Azərbaycan Respublikasının Prezidenti yanında Ali Attestasiya Komissiyasının 09.01.2026-cı il tarixli qərarı ilə Azərbaycan Texnologiya Universitetinin (ATU) Ətraf mühitin mühafizəsi kafedrasının əməkdaşı İmmi Əliyevaya 2426.01 – Ekologiya ixtisasında biologiya elmləri elm sahəsi üzrə fəlsəfə doktoru elmi dərəcəsi verilib.
Təbrik edirik!
Müasir dünyada ksenofobiya, dini dözümsüzlük və etnik münaqişələrin artdığı bir dövrdə humanizm və sülh ideyalarını təbliğ edən liderlərin fəaliyyəti xüsusi əhəmiyyət kəsb edir. Azərbaycan Respublikasının Prezidenti İlham Əliyevin 2026-cı il üzrə nüfuzlu “Zayed İnsan Qardaşlığı Mükafatı” (Zayed Award for Human Fraternity) ilə təltif edilməsi, ölkəmizin onilliklər ərzində formalaşdırdığı tolerantlıq mühitinin və dövlət başçısının qlobal sülhə verdiyi töhfələrin beynəlxalq səviyyədə ən yüksək təsdiqidir.
Bu mükafat 2019-cu ildə Birləşmiş Ərəb Əmirliklərinin qurucusu Şeyx Zayed bin Sultan Al Nayanın irsini yaşatmaq məqsədilə təsis edilib. Mükafatın ilk fəxri laureatları elə sənədi imzalayan iki böyük dini lider - Papa Fransisk və Şeyx Əhməd ət-Tayyeb olublar. Mükafat yalnız sülh bəyanatları verən deyil, bu ideyaları real əməllərə çevirən şəxsiyyətlərə təqdim olunur. İlham Əliyevin bu mükafata layiq görülməsi, onun rəhbərliyi ilə Azərbaycanın fərqli dinlərin və mədəniyyətlərin harmonik şəkildə bir arada yaşadığı nadir bir məkana çevrilməsinin nəticəsidir.
Azərbaycanın bu ali mükafata gedən yolu təsadüfi uğurlardan deyil, düşünülmüş və sistemli bir strategiyadan keçir. Prezident İlham Əliyevin rəhbərliyi ilə multikulturalizm ölkədə sadəcə bir dözümlülük mühiti deyil, həm də qanunvericiliklə tənzimlənən və dövlət institutları tərəfindən dəstəklənən bir modelə çevrilmişdir. Bakı Beynəlxalq Multikulturalizm Mərkəzinin yaradılması və ali təhsil müəssisələrində bu sahənin elmi əsaslarla tədris olunması, Azərbaycanın gələcək nəsillərini “insan qardaşlığı” prinsipləri ruhunda yetişdirmək hədəfinin göstəricisidir. “Zayed İnsan Qardaşlığı Mükafatı” məhz bu institusional yanaşmaya - fərqlilikləri bir zənginlik kimi idarə etmək bacarığına verilən qiymətdir.
Ən mühüm məqamlardan biri Prezident İlham Əliyevin təşəbbüsü ilə 2008-ci ildən start götürən “Bakı Prosesi”dir. Bu platforma Şərq ilə Qərb, İslam dünyası ilə Xristian dünyası arasında körpü rolu oynayır. Ümumdünya Mədəniyyətlərarası Dialoq Forumunun mütəmadi olaraq Bakıda keçirilməsi, Azərbaycanın qlobal humanitar gündəliyi müəyyən edən mərkəzlərdən birinə çevrilməsini təmin etmişdir. “Zayed” mükafatı bu fəaliyyətin qlobal miqyasda nə qədər zəruri olduğunu bir daha sübut etdi.
Dinlərarası harmoniyanın Azərbaycan modeli dünya üçün bir örnəkdir. Prezident İlham Əliyevin “Multikulturalizm Azərbaycanın həyat tərzidir” fəlsəfəsi ölkədəki bütün dini konfessiyaların dövlət tərəfindən bərabər dəstəklənməsində özünü göstərir. Mükafat komitəsi bu təltiflə həm də Azərbaycandakı bu daxili sabitliyi və fərqli inanclara olan dərin hörməti yüksək qiymətləndirmişdir. Eyni zamanda, Heydər Əliyev Fondunun Vatikanda xristian katakombaların, Fransada kilsələrin, dünyanın müxtəlif yerlərində dini abidələrin bərpasındakı rolu bu humanitar missiyanın sərhədləri aşdığını və Azərbaycanın bəşəri irsə olan hörmətini nümayiş etdirir.
