Azərbaycan Texnologiya Universiteti (ATU) ilə dəmir yolu nəqliyyatı sahəsində dünyanın aparıcı şirkətlərindən olan “ALSTOM”un Azərbaycandakı nümayəndəsi – “ALSTOM Transport Azərbaycan” MMC arasında əməkdaşlıq haqqında memorandum imzalanıb.
Sənədə ATU-nun rektoru Yaşar Ömərov və “ALSTOM Transport Azərbaycan” MMC-nin direktoru Elşən Zeynalov Bakı şəhərində imza atıb.
Memorandumun məqsədi universitet ilə sənaye arasında əməkdaşlığın genişləndirilməsi, tələbələrin praktiki bilik və bacarıqlarının artırılması, eləcə də elmi-tədqiqat və innovasiya fəaliyyətinin dəstəklənməsidir.
Sənədə əsasən, tərəflər tələbələrin istehsalat təcrübəsinin təşkili, mütəxəssislərin tədris prosesinə cəlb olunması, müasir təhsil proqramlarının hazırlanması, birgə elmi araşdırmaların aparılması, master-klassların təşkili və məzunların şirkətdə təcrübə və iş imkanlarının yaradılması istiqamətində birgə əməkdaşlıq edəcəklər.
Memorandum çərçivəsində həmçinin dəmir yolu nəqliyyatı sahəsində elmi potensialın gücləndirilməsi, innovativ ideyaların istehsalata tətbiqi və universitet–sənaye əlaqələrinin daha da inkişaf etdirilməsi nəzərdə tutulur.
Əməkdaşlıq memorandumu 3 il müddətinə imzalanıb.
Azərbaycanın dəmir yolu infrastrukturunun inkişafında aktiv iştirak edən, dəmir yolu nəqliyyat sistemləri istehsalı üzrə qlobal liderlərdən biri olan "ALSTOM" transmilli maşınqayırma şirkətidir. Şirkət yüksək sürətli qatarlar, metrolar, tramvaylar, elektrik lokomotivləri, həmçinin rəqəmsal siqnal və infrastruktur həllərinin layihələndirilməsi və istehsalı ilə məşğuldur.
Hər il 26 iyun tarixi Azərbaycan xalqı tərəfindən böyük qürur və ehtiram hissi ilə qeyd olunur. Bu əlamətdar gün Azərbaycan Respublikasının Silahlı Qüvvələr Günü kimi tariximizdə xüsusi yer tutur. Silahlı Qüvvələr ölkənin müstəqilliyinin, suverenliyinin və ərazi bütövlüyünün əsas təminatçısıdır. Güclü ordu hər bir dövlətin təhlükəsizliyinin və sabit inkişafının vacib şərtidir. Azərbaycan Ordusu da keçdiyi şərəfli inkişaf yolu ilə regionun ən güclü ordularından birinə çevrilmişdir.
Azərbaycan Silahlı Qüvvələrinin yaranma tarixi 1918-ci il iyunun 26-na təsadüf edir. Həmin gün Azərbaycan Xalq Cümhuriyyətinin qərarı ilə ilk milli hərbi hissə – Əlahiddə Azərbaycan Korpusu yaradılmışdır. Bu hadisə milli ordunun formalaşmasının başlanğıcı hesab olunur. Sonrakı dövrlərdə ölkəmizin müstəqilliyini itirməsi nəticəsində milli ordu quruculuğu prosesi dayandırılsa da, xalqımızın azadlıq və müstəqillik arzusu heç zaman sönməmişdir.
1991-ci ildə Azərbaycan dövlət müstəqilliyini bərpa etdikdən sonra milli ordu quruculuğu yenidən gündəmə gəldi. Lakin həmin dövrdə ölkədə mövcud olan siyasi və iqtisadi çətinliklər, eləcə də Ermənistanın Azərbaycana qarşı hərbi təcavüzü Silahlı Qüvvələrin formalaşmasını mürəkkəbləşdirirdi. Ümummilli Lider Heydər Əliyevin hakimiyyətə qayıdışından sonra ordu quruculuğu sahəsində mühüm islahatlar həyata keçirildi. Peşəkar hərbi kadrların hazırlanması, hərbi intizamın möhkəmləndirilməsi və ordunun maddi-texniki bazasının gücləndirilməsi istiqamətində mühüm addımlar atıldı.
