi olaraq təşkil edir. Yarışın keçirilməsində əsas məqsəd tələbələr arasında sağlam həyat tərzinin təşviqi, idmana marağın artırılması, ali təhsil müəssisələri arasında əməkdaşlığın gücləndirilməsi, gənclərin asudə vaxtının səmərəli təşkili və komanda ruhunun inkişaf etdirilməsidir.
Azərbaycan Texnologiya Universitetində (ATU) “Agro Dairy” şirkətinin nümayəndə heyəti ilə görüş keçirilib.
Universitet-sənaye əməkdaşlığının genişləndirilməsi, tələbələrin istehsalat təcrübələrinin artırılması, elmi-tədqiqat və innovasiya fəaliyyətlərinin gücləndirilməsi məqsədilə təşkil olunan görüşdə tərəflər arasında qarşılıqlı əməkdaşlıq istiqamətləri müzakirə olunub.
Görüşdə ATU-nu elm və innovasiya məsələləri üzrə prorektor Sahil Həmidov, strateji inkişaf və rəqəmsallaşma məsələləri üzrə müşavir Toğrul Sadıqov, universitet-sənaye əlaqələri üzrə müşavir Rövşən Əliyev, Qida mühəndisliyi fakültəsinin dekanı Mehman İsmayılov və İnnovasiya Mərkəzinin direktoru Elnur Əhmədov təmsil edib.
“Agro Dairy” şirkətini isə İdarə Heyətinin üzvü, insan resursları üzrə baş direktor Fatimə Tağıyeva, Mərkəzi insan resursları şöbəsinin rəhbəri Rauf İsmayılov, sahə meneceri Bəxtiyar Səfərov, işə qəbul üzrə mütəxəssis Nuranə Süleymanova və marketinq mütəxəssisi Leyla Acalova təmsil ediblər.
Görüşün sonunda ATU ilə “Agro Dairy” arasında əməkdaşlığa dair memorandum imzalanıb. Memorandum tələbələrin istehsalat təcrübəsi proqramlarına cəlb olunması, birgə təlim və seminarların təşkili, müasir təhsil proqramlarının hazırlanması, elmi-tədqiqat fəaliyyətlərinin dəstəklənməsi, məzunların şirkətin namizəd bazasına daxil edilməsi və karyera imkanlarının genişləndirilməsi istiqamətində əməkdaşlığı nəzərdə tutur.
Eyni zamanda, sənəd çərçivəsində universitetdə “Agro Dairy”nin mühazirə otağının yaradılması, davamlı öyrənmə prinsipinə əsaslanan ixtisasartırma proqramlarının təşkili, həmçinin qida məhsulları texnologiyası sahəsində innovativ yeniliklərin istehsalata tətbiqi də nəzərdə tutulur.
Azərbaycan Texnologiya Universitetində (ATU) Karyera Festivalı çərçivəsində Karyera Forumu keçirilib. Forum universitet-sənaye əlaqələri üzrə rektor müşaviri Rövşən Əliyevin moderatorluğu ilə baş tutub. Spiker qismində tanınmış iqtisadçı Fərhad Pərvizi, KOBİA-nın Gəncə-Daşkəsən və Qazax-Tovuz iqtisadi rayonları üzrə regional koordinatoru Anar Əliyev və Naftalanın ən müasir otellərindən olan “Garabagh Resort & Spa”nın direktor əvəzi Nicat Məhərrəmov çıxış ediblər.
Spikerlər şəxsi karyera təcrübələri, peşəkar inkişaf mərhələləri və əmək bazarında uğur qazanmaq üçün vacib amillər barədə fikirlərini bölüşüblər. Çıxışlarda müasir dövrdə çevik bacarıqların əhəmiyyəti, innovativ düşüncə, düzgün şəbəkələşmə, liderlik keyfiyyətləri və özünüinkişafın karyera yolundakı rolu xüsusi vurğulanıb. Eyni zamanda tələbələrə əmək bazarının aktual tələbləri, turizm, sahibkarlıq və iqtisadiyyat sahələrində yaranan yeni imkanlar barədə məlumat verilib, onları maraqlandıran suallar cavablandırılıb.
İnteraktiv müzakirələr şəraitində keçirilən Forum tələbələrin real iş mühiti ilə bağlı biliklərini artırmaq, peşəkar şəxslərlə birbaşa ünsiyyət qurmasına imkan yaratmaq və onların gələcək karyera planlamasına töhfə vermək məqsədi daşıyıb.
Azərbaycan Texnologiya Universitetinin (ATU) Turizm fakültəsində Ulu Öndər Heydər Əliyevin anadan olmasının 103 illiyinə həsr olunmuş “Gənc bələdçilər” intellektual yarışı keçirilib.
I kurs tələbələri arasında təşkil olunan yarışın məqsədi tələbələrin dünyagörüşünün genişləndirilməsi, turizm sahəsinə marağın artırılması, komanda işinin təşviqi və intellektual bacarıqlarının inkişaf etdirilməsi olub.
İntellektual yarışda 4 komanda iştirak edib. Komandalara Azərbaycanın turizm potensialı, tarixi-mədəni irsi, milli dəyərləri, görməli məkanları və turizm sahəsini əhatə edən müxtəlif mövzularda suallar ünvanlanıb. İştirakçılar sualları operativ və düzgün cavablandıraraq bilik və hazırlıq səviyyələrini nümayiş etdiriblər.
Yarış tələbələr tərəfindən böyük maraqla qarşılanıb və rəqabət şəraitində keçib. Sonda fərqlənən komandalar mükafatlandırılıb.