İnsan qardaşlığı yalnız dözümlü olmaq deyil, həm də çətin anda dəstək olmaqdır. Prezident İlham Əliyevin rəhbərliyi ilə Azərbaycanın humanitar diplomatiyası həm pandemiya dövründə, həm də təbii fəlakətlər zamanı dini və irqi fərq qoymadan onlarla ölkəyə yardım əlini uzatması ilə yadda qalmışdır.
Bu mükafat Prezident İlham Əliyevin Cənubi Qafqazda yeni bir dövr - davamlı sülh və əməkdaşlıq erası yaratmaq səylərini əks etdirir. Otuz illik münaqişədən sonra Azərbaycanın sülh müqaviləsi və regional inteqrasiya təklifləri, intiqam deyil, birgəyaşayış və qardaşlıq prinsiplərinə əsaslanır. Bu cür uzaqgörənlik mükafat komitəsinin diqqətindən yayına bilməzdi, çünki insan qardaşlığı ən çox müharibədən sonrakı bərpa və barışıq proseslərində sınağa çəkilir.
Prezident İlham Əliyevin “Zayed İnsan Qardaşlığı Mükafatı”na layiq görülməsi təkcə bir siyasi liderin uğuru deyil, bütövlükdə Azərbaycan xalqının əsrlər boyu yaşatdığı tolerantlıq mədəniyyətinin zəfəridir. Bu hadisə Azərbaycanın “yumşaq güc” diplomatiyasını gücləndirir və ölkəmizin beynəlxalq aləmdə dialoq, sülh və qarşılıqlı hörmət rəmzi kimi imicini möhkəmləndirir. Bu mükafat bir daha göstərdi ki, Azərbaycanın təklif etdiyi multikulturalizm modeli bəşəriyyətin gələcək birgəyaşayışı üçün ən optimal yoldur.
Azərbaycan Texnologiya Umiversiteti
İctimai elmlər və multikulturalizm
kafedrasının dos.əv., t.f.d. M.İ.Tağıyeva
🚀 Azərbaycan Texnologiya Universitetinin (ATU) İnnovasiya Mərkəzi yeni və innovativ maarifləndirici layihəyə start verir. Layihə çərçivəsində “Texnologiyanın sirləri” adlı elmi-populyar animasiya şəklində silsilə çarxlar təqdim ediləcək.
Süni intellekt əsaslı animasiyada Eynşteyn obrazı ATU tələbələri ilə birlikdə texnologiyanın keçmişinə, bu gününə və gələcəyinə elmi səyahət edəcəklər. Hər bir animasiya seriyası tamaşaçını texnoloji inkişafın mühüm mərhələləri ilə tanış edərək, elmin insan həyatına təsirini sadə, vizual və anlaşılan formada təqdim edəcək.
Animasiyada komandanı zaman tunelinə “ATU Car” aparacaq. Qeyd edək ki, “ATU Car” ATU tələbələrinin ötən il ərsəyə gətirdiyi və ictimaiyyətin böyük marağına səbəb olan hibrid avtomobilin süni intellekt vasitəsilə canlandırılmış animasiya obrazıdır. Bu avtomobil simvolik olaraq gənclərin innovativ düşüncəsini, mühəndislik bacarıqlarını və gələcəyin texnologiyalarına açılan yolu təmsil edir. Layihə çərçivəsində aşağıdakı əsas mövzulara toxunulacaq:
🔹 Texnologiyanın tarixi və sənaye inqilabları
• I Sənaye İnqilabı – buxar maşını, mexaniki istehsal
• II Sənaye İnqilabı – elektrik enerjisi, kütləvi istehsal
• III Sənaye İnqilabı – kompüterlər, avtomatlaşdırma, rəqəmsallaşma
• IV Sənaye İnqilabı – süni intellekt, robototexnika, “ağıllı” sistemlər
🔹 Elmin və texnologiyanın təməl icadları
• Elektrik və elektromaqnitizm
• Daxiliyanma mühərriki
• Kompüter və internetin yaranması
• Peyk texnologiyaları və kosmik tədqiqatlar
• Biotexnologiya və gen mühəndisliyi
🔹 Müasir və gələcək texnologiyalar
• Süni intellekt və maşın öyrənməsi
• Böyük verilənlər (Big Data)
• Yaşıl və bərpa olunan enerji texnologiyaları
• Ağıllı şəhərlər və IoT sistemləri
• Avtonom nəqliyyat vasitələri və elektromobillər
🔹 Universitet və elmin rolu
• Ali təhsilin texnoloji inkişafda rolu
• Elmi-tədqiqat və sənaye əməkdaşlığı
• Startap mədəniyyəti və innovasiya ekosistemi
• Gənc mühəndis və tədqiqatçıların formalaşması
Layihənin əsas məqsədi elmi biliklərin geniş auditoriyaya, xüsusilə gənclərə və tələbələrə maraqlı və anlaşılan formada çatdırılması, eyni zamanda ATU-da formalaşan innovativ düşüncə mühitinin nümayiş etdirilməsidir.