Müstəqillik illərində Azərbaycan Ordusunun inkişafı dövlət siyasətinin əsas prioritetlərindən birinə çevrildi. Ordunun müasir silah və texnika ilə təchiz olunması, beynəlxalq standartlara uyğun hərbi hazırlıq sisteminin yaradılması və hərbi qulluqçuların sosial təminatının yaxşılaşdırılması istiqamətində ardıcıl tədbirlər həyata keçirildi. Bu siyasət nəticəsində Azərbaycan Silahlı Qüvvələri regionun ən güclü hərbi qüvvələrindən biri statusunu qazandı.
Azərbaycan Ordusunun gücü xüsusilə 2020-ci ildə baş vermiş 44 günlük Vətən müharibəsində özünü bütün dünyaya nümayiş etdirdi. Ali Baş Komandanın rəhbərliyi altında Azərbaycan Ordusu yüksək peşəkarlıq, döyüş ruhu və vətənpərvərlik nümayiş etdirərək torpaqlarımızın böyük hissəsini işğaldan azad etdi. Bu tarixi Qələbə xalqımızın milli birlik və həmrəyliyinin, eyni zamanda Silahlı Qüvvələrimizin qüdrətinin bariz nümunəsi oldu. Şəhidlərimizin qəhrəmanlığı və qazilərimizin fədakarlığı xalqımızın yaddaşında əbədi yaşayacaqdır.
2023-cü ildə ölkəmizin bütün ərazisində dövlət suverenliyinin tam bərpa olunması da Azərbaycan Ordusunun peşəkarlığının və gücünün növbəti göstəricisi oldu. Bu uğurlar göstərdi ki, güclü dövlətin əsas dayaqlarından biri güclü ordudur. Azərbaycan əsgəri hər zaman Vətənin keşiyində ayıq-sayıq dayanaraq ölkəmizin təhlükəsizliyini qoruyur.
Silahlı Qüvvələr Günü yalnız hərbi qulluqçuların deyil, bütün xalqın bayramıdır. Bu gün vətən uğrunda canından keçən şəhidlərimizin əziz xatirəsi dərin ehtiramla yad edilir, qazilərimizin göstərdiyi qəhrəmanlıqlar yüksək qiymətləndirilir. Eyni zamanda gənc nəslin vətənpərvərlik ruhunda tərbiyə olunması, dövlətə və xalqa xidmət hissinin gücləndirilməsi baxımından da bu bayramın böyük əhəmiyyəti vardır.
Bu gün Azərbaycan Silahlı Qüvvələri müasir texnologiyalarla təchiz olunmuş, yüksək hazırlıqlı və peşəkar bir ordu kimi ölkəmizin təhlükəsizliyini etibarlı şəkildə təmin edir. Ordumuzun əldə etdiyi nailiyyətlər hər bir azərbaycanlının qürur mənbəyidir. Dövlətimizin müdafiə qabiliyyətinin daha da möhkəmləndirilməsi istiqamətində həyata keçirilən tədbirlər Azərbaycanın gələcək inkişafı və təhlükəsizliyi üçün mühüm əhəmiyyət daşıyır.
26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı və Azərbaycan xalqını ürəkdən təbrik edir, ordumuza yeni uğurlar arzulayırıq. Azərbaycan Ordusu daim güclü olsun, dövlətimizin müstəqilliyi və ərazi bütövlüyü əbədi yaşasın!
Yaşasın Azərbaycan Ordusu! Yaşasın müstəqil Azərbaycan!
Azərbaycan Texnologiya Universiteti
Social məsələlər və ictimaiyyətlə əlaqələr üzrə prorektor
Şahmar Umud oğlu Həsənov
Azərbaycan Texnologiya Universitetində 26 İyun – Azərbaycan Respublikasının Silahlı Qüvvələri Gününə həsr olunmuş tədbir keçirilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Vətənin azadlığı və ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad olunub.
