“Heydər Əliyev və Azərbaycan tarixi” adlı bilik yarışı keçirilibHeydər Əliyev Mərkəzində “Heydər Əliyev və Azərbaycan tarixi” VI ümumrespublika bilik yarışı keçirilib. Heydər Əliyev Mərkəzinin təşkilatçılığı və Təhsil Nazirliyinin dəstəyi ilə reallaşan layihədə bu il 49 ali təhsil müəssisəsinin komandaları iştirak edib.Tədbirdə məlumat verilib ki, 2014-cü ildən etibarən hər il həyata keçirilən layihə Azərbaycan xalqının ümummilli lideri Heydər Əliyevin həyat və fəaliyyətinin öyrənilməsi, Ulu Öndərin irsinin yaşadılması və gənclər arasında təbliği, eyni zamanda, gənc nəslin elmə, maarifləndirici yarışlara marağının artırılması məqsədini daşıyır. “Heydər Əliyev və Azərbaycan tarixi” bilik yarışında iştirak edən komandalar hazırlıq məqsədilə oktyabrın 29-dan noyabrın 7-dək Mərkəzdəki HeydərƏliyev Muzeyini ziyarət edib, burada toplanmış məlumat və eksponatlar, foto və videomateriallarla tanış olublar.Bilik yarışında suallar ulu öndər Heydər Əliyevin irsini, Azərbaycan tarixinin mühüm dövr və hadisələrini əhatə edib.Münsiflər heyətində Heydər Əliyev Mərkəzi, Təhsil Nazirliyi və Azərbaycan Milli Elmlər Akademiyası Tarix İnstitutunun nümayəndələri təmsil olunublar.Azərbaycan Texnologiya Universitetinin komandası bilik yarışında 13-cü yerdə qərarlaşıb. Yarışda ilk üçlüyü müvafiq olaraq Daxili İşlər Nazirliyinin Polis Akademiyasının,  Dövlət Təhlükəsizliyi Xidmətinin Heydər Əliyev adına Akademiyasının və Azərbaycan Respublikası Dövlət Sərhəd Xidməti Akademiyasının komandaları bölüşüblər.Yarış iştirakçılarına sertifikatlar, qaliblərə diplom və medallar təqdim edilib.