Azərbaycan Texnologiya Universitetində (ATU) Azərbaycan Respublikasının ev sahibliyi edəcəyi mühüm beynəlxalq tədbir – 13-cü Dünya Şəhərləri Forumuna (WUF13) həsr edilmiş görüş keçirilib.
Maşın mühəndisliyi və logistika kafedrası ilə Yüngül sənaye mühəndisliyi və dizayn kafedrasının birgə təşəbbüsü və akademik heyətinin iştirakı ilə baş tutan görüşün keçirilməsində məqsəd WUF13-ün əhəmiyyətinin geniş auditoriyaya çatdırılması, akademik mühitdə mövzu ətrafında fəal müzakirələrin təşviqi və universitetlərin qlobal proseslərə inteqrasiyasıdır.
Görüşdə Prezident İlham Əliyevin sərəncamı ilə 2026-cı ilin Azərbaycanda “Şəhərsalma və Memarlıq İli” elan edildiyi diqqətə çatdırılıb, WUF13-ün ölkəmiz üçün əhəmiyyəti, eləcə də bu qlobal platformanın elm, təhsil, gənclər və dayanıqlı inkişaf baxımından yaratdığı imkanlar müzakirə olunub.
Çıxışlarda bildirilib ki, BMT-nin İnsan Məskənləri Proqramı (UN-Habitat) tərəfindən təşkil olunan Dünya Şəhərləri Forumu şəhərlərin və yaşayış məntəqələrinin gələcəyinin müzakirə edildiyi ən mötəbər beynəlxalq platformalardan biridir. WUF13-ün Azərbaycanda keçirilməsi ölkəmizin beynəlxalq nüfuzunun daha da möhkəmlənməsinə, Azərbaycanın urbanizasiya, davamlı inkişaf və şəhərsalma sahələrində qlobal müzakirələrin mərkəzinə çevrilməsinə xidmət edir.
Tədbirdə vurğulanıb ki, WUF13 Azərbaycan üçün yalnız beynəlxalq tədbir deyil, eyni zamanda elm və ali təhsil mühiti üçün yeni imkanlar yaradan mühüm platformadır. Forum çərçivəsində təşkil olunacaq elmi sessiyalar, panel müzakirələr və konfranslar Azərbaycan alimlərinin beynəlxalq elmi əməkdaşlıqlara qoşulması, birgə tədqiqat layihələrinin icrası və elmi bilik mübadiləsinin genişlənməsi baxımından böyük əhəmiyyət daşıyır.
Akademik heyət beynəlxalq tədbirdə gənclərin iştirak imkanlarına da xüsusi diqqət çəkib. Qeyd olunub ki, tələbələr və gənc tədqiqatçılar forum vasitəsilə innovativ ideyalarını beynəlxalq auditoriyaya təqdim etmək, “ağıllı şəhərlər”, “yaşıl texnologiyalar” və “dayanıqlı inkişaf” kimi istiqamətlər üzrə qabaqcıl təcrübələrlə tanış olmaq imkanı əldə edəcəklər. Bu isə gənclərin elmi və peşəkar inkişafına mühüm töhfə verəcək.
Eyni zamanda, tədbirdə WUF13-ün Azərbaycanın dayanıqlı inkişaf strategiyası ilə tam uyğunluq təşkil etdiyi qeyd olunub. Qarabağ və Şərqi Zəngəzurda həyata keçirilən “ağıllı şəhər” və “ağıllı kənd” layihələri, yaşıl enerji təşəbbüsləri və ekoloji tarazlığın qorunması istiqamətində görülən işlərin forum çərçivəsində beynəlxalq ictimaiyyətə təqdim olunacağı vurğulanıb.
Ölkəmizdə gənclər siyasəti müstəqillik dövrünün ən mühüm və əhəmiyyətli istiqamətlərindən biridir. Gənc nəslin müasir dünyagörüşlü, intellektual potensiala malik, dövlətçiliyinə sadiq və bütün bunlarla yanaşı milli-mənəvi dəyərlərini yaşadan vətəndaşlar kimi yetişməsi bu siyasətin əsas məqsədini təşkil edir.