İştirakçılara Azərbaycan Ordusunun keçdiyi şərəfli döyüş yolunu, əldə etdiyi uğurları və qazandığı tarixi Zəfəri əks etdirən sənədli film nümayiş etdirilib.
Tədbirin açılışında çıxış edən sosial məsələlər və ictimaiyyətlə əlaqələr üzrə prorektor Şahmar Həsənov Azərbaycan Ordusunun yaranma tarixindən, Ulu Öndər Heydər Əliyevin ölkəmizdə müasir ordu quruculuğunun formalaşdırılması istiqamətində həyata keçirdiyi mühüm tədbirlərdən, Silahlı Qüvvələrimizin keçdiyi inkişaf yolundan, Vətən müharibəsində nümayiş etdirdiyi qəhrəmanlıq nümunələrindən və ölkəmizin müdafiə qüdrətinin möhkəmləndirilməsi istiqamətində görülən işlərdən bəhs edib. O, Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun tarixi Zəfər qazandığını, ölkəmizin ərazi bütövlüyü və suverenliyinin tam bərpa olunduğunu vurğulayıb.
Daha sonra Azərbaycan Respublikası Qarabağ Qaziləri İctimai Birliyinin sədri Eyvaz Hüseynov və birliyin Gəncə filialı sədrinin müavini, ehtiyatda olan polkovnik-leytenant Ceyhun Əliyev çıxış edərək Silahlı Qüvvələrimizin keçdiyi şərəfli döyüş yolundan, xalq-ordu birliyinin əhəmiyyətindən və gənclərin vətənpərvərlik ruhunda tərbiyəsinin vacibliyindən danışıblar.
Tədbirdə Humanitar elmlər və multikulturalizm kafedrasının müəllimi, Vətən müharibəsi qazisi, ehtiyatda olan zabit Xəlil İbrahimov da çıxış edib. O, Azərbaycan Ordusunun hərbi sahədə qazandığı nailiyyətlərdən, müasir döyüş təcrübəsindən, Prezident, Müzəffər Ali Baş Komandan İlham Əliyevin rəhbərliyi ilə həyata keçirilən "Dəmir Yumruq" əməliyyatı nəticəsində qazanılan tarixi Zəfərdən və sonrakı dövrdə uğurla icra olunan hərbi əməliyyatlardan söz açıb, şanlı Zəfər tariximizin əhəmiyyətini vurğulayıb.
Çıxışlarda Azərbaycan Ordusunun regionun ən güclü ordularından biri olduğu qeyd olunub, Silahlı Qüvvələrimizin qazandığı qələbələrin xalqımızın qürur mənbəyi olduğu bildirilib.
Azərbaycan Texnologiya Universitetində (ATU) "Açıq qapı” günü keçirilib. 2025-2026-cı tədris ilinin yaz imtahan sessiyası ilə bağlı təşkil olunan “Açıq qapı” günündə valideynlər, rəhbər heyət və dekanlar iştirak edib.
Elm və innovasiya məsələləri üzrə prorektor, Apellyasiya Komissiyasının sədri Sahil Həmidov və sosial məsələlər və ictimaiyyətlə əlaqələr üzrə prorektor, İmtahan Qərargahının rəhbəri Şahmar Həsənov dəyirmi masa formatında valideynlərə imtahan prosesinin təşkili barədə məlumat veriblər. Bildirilib ki, imtahanların keçirilməsi Elm və Təhsil Nazirliyinin müvafiq qaydalarına uyğun şəkildə tənzimlənir və bu məqsədlə İmtahan Qərargahı və Apellyasiya Komissiyası fasiləsiz fəaliyyət göstərir. Həmçinin qeyd olunub ki, imtahan prosesində rəqəmsallaşmaya mərhələli keçid həyata keçirilir, bu il isə sistemin sınaq mərhələsi – pilot layihə kimi tətbiq olunur, həmçinin yeniliklər çərçivəsində imtahana hazırlıq portalı istifadəyə verilib. Şəffaflığın və obyektivliyin təmin olunması üçün auditoriyalarda müşahidə kameraları quraşdırıldığı, korpuslarda müraciət qutularının yerləşdirildiyi, eləcə də tələbələrin operativ müraciət imkanları üçün elektron platformaların istifadəyə verildiyi diqqətə çatdırılıb.
