Raqif Tofiq oğlu Hüseynov 1 sentyabr 1984-cü ildə Gəncə şəhərində anadan olub. 2002-2006-cı illərdə Azərbaycan Dövlət Aqrar Universitetinin bakalavriat səviyyəsində İnzibati idarəetmə və gömrük ekspertizası ixtisası üzrə, 2011-2014-cü illərdə magistratura səviyyəsində İstehlak mallarının ekspertizası və marketinqi ixtisası (ixtisaslaşma - gömrük ekspertizası) üzrə təhsil alıb. 2007-2008-ci illərdə Almaniyanın Texniki Əməkdaşlıq Cəmiyyətinin Azərbaycan Dövlət Aqrar Universitetində təşkil olunmuş “Menecment” üzrə ixtisasartırma kursunu bitirib. 2015-2016-cı illər ərzində Erasmus Mundus proqramı çərçivəsində Polşanın Varşava Təbiət Elmləri Universitetinin İqtisadiyyat fakültəsində elmi tədqiqat işləri aparıb. Doktorantura təhsilini 2016-2020-ci illərdə Hökumətlərarası Təqaüd Proqramları çərçivəsində Macarıstan Respublikasının Sent İştvan Universitetində alıb. Doktoranturada yerinə yetirdiyi “Gəncə-Qazax iqtisadi rayonunun əsasında ərzaq təhlükəsizliyinin regional aspektləri” mövzusunda namizədlik dissertasiyasını müdafiə edərək iqtisad üzrə fəlsəfə doktoru elmi dərəcəsinə layiq görülüb.
Əmək fəaliyyətinə 2008-2010-cu illərdə Gəncə şəhər Statistika İdarəsində aparıcı-iqtisadçı vəzifəsində başlayıb. 2010-2015-ci illər ərzində Gəncə şəhər Xəzər Təhsil Mərkəzində direktor vəzifəsində, 2014-2015-ci illər ərzində Azərbaycan Dövlət Aqrar Universitetinin Aqrar siyasət və dünya iqtisadiyyatı kafedrasında assistent, 2020-2021-ci illər ərzində Macarıstanın Budapeşt şəhərində fəaliyyət göstərən Tomori Pal Kollecində müəllim vəzifələrində çalışıb. 2022-2023-cü illər ərzində Azərbaycan Texnologiya Universitetinin Tədris şöbəsinin müdiri vəzifəsində fəaliyyət göstərib. 2021-ci ildən Azərbaycan Texnologiya Universitetinin İqtisadiyyat kafedrasında assistent, baş müəllim, hal-hazırda dosent vəzifəsində elmi pedaqoji fəaliyyətini davam etdirir.
Raqif Hüseynovun dünyanın nüfuzlu “Scopus” və “Web of Science” elmmetrik bazalarında 25-dən çox məqaləsi dərc edilib, onun işlərinə 150-yə yaxın istinad olunub (H indeksi 5-dir). 1 (bir) dərsliyin, 5 (beş) tədris proqramının və 2 (iki) patentin müəllifidir.
R.T.Hüseynov xarici ölkələrdə bir neçə beynəlxalq tədbirin əsas təşkilatçılarından biri olub. Belə ki, 17.12.2015-ci il tarixində Polşanın Varşava Təbiət Elmləri Universitetində “Gənc Alimlərin 1-ci Beynəlxalq Elmi Konfransı”nı, 02.12.2016-cı ildə həmin universitetdə “Gənc Alimlərin 2-ci Beynəlxalq Elmi Konfransı”nı və 26.04.2018-ci il tarixində Macarıstanın Sent İştvan Universitetində “Gənc Alimlərin 3-cü Beynəlxalq Elmi Konfransı”nı təşkil edib.
R.T.Hüseynov elm və təhsil sahəsindəki xidmətlərinə görə Türkiyənin İqtisadi İnkişaf və Sosial Tədqiqatlar İnstitutu tərəfindən mükafatla təltif olunub.
R.Hüseynov Mövlanə Mübadilə və Erasmus+ proqramları çərçivəsində Türkiyənin və Avropanın bir neçə universitetində təlimlərdə və görüşlərdə iştirak edib. Belə ki, 2016-cı ildə Türkiyənin İstanbul Universitetində, 2022-ci ildə İspaniyanın Jaen Universitetində, 2023-cü ildə Rumıniyanın Georgi Asaşi Texniki Universitetində olub. Eyni zamanda “Azərbaycanda Rektorlar Konfransının yaradılması” Erasmus+ ECAR layihəsi çərçivəsində 2022-ci ildə Fransa, Belçika, 2023-cü ildə İsveç, Litva və İspaniyada təlimlərdə iştirak edib. 2023-cü ildə İsveç, Litva, İspaniya, 2024-cü ildə REFRESH layihəsi çərçivəsində Danimarkada təlimlərdə iştirak edib.
Raqif Hüseynov Azərbaycan Respublikası Elm və Təhsil Nazirliyinin 03.08.2023-cü il tarixli əmri ilə Azərbaycan Texnologiya Universitetinin tədris işləri üzrə prorektoru vəzifəsinə təyin edilib. .
2004-cü ildən Yeni Azərbaycan Partiyasının üzvüdür. YAP-ın yaradılmasının 30 illiyi ilə əlaqədar Fəxri Fərmanla təltif edilib.