Heydər Əliyevin 1993-cü ildə hakimiyyətə qayıdışından sonra gənclərə diqqət dövlət siyasətinin əsas istiqamətlərindən birinə çevrildi. Bu dövrdə gənclərin sosial problemlərinin həlli, təhsil imkanlarının genişləndirilməsi və onların cəmiyyətdə fəal iştirakına şərait yaradıldı. Onun siyasəti nəticəsində gənclər milli düşüncəyə, vətənpərvərlik hissinə və ana dilinə bağlı ruhda formalaşmışdır. Ulu Öndər hesab edirdi ki, dövlətçiliyin davamlı, müstəqilliyin möhkəm olması yüksək səviyyəli gənc kadrların yetişdirilməsindən çox asılıdır. Ümummilli Liderin təşəbbüsü ilə Gənclər və İdman Nazirliyi yaradıldı, Gənclər Siyasəti Haqqında Qanun qəbul edildi, eləcə də bu qəbildən bir sıra kompleks tədbirlər həyata keçirildi.
2 fevral 1996-cı ildə Azərbaycan Gənclərinin I Forumu gənclərimizin həyatında, onların gələcək fəaliyyətlərinin məqsədyönlü şəkildə istiqamətləndirilməsində dönüş nöqtəsi kimi dəyərləndirilə bilər. Çünki, məhz elə bu forumda onların təhsil imkanları, məşğulluq məsələləri kimi sosial problemləri ortaya qoyulmuş, bu sahədə dövlətin onlara göstərə biləcəyi dəstək müzakirə edilmişdir. Sözügedən forum gənclərə öz fikirlərini çatdırmaq və dövlət siyasətində iştirak etmək imkanı verən mühüm ictimai-siyasi meydan funksiyasını yerinə yetirmişdir.
1997-ci ildə Azərbaycan xalqının ümummilli lideri Heydər Əliyevin imzaladığı fərmana əsasən gənclərin dövlət həyatında və siyasətində oynayacağı rolun əhəmiyyətinin rəsmi şəkildə tanınmasının göstəricisi olaraq 2 fevral Gənclər Günü kimi təsis edildi. Hamıya məlumdur ki, Ulu Öndər Heydər Əliyev hər zaman gəncləri Azərbaycanın gələcəyi kimi dəyərləndirərək onların milli-mənəvi dəyərlərə bağlı, vətənpərvər ruhda yetişdirilməsini dövlət siyasətinin əsas prioritetlərindən biri hesab edirdi. Gənclərin düzgün tərbiyəsinin dövlətin inkişafı üçün strateji əhəmiyyətini belə vurğulayırdı: “Cəmiyyətin gələcək tərəqqisi bir çox cəhətdən gənclərimizə nəyi və necə öyrətməyimizdən asılı olacaq”.
Bu gün ölkəmizdə gənclər siyasəti Ulu Öndər tərəfindən müəyyən edilən strateji xəttin davamı olaraq Heydər Əliyevin dövlətçilik fəlsəfəsinə əsaslanan Prezident İlham Əliyev tərəfindən davam etdirilir. Müasir dövrdə Gənclər Siyasətinin əsasında təhsil və elm, məşğulluq və iqtisadi inkişaf, mədəniyyət və idman, o cümlədən ictimai-siyasi fəallıq dayanır. Xaricdə təhsil imkanları, dövlət təqaüdləri və mübadilə proqramları gənclərin intellektual inkişafına xidmət edir. Gənclərin sahibkarlıq təşəbbüsləri dövlət tərəfindən stimullaşdırılır, innovasiya mərkəzləri yaradılır, onların işlə təmin olunması üçün xüsusi proqramlar həyata keçirilir, peşə hazırlığı kursları təşkil olunur. Azərbaycanı layiqincə təmsil edən gənc idmançıların iştirak etdiyi beynəlxalq yarışlar, təşkil edilən festivallar, müsabiqə və layihələr həm gənclərin yaradıcılıq potensialını ortaya qoyur, həm də uğurlarımızın göstəricisi olaraq bizi qürurlandırır.