Daha sonra İmtahan Komissiyasının sədri, Tədrisin təşkili və idarəedilməsi şöbəsinin müdiri Cəsarət Şabanov monitor vasitəsilə imtahanların gedişini canlı rejimdə nümayiş etdirib. Valideynlərin diqqətinə çatdırılıb ki, imtahanlar müəyyən edilmiş qrafik əsasında test və yazılı formatlarda keçirilir. Yazılı imtahanlar üçün 3 saat, test imtahanları üçün isə 1 saat vaxt ayrılır. Yoxlama prosesi xüsusi kodlaşdırılmış sistem vasitəsilə həyata keçirilir, apellyasiya müraciətləri isə komissiya tərəfindən araşdırılaraq müvafiq qərarlar qəbul edilir. Komissiya sədri həmçinin bildirib ki, kompüter mühəndisliyi və informasiya təhlükəsizliyi ixtisasları üzrə təhsil alan I kurs tələbələri üçün yazılı imtahanlar ilk dəfə olaraq pilot layihə çərçivəsində süni intellekt əsaslı platforma üzərindən kompüter vasitəsilə təşkil olunub. Tələbələrə imtahanın yerinə yetirilməsi üçün 4 saat vaxt ayrılıb. Qeyd edilib ki, pilot layihə çərçivəsində imtahan nəticələrinin qiymətləndirilməsi süni intellekt tərəfindən aparılır və tələbələr imtahanı başa vurduqdan dərhal sonra öz nəticələrini öyrənə bilirlər ki, bu yenilik də qiymətləndirmə prosesinin daha operativ, şəffaf və çevik həyata keçirilməsinə imkan yaradır.
Valideynlər neqativ halların qarşısının alınması ilə bağlı zəruri tədbirlərin görülməsini yüksək qiymətləndirib, tələbələrin biliklərinin şəffaf və obyektiv qiymətləndirilməsi üçün yaradılan şəraitdən məmnunluq ifadə ediblər.
Azərbaycan Texnologiya Universitetində (ATU) Elmi Şuranın növbəti iclası keçirilib. Universitetin rektoru, elmi şura sədri Yaşar Ömərov gündəlikdə duran məsələləri diqqətə çatdırıb.
İclasda İqtisadiyyat və idarəetmə fakültəsinin dekanı Fazil Kərimovun və Beynəlxalq əməkdaşlıq şöbəsinin müdiri Ülviyyə Məmmədovanın hesabatları dinlənilib.
Daha sonra sosial məsələlər və ictimaiyyətlə əlaqələr üzrə prorektor, Tədris Metodiki Şuranın (TMŞ) sədri Şahmar Həsənov TMŞ-nın nəzdində fəaliyyət göstərən "Monitorinq qrupu"nun hesabatını təqdim edib. Prorektor növbəti çıxışında təsdiq olunması üçün tədris-metodiki vəsaitlərin siyahısını Elmi Şura üzvlərinin diqqətinə çatdırıb.
Ardınca insan resursları şöbəsinin müdiri İlham Əlizadənin təklifi əsasında ATU-nun elmi dərəcəsi olmayan müəllim heyəti ilə əmək münasibətləri məsələlərinə baxılaraq müvafiq qərarlar qəbul edilib.
İclas çərçivəsində rektor Yaşar Ömərov Azərbaycan Respublikasının Prezidenti yanında Ali Attestasiya Komissiyasının qərarı ilə 5312.01 – “Sahə iqtisadiyyatı” ixtisası üzrə professor elmi adına layiq görülmüş Turizm fakültəsinin dekanı Yusif Hümbətovu təbrik edib, ona diplomunu təqdim edərək gələcək elmi-pedaqoji fəaliyyətində yeni uğurlar arzulayıb.