Prezident İlham Əliyev gənclər siyasətinə dair çıxışlarında müasir Azərbaycan gəncliyinin dövlətin bu günü və gələcəyi üçün strateji əhəmiyyətini xüsusi vurğulamışdır. O qeyd etmişdir ki, “İndiki gənclər üçün imkanlar təbii ki, daha genişdir və gənclər bu imkanlardan istifadə etməlidirlər. Biz azad ölkədə yaşayırıq, sabitlik olan ölkədə yaşayırıq, özünə güvənən ölkədə yaşayırıq. Biz haqlı olaraq fəxr edirik ki, Azərbaycan vətəndaşlarıyıq və gənclər həm öz gələcək həyatını düzgün müəyyən etmək üçün və eyni zamanda, dövlətə maksimum xeyir vermək üçün fəal olmalıdırlar”. Bu fikirlərlə cənab Ali Baş Komandan gənclərin yalnız fərdi inkişafı deyil, həm də dövlətin möhkəmlənməsi və davamlı inkişafı üçün mühüm rol oynadığını ön plana çəkir. Onun yanaşmasına görə, gənclər geniş imkanlardan istifadə etməklə öz həyatlarını düzgün istiqamətləndirməli, eyni zamanda dövlətə fayda vermək üçün sosial və ictimai proseslərdə fəal iştirak etməlidirlər.
Müasir gənclik ictimai-siyasi həyatın bütün sahələrində fəal iştirak edir. Təkcə bunu demək kifayətdir ki, Qarabağ zəfəri gənclərin dövlətçilik uğrunda fədakarlığının bariz nümunəsi kimi tarixə düşmüşdür. Müharibənin gedişində gənclər ön cəbhədə döyüşərək torpaqlarımızın azadlığı uğrunda canlarını fəda etmiş, arxa cəbhədə isə könüllü fəaliyyətləri, informasiya müharibəsində fəal iştirak etməkləri ilə öz töhfələrini vermişlər. Bu zəfər gənclərin milli kimliyə bağlılığını, dövlətçilik ideallarına sadiqliyini, ən əsası müasir nəsil olaraq gücünü – həm texnologiya, həm də intellektual sahədə müharibənin gedişinə verdiyi dəstəyi – aydın şəkildə nümayiş etdirmişdir. Bununla bütün dünyaya sübut olundu ki, gənclər təkcə bir dövrün qəhrəmanları deyil, həm də gələcəyi formalaşdıran aparıcı qüvvədir.
Azərbaycan gəncliyi dövlətin gələcəyinin təminatçısıdır. Bu baxımdan 2 Fevral – Azərbaycan Gənclər Günü yalnız bir bayram deyil, həm də dövlətin gənclərə verdiyi dəyərin rəmzidir və gənclərin milli-mənəvi dəyərlərə bağlılığını, dövlətin onlara göstərdiyi qayğını və inkişaf imkanlarını simvolizə edir. Bu günün mahiyyəti ondan ibarətdir ki, gənclər müstəqil Azərbaycanın gələcəyini formalaşdıran, onun gücünü və nüfuzunu artıran əsas strateji qüvvə kimi tarixdə və cəmiyyətdə öz yerini möhkəmləndirmişdir.
Azərbaycan Texnologiya Universiteti
İctimai elmlər və multikulturalizm kafedrasının
baş müəllimi Zəminə Novruzova
Azərbaycan Texnologiya Universitetinin (ATU) rektoru Yaşar Ömərov 2 Fevral – Gənclər Günü münasibətilə fəal gənclərlə görüşüb.
Görüşdə prorektorlar, Tələbə Gənclər Təşkilatının, Tələbə Həmkarlar İttifaqı Təşkilatının, Tələbə Elmi Cəmiyyətinin, İnnovasiya Mərkəzinin, Bədii Yaradıcılıq Mərkəzinin, Dizayn Klubunun və İdman Klubunun rəhbərləri və fəal üzvləri, eləcə də təhsildə yüksək göstəriciləri ilə fərqlənən tələbələr iştirak ediblər.
Tədbirdə ATU-nun rektoru Yaşar Ömərov Azərbaycanda uğurlu gənclər siyasətinin əsasının 1994-cü ildə Ulu Öndər Heydər Əliyev tərəfindən qoyulduğunu, bu siyasətin bu gün Azərbaycan Respublikasının Prezidenti cənab İlham Əliyev tərəfindən uğurla davam etdirildiyini bildirib. Rektor qeyd edib ki, ölkəmizdə həyata keçirilən gənclər siyasətinin ən böyük nailiyyətlərindən biri gənc nəslin vətənpərvərlik ruhunda formalaşmasıdır. Yaşar Ömərov gəncləri 2 Fevral – Gənclər Günü münasibətilə təbrik edib, onlara gələcək fəaliyyətlərində uğurlar və yeni nailiyyətlər arzulayıb.
Sonda tədbirdə iştirak edən tələbələrə təşəkkürnamələr təqdim olunub.